Matiu 15

Lo noxou Mosinge uua'ulixu lavuloto noxi'a Taiuta

1Ioxe, no voxo ne la Tapalisi se'i xe tamitema so lavulavu no anu lavuloto se'i me'a ne Ielusalemo mine'e noxou Iesua. La mivikalanu lexe, 2“Axova so tatisaipelimeni imulinu ilixo noxi'a tatiatila noxinge tatei uasio? Xo loxo ane'i a so i'ani la i'uinu avo'a tei to uasi.” 3La Iesua mukoline'i lexe, “Laso axova noxinge, xo ngingi ngaxola'u lo noxou Mosinge so ngamulinu lavuloto noxingemo. 4Xo vaikalou Mosinge aloxo 'o, 'Ngingi ngataxane'i tamaminge taneninge so ngalomuxa'a.' mo 'Itema loxo uvikala masuaou momu o masuaie nenu la ngavau usoli.' Anene lo noxou Mosinge. 5Ia ngingi la ngexiunu lo ne mo ngavikalane'i tamitema lexe, 'Ai, laixe so ngasu'uline'i tamaminge oli'a taneninge no anu lamoli ia umomomo uasi, xo anu masi ngasosovosou lexe noxou Mosingesi.' 6Mo no anu anene la ngatanuxu vote'i so tamitema itaxane'i tamami'a taneni'a to! Laso ane, ngingi ngalu'enu vaikalaou Mosinge so nga'itinu lavuloto e ngingi menge ngexalixumo. 7Ngingi tamitema so kalavoi to! Vaikalaou polopeti Aisaia manina xo mukaukavu tatei lexe, 8'Ane'i tamitema ano'o i'oxo tatilasilo no anaxa'asi ia opone'i uxolu va'axu noxilo. 9Ane'i i'itinu ualasilo vuluvulusi. Ane'i ivotovoto no anu lavuloto ane tamitema me'a mixalixusi.'”

Iesua mupela'a lexe mi ma'ia manina u'oxonu itema nuni'u

10Ioxe, Iesua mu'avali'a tamitema latala mine'ene'e noxou ka muvikalane'i lexe, “Ngalomusou vaikala ano'o mo ngano'u lavulavu. 11Loxo itema u'ou mi vile so u'una no vasimolu la umomomo so u'oxonu masua no iou Mosinge uasi. Ia mi ane a uxoxolu nonano xe ula no anaxu, la anenesi u'oxonu masua no iou Mosinge.”

12Xe ili'i la tatisaipeli mine'e mitali'isou lexe, “Axova, nini nelavu lexe Tapalisi milomusou vaikalameni ne la opone'i tu'umaxuou?” 13La Iesua mukoline'i lexe, “Mamilo e uxoxolu no tualasou lailaixe, loxo mi vile uleme no anu xaixu ane molu utounu uasi la uluvusou ilou uli'usi. 14Laso ngaxavutalane'i uasi. Xo ane'i loxo tamitema ane ie'i selevenu itila'a tamenexi'a ie'i selevenula. Mo axone la oli'a ilapau ipatolo no taxasi.”

15La Pita muvikalanu Iesua lexe, “Latilovo e nelemolu noxi'a latala 'o napalasinoxu laxu noxixe.” 16La anu mu'oxo lexe, “Loxova, lavulavu noxinge umomomo kalumo uasio? 17Xo ngalavu uasi? Mimi mukalusi ane u'una no anaxu itema xe ulai nonano no vasimolu ukalu la usu'a vitanisi no ilusi. 18Ia mi ane muxolu lumamo no oponu itema mo ula no anaxu la anenesi u'oxonu masua no iou Mosinge. 19Xo mimi masua ano'o molu noxou itema oponu mo ula. Mi loxo xavutala masua xe tamitema ive'a tamenexi'a xe ixola'u taula'i xe ilixo nuni'u xe pakali xe ikalavoisi'a tamenexi'a no lakoti xe ipupui. 20Anu ane, mimi anene uxalixu itema nuni'u. Ia mi loxo i'ani vitanisi, i'uinu avo'a tei uasi, la anene u'oxonu itema nuni'u no iou Mosinge uasi.”

