San Juan 4

Jesusi Samaria anapu ma uarhiti jinguni uandaxespti

1Fariseouechaksï mítespti eska Jesusi sánderu uáneraaxapka jurhengorherichani, ka eska Juánuni jinguni exentaparini, sánderu uánekua itsï atajtsikpexapka. 2Nójtu Jesusisï itsï atajtsïkpeni jápti, imeri jurhengorherichaksïsï ísï jámani jápti.

3Enga Jesusi aiangunhapka eskaksï fariseouecha mítespkia, Judea uéakuntaspti ka Galilea k'uanhatsentani.

4Níntani jámani, Samaria isï nitamantapirindi. 5Ka ísï jámani Samaria anapu ma iretarhu jamantaspti enga Sikari arhinhajka, jimajku isï enga Jakobu uájpa Joseni echeri jurajkukuapka. 6Jima jarhaspti itsï uératirhu enga Jakobu xéntapka. Jesusi, kuataratini xáni xanharani, imani itsï p'itakuarhu uaxamukuspti. Teruxutini isïspti.

7Uarhiti ma Samaria anapu jima niáraspti itsï p'itani ka Jesusi arhispti:

–Intsïmberini sáni itsï.

8Jurhengorherichaksï iretarhu jámaxapti t'irekua sáni piákorheni.

9Ka jimbokaksï judiouecha ikiatsperasïnga Samaria anapuecha jinguni, uarhiti arhispti:

–¿Andirinisï jíndeni itsï kurhachejki? ¿T'úri judioueska, ka ji Samaria anapueska?

10Jesusi arhispti:

–Engari mítepiringa ambe enga Diósï íntspejka, ka ekari mítepiringa nékinisï itsï kurhacheni jaki, t'úrisï itsï kurhakupiringa, ka imakini itsï tsípiti íntskupirindi.

11Uarhiti arhispti:

–Tata, itsï p'itarakua jámberiri no kámasïnga, ka jimini kánekua jauanhesti: ¿Nénarinisï itsï tsipiti íntskuaia? 12Íni itsïnijtsïni Juchari táte Jakobu jurajkuchesti, ixuksï itsïmasirempti imajtu ka imeri uájpecha ka karichicha enga ima kángorheauempka. ¿Andi t'u sánderu k'éri ambeski eska ima?

13Jesusi arhispti:

–Ne enga ixu p'itakata itsïmaska, ménderu k'arhichaati; 14ka ne enga imani itsïmaska engani ji íntskuaka, nóteru méni k'arhichaatia. Jimboka itsï engani ji íntspejka, méntkisï anapu itsï uérati újpentasïndi, enga tsípekua méntkisï anapu íntspejka.

15Uarhiti arhispti:

–Tata, imeni jásï itsïrini íntsku, eskani nóteru méni jámaaka k'arhichani ka nóteru uétarheni eskani ji ixu juuaka itsï p'itani.

16Jesusi arhispti:

–Ni urheta p'irani chéti achetini.

17Ka uarhiti arhispti:

–Ji achetini no kámasïnga.

Jesusi arhispti:

–Sésiri arhisïnga eskari no kámasïnga achetini; 18jimbokari iúmu káaskia, ka ima engari jinguni iásï jámani jaka no chéti achetisti. Ísïsti eskari na uandaka.

19Ísï kurharini, uarhiti uandaspti:

–Tata, jánhaskaskia eskari Diósïri uandariska. 20Juchari ióntki anapuechaksï Samaria anapuecha, ixu íni juátarhu Diósïni k'éri ambe arhisti; ka chájtsï judiouecha uandasïnga eska Diósï Jerusalenisï k'éri arhikueka.

21Jesusi arhispti:

–Uarhiti, jakajkucherini, jimboka janoxakaia jurhiata engajtsï cha k'éri ambe arhiaka Táteni ka no uétarheati eskajtsï ixu juuaka juátarhu níjtu Jerusaleni nirani. 22Chájtsï no míteska nénijtsï kéri ambe arhisïni; ka jucha míteska néni enganichi k'éri ambe arhijka, jimboka p'ímutantskua judiouecha jimboeska. 23Ka janoxatiia jurhiata, ka iásïstia, eska ima engaksï sési jimbo k'éri ambe arhijka Táteni, sésimenduksï mintsita jinguni k'éri ambe arhiaka. Jimboka Táte imechanisï uékaani jaka engaksï ísï k'éri arhiaka. 24Diósï Espirituesti, ka ima engaksï k'éri ambe arhijka, sési jimboksï mintsita jinguni k'éri ambe arhisïndi.

25Uarhiti arhispti:

–Ji míteska eska Mesiasi juuaka (enga Krístueka); ka eka ima janoaka, iámu ambejtsïni jánhastaati.

26Jesusi arhispti:

–Jískachkania, engakini uandaxecheni jaka.

