लूका 22

यीसू गै खिलाफ साजिस

(मत्ती 26:1-5; मरकुस 14:1,2)

1बिना खमीर गी रोटी गो त्यूंहार आण आळो हो, झिकै नै फसह बी केवै। 2मुख्य याजकां अर धरम सासतरियां यीसू नै पकड़ागे मराण गी जुगती बणाण में मगन हा पण बे लोगां ऊं डरा।

यहूदा गो बिस्वास घात

(मत्ती 26:14-16; मरकुस 14:10,11)

3बारा चेला माऊं एक चेलो यहूदा इस्करियोति हो जद बिमै सैतान बड़ग्यो। 4बण मुख्य याजक अर मिन्दर गै सिपाईयां गै अधिकारियां गै कनै जा'गे बात करी कै यीसू नै किसै तरिकै ऊं थारै हात पकड़ाऊं। 5बे सारा सुणगे भोत राजी होया अर बिनै रिपिया देण गो वायदो करयो। 6फेर यहूदा राजी होगे मोको देखण लागग्यो कै कद ओ एकलो होवै अर मैं कद इनै पकड़ाऊं।

चेला गै सागै फसह गो छेकड़लो भोज

(मत्ती 26:17-25; मरकुस 14:12-21; यूहना 13:21-30)

7जद बिना खमीर गी रोटी गो त्यूंहार आ'ग्यो, झिकै में यहुदी लोगां नै मिन्दर में मेमणियै गी बली चढाणी जरूरी ही। 8जद यीसू पतरस अर यूहना नै कनै बुला'गे केयो कै, “जा'गे आपणै खाण खातर फसह गो भोजन तैयार करो” 9चेला बानै पूछयो, “थे कठै चावो कै म्हे जा'गे तैयार करां” 10बण बानै केयो, “देखो, थानै गाम में बड़तांई एक आदमी मिलैगो झिकै गै सिर पर पाणी गो घड़ो हो'सी, झिकै घर में बो जावै थे बिंगै लारै ई जाईयो। 11अर जा'गे घर गै धणि नै केईयो, ‘गुरू तेरूं पूछयो है कै बो कमरो किस्यो है झिकै मैं आपगै चेला गै सागै फसह गो भोजन खाऊं?’ 12बो थानै एक सज्यो सजायो मोटो चुबारो दिखासी बिमै जा'गे थे फसह गो भोजन तैयार करियो।” 13जद बे बठै गेया तो बिंयाई मिल्यो जिंया यीसू बानै केयो अर बां फसह गो भोजन तैयार करयो।

प्रभु भोज

(मत्ती 26:26-30; मरकुस 14:22-26; 1 कुरुन्थी 11:23-25)

14जद टेम आयो तो बो आपगै चेला गै सागै भोजन करण बेठयो। 15जद बण चेला नै केयो, “मेरी भोत मोटी इच्छा ही कै दुख भोगण ऊं पेलां मैं ओ फसह गो भोजन थारै सागै खाऊं। 16क्यूंकै मैं थानै केऊं कै जद तांई परमेसर गै राज में फसह गो भोजन गो असली मतलब पूरो ना हो'ज्यै मैं इनै दुबारै कोनी खाऊंगा।” 17फेर बण अंगूरां गो कटोरो लेगे परमेसर गो धन्यवाद करयो अर केयो, “इनै लेगे आपसरी में बांटगे पील्यो 18क्यूंकै मैं थानै केऊं कै जद तांई परमेसर गो राज ना आवै जद तांई मैं दाख गो रस अबूं लेगे कदी कोनी पीऊं” 19फेर बण रोटी ली अर धन्यवाद कर'गे तोड़ी अर बानै देगे केयो, “आ मेरी देह है झिकी थारै खातर देऊं हूं, मेरी यादगीरी में इंयाई करे करियो।” 20ईं रीति ऊं रोटी गै बाद में दूसरो कटोरो लेगे बानै दियो अर केयो, “ओ कटोरो मेरै खून गै रूप में है झिको थारै खातर बहाइज्यैगो ओ एक नूंअ वायदै गो निसान है। 21पण देखो, मनै धोखै ऊं पकड़ाण आळै गो हात ईं मेज पर है। 22क्यूंकै मिनख गै बेटै गै सागै झिको कीं होणो है बो तो होगे रेसी पण थारै उपर भोत बुरो होवैगो बिं पर झिको बिनै पकड़ासी।” 23आ बात सुणगे बे आपसरी में पूछताछ करण लागग्या कै आपणै माऊं हिस्यो कुण है, झिको ओ काम करैगो।

मोटो कुण?

