Tioni 1

Anu ane ualasou lexe Vaikala muxali itema

1Tei tei manina loxo mimi uxali uao la anu ane ualasou lexe Vaikala a uxoxolu. La Vaikala ne ilou Mosinge ixoxolu. Vaikala ne anu molu Mosingemo. 2La ilou Mosinge ixoxolu no anu tei tei manina. 3No anu vote'i e noxou Vaikalasi la mimi mukalusi muxali. Mi vile uxali no anu vote'i vilemo to uasi, mimi mukalusi muxali a noxousi. 4Anu ne a tava'u maulisi, mo mauli ne anu lamanasi'a tamitema. 5Lamana anene uieiei no isivoxo la isivoxo uua'ulixu uasisi.

6Ioxe, itema vile e Mosinge mupalusou a muxali. Anu ualasou lexe Tioni. 7Anu mune'e so ulanu vaikala. Vaikala e mulanu ne anu so upala'anixu lamana olele. Mo so no anu vaikala e mulanu ne la uxalixu vote'i so tamitema mukalusi ilopala. 8Anu ne, anu lamana anene uasi. Anu mune'e mulanu vaikala so upala'anixu lamana olelesi. 9Anu lamana e a mune'e no lialia ne, anu lamana maninasi. Anu so lamanasi'a tamitema mukalusi.

10Ioxe, laso anu ane ualasou lexe Vaikala a muxolu 'o no lialia e muxali noxou ne, ia tatemanu lialia itongonu to uasi. 11Anu mune'e muxolu no anu xale lia so laili noxou mu'isalili ia ane'i so laili noxou ne i'osa so i'unanu noxi'a uasi. 12Ia noxi'a tamitema ta'ei loxo mi'osa so mi'unanu noxi'a la muiti'a tanixa'a ane so mixali Mosinge ta'olu. Ane'i ne tamosou e ilopalanu ualasousi. 13Ane'i mixali Mosinge ta'olu ia anu mi so vasimenge tamitema o xavutali'a tamitema o masaxa noxou itema vile uasi. Mosinge molu muxalixi'a so ane'i ta'olusi.

14Anu Vaikala ne muxolu itema no anu vasimolu, mo mune'e muxolu no tainexi. La temaisou xoluxolu noxou lailaixe mo xaviou misevile la mupala'a lexe anu Olu e vilesisi anu molu noxou Maminge. Anu mosou iaiama ilou vaikala anu temanu manina. 15Tioni mulanu vaikala so mupala'anixu la mu'ava'ava lexe, “Anu ano'o itema e evikalasou lexe, 'Anu ane une'e ili'i noxilo la u'uli'uli noxilo xo loxo eni axali uao la anu a uxoxolu.'”

16Anu mosou iaiama la no anu iaiama mulolutu noxou ne la upilipilixinu noxinge. 17Xo manina, no anu vote'i e noxou Mosisi la texalisou lo. Ia noxou Iesua Kalaisiti la texalisou iaiama ilou vaikala anu temanu manina. 18Itema vile usaxisou Mosinge no iou lavo'onu uasi. Ia Mosinge Olu vilesisi e anu molu Mosinge ne, anu uxolu noxou Momu pa'umolu, la anusisi a mupela'ingexu Mosinge.

Tioni e itema so kelele mulanu vaikala

19Ioxe, tatiatila noxi'a Taiuta mipalusi'a mose'i noxi'a tapilisiti oli'a ane'i so laili Livai e isu'uline'i tapilisiti me'a ne Ielusalemo mixali noxou Tioni. Mixali noxou la mitali'isou lexe, “Nini ena'ei manina?” 20La Tioni utalumeu mi vile uasi mulanu vaikala lamana mo mupala'anixu lexe, “Eni ane Mosinge musosovosou so lexe Kalaisiti uasi.” 21La ane'i mitali'isou lexe, “Laso axova? Nini Elaitia?” La anu mu'oxo lexe, “Eni amitema ne uasi.” La mitali'ila lexe, “Nini Polopeti oleleo?” Ia anu mukoline'i lexe, “Uasi to.” 22La ane'i mitali'isoula lexe, “Laso nini ena'ei manina? Nalemolu noxixe mo so nexi talivunoxu noxi'a ane'i ane mipalusixe. Nini mene navikalasine axovaio?” 23Sila Tioni mukoline'i lexe, “A eni e polopeti Aisaia mulemolu tatei lexe 'Xolinu evile uxoxolu no xale lia esi'esi mo u'ava'ava lexe, “Nga'isalilinoxu vote'isou Tatananenge.”

24Ane'i tamitema ane Tapalisi mipalusi'a mine'e ne, 25a mitali'i noxou Tionila. Mi'oxo lexe, “Loxo nini ane so Kalaisiti o Elaitia o Polopeti olele uasi laso tava'u axova so na'oxonu ilixo so kelele noxi'a tamitema?” 26La Tioni mukoline'i lexe, “Eni akelenixa'a no lexasi, ia itema vile a ututulu no taingengi ane ngalavusou to uasi. 27Anu ne, itema e so uili'i noxilo. Io eni 'o amitema alaixe so axaxai noxou se so alulusou lamotasou lasuou uasisi.” 28Mimi ano'o muxali no tuala ne Vetani e uxolu xalevile no lexa Tiotani no tanixu e Tioni mulavusou u'oxonu ilixo so kelele.

