San Juan 11

Lásarueri tsíntskua

1P'amenchati ma jarhaspti enga Lásaru arhinhempka, Betania anapuespti, jima engajtuksï Maria ka Marta anapuepka. 2Ima Maria, enga Lásarueri pípa jémbepka, imasï Achani p'untsumekua atandukupti ka imajtusï jauiri jimbo kutsundukuntapti. 3Ka imaksï Lásarueri pípa jémbecha Jesusini arini uandakua axakuspti:

–Acha, chéti p'íchpiri enga t'u xáni xénhchajka p'amenchaxati.

4Enga Jesusi aiangunhapka, uandaspti:

–Ima indeni p'amenchakua jimbo no uarhiati, ka sánderu sáni, marhuauati eska Diósïri uinhapekua xarharaaka, ka eska ísï jámani Diósï uájpa k'éri xénhaaka.

5Jesusi Mártani ka jingunekua jémbani ka Lásaruni kánekua xénhchaasïrempti. 6Na uéjki mítepka eska Lásaru uarhixapkia jima pakaraspti máteru tsimani jurhia. 7Tátsekua arhiaspti jurhengorheri jémbechani:

–Ju je ménderu Judea.

8Ka jurhengorheri jémbechaksï arhispti:

–Jurhentpiri, nájkichka iásï no ióni andi engaksïni judiouecha tsakapkuerani uékani jápka, ¿Andirisï ménderu uéjki jini nirani?

9Jesusi arhiaspti:

–¿Andi no ma jurhiatekua erajkukorhesïnki? Jimboka ma nómbema úkorhenchasïnga enga jurhiakua jámaaka, jimboka íni parhakpeni anapu t'ímarhandekua erajkutarasïnga; 10k'óru enga nema chúrekua jámka, ambe ma úkorhenchasïndi jimboka íni parhakpeni anapu t'ímarhandekua no ima jinguni jarhaska.

11Tátsekua uandasptiteru:

–Juchari p'íchpiri Lásaru k'uíxati, ka niuaka tsínharhitani.

12Jurhengorheri jémbechaksï arhispti:

–Tata, eka k'uíni jaka, jimajkani arhikuekasïndi eska ambakentaakia.

13Jesusi arhiakuekaxamempti eska Lásaru uarhispkia, ka jurhengorheri jémbechaksï ísï kurhanguspti eska k'uíkuanisï arhini jápka. 14Jiájkani k'óru Jesusi k'amak'amasï arhiaspti:

–Lásaru uarhistia. 15Ka tsípexaka engani no jima jápka, jimboka chári jimbo sánderu sésiska, eskajtsï ísï jámani jakajkuaka. Jútkiru je exenia.

16Ka ima Tomasi engaksï Dídimusï arhimpka, arhixapti máteru jurhengorherichani:

–Ju je juchajtu Jesusi jinguni uarhini.

Jesusi tsíntskuesti ka tsípekuesti

17Niáratini mítespti eska t'ámu jurhiauespkia enga Lásaru jatsinhantapka. 18Betania Jerusaleni no iauani jarharetinispti, tanimu (3) kilometru isï; 19ka uánekuaksï judiouecha niraspti Mártani ka Mariani p'urhembeni, kurhambeantaani enga erachi jémba uarhipka. 20Enga Marta mítepka eska Jesusi niáraxapkia, niraspti kúmani; ka Maria jéngorhespti. 21Marta Jesusini arhispti:

–Acha, ekari ixu japiringa jucheti erachi no uarhipirindi. 22Kóruni míteska eskakini Diósï kurhajchaaka eskari xáni ambe kurhakuska.

23Jesusi arhispti:

–Chéti erachi tsíntaati.

24Marta arhispti:

–Jo, míteskia eska jiájkani tsíntaaka engaksï uarhiricha tsíntaaka, jiájkani engaksï jurhiakuecha k'amarhuaka.

25Jesusi jima arhispti:

–Ji tsíntskueska ka tsípekueska, ne engarini mintsikaaka, náuejki uarhini, tsipekua jatsiati; 26ka ne enga nótki uarhijka ka mintsikanirini, nómeni uarhiaati. ¿Jakajkusïndi isï?

27Marta arhispti:

–Jo, Acha, jakajkusïnga eskari t'úsï Krístueka, Diósï Uájpa, ima enga jupiringa.

Jesusi Lásaruni uekusti

28Enga na ísï uandapkia, Marta niraspti Mariani p'irani, imeri jingunekua jémbani, ka arhindikuspti:

Jurhentpiri ixu jarhasti ka uandajpaxatikini.

29Ísï kurharini, Maria jauarapaspti ka nirani Jesusini uandaxekuni. 30Jesusi nótki inchaakusïrempti iretarhu; jima jarhaspti útasï enga Marta kúpka. 31Engaksï Mariani erangupka eska k'uaniramaska, judiouecha engaksï jima jápka pámbetani chúngumasptiksï, jimbokaksï ísï eratsespka eska ima uandatsekorheni niraxamempka jima enga uarhiri jatsinhantapka.

