यूहना 8

1पण यीसू जेतुन दरखत गै प्हाड़ पर उड़ग्यो। 2दिनगै दिनगै बो फेर मिन्दर में आयो अर सारा लोग बिंगै कनै आया। ईंखातर बो बानै बेठगे उपदेस देण लागग्यो। 3जद यहुदी धरम सासतरी अर फरीसी लोग बेबीचार करण आळी एक लुगाई नै पकड़गे बिनै सारा गै सामणै खड़ी करी, 4अर यीसू नै केयो, “हे गुरूजी आ लुगाई बेबीचार करती पकड़ीजी है। 5मूसा गो नेम म्हानै ओ बतावै है कै हिसी लुगाई नै तो पथरां ऊं मारणी चईयै थे इंगै बारै में के केवो हो?” 6बां बानै फसाण खातर आ बात कैई क्यूंकै बे चावै हा म्हानै कोई गळती मिलै पण यीसू नीचै झुकगे जमीन पर आंगळी ऊं कीं लिखण लागग्यो। 7क्यूंकै बे यीसू नै बारी बारी पूछण लागरया हा, ईंखातर यीसू सीधो खड़यो होग्यो अर बानै केयो, “थारै माऊं झिकै कदी पाप कोनी करयो बो पेलो पथर मारै।” 8ओ केगे यीसू दुबारै झुकगे जमीन पर लिखण लागग्यो। 9जद लोगां ओ सुण्यो तो सारा ऊं पेलां बुडा अर बांगै बाद में जुआन एक एक कर'गे बठूं उड़ग्या। बठै बा लुगाई एकली यीसू गै सामै खड़ी रेई। 10यीसू खड़यो होयो अर बिं लुगाई नै केयो, “हे बेटी, बे सारा लोग अठुं उड़ग्या के पण कणैई तेरै पर दोस कोनी लगायो।” 11लुगाई बोली, “हे प्रभु, कणैई दोस कोनी लगायो।” यीसू केयो, “मैं बी तेरै पर दोस कोनी लगाऊं, अर अब फेर कदी पाप ना करी।”

यीसू जगत गी जोती

12फेर यीसू लोगां नै केयो, “संसार गी जोती मैं हूं झिको मेरै लारै चालैगो बो अन्धेरै में कोनी रेवैगो, पण जीवन देण आळी जोती पावैगो।” 13ईं बात पर फरीसियां बिनै केयो, “तूं आपगी गवाई आप देवै है ईंखातर तेरी गवाई ठीक कोनी।” 14यीसू बानै उतर दियो, “जे मैं आपगी गवाई आप कानूं देऊं तो बी मेरी गवाई ठीक है क्यूंकै मैं जाणूं हूं कै मैं कठूं आयो हूं अर कठै जाऊं, पण थे लोग ओ कोनी जाणो कै मैं कठूं आयो हूं अर कठै जाऊं। 15थे दुनिया गै तरियां न्याय करो हो, मैं किंगोई न्याय कोनी करूं। 16जे मैं न्याय करूं बी तो मेरो न्याय सच्चो हो'सी क्यूंकै मैं एकलो न्याय कोनी करूं पण परमेसर पिता झिकै मनै भेज्यो है बो अर मैं मिलगे न्याय करा हां 17थारै नेमा में लिखेड़ो है कै दो जणा गी गवाई ठीक होवै है। 18मैं आपगी गवाई आप देऊं अर मेरी गवाई पिता परमेसर बी देवै झिकै मनै घाल्यो है।”

19बां बिनै केयो, “तेरो पिता कठै है?” अर यीसू मसी केयो, “थे मनै बी कोनी जाणो अर मेरै पिता नै बी कोनी जाणो। जे मनै जाणता तो थे मेरै पिता नै बी जाणता।” 20मिन्दर में उपदेस देवंता होया दान पात्र गै कनै बण ऐ बाता कैई पण बिनै कणैई कोनी पकड़यो क्यूंकै दुख झेलगे मरण गो टेम अजे तांई कोनी आयो हो। 21यीसू बानै एकर फेर केयो मैं उड़ जावूंगा थे लोग मनै ढूंडोगा अर थे आपगै ई पापां में मर ज्योगा, जठै मैं जाऊं बठै थे कोनी आ सको।