24फेर चेला में ओ बाद विवाद बी होयो कै म्हारै माऊं कुण मोटो मानिजै। 25यीसू बानै केयो, “दूसरी जातियां गा राजा झिकां पर राज करै अर बां पर हक राखै बे बांगा रूखाळा कुहावै। 26पण थे भिस्या ना बणजाइयो, पण झिको थारै में मोटो है बो छोटै गै बरगो बणै अर झिको प्रधान है बो दास गै बरगो बणज्यै। 27क्यूंकै मोटो कुण है, झिको रोटी खावै बो या झिको खुआवै? मोटो बो कोनी कै झिको खावै। पण मैं थारै बिचाळै दास गै बरगो हूं। 28थे बे हो झिका मेरै हरेक दुख तकलीफ में सागै रेया। 29अर जिस्यो मेरै पिता मनै राज दियो है बिस्यो ही मैं बिं थानै राज देऊं। 30मेरै राज में थे मेरी मेज पर खाओगा अर पिओगा अर सिंघासन पर बेठगे इसराएल गै बारा गोतरां गो न्याय करोगा।”

पतरस गै नटणै गी बात

(मत्ती 26:31-35; मरकुस 14:27-31; यूहना 13:36-38)

31फेर यीसू बोल्यो, “समौन, हे समौन। जिंया किसान कणक नै साफ करै है इंया ही थारै सारा गी परीक्सा लेण गी सैतान आग्या परमेसर ऊं मांगी है। 32पण मैं तेरै खातर पराथना करी है कै तेरो बिस्वास ना जांतो रेवै अर जद तूं पाछो आवै तो आं भाईयां गो ई बिस्वास तकड़ो करी।” 33समौन केयो, “हे प्रभु, मैं थारै सागै जेळ तो के मरण नै बी तैयार हूं।” 34बण केयो, “हे पतरस, आज कुकड़ गै बांग देण ऊं पेलां तूं मेरो तीन बार ओ केगे इनकार करैगो कै मैं इनै कोनी जाणूं।”

बटुओ झोळी अर तलवार

35फेर यीसू बानै केयो, “जद मैं थानै बिना बटुआ, झोळी अर बुंटा गै घाल्या तो थानै कोई चीज गी कमी होई ही के?” बां जबाब दियो, “कोई चीज गी कमी कोनी होई” 36बण बानै केयो, “पण अब झिकै गै कनै बटुओ अर झोळी है बो बानै लेल्यै अर झिकै गै कनै तलवार ना है बो आपगा कपड़ा बेचगे मोल लेल्यै। 37क्यूंकै मैं थानै केऊं सासतर में ओ लिखेड़ो है कै, ‘बो अपराधियां गै सागै गिणीज्यो,’ आ बात मेरै में होणी जरूरी है क्यूंकै मेरै बारै में लिखेड़ी बातां पूरी होण पर है।” 38चेला केयो, “हे प्रभु, देख,” म्हारै कनै दो तलवारां है। बण केयो, “रेण दैयो बस भोत हो'गी, थारै बात समझ में तो आवै कोनी।”

जेतुन गै प्हाड़ पर यीसू गी बात

(मत्ती 26:36-46; मरकुस 14:32-42)

39जद बे बारै निकळगे रोजाना गी तरियां जेतुन प्हाड़ पर गेया अर चेला लारै लारै चाल पड़या। 40बिं जिग्यां पोंचगे बण चेला नै केयो, “पराथना करो जिंऊ ब्यादि में ना पड़ो” 41अर यीसू बाऊं थोड़ी सी दूर जा'गे अर घुटना टेकगे पराथना करण लागग्या। 42हे पिता, “जे थे चावो तो ईं कटोरै नै मेरै कनूं हटा सको, तो बी मेरी नई तेरी ही इच्छा पूरी होवै।” 43जद बानै एक दूत दिख्यो झिकै बानै सामरथ दी। 44बो घोर संकट में ब्याकुल होगे ओर बी जादा हिरदय ऊं पराथना करण लागग्या अर बांगो पसीनो खून गै टपका गी तरियां जमीन पर गिरण लागरयो। 45जद बो पराथना कर'गे खड़यो होयो अर चेला गै कनै आ'गे देख्यो तो बे उदासी गै मारेड़ा सूत्या पड़या। 46अर बानै केयो, “सोवो क्यामी हो? ऊठज्यो अर पराथना करो कै ब्यादि में ना पड़ो।”

यीसू नै धोखै ऊं पकड़णो

(मत्ती 26:47-56; मरकुस 14:43-50)