32Enga Maria andarherapka Jesusini, tinguixurhikuspti uandaparini:

–Acha, jucheti erachi no uarhipirindi engari t'u ixu japiringa.

33Enga Jesusi exepka eskaksï Maria ka judiouecha engaksï ima jinguni niárapka uéraxapka, kánekua p'ikuarhenhespti ka p'amojkuani, 34ka kurhamarheaspti:

–¿Nanijtsï jatsintaski?

Ka imaksï arhispti:

–Acha, jútkiru exenia.

35Ka Jesusi ueraspti. 36Ka judiouechaksï uandaspti:

–¡Xe na enga xáni kánekua xénhchempka!

37Enga úpka, máruksï uandasïrempti:

–I enga pátenharhini éskataraka, ¿Andisï nómbema u eska Lásaru no uarhipiringa?

Lásaru tsíntasti

38Jesusi útasï kánekua p'ikuarheraparini andamukueraspti jima enga jatsintskata jápka, enga tsakapu jimbo míkakata jápka. 39Ka uandaspti:

–Kéndita je tsakapuni.

Marta, Lásarueri pípa jémba uandaspti:

–Acha, nósesi jájkundixatiia jimboka t'ámu jurhiakueskia enga uarhika.

40Jesusi arhispti:

–Nájkikini arhia andi eskari exeaka Diósïri k'érikuani ekarini mintsikaska.

41Tsakapunksï kénditaspti, ka Jesusi erancheparini uandaspti:

–Táte, diósmaiamukini arhixaka engarini kurhaka. 42Mítetixaka eskarini méntku isï kurhasïnga, enga úka, íchani jimbosïni uandani jaka engaksï ixu jaka, eskaksï jakajkuaka eskarini t'u axaska.

43Enga na k'amarapka ísï uandani, uinhachaspti:

–¡Lásaru, uéndikuntsï!

44Ka uarhiri uéndikuntaspti, irhirhitakata ka takusï ónharhitakata. Jesusi arhiaspti:

–Kuerantsï je ka jurajku níntani.

Arhijperasptiksï néna Jesusini jupirkorheni

(Mt 26.1-5; Mc 14.1-2; Lc 22.1-2)

45Ísï exerinksï, uánekua judiouecha engaksï Mariani pámbetani jápka jakajkukuspti. 46Ka máruksï fariseouechani niraspti aianguani ambe engaksï exepka enga Jesusi úpka. 47Ka fariseouechaksï ka táta urhejtsïkurichaksï k'éri tángorhekua jatsipti, ka uandasptiksï:

–¿Nénachisï jámaia? Ima acheti uánekua ambe xarhataxatiia. 48Engachi ísku exeni jauaka, iámenduechaksï úndaatia jakajkukuni, ka rómecheri juramuticha jamberijtsïni juuatia juchari tiósta pímbinhasïni ka juchari iretani xerechentani.

49Ka Kaifasi, enga ima uéxurhini tátecheri juramutini jápka, arhiaspti:

–Chájtsï nómbema míteska, 50níjtujtsï jánhaskajki eska sánderu sésiska eska ma achetijku uarhiaka iámu ireteri jimbo, ka no eska iámendu ireta k'amantskanhaaka.

51Ka Kaifasi no ísku jatinisï ísï uandapti, ísï uandaspti jimboka ima uéxurhini ima juramukuaxapka tátechani, Diósïni jimbosï uandapti eska Jesusi iámu iretani jimbosï uarhipiringa; 52ka no ima iretani jimbojku uarhipirindi, imani jimbojtu uarhipirindi eskaksï májkuentaaka iámendu Diósï uájpecha engaksï etsandurikata jámani jápka. 53Jimboksïsï jiájkani arhijperapti eskaksï Jesusini atapiringa uándikuni.

54Jimbosï Jesusi judiouechani nóteru xarhakuauemptia, ka kéndikukuaspti ka jimesï niraspti enga nónema irekaka, iretarhu ma enga Efraini arhinhajka. Jurhegorheri jémbechani jinguni jima jarhaspti.

55Judiouecheri páskueri k'uínchekua andamutaxaptia, ka uánekuaksï urhepaspti Jerusaleni karhamani pímbinhaxentskueri p'indekua úni. 56Jesusinksï jirinhantaxapti ka tiósïoksï kurhamarhperasïrempti:

–¿Cha na uandasïnki? ¿Arhitki juuaia k'uíncheni, o nómbe?

57Fariseouecha, ka táta urhejtsïkurichaksï arhijpetixapti eska ne enga Jesusini exepiringa, eska uandantapiringa ka eskaksï ísï jámani úpiringa jupirkorheni.

Currently Selected:

San Juan 11: BI-PURHE

Highlight

Copy