27Enga ísï úkorheni jápka, niántasptiksï jurhengorhericha, ka ískuksï pakarerani enga Jesusi uarhiti ma jinguni uandaxeni jápka. K'óru nónema tekaaspti kurhamarheni ima imani uarhitini jinguni ambesï uékempki, ka ambeksï uandaxexapi. 28Uarhiti jima jurajkuspti k'amukua ka iretarhu aiangpeparini jámaxapti:

29–Ju je exeni achetini ma engarini iámu ambe arhika eskani xáni ambe ji jámatika. ¿Cha no arhijki eska ima Diósïri axakatekia?

30Jiájkani k'óru uéakunhaspti iretarhu ka ninhaspti jima enga Jesusi jápka. 31Enga nótki niaranhani jápka jurhegorherichaksï arhisïrempti Jesusini:

–Jurhentpiri, a sáni ambe.

32K'óru ima arhiaspti:

–Ji jatsikorheska ma jásï t'irekua enga cha no míteka.

33Jurhengorherichaksï kurhamarhperaspti:

–¿Andi nema juáku ambe ma t'irekua?

34Ka Jesusi arhiaspti:

–Jucheti t'irekua aristi: Úni embe enga ima uéjka engarini axaka ka no jurarkukuni, k'amarakuni. 35Chájtsï uandasïnga: T'ámu kutsï jimboteru p'íkuntskueuatia; ka jíksïni arhixaka eskajtsï eraataaka tarhetani, jimboka p'ikuntskueskia. 36P'ikuntsti maiamunhasïndi, ka p'ikuntskata méntki isï anapu tsípekuesti, ka ísïksï jámani tsíri jatsïri ka p'ikunsti márku tsípeati. 37Jimbokaksï sésku arhisïnga eska: Ma tsíri jatsisïnga ka máteru nema p'ikuntani. 38Ka jíksïni chánksïni p'ikurantani jima axaska engajtsï nómbema ánchekorheta incharhetaka; máteruksï ánchekorhesti, ka chájtsï imecheri ánchekorheta jimbo sési uéraska.

39Uánekuaksï jakajkukuspti Jesusini imani ireta Samaria anapuecha, enga ima uarhiti k'amak'amasï aianguapka: “Iámu amberini arhisti eskani xáni ambe jámatika.” 40Ka ísï jimbo, engaksï Samariauecha niárapka, kómu arhisptiksï Jesusini eska jima pakarapiringa. Ima jima pakaraspti tsimani jurhia, 41ka uánekuateruksï jakajkuspti kurharini enga ima uandempka. 42Ka uarhitinksï arhispti.

–Jakajkuskachia, no imani jimbojku engajtsïni t'u aianguka, támu jimbokani jucha kurhaskia ka míteskachi eska sési jimbo inde parhakpeni P'ímutantspitiska.

Jesusi irecheri ánchekorheri uájpani ma ambakerantasti

(Mt 8.5-13; Lc 7.1-10)

43Enga na nitamapka ima tsimani jurhia, Jesusi Samaria uéakuntaspti ka xanhari jatantaspti Galilea nirani. 44Jimajkani isï, Jesusi uandaspti eska Diósïri uandari ma, imeri iretarhu no janhanharhinhasïnga. 45Enga niárapka Galilea, jimesï anapuechaksï sési jiókaspti, jimbokaksï imajtu niraspka Páskueri k'uínchekuarhu Jerusaleni ka exesptiksï enga xáni ambe ima jima úpka.

46Jesusi k'uanhatsentaspti Kana, Galilea, jima enga itsïni kauikua úntapka. Ka irecheri jántspiri urhejtsïkuri ma, uájpani Kafarnaumi p'amenchataxapti. 47Enga urhejtsïkuri mítepka eska Jesusi Galilea niántaspka, Judea uéntatini, niraspti uandaxekuni ka kómu arhispti eska nipiringa chénjembo ka eska uájpani ambakerantapiringa, enga uarhini jápkia. 48Jesusi arhispti:

–Chájtsï no úsïnga jakajkuni engajtsï no urheta ambe ma xarharani exejka ka milagruechani exearini.

49K'óru, urhejtsïkuri arhispti:

–Tata, ju kókuani, k'óru t'uíni jucheti sapi uarhiatia.

50Jesusi jimajkani arhispti:

–Ni níntani; chéti sapi sési jarhastia.

Acheti jakajkuspti enga Jesusi uandapka ka níntaspti. 51Enga níntani jápka kúmantasptiksï jántspiri jémbecha ka arhinksï:

–¡Chári sapi sési jarhastia!

52Ima kurhamarheaspti ambe jándu uénaspi imeri sapi sési p'ikuarherani, ka arhisptiksï:

–Uitsindekua téjkamatiru kéndikukusti tinharakua.

53Tátjemba, jimajkani jánhaskantaspti eska ima jándu Jesusi arhispka: “Chéti sapi sési jarhastia”; ka iámenduksï jakajkukuspti Jesusini, imao anapuecha.

54Jesusi, íni tsimani úni jámani milagru úspti, enga Judea uéntatini Galilea janonguapka.

Currently Selected:

San Juan 4: BI-PURHE

Highlight

Copy