San Lucas 19

Jesusi ka Sakeo

1Jesusi Jeriko niáraspti ka iretarhu inchaakuspti. 2Jima irekaspti acheti jatsikorheri ma enga Sakeo arhinhempka, ima tumina tánaticheri urhejtsïkurispti. 3Ka uéksïrempti Jesusini míteni, ka no úsïrempti andarherani jimboka uánekua jánhasïrempka ka Sakeo no iójtarhaspti 4Jimbosï uiriapti urhepani, ka p'ukutapurhu ma karharaspti Jesusini exekuekani, enga jimesï nitamapiringa. 5Enga Jesusi nitamani jápkia, erarhutaspti ka arhini:

–Sakeo, sóntku kétsentsï, jimbokani iásï chéni jájkorheaka.

6Sakeo sóntku kétsentaspti ka Jesusini tsípekua jinguni chénjembo paspti. 7Ísïksï exerini, iámenduecha uénaspti Jesusini arhinhchani, uandaparini eska Jesusi k'amanharhintatio ma niraspka jájkorheni. 8Sakeo jauaraspti ka Achani arhispti:

–Acha exe, no jatsikorherichani íntsauaka jima terujkani eskani xáni ambe jatsikorheka; ka ekani nemani méni isï euakorheka, jima t'ámu xanhari k'uanhaskukuntaaka.

9Jesusi uandaspti:

–Íni k'umanchekuarhu p'ímutantskua iásï janosti, jimboka i achetijtu Abraniri sïrukueska. 10Jimboka acheti Uájpa imanisï juka jirinhantani ka p'ímutantani enga tsînchetini jápka.

Tumineri uandantskua

11Kurhanhaxapti ambe enga Jesusi uandani jápka, ka uandantskua terukutarantskua ma aianguaspti, jimbokaksï niáraxapkia Jerusaleni ka ima engaksï kurhani jápka eratsepaxaptiksï eska Diósïri irechekua xarharapiringia.

12Arhiaspti: “Jarhaspti acheti ma enga irechecheri sïrukuepka, enga iauani nípka máteru k'éri iretarhu irechekua p'irani, ka eska irecha úkata k'uanhatsentapiringa. 13Uérani jámani, témbeni imeri ánchekorherichani uandajpaaspti, mándani arhispti uánhachani tumina íntsaani ka arhiani: ‘Kánera je íni tuminani engani jamberi junguaska’ 14Enga úpka, imeri iretarhu anapuechaksï no xénhchasïrempti, ka chúngutaramasptiksï axaani máru eskaksï uandapiringa: ‘Nóchi uéksïnga eskajtsïni inde juramucheaka.’”

15“Ka náuejki ísï, ima irecha únhaspti, ka imeri iretarhu k'uanhatsentaspti. Enga na niántapka, ánchekorherichani uandajpatarkorheaspti, imechani enga tumina íntsaapka, mítekuekani tuminaksï náxannhachani andaraspi. 16Ma uénaspti niárani ka uandani: ‘Tata, chéti tumina témbeni xanhari jukari andasti.’ 17Irecha arhispti: ‘Kánekua sési, ambakiti ánchekorheriskari; ka jimbokari sapichu ambe no sïpaska, juramutikini úxaka témbeni iretecharhu.’ 18Máteru janospti ka uandani: ‘Tata, chéti tumina iúmu xanhari sánderu andasti.’ 19Imantu arhispti: ‘T'úri iúmu iretecheri juramutiuaka.’”

20“Ka máteru junguaspti uandaparini: ‘Tata, indeia chéti tumina. Sési jatsiakutini patsaska; 21chérheskakini, jimbokari uinhamarhetspesïnga, ka jukari jamberiri euajpentasïga, ka jimari p'ikuntasïnga engari no t'u ánchekorhejka.’ 22Jimajkani irecha arhispti: ‘Ánchekorheri nómbemaru, chéti uandakuechani jimbojkukini útacheaka. Engari mítepka eskani uinhamarhetspesïnga, ka eskani jukari euajpentasïnga ka eskani jima p'ikuntasïnga engani no ánchekorhejka, 23¿Andirisï no jima patsapi tuminani enga andani japiringa, ka andakua jingunirini íntskuntani engani janonguapiringa?’ 24Ka arhiaspti imechani engaksï jima jápka: ‘Euantsï je tumina ka imani íntsku je enga témbeni xanhari sánderu andaka.’ 25Imaksï arhispti: ‘Tata, ¡Inde témbeni tumina kámaxatia!’ 26Irecha arhiaspti: ‘Arhixakachkaksïni, eska ima enga jatsika, sánderu intsïnhaaka; ka ima enga no jatsika, imani jamberi euanhantaati enga sánisï jatsika. 27Ka imechani engajtsïni ikiachejka, engajtsïni no jiókorhempka eskani imecheri irechepiringa, axu júaa je ka uándikuani je.’ ”

