मट्टि 21
21
यारुसालेम्पि येसु नुःर लॆःॽमिम्पा
(मारकुस ११:१-११; लुका १९:२८-४०; युहान्ना १२:१२-१९)
1हाङ् खोचि यारुसालेम नेन्टाङ्ऎ जाइटुन लोमॆ पङ्पङ्माबिऎ बेठ्फागे लोमॆ ठालबि टाआमि, हाङ् येसुऎ हिप्पा टिङ्खुबाचि गर लोमानुङ् पाहाङ्सुचि, 2“आन्चिना मियॆ गाँवाँबि खाराचॆ। आक्कुबि टामा अक्सि एक्क गाढा उम्मानुङ्न हिक्भुङ्मिम्पा भॆट्टक्चुना। आक्खाचि हेम्पकाम्नॆहाङ् काबि लाटॆटाचॆ। 3हाङ् आसॆ हाङ्स आन्चिना सिमाचि हाङ्ग, ‘इघा गाढा पारभु पाप्डा’ कामानुङ् लोसाचॆ, हाङ् खोसॆ मरक्लन पाङ्हाङ्इकु।”
4निवाँहाङ्मि खानावाँ लोखुबाऎ गरहाङ् इमिम्पा खानावाँ लिखॆॽमाम् लागिन ग लिडॆ यो,
5“सियोनबिहा याॽमिचि लोसाम्नॆ,
‘खाङॆ, आनामि हाङ् आनाबि टामेपाइ,
खो मिःछुॽवा लॆङ्से गाढाबि टामेपाइ। खो एक्क गाढा पासा सक्पि ठाङ्मानुङ् टामेपाइ’।”#यासाइया ६२:११; जाकारिया ९:९
6हाङ् आक्खा हिप्पा टिङ्खुबाचि खाराचिहाङ् येसुऎ लोसिन्टक्न लॆटाचि। 7खोचिऎ गाढानुङ् आक्कमि पासा लाटॆटाचु हाङ् आक्क सक्पि खोचिऎ खाम्मॆ चे डिङुचि हाङ् येसु गाढा सक्पि पेना। 8डिरिक याॽमिचिऎ खो नुःर लॆःॽमाम् लागि खोचिऎ खाम्मॆ चे लाम्फुबि डिङ्पिटुचि हाङ् होइढा याॽमिचिऎ चाइ सिङ्लुङ्बाङ् सेउलासेउलि चेन्टॆटुचि हाङ् लाम्फुबि डिङ्पिटुचि। 9येसु चाइ याॽमिचिम् लुम्पि चुआ हाङ् खोम् गॆअङ्मॆअङ्हा याॽमिचि गरहाङ् कासामि, “डाउडमि पासामि निङ् सङ्पि लिर! पारभु निवाँहाङ्मि निङ्पि टाखुबा आसिका नुङ्मा लॆ! चोप्बाङ सङ्पिटु पेन्खुबा निवाँहाङ् सङ्पि लिर!”#खोम्मिम्पासाम् ११८:२५-२६; १४८:१
10हाङ् येसु यारुसालेम्पि भॆनार हाटाभोरि याॽमिचि चेन्चाआमि हाङ् “ग आसार?” कामानुङ् सिमुचि। 11याॽमिचिऎ गरहाङ् खानावाँ ऎम्पिटुचि, “खो ग गालिलमि नासाराटबाङ् टाडॆ निवाँहाङ्मि खानावाँ लोखुबा येसु रेम।”
येसु निवाँहाङ्मि खिम्पि खॆॽमिम्पा
(मारकुस ११:१५-१९; लुका १९:४५-४८; युहान्ना २:१३-२२)
12येसु निवाँहाङ्मि खिम्मि पालुम्पि खारा हाङ् खोसॆ आक्कुबि बेप्पारा लॆखुबा याॽमिचि चोब्न यिक्पहाक्सुचि। हाङ् याङ् लॆन्खुबाचिम् कक्नाम् हाङ् रप्खॆॽवा इन्चाखुबाचिमि पेन्ठाम् ठाल टेराङ्पिट्टुचि। 13हाङ् खोसॆ आक्खा याॽमिचि लोसुचि, “निवाँनेन् साब्चिराबि गरहाङ् साब्डा, ‘काम् खिम् पारठाना लॆठाम् खिम् लिमा लॆ’#यासाइया ५६:७ टर आन्नॆ ग लुप्चाचिमि खिम् मुडाम्नि!”
