San Juan 19

1Pilatu jiákani k'óru Jesusini k'uikirhetarkorhespti. 2P'urhejkutichaksï kanakua ma chekamekueri úspti, inchajtsïtasptiksï ka k'uáparhakuaksï charhapiti niájtsïti ma jatsikuntaspti, 3ka engaksï andarherapka, arhisptiksï:

–¡Ie je, judiouecheri irecha!

Ka pákspaksanharhikusïremptiksï.

4Pilatu ménderu uéraspti ka uandani:

–Exe je, petaxaka eskajtsï exekorheaka eskani nómbema k'amanharhitskua xékuntasïnga.

5Jesusi ekuarhu uéraspti kanakua chekamekueri ka k'uáparhakua charhapiti niájtsï jukarini. Pilatu arhiaspti:

–¡Indeia je, jimintsï jatsiska achetini!

6Engaksï na tátecheri urhejtsïkuricha ka tiosïo kuáricha exepka, uinhachasptiksï:

–¡Krúsirhu cháparhata, krúsirhu cháparhata!

Pilatu arhiaspti:

–Pántsï je ka cha krúsirhu cháparhatani je, jimbokani ji nómbema nósesi ambe xékuntaska.

7Judiouechaksï mókukuspti:

–Jucha juramukua karakata ma jatsiska ka imani juramukuarhu arhisïndi eska uarhiaka, jimboka uandasïnga eska Diósï uájpeska.

8Enga Pilatu ísï kurhapka, sánderu kánekua chérakorhespti. 9Ménderu juramukuarhu inchantaspti ka Jesusini kurhamarheni:

–¿T'u nani anapueski andi?

Ka Jesusi nómbema kurhakorhespti. 10Pilatu arhispti:

–¿Náuejkini jíka, nórini kurhachesïni? ¿Nóri míteski eskani ji juramukua jatsiska jurajkunikini, ka eskajtuni juramukua jatsiska krúsirhukuni cháparhatatarkorheni?

11Jiájkani k'óru Jesusi kurhakorhespti:

–Nómbemarini úpiringa juramucheni engari no juramukua auandarhu uératini intsïnhapiringa; ísï jimbo sánderu k'amanharhintasti ima engarini t'úngeni intsïnharhitaka.

12Jima uénaspti Pilatu jirinhakuntani néna Jesusini jurajkuni. Enga úpka judiouechaksï uinhachaspti:

–¡Engari jurajkuska, nóri Sesariri p'íchpiriska! Ne uéjki enga irecha úkorhejka Sesarini ikiatasïndi.

13Enga Pilatu ísï kurhapka, Jesusini petaspti ka tsakapueri útatsperakuarhu uaxakani, enga ebreo uandakua jimbo Gabatá arhinhajka. 14Ima jurhiatekuespti enga páskueri úratakua ambe tánanhajka, teruxutinisptia. Ka Pilatu judiouechani arhiaspti:

–¡Inde je chári irechani!

15Ka imaksï uinhachaspti:

–¡Kéndita jéta! ¡Krúsirhu cháparhata je!

Pilatu arhiaspti:

¿Andi chári irechantsï krúsirhu cháparhataa?

Ka tátecheri urhejtsïkurichaksï uandaspti:

Sésarijkusï juchaari irecheti.

16Ka ísï jámani intsïnharhitantaaspti eska krúsirhu cháparhatanhapiringa. Ka pásptiksïa.

Jesusi krúsirhu cháparhatanhasti

(Mt 27.32-44; Mc 15.21-32; Lc 23.26-43)

17Ka Jesusi krúsini pákorhespti jima jamberi enga Uarhiri Éjpu arhinhajka, enga ebreo jimbo Gólgota arhinhajka 18ka jimaksï krúsirhu cháparhataspti ka máteruksï tsimani, jima imani jinguni cháparhataaspti ma akandachani ka Jesusi terujkani pakaraspti. 19Pilatu krúsirhu karhakua karakata ma jatsikutarkorhespti. Karakata arhisïrempti: “Jesusi Nasareti anapu, judiouecheri irecha” 20Uánekua judiouechaksï exespti imani karakatani jimboka jima enga Jesusi cháparhatakata jápka, iretarhu no iauani ueákumanispka; ka ebreo jimbo karakata jarhaspti, ka latini jimbo ka griegu jimbo. 21Tátecheri urhejtsïkurichaksï Pilatuni arhispti:

–Ásï kara eska inde judiouecheri irecheska, sánderu sáni kara eska inde uandasïnga eska judiouecheri irecheska.

22Pilatu arhiaspti:

Ambe engani karaka, t'uíni karaskia.

