Tioni 19

1Ioxe, mukalu la Pailati mupalusi'a ta'amiou kaio milaixu Iesua so mipuapuasou. 2Xe ta'ami mipalixoxonu lamota ana'anaxu ka mimulaxu no kisou aloxo atiou kingi. Mo mi'ailaxu no anu lavalava lauionu. 3Xe mine'ene'e alai noxou mo mivikalanu lexe, “O aso, kingi noxi'a Taiuta.” La mi'otu'otunu alaiou.

4Mukalu la Pailati mula noxi'a Taiutala ka muvikalane'i lexe, “Ngamaisou, eni alanu noxinge 'o mo so ngalavu lexe eni axalisou tava'u susu vile noxou uasio.” 5Xe Iesua a mula la mi loxo atiou kingi no anu lamota ana'anaxu a muai no kisou xe lavalava lauionu a mu'ailaxusio. Sila Pailati muvikalane'i lexe, “Ngamalei, itema anene ano'o.”

6Ioxe, ane'i tatiatilasi'a tapilisiti oli'a tamitema so latolo no tasou Mosinge mimaisoui, la mi'ava'ava lexe, “Nalilinu no ovu valautu so usoli. Nalilinu no ovu valautu so usoli.” La Pailati muvikalane'i lexe, “A ngingi menge ngano'u ka ngalilinu no ovu valautu so usoli, xo eni axalisou tava'u susu vile noxou uasi.” 7Ia ane'i Taiuta mikolinu lexe, “No anu lo lo noxixe la vile uvikala lexe itema aloxo 'o usolisi, xo anu molu muvikalasou lexe anu Mosinge anu Olu.”

8Xe Pailati mulomusou vaikalai'a ne la ume noxou mutilasi. 9La Pailati mulivu mu'unalai no tasou xamanila mo mutatali'i noxou Iesua lexe, “Nini so xale lia ne'eio?” Ia Iesua ukolinu uasi. 10Laso Pailati muvikalanu lexe, “Navikalaleli uaio? Nalavu uasi? Xavi uxolu noxilo so a'italoneni nalai o so a'italoneni no anu soli no ovu valautu.” 11La Iesua mulivuxu lexe, “Xavi e uxolu noxine ne anu molu teitexi no tualasou Mosingesi. Loxo Mosinge upilixinu xavi anene noxine uasi la nini vote'i so na'oxo mi vile noxilo uasisi. Laso maixene susu noxou anu e mupilixileli no avone, la uua'ulixu ane noxine 'o.” 12Pailati mulomu axone laso anu xavinu so ukamulinu vote'i lexe u'italonu Iesua ulai axova. Ia Taiuta mi'ava tatila lexe, “Loxo na'italonu itema ne ulai la nini namitema so navalaxu kingimengi Talomu e Sisa uasi. Xo itema loxo molu u'oxo lexe anu kingi la uxililiou Sisa ane.”

13Ioxe, Pailati mulomusou vaikalai'a ne laso mulanu Iesua noale ka mutalupexa no anu sia noxi'a tatiasi no anu ngiou e milemolu lexe Poloa Lavo'o. No anu vaikala Ipilu la ilemolu lexe Xavata. 14La anene voxo so lalaxisou lavilelu so Mualasi'a mo aso iou loxo 12 'o. Sila Pailati muvikalane'i Taiuta lexe, “Ngamalei, kingimengi a.” 15La ane'i milivuxu no anu ava lexe, “Naxexenu ulai. Naxaxenu ulai. Nalilinu no ovu valautu so usoli.” Xe Pailati mutali'isi'a lexe, “Xo axova, alilinu kingimengi no ovu valautu so usolio?” La ane'i tatiatila noxi'a tapilisiti mikolinu lexe, “Nexi kingimexi vilela uasi, Sisa anusisi.” 16Laso Pailati mu'italonu no avo'a so ililinu no ovu valautu so usoli.

Ane'i mililinu Iesua no ovu valautu so musoli

17Ioxe, mukalu la mino'u Iesua milaixu mo anu molu a mutatavulenu ovu valautu so ulili no anu. Milai xo la mixalixu no anu apu vile e ilemolu lexe Kisou Xinu. Anene ilemolu no anu vaikala Ipilu lexe Xoloxota. 18La no apu ne mililinu no ovu valautu. Xe mililixa'a tamitema tamei no anu ovu valavalautusi'a kalumo, vile xalevile xe vile xalevile, io Iesua mulili nonixi.

19Xe aloxo 'o. Pailati mupilixinu vaikala so lexe kaukavu vile ulili teitexi no anu ovu valautusou Iesua. Kaukavu ne aloxo 'o, “Ano'o Iesua so Nasaleti, anu kingi noxi'a Taiuta.” 20Kaukavu anene mimulaxu no anu vaikala Ipilu xe Lomu xe Kiliki. La ane'i Taiuta tavu'alo mine'e mi'iti'itisou vaikala anene xo apu e mililixu Iesua no anu muxolu alai no taoni sesi. 21Laso tatiatilasi'a tapilisiti noxi'a Taiuta milai mivikalanu Pailati lexe, “Ngingi ngekaukavu lexe, 'Ano'o kingi noxi'a Taiuta'. Ia anu axone uasi, anu laixe so ngakaukavu lexe, 'Itema ano'o muvikala lexe anu kingi noxi'a Taiuta.'” 22La Pailati mulivuxa'a lexe, “Uasi. Vaikala ma'ia e elemolu so ukaukavu ne, uxolu axonesi.”