Sema vile so Kenani milopala manina noxou Iesua

21Ioxe, Iesua muxexesou tuala ne mo mulai no xale lia ne Taili xe Saitoni. 22La sema vile so laili noale'ale e ne Kenani ane milavusou ixoxolu ne mine'e noxou. Mine'e la mi'ava'ava lexe, “Tatilao, nini Ilusunu Tevitio, naiaima noxilo. Xo angelo masua mukasie alixeli mo i'oxone masua manina.” 23Ia Iesua ukoline vile uasi. Laso tatisaipeliou mine'e miuolotete noxou lexe, “Nakusaiesi xo imulinenge mo i'ava'avasi.”

24La Iesua mukoline'i lexe, “Mosinge mupalusilo ene'e so su'ulisi'a tasipisipi no anu laili noxi'a Ta'isilaelisi e milusi.” 25Ia sema ne mine'e alai noxou ka mitangatulu no tava'u mo mivikala lexe, “O Tilao, nasu'ulileli.” 26La anu mutovone no anu latilovo aloxo 'o, “Mamu so tano'u la'ilalixa'a tamolomolo mo tapeinu noxi'a ta'a'a.” 27Ia ane mikolinu mulovo no anu latilovo ne lexe, “Ai tatila anene manina. Ia ta'a'a kalumo ixolu no laxu lu mo so loxo tamosi'a i'ani xe utuxu ulapau la ane'i iloxu no lia ane.” 28Xe Iesua mulomusou vaikalaie la mu'oxo lexe, “Ai semao, lopala noxine ne tatila kena. Laso mi ane nemasaxau la anu uxali noxine axone.” Sila alala'e se nesi ilie laixene avile.

Iesua mupaipoune'i tamitema so siki iouiou tapiena

29Ioxe, Iesua mulutu no tuala ne la mumuamua'i mulai no pa'umolu kupa Xalili. Ka mutelai no la'olu vile mo muxolu mutalupexa ne. 30La tamitema tavu'alo e tavu'alo mine'ene'e noxou mo mino'a tamenexi'a ane vasime'a mukaupe xe xine'i musoisoli xe ie'i selevunu xe anaxa'a mutomu xe so siki iouiou tavu'alola. Mino'a mo mimulaxa'a alai no tava'u laso mupaipoune'i. 31La tamitema latala ne mikuluke kena xo mimaisi'a ane'i ane anaxa'a mutomu a mivivikala xe ane'i ane xine'i musoisoli laixene'i xe ane'i ane vasime'a kaupe a vasime'a manamana'u so imuamua'i xe ane'i ane ie'i selevenu a mimaleisi. Tamitema latala mimaisi'a axone laso ane'i mi'iti'itinu Mosi'a Ta'isilaeli ualasou.

Iesua mua'ane'i tamitema 4000

32Mukalu la Iesua mu'avali'a tatisaipeliou mine'e noxou kaio muvikalane'i lexe, “Eni talelixa'a tamitema latala 'o. Xo ane'i xe nenge texolu lai 'o voxo tatalu mo ane'i i'ani uasi. Xe loxo apalusi'a so ilivulivu no tuatualasi'a la masi ie'i uxalixalili no vote'i xo isolixa'a.” 33La tatisaipeli mivikalanu lexe, “Xale lia ano'o tamosou uasio. Laso nenge taxalisou pileti tavu'alo so umomomosi'a tamitema tavu'alo 'o a ne'eio?” 34La Iesua mutali'isi'a lexe, “Ia pileti ta'ei mo a uai noxinge ne?” La ane'i mi'oxo lexe, “A pileti 7 mososi xe tasinana se'i kitukitusi.”

35Ioxe, laso Iesua muvikalane'i tamotu latala ne lexe italutalupexa no lia. 36La anu muno'u pileti 7 xe tasinana moso ne mo muvikala laixe noxou Mosinge. Mukalu la anu muse'ise'inu mo mulosi'a tatisaipeliou so ivelunuxa'a tamitema. 37Xe tamitema mi'ani mi'ani xo la mikalusou masaxa na'a avile. Mikalusou masaxa na'a xe mipitanu matomatovinu la mumomomo no anu lakela 7. 38La noxi'a ane'i ane mi'ani'ani ne loxo ta'itisi'a tasema xe tamolomolo uasi, ta'itisi'a tamulu noxi'asi, la navasi'a mumomomo no anu 4000. 39Mukalui laso Iesua mupalusi'a tamitema latala ne milailai. Io anu mutelo no pouti la mulai muxali no xale lia ne Maxatani.

Currently Selected:

Matiu 15: ATA

Highlight

Copy