22फेर यहुदी अधिकारी आपसरी में केण लागग्या कै बो अपणै आपनै मार देणो चावै है क्यूंकै बण केयो, “थे बठै कोनी आ सको जठै मैं जाऊं।”

23बण बानै केयो, “थे लोग नीचै ऊं हो पण मैं परमेसर पिता गै कनूं उपर ऊं आयो हूं। थे दुनिया गी ओर ऊं आएड़ा लोग हो। मैं दुनिया गी ओर ऊं कोनी आयो। 24ईंखातर मैं थानै केऊं कै थे आपगै पापां में मरोगा। परमेसर गै बचन में इंया लिखेड़ो है कै जे थे बिस्वास ना करोगा कै मैं बो ई हूं तो थे आपगै पापां में मरोगा।”

25फेर बां यीसू नै पूछयो, “तूं कुण है।” यीसू बानै उतर दियो, “बोई हूं जिंया मैं सुरू में थानै केवंतो आयो हूं।” 26थारै बारै में मनै भोत कीं केणो अर न्याय करणो है पण मनै भेजण आळो सच्चो है अर झिको कीं बण मनै केयो है बो ई संसार नै केऊं हूं।

27बे ओ कोनी जाण सक्या कै बो पिता परमेसर गै बारै में केवै है। 28फेर यीसू केयो, “जद थे मिनख गै बेटै नै करूस पर चढाओगा तो थे जाणोगा कै मैं बोई हूं झिको हूं अर अपणै आप कीं कोनी करूं पण पिता परमेसर झिको कीं मनै सिखायो है बोई मैं बोलूं हूं। 29अर झिकै मनै भेज्यो है मेरै सागै है बण मनै कदी एकलो कोनी छोड़यो क्यूंकै मैं सदां बो करूं झिको बिनै आच्छो लागै।” 30यीसू जद ऐ बाता केवै हो तो भोत सारै लोगां बिंगी बातां पर बिस्वास करयो।

सच्च थानै आजाद करसी

31यहुदी लोग झिका यीसू गी बातां पर बिस्वास राखता हा यीसू बानै केयो, “जे थे मेरै बचन नै मानोगा तो सचमुच मेरा चेला बणोगा।” 32अर थे सच्चाई नै जाणल्योगा अर बो सच्चो परमेसर थानै गुलामी में बंदेड़ा नै छुड़ा ल्यैगो। 33जद बां लोगां बिनै केयो, “म्हे तो अबरहाम गै वंस में पैदा होया हां अर कदी किंगैई गुलाम कोनी होया फेर तूं ओ किंया केवै है गुलामी ऊं छुड़ा लेवूंगा।” 34यीसू बानै उतर दियो, “मैं थानै सच्च सच्च केऊं हूं कै झिको कोई पाप करै है बो पाप गै बस में है। 35कोई गुलाम सदां परिवार गै सागै कोनी रे सकै पण बेटो सदां थारै सागै रे सकै है। 36ईंखातर बेटो थानै छुड़ा दैयगो सचमुच थे पाप गै बस माऊं छूट जाओगा। 37मैं जाणूं हूं कै थे अबरहाम गै वंस माऊं हो तो ई थे मनै मारणो चावो हो क्यूंकै मेरो बचन झिको मैं थानै सिखाऊं बिनै थे मानो कोनी। 38मैं बो ई केऊं हूं झिको कीं मेरै पिता मनै दिखायो है अर थे बो कीं करो हो झिको थारै पिता ऊं सुण्यो है।”

39बां बिनै उतर दियो कै म्हे अबरहाम गै वंस गा हां। यीसू बानै केयो, “जे थे लोग अबरहाम गै वंस गा होवंता तो झिको अबरहाम करयो हो बो थे बी करता। 40झिको साच्चो बचन मैं परमेसर कनूं सुण्यो है बो ई थानै बताऊं हूं पण थे अब मनै मार देणो चावो हो, अबरहाम कदी इयां कोनी करयो हो। 41पण थे आपगै असली पिता गो काम करो हो फेर बां यीसू नै केयो म्हे गळत संबध ऊं पैदा कोनी होया अर म्हारो एक ई पिता है अर बो परमेसर है।”