23Engaksï p'urhejkuticha Jesusini na cháparhatapkia, xukuparhakuaksï p'ikuspti, ka t'ápuruksï arhungurhispti. Inchanhekuajtuksï p'íkuspti ka inchanhekua no sïrikuntskatespti, májku anhanhatakua úkatespti. 24Jimboksïsï arhijperapti:

–Ju je no karukuni, ju je ch'anakua jimbo exeni ne enga pákorheaka.

Ka ísï jámani úkorhespti enga Karakata arhijka “Jucheti xukuparhakuaksï arhungurhisti ka ch'anaparinksï pákorhesti jucheti inchanhekua.” Ísïksïsï jámaptia p'urhejkuticha.

25Jesusiri amamba ka amamberi jingunekua jémba engajtu Maria arhinhempka, Cleofasï témba, ka Maria Magdalenaksï krúsirhu no iáuantku jarharetixapti. 26Enga Jesusi amambani exepka ka eska ima jinguni jarhaspka jurhengorheri enga ima xénhchempka, amambani arhispti:

–Nana, jiminiri jatsiskia chéti uatsïtini.

27Tátsekua jurhengorheri jémbani arhispti:

–Jiminiri jatsikia chéti nándeni.

Ka imani jurhiatekua uératini ima jurhengorheri chénjembo páspti irestani.

Jesusiri uarhikua

(Mt 27.45-56; Mc 15.33-41; Lc 23.44-49)

28Tátsekua Jesusi mítetini eska iámu ambe ísï úkorhespkia, ka eska úkorhepiringa eska na karakata jaka, uandaspti:

–K'arhichaxaka.

29Jima jarhaspti tsúntsu ma kauikua xarhipiti jatarini. Xurhateni jásïksï kupamurhu ma jatsirhukuspti ka pímutasptiksï. 30Jesusi arhaspti imani kauikua xarhipitini ka uandani:

–Iámu ambe úkorhestia.

Ka éjpu t'énhsatatini espirituni íntspentaspti.

Jesusinksï t'anharhenhasti

31Pauandekuarhu páskuexamempti, ka judiouechaksï no uéksïrempti eskaksï uarhiricha sábaduechani krúsicharhu pakarapiringa, jimboka ima sábadu sánderu k'érispka, arhisptiksï Pilatuni eska kuarhandukuapiringa ka eska kénditaapiringia. 32P'urhejkutichachkaksï niraspti ka kuarhandukusptiksï imani enga urhetku jápka ka máteruntu isï. 33Ka engaksï Jesusini andarherapka ka engaksï exepka eska uarhispkia, nóksï kuarhandukuspti.

34Enga úpka ima ma isï p'urhejkuti tiámu atajperakua ma jimbo t'anharhenhaspti ka iurhiri ka itsï uéraspti. 35Ima enga exeka, imasï uandantati ka enga ima uandantajka jukaparhakuesti, ka ima mítesti eska jurhimbitku uandantaxaka, eskajtsï ísï jámani chájtu jakajkuaka. 36Ka iámendu inde ambe ísï úkorhesti, ka eska úkorhepiringa eska na Karakata jaka: “Nóma úni kuarhakumenhaati” 37Ka máteru Karakatarhu arhisïndi: “Imaksï erauati imani engaksï t'anharhenhaka.”

Jesusi jatsinhantasti

(Mt 27.57-61; Mc 15.42-47; Lc 23.50-56)

38Ísï tátsekua enga na ísï úkorhepka, Jose Arimatea anapu enga Jesusiri jurhengorheripka, Pilatuni arhispti sésekua kurhakuni eska jiáretapiringa Jesusini pántani, k'óru sïpatekuarhku jimboka judiouechani chérheasïrempka. Ka Pilatu jiáretaspti. Niraspti ka pántasptia. 39Nikodemujtu niraspti, ima enga ma xánhari chúrekua nípka Jesusini uandaxekuni, xunhanda ka tamari jeuetakata páspti enga sáno ma ekuatse témbeni tanimu kílu k'uetsapepka 40Jesusinksï késkuntaspti ka takusïksï irhiirhitaspti ka p'untsumitiksï atarhentani, eskaksï judiouecha na p'indeka uarhiri jatsintani. 41Jima enga cháparhatanhapka echeri ma jarhaspti, ka jima jarhaspti uarhiri jatsijperantskua jimbanhe ma enga nótki nema pénhantani jápka. 42Jimajkuksï péntaspti jimboka jima no iauanispka ka jimboka judiouecheri jimbo sábaduexamempkia.

Currently Selected:

San Juan 19: BI-PURHE

Highlight

Copy