San Juan 15

Uba ambakiti

1Ji ambakiti úbeska, ka jucheti Táte úba jatsikutisti. 2Enga ma ísï axajtata uba no jukarhukurhajka, ima kachundikusïndi, ka iámendu imechani engaksï uba jukarhukurhajka, Ima ambarhutantasïndi, eska sánderu sési jukarhukurhaaka. 3Chájtsï pímbinhasï jarhaskia jimbokaksïni chánksïni Uandakuani aianguskia. 4Jíndeni jinguni ja je, eskani ji na cha jinguni jaka. Ísï eska na axajtata ma enga ch'auarhutini jarhajka no újka jandiójku ambe ma jukarhukurhani; chájtujtsï no úaka sési ambe íntspentani engajtsï no jíndeni jinguni jarhaska.

5Jísïni ísïka eska úberi tepakua ka chájtsï jucheti axajtateska. Ne enga jíndeni jinguni jarhajka ka ji imani jingunini jarhani, ima kánekua ambe íntspeni jarhasïndi; jimbokajtsïni jíndeni jarharetini nómbema úaka úni. 6Enga nema no jíndeni jinguni jaka, axajtateni k'uanikunhaati ka enga na k'arhiakia, tánanhantati ka kurhinhantani.

7“Ekajtsï cha méntkisï jíndeni jinguni jarhaska, ka nójtsï jurajkuni engaksïni xáni ambe jurhendaka, kurhajkorhe je ambe engajtsï xáni uéjka ka intsïnhaakajtsï. 8Jucheti Táteri k'érikua jimini xárharasïndi engajtsï kánekua ánchekorheta xarhataaka, ka jucheti jurhengorheriuakajtsï. 9Eskarini Táte na xénhchaka, jíjtuksïni chánksïni xáni xénhchasïnga; ásï kéndikuku je jucheti xénhchperatani. 10Ekajtsïni jucheti juramukuechani kurhandiracheska, jíksïni xénhchani jauaka, májkueni eskarini jucheti Táteni na xénhchani jaka jimbokani ji kurhandirakuska.”

11“Ísïksïni arhixaka eskajtsï indeni kurharini chájtu májkueni tsípeaka, ka eskajtsï ísï jámani iámumendu sési tsípeaka. 12Ari jucheti juramukuesti: Eskajtsï xénhchperaaka ísï eskaksïni ji na xénhchkaka. 13Imasï sánderu xénhchpejti enga imeri p'íchprichani jimbo tsípekua íntspejka. 14Chájtsï jucheti píchpiriska, ekajtsï ísï jámaska eskaksïni na juramucheni jaka. 15Nóteruksïni jántspiri arhixakaia, jimboka jántspiri no mítetini jarhasïnga ambe enga ánchetpiri jémba úni jarhajka; chánksïni jucheti p'íchpiri arhisïnga, jimbokaksïni iámendu ambe aianguska engarini jucheti Táte arhika. 16Jíndentsïni no cha erakuska, jíksïnisï chánksïni erakuka, ka míndaskaksïni eskajtsï niuaka ka kánekua ánchekorhekata íntspentani, ka eska chári ánchekorhekata ióni marhuauaka; ka ísï jámanksïni jucheti Táte iámu ambe íntskuati engajtsï jíndeni uandaparini kurhakuska. 17Juramuchexakaksïni eskajtsï xénhchperaaka.”

Chánksïntuksïni atani kámaati

18Ekaksïni parhakpeni anapuecha kurhunhejka, míte je eskajtsïni jíndeni urhetasï kurhunheka. 19Ekajtsï cha parhakpeni anapuepiringa, parhakpeni anapuechaksïni xénhchapirindi, eskaksï imajku na xénhchperajka. Eka úka, chájtsï nóteru parhakpeni anapueskia jimbokaksïni ji erakutini p'íjpantaska, jimboksïnisï parhakpeni anapuecha kurhunhejti. 20Mía je engaksïni arhika: Jántspiri no sánderu ambesïndi eska ánchetpiri jémba. Engajtsïni jíndeni atani kámaka, chánksïntuksïni atani kámaati; ka ekajtsïni jíndeni kurhajchajka, chánksïnijtuksïni kurhajchaati. 21Eka úka, jíndeni jimboksïnisï ísï kámaati, jimbokaksï no míteska imani engarini axaka.

22Engani ji no jupiringa ka engani ji no uandaxekuapiringa, nóksï k'amanharhintapirindi; enga úka iásïksï imecheri k'amanharhintskua jimbo nóteru ambe ma úati uandakorheni; 23Né engarini jíndeni kurhunhejka, jucheti Tátentu kurhunhesïndi. 24Ekani nómbema úpiringa imani ambe engani imechani japari úka, nóksï k'amanharhintapirindi; ka iásïksï exeristia, ka náuejki isï, jíndeni ka jucheti Tátentsïni kurhunhesïndi. 25Eka úka, inde ambe jimboesti eska úkorheaka eska imecheri juramukua na karakata jaka: Ísku jatinijtsïni kurhunhesti.

26Enga uinhaperpentsti na juuakia, engani jucha Táteni jinguni axaaka, Espiritu enga isïkamendu, enga Táteri uéjtateka, ima jucheti ambe uandantaati. 27Ka chájtujtsï xárhataaka, jimbokajtsï uénani jámantki ji jinguni jamaxaka.

Currently Selected:

San Juan 15: BI-PURHE

Highlight

Copy