42यीसू बानै उतर दियो, “जे परमेसर थारो पिता होवंतो तो थे मनै प्रेम करता क्यूंकै मैं परमेसर कनूं आयो हूं अर अब मैं अठै हूं मैं आपगी मरजी ऊं कोनी आयो पण परमेसर मनै भेज्यो है। 43मैं झिको कीं केऊं हूं बिनै थे क्यूं कोनी समझो क्यूंकै थे मेरो बचन मानण खातर तैयार कोनी। 44थे थारै पिता सैतान गी उळाद हो अर थे थारै पिता गी इच्छा पर चालणो चावो हो। बो तो सुरूं ईं हत्यारो है अर सदां बण परमेसर गै सच्चै बचन गो बिरोध करयो है क्यूंकै बिमै कोई सच्च कोनी है बो झूठ बोलै है क्यूंकै झूठ बोलणो बिंगी आदत है अर बो झूठ बोलण आळा गो बाप है। 45मैं परमेसर गो सच्चो बचन ई बोलूं हूं। ईंखातर थे मेरो बिस्वास कोनी करो। 46थारै माऊं कोई बी मनै पापी कोनी बणा सकै। मैं सच बोलूं हूं ईंखातर थानै मेरै पर बिस्वास करणो चईयै। 47झिको आदमी परमेसर गो है बो परमेसर गो बचन सुणगे बिंगो पालण करै है थे परमेसर गो बचन सुणगे बिंगो पालण कोनी करो क्यूंकै थे परमेसर गा कोनी।”

यीसू अर अबरहाम

48ओ सुणगे यहुदी लोगां बिनै केयो के म्हे ठीक कोनी केयो कै तूं सामरी जिस्यो है अर तेरै में भूत है? 49यीसू उतर दियो, “मेरै में कोई भूत कोनी पण मैं आपगै पिता परमेसर गो आदर करूं हूं अर थे मेरो आदर कोनी करो। 50मैं आपगो आदर कोनी चाऊं पण एक तो है झिको चावै है कै लोग मेरो आदर करै अर बो सगळा गो न्याय करण आळो है। 51मैं थानै साची साची केऊं कै जे कोई मेरै बचन नै मानैगो तो बो कदी कोनी मरैगो।”

52यहुदी लोगां बिनै केयो कै म्हे जाणग्या हां कै तेरै में ओपरी बडे़ड़ी है क्यूंकै अबरहाम अर परमेसर गी बात बताण आळा कद गा ई मरग्या पण तूं केवै है कै जे कोई मेरै बचन नै मानैगो तो बो कदी कोनी मरै। 53तूं म्हारै बडेरा अबरहाम ऊं मोटो कोनी झिको मरग्यो अर परमेसर गी बात बताण आळा बी मरग्या फेर तूं के केवै है? तूं है कुण?

54यीसू उतर दियो, “जे मैं आपगो आदर मान चाऊं तो बो आदर कीं कोनी पण मेरो पिता परमेसर झिकै नै थे थारो परमेसर मानो हो बो ई मेरो आदर मान करै है। 55थे तो बिनै कोनी जाण्यो पण मैं बिनै जाणूं हूं जे मैं केऊं कै मैं बिनै कोनी जाणूं तो मैं थारी तरियां झूठो मानीजूंगा पण मैं बिनै जाणूं अर बिंगै बचन नै मानूं हूं। 56मेरै धरती पर आण गै दिन गी आसा रखगे थारो पिता अबरहाम भोत खुस हो। अर बण देख्यो अर खुस होयो।”

57यहुदी लोगां बिनै केयो तूं अजे पचास सालां गो बी कोनी होयो ईंखातर थे कदी अबरहाम नै कोनी देख्यो। 58यीसू बानै केयो, “मैं साची साची केऊं कै अबरहाम गै पैदा होण ऊं पेलां बी मैं हूं।” 59जद बां यीसू नै मारण खातर दगड़ चकलिया पण यीसू लुकतो लुकतो मिन्दर माऊं टप ग्यो।

Currently Selected:

यूहना 8: BGQ

Highlight

Copy