Iesua anu Sipisipi Ilie noxou Mosinge

29 Xe no voxo loxo nei'ela la Tioni mumaisou Iesua a umuamua'i une'e noxou la Tioni muvikala lexe, “Ngamalei, anene Sipisipi Ilie noxou Mosinge ane! Anu mosou e so uxexenu susu noxi'a tatemanu lialia. 30Anu itema e elemolu mukalu lexe, 'Itema e une'e ili'i noxilo anu u'uli'uli noxilo xo loxo eni axali uao la anu a uxoxolu.' 31Eni melo atongonu tei lexe ena'ei ane uasi. Ia tava'u eni ene'e mo e'oxo ilixo so kelele no lexa a so ngingi Ta'isilaeli ngalamana noxou.”

32La Tioni mulanu vaikala so upala'anixu aloxo 'ola, “Eni emaisou Ulenu Laixe molu no loxotolo mulu'e loxo ngiala utu. Mulu'e la muai noxou. 33Loxo eni melo la atongonu uasi. Ia anu ane mupalusilo ene'e so a'oxo ilixo so akelenixa'a tamitema no lexa, la anu molu muvikalaleli lexe, 'Loxo nini namaisou Ulenu Laixe ulu'e uai noxou itema aneva, la anu mosou e so ukelenixa'a tamitema noxou Ulenu Laixe ane.' 34Xe eni melo emasiou mo a alalanu vaikala so apala'anixu lexe anu ano'o Mosinge Olu.”

A'alosi'a ane'i ane tei so mixali tatisaipeli

35Ioxe, no voxo loxo ne'iela la Tioni oli'a tatisaipeliou tamei a mitutulu. 36La anu mumaisou Iesua a umaumua'i sila muvikala lexe, “Ngamalei, anene Sipisipi Ilie noxou Mosinge ane!” 37Xe tatisaipeli tamei milomusou muvikala axone sila ilou mi'avuti mimulinu Iesua. 38Xe Iesua muxiu mumaisi'a mi ne imulinu la mutali'isi'a lexe, “Ngilou ngakamulinu mi ma'ia?” La ilou mivikalanu lexe, “Lavai, nini naxolu no tani aneva?” Vaikala Lavai ne laxu lexe Tisa. 39La Iesua mukoline'i lexe, “Ngane'e ngamaisou.” Laso ilou milai mimaisou tani e muxolu no anu. Milai la anu loxo aso iou tami'a no o'olovoxo laso oli'a mixoxolu xo mo aso mu'una.

40La anu vile noxi'a ilou e milomusou vaikalaou Tioni ka mimulinu Iesua ne, anu Anitilu e Saimoni Pita vimou. 41Ioxe, Anitilu ne loxo muxexesou Iesua la mulai avile mukamulinu vimou Saimoni. Mukamulinu xo xe muxalisou la muvikalanu lexe, “Ai, nexi texalisou Mesaia mukalu!” Uala Mesaia ne laxu lexe Anu e Mosinge musosovosou lexe Kalaisiti. 42Mukalu la Anitilu mulaixu Saimoni noxou Iesua. Mulaixu xe Iesua mumaisou sila muvikala lexe, “Nini Saimoni, mamine ualasou lexe Tioni. Ili'i la ilemene lexe Sivasi.” Uala Sivasi ne anu uala iou vilesisi no anu Pita, mo laxu lexe lavo'o.

Iesua mu'avali'a Pilipi ilou Natanieli lexe imulinu

43Ioxe, no voxo loxo ne'ielala la Iesua mulalaxinu oponu lexe ulai no xale lia Xalili. La muxalisou itema vile ualasou lexe Pilipi ka muvikalanu lexe, “Nane'e namulileli.” 44Pilipi ne anu so taoni ne Vetisaita e oli'a Anitilu ilou Pita nunisi'a. 45Ioxe, Pilipi mu'avuti mulai xe loxo muxalisou menexu e Natanieli la muvikalanu lexe, “Ai, nexi texalisou itema e Mosisi mulemolu no anu lavuku so lo xe tapolopeti mikaukavusou tatei. Anu Iesua so tuala Nasaleti e Iosepu olu.” 46Ia Natanieli muvikalanu lexe, “Xo axova, umomomo so mi vile laixe uxali no tuala Nasaleti?” La Pilipi mukolinu lexe, “A nane'e namalei tosi.”

47Xe Iesua mumaisou Natanieli unene'e mo a so uxali noxoui, la muvikalasou lexe, “Ngamalei, itema e unene'e 'o anu so Isilaeli kena, noxou la kalavoi sevile uasisi!” 48La Natanieli muvikalanu lexe, “Xo nelavusilo axovao?” La Iesua mukolinu lexe, “Loxo nexolu no tava'u ovu viki mi ne Pilipi uxalisine so u'avaline uao, la eni emaisine ne.” 49Sila Natanieli muvikala noxou lexe, “Tisa, manina, nini Mosinge Olu. Nini nakingi noxixe Ta'isilaeli.” 50La Iesua muvikalanu lexe, “Nini nelopalaleli xo no anu vaikalaxeli e lexe emaisine no tava'u viki, ne? O ili'i la nini namaisou mimi mutiatila ane uua'ulixu mi ne avilesi.” 51Mo musolonu aloxo 'ola, “Avikalangengi manina e maninasi, ili'i la ngamaisou tualasou Mosinge ukisi mo ta'angelou Mosinge ilulu'e itetelo noxou Itema ane molu noxou Mosinge.”

Currently Selected:

Tioni 1: ATA

Highlight

Copy