23Ioxe, ane'i ta'ami mililixu Iesua no ovu valautu mukalu la mino'u lavulutiou kaio mivelunu no anu pa'usou tami'a la ane'i vilevilesi mino'u pa'usou vile. Xe ane'i mino'u lasiotiou veveni kalumo ia mimaisou lexe anu tanixu lasumapi uasi, mi'itaxu loloni axonesi. 24Ta'ami mimalei axone laso ane'i mivikala lexe, “Mamu so takakanu, nenge'a ta'oxonu ilixo so uala so lexe ena'ei uno'u.” Mi'oxo axone la anene muxalixu nene'axu vaikala vile ane uxolu no anu lavukuou Mosinge lexe, “Ane'i mivelunu lavulutixeli xe mi'oxonu ilixo so uala so lexe ena'ei uno'u lasiotixeli veveni.” La ane'i ta'ami mi'oxo axonesi.

25La Iesua nenu olie vimoe xe Malia ane Kilopasi semau xe Malia so taoni Makatala ane'i a mitulu alai no anu ovu valautusou Iesua. 26Xe Iesua musaxisie nenu ilou tisaipeli e musexelaxu misevile a miveisa'i mitutulu. Sila Iesua muvikalane nenu lexe, “Semao, namalei, anu ne a so iline.” 27Xe muvikalanu tisaipeli ne lexe, “Namalei, ane ne a so nenine.” La musoko'u no voxo se nesi la tisaipeli ne muno'e Malia mo mixoxolu no taine'i tatemanu tasou.

Iesua mupilixinu mauli noxou

28Mukalu xe ili'i la Iesua mulavu lexe mimi mukalusi muxali mu'isalilisi. Laso anu muvikala lexe, “Limilaxo esi'esi 'oe.” Muvikala axone mo so uxalixu nene'axu vaikala ane uxolu no anu lavukuou Mosinge. 29La lasopenisou uaini sisielixu a muai alai se ne. Laso ane'i mino'u mi loxo lavalava xasixu kaio mi'unanu no anu uaini xe pita'ui, la ane'i misakinu no ovu isopi avolu mo mitolosou mulai no anaxu Iesua. 30La anu muno'u uaini ne sevile. Mukalu xe ili'i la anu muvikala lexe, “Anu mukalu!” Sila anu mutaloxonixu kisou mo mu'italonu mauli noxou.

Ami vile muto'omolu Iesua no vaimolu

31La voxo anene anu so lalaxisou Voxo so Ma'ila. Xe ane'i Taiuta opone'i lexe mamu so vasime'a tamitema ulili no ovu valavalautu no anu Voxo so Ma'ila ne xo anu anene voxo mutiatila manina noxi'a. Laso ane'i mitatali'i noxou Pailati lexe upalusi'a ta'ami so ixolasou tava'a ane'i e milili ne mo so isoli palea ka ixexenu vasime'a. 32Ioxe, ane'i ta'ami milai la mixolasou tava'a tatamei e milili no pa'upa'umolu Iesua. 33Ia mine'e noxou Iesua xe mimalei lexe musoli mukalu laso ane'i ixola'u tava'u uasisi. 34Io ami vile muto'omolu Iesua no vaimolu no anu lalumiso, sila alaxu vilesisi sialu ilou lexa munixi mula. 35La mosou e muxolu mumaisou mi ne a ulalanu vaikala so upala'anixu. La vaikalaou e ulanu ne anu maninasi mo anu molu mulavu no oponu lexe mi ma'ia ulemolu ne anu maninasi. Laso anu umomomo so ngingi kalumo ngalopalasi. 36Mimi ne muxali so muxalixu nene'axu vaikala ane uxolu no anu lavukuou Mosinge aloxo 'o, “Xinu vile no vasimolu so ixola'u uasisi.” 37Xe vaikala vile no anu lavukuou Mosinge aloxo 'ola, “Ane'i isaxisou anu ane mito'omolu.”

Mimulaxu vasimolu Iesua no anu lulu e alavuasi

38Xe ili'i la Iosepu so Alimatea mulai noxou Pailati mo mulingau vasimolu Iesua so uno'u. Iosepu ne anu tisaipeliou Iesua vile ia mutalumeu lopala noxou xo mu'ume'a Taiuta. Mulingau xe Pailati mu'italonu lexe uno'usi laso anu muxali no anu vasimolu Iesua ka muxexenu mulaixusi. 39La Nikotimasi e mulai tei noxou Iesua no olovoxo a ilou Iosepu. Nikotimasi ne mune'enu ueli tuma'u lailaixe ane kilosou loxo 30. Ueli tuma'u lailaixe ne tamitema mi'oxonu no anu luxu ovu iou tamei kaio miilanu. 40La ane'i ilou mino'u Iesua vasimolu kaio milutunu ueli ne noxou xe miisinu no anu lavalava kea. Ilixo ne Taiuta ilavusou i'oxonu no anu vasime'a tamitema misoli loxo ane'i so i'asixu.

41Anu xai vile muxolu alai se no anu apu e Iesua musoli no ovu valautu. La no anu xai ne lulu vile e maia taxanu a muxolu. Anu lulu ne alavuasi, imulaxu vasimolu itema musoli no anu uasi. 42Anene voxo e so Taiuta ilalaxisou Voxo so Ma'ila, laso ane'i ilou mimulaxu vasimolu Iesua no lulu ne xo anu a muxolu alai sesi.

Currently Selected:

Tioni 19: ATA

Highlight

Copy