Génesis 7
7
Iurhentpekua
1Acha arhispti Noéni: Jata chéti márkuechani jinkuni k'éri icharhutarhu, jimpokakini exeska eskari t'úkusï kaxumpitika. 2Manakorheri pinpinharhati iumu tsimani kutsïti ka t'arhe erakua, kóru manakorheri enka no pinpinharhaaka ma kutsïti ka ma t'arhe eraku. 3Manakorheri káratichani iumu tsimani erakua kutsïti ka tataka ka ísïksï no xánkueuati. 4Jimpokani uimu tsimani jurhia jimpo, janiraaka ka tsimani ekuatse chúrekua ka jurhiakua janiaati ka nóteru ampe ma tsípiti pakaraati echerirhu enkani xáni kueraaka. 5Noé iámentu ampe isï úspti eska ACHA na arhipka.
6Enka iurhentpekua niárapka Noé ma irepeta ka témpeni (600) uéxurhini jatirispti. 7Noé jataspti k'éri icharhutani imeri márku jempechani jinkuni ka isï jamaniksï no uarhipirinti. 8Manakorheri p'inp'inhasïchani ka no p'inp'inhasïchani ka káratichani ka enkaksï antsikorhek'a, 9tsimantani jatasptiksï kutsïti ka tataka, ísï eska Diósï na arhipka Noéni.
10Uimu tsimani jurhia jimpo k'éri ma janiraspti ka iurhentpesti. 11Témpeni iumu tsimani jurhiata (17), tsimani kutsï, ma irepeta ka témpeni ekuatse (600) uéxurhini jimpo enka Noé xáni jatirini jápka, k'éri japunta tamorhusptiksï ka auanta mítakorhespti ka k'éri janispti, 12Ka tsimani ekuatse chúrekua ka jurhia k'éri janispti. 13Jiáni Noé tempa jinkuni ka uáp'a Semi ka Kami ka Jafeti ka tarhaskua jempechani jinkuni k'éri icharhutani jataspti, 14manakorheri ikimenharicha, enkaksï k'umenchakuarhu irekak'a, iámentu enkaksï antsikorhek'a ka káraticha imát'uksï jataspti k'éri icharhutani. 15Noé jinkuni tsimantani manakorherichaniksï jatasptiksï k'éri icharhutani. 16Iámentu manakorherichaksï tsimantani jataspti, kutsïti ka t'arhe, isï eska Diósï na arhipka. Tátsekua ACHA mikaspti k'éri icharhutani.
17Tsimani ekuatse (40) jurhia iurhentpespti ka k'éri icharhutani tarhataspti. 18Ka xáki kánespti itsï enka k'éri icharhutani tarhatapka. 19Kánekua ka uinhamentu janispti enka juáta k'ératichani iámu óch'akurapka. 20Enka na óch'akurapkia iámentu juátechani máteru iumu tsimani ióxurhakua jataspti itsï parhakpenirhu. 21Iámentu tsípiti uarhispti k'uiripu ka manakorhericha káraticha, enkaksï k'umanchekuarhu irekapka, ikimenharhicha ka enkaksï antsikorhek'a, 22iámentu ampe uarhisti enka xáni tsípekua jukapka, iámentu ampe enka jiretak'a uarhispti. 23Tsípitichaksï k'amantskanhasti, k'uiripuecha, manakorheri ikimenharhicha, enkaksï antsikorhek'a ka káraticha, iámentu ampe k'amantskanhasti, Noé ka enkaksï icharhutarhu jápka imakuksïsï tsípiti pakarapti. 24Témpeni iumu ekuatse jurhiatekua kánekua itsï jatarixapti parhakpeni.
Currently Selected:
Génesis 7: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