47बो केण लागरयो कै लोगां गी एक भीड़ आई अर सारा ऊं आगै आगै बांगो बारा चेला माऊं एक चेलो यहूदा आण लागरयो बो बानै नै चूमण खातर कनै आयो। 48जद यीसू बिनै केयो, “हे यहूदा, तूं चूमो लेगे मिनख गै बेटै नै पकड़ासी के?” 49बिंगै चेला देख्यो कै के होण आळो है जद बां केयो, “हे प्रभु, म्हे तलवार चलावां के?” 50जद एक चेलै यीसू गै बोलण ऊं पेलां ई मुख्य याजक गै दास गो तलवार ऊं सजो कान उड़ा दियो। 51ईं पर यीसू केयो, “बस भोत हो'गी कोई हद'ई होवै।” अर बिंगो कान हात लगागे पाछो जोड़ दियो। 52बां मुख्य याजकां अर मिन्दर गै पेरेदारां गै अधिकारियां नै अर पंचायती नेता झिका बिंगै उपर चढण लागरया बानै केयो, “थे मनै डाकू समझगे तलवारां अर लठ लेगे आया हो के? 53जद मैं रोज मिन्दर में थारै सागै रेंवतो जद तो थे मेरै हात ई कोनी लगायो पण ओ टेम थारो है झिको सैतान गो राज है अर अंधेरै गो बासो है।”

पतरस गो नटणो

(मत्ती 26:57,58,69-75; मरकुस 14:53,54; यूहना 18:12-18,25-27)

54फेर बे बिनै पकड़गे मुख्य याजक गै घरे लिआया अर पतरस दूर दूर ई बांगै लारै-लारै आण लागरयो। 55जद बे आंगणै में आग जगा गे सारा भेळा बेठयो तो पतरस बी बांगै बिचाळै जा बैठयो। 56जद बठै एक दासी आग गै चानणै में बिनै बेठयो देख्यो अर बिंगै कानी ताकगे केयो, “ओ ई बिंगै सागै हो” 57पण बो नटग्यो अर बोल्यो, “भेन, मैं तो बिनै कोनी जाणूं” 58थोड़ी सी देर बाद में बिनै कणै'ई ओर देख्यो अर केयो, “तूं बी तो बामूं'ईं है” पतरस फेर नटग्यो कै “मैं तो बामूं कोनी।” 59घंटै कै बाद में एक ओर आदमी जोर देगे केण लागग्यो कै “जरूर ओ बी तो बांगै सागै हो, क्यूंकै ओ गलीली है।” 60फेर बी बो नटग्यो अर केयो, “भाई जी मैं कोनी जाणूं, थे के केण लागरया हो।” बो बोलणई लागरयो इतनै कुकड़ बांग मार दी। 61जद प्रभु मुड़गे पतरस कानी देख्यो तो बिनै प्रभु गी बात याद आ'गी झिकी बण पेलां कैई ही कै, “आज कुकड़ गै बांग मारण ऊं पेलां तूं तीन बारी मनै पिछाणन ऊं नट ज्यैगो।” 62फेर पतरस बारै आ'गे फूट फूट'गे भोत ई रोयो।

यीसू गी बेजती करणी

(मत्ती 26:67,68; मरकुस 14:65)

63झिका आदमी यीसू नै पकड़ राख्यो बे मजाक उड़ा-उड़ा'गे कुटण लागग्या। 64अर बांगी आंख्या ढकगे पूछयो, “परमेसर गी बात बोल'गे बता कै तेरै कण मारी है?” 65बां ओर बी निंदा गी घणी बातां बांगै खिलाफ में कैई।

मोटी पंचायत गै सांमै यीसू

(मत्ती 26:59-66; मरकुस 14:55-64; यूहना 18:19-24)

66जद दिन उग्यो तो लोगां गा बडेरां अर मुख्य याजकां अर सासतरियां भेळा होगे अर बानै आपगी पंचायती नेतावां गी सभा में बुला'गे पूछयो, 67“जे तूं मसी है तो म्हानै बता दे।” बण बानै केयो, “जे मैं थानै केऊंगा तो थे मानोगा कोनी, 68अर जे पूछूं तो जबाब कोनी देओगा। 69पण अबूं मिनख गो बेटो सरवसकतिमान परमेसर गै सजै पासै बेठयो रेवैगो।” 70ईं बात पर सारा केयो, “तो तूं परमेसर गो बेटो है के?” बण बानै केयो, “थे आप ई तो केवो, क्यूंकै मैं परमेसर गो बेटो हूं।” 71जद बां केयो, “अब म्हानै गुआई गी के लोड़ है, क्यूंकै म्हे खुद'ई इंगै मूं ऊं सुण लियो।”

Currently Selected:

लूका 22: BGQ

Highlight

Copy