Jesusi Jerusaleni inchaakusti

(Mt 21.1-11; Mc 11.1-11; Jn 12.12-19)

28Ísï uandarini, xanhari jatantaspti Jerusaleni nirani. 29Enga Betfage ka Betania niárani jápkia, juátarhu ísï enga Olibu arhinhajka, tsimani jurhengorherichani axaaspti, 30arhiaparini:

–Ni je imani ireta sapichurhu enga ixu jurhimbitku jaka, niáratinku, jima jauati ch'anchaki ma jótakata, enga nótki nema jatani jaka, kuerata je ka jua je. 31Ka ekaksïni nema kurhamarheska ¿Andijtsïsï kueratani jaki? Arhi je eska Acha úrakuekaxaka.

32Jurhengorherichaksï niraspti ka iámu ambe ísï jarhaspti eska Jesusi na arhiapka 33Engaksï ch'anchakini kueratani jápka, kurhamarheasptiksï ima engaksï ch'anchakini kángorhempka:

–¿Andijtsïsï kueratani jaki?

34Imaksï uandaspti:

–Jimboka Acha úrakuekaxaka.

35Ka pákusptiksï, ka imecheri chereparhakuechanksï tatsuparhakutini Jesusini jatsiraspti. 36Eska na Jesusi xanharapempka, ísïksï imecheri xukuparhakua xanhari jimbo tatsuntskakupasïrempti. 37Ka enga na úndapka Olibu juátani sáni kétsentani, iámendu imeri chúngumatichaksï uénaspti jiuakorheni xáni tsípeni ka Diósïnksï k'éri ambe arhini iámendu milagruechani exearini. 38Ka uandasïremptiksï:

–¡Újchakurakate irecha enga Achani jimbo jurhani jaka! ¡Sési jarhasti iámendu ambe auandarhu ka auandarhu k'éri arhinhasïndi!

39Jimajkanksï máru fariseouecha engaksï jima jápka arhisptiksï:

–Jurhentpiri, xukaa chéti chúngumatichani.

40Enga úpka Jesusi arhiaspti:

–Arhixakaksïni, engaksï i pínasku jauaka tsakapuechaksï uinhachaati.

41Enga Jerusaleni niárani jápka, ka k'éri iretani exeni, Jesusi iretani uekuspti 42uandaparini: “¡Ekari iásï íni jurhiatekua t'újtu sési jakuani kurhangupiringa! Enga úka imaniri iásï no sésekua intsïnhaska kurhanguni. 43Jimbokaksïni nósesi járhati jurhiatekuecha janocheaka, engaksïni chéti ikiatspiricha ópandaaka, ka uirhipkurhaatiksïni ka iápuru ísïksïni k'uaniraati, 44ka xerentskantaatiksïni. Iámendu jimini anapuechanksïni uándikucheati, ka nóksï ma tsakapu tsïntsikata jurajkuati, jimbokari no kurhanguska imani jurhiatekuani engari juka p'urhembenhani.”

Jesusi tiósïo ambantskantasti

(Mt 21.12-17; Mc 11.15-19; Jn 2.13-22)

45Ka jimajku Jesusi k'éri tiósïo inchaspti, ka petantaani uénaspti imechani engaksï ambe atarantani jápka, 46ka arhiaspti:

–“Karakatarhu arhisïndi: ‘Jucheti k'umanchekua uandamukukorhetarakueuati’, ka chájtsï sïpajkurhecheri jirikorhekua úntaska.”

47Jesusi k'éri tiósïo mándani pauani jurhentpesïrempti, ka tátecheri urhejtsïkuricha ka juramukua jurhentpiricha ka ireteri achechajtuksï jirinhakuntaxapti nénaksï uándikuni. 48Ka nóksï ambe ma xékuntasïrempti jimboka iámendu jinguntku janhaspka kurhanhani enga ima uandempka.

Currently Selected:

San Lucas 19: BI-PURHE

Highlight

Copy