14हाङ् आक्कुबि मिक्सुरुम्पा नुङ् लाङ् हुक् फॆन्मिनिहा याॽमिचि निवाँहाङ्मि खिम्पि टाआमि, हाङ् खोसॆ आक्खाचि नुबक्मिट्टुचि। 15टर ढ्या याटाङ्पाचि हाङ् यायेॽमा चिन्खुबाचिऎ खोसॆ यिक्मिम्पा आक्खॆमाहा योम्पक् खाङुचि हाङ् निवाँहाङ्मि खिम्पि पिसाचिऎ “डाउडमि पासामि निङ् सङ्पि लिर” कामानुङ् याकामिम्पा खेमुचिहाङ् एट्टान सोम् खेरामि। 16हाङ् खोचिऎ येसु लोसुचि, “इघा पिसाचि माङ् कामेपाइमिहा आनॆ खेम्मॆ सिकुनॆ?” येसुऎ लोसुचि, “खेम्मे सिकुङ्, माल् आन्नॆ ‘आनॆ पिसाचि हाङ् चाचाचिम् याबाङ् आनाम् निङ् ठेरुकुना’#खोम्मिम्पासाम् ८:२ लोमॆ खानावाँ हानाम्स मान्पाढालॆटिटाम्नॆ?” कामानुङ् खोसॆ खानावाँ ऎम्पिटुचि। 17हाङ् खोसॆ आक्खाचि याइडाउचिहाङ् हाटाबाङ् बेठानिया लोमॆ गाँवाँबि खाराहाङ आक्कबिॽन बासा पोबा।
उम्चा मासिमिम्पा छाराक्फुमि बोटा
(मारकुस ११:१२-१४,२०-२४)
18हाङ् वेन्डाक् लाम्पॆ नाम्स माॽमि हाटा पोट्टि ऎन्टामार येसु सागॆ सिसु। 19खोसॆ लाम्फु कॆक्पि एक्क छाराक्फुमि बोटा खाङु हाङ् उम्चा सिडुवॆ रु कामानुङ् बोटा कॆक्पि खारा, टर खोसॆ आक्कुबि सिङ्बाक् टेःॽन खाङु। हाङ् खोसॆ आक्क बोटा लोसु, “हयॆबाङ् मर आनाबि हानाम्स उम्चा ऎसिसुर!” हाङ् मरक्लन म छाराक्फुमि बोटा सोप्खारा।
20म खाङुचिहाङ् टिङ्खुबाचि आक्खॆसे कासामि, “मान्टक्ल ग बोटा गर सॆॽलन सोप्खॆटुवॆ?” 21आक्खाचि खानावाँ ऎम्पिसॆ लोसुचि, “चाइबान कॆ आन्ना लोकानि, आन्नाबि निवाँयुङ चु हाङ् साङ्का मालॆटानि हाङ्ग, कॆग छाराक्फुमि बोटा माङ् लॆटुङ् म टेः हॆॽनॆ, टर ग पङ्पङ्मा मिउ पॆरॆरॆमाबि हेड्ढिन्टॆ लोसाम्नि भनॆ आक्रक्न लि। 22निवाँयुङ् लॆःॽमानुङ् आन्नॆ पारठानाबि माङ् ङागुकाम्नि आक्क टक्चाकाम्नि।”
येसुमि ढुप्पाट्टमि खानावाँ
(मारकुस ११:२७-३३; लुका २०:१-८)
23येसु निवाँहाङ्मि खिम्मि पालुम्पि भॆना हाङ् खोसॆ चिन्मॆ सिसुचिर ढ्या याटाङ्पाचि हाङ् होइढा टुङ्घङ्पाचि खोबि टाआमिहाङ् सिमुचि, “आनॆ हाम्पिऎ ढुप्पाट्टबाङ् इघा योम्पक् यिगुक्नॆ? आसॆ आना ग ढुप्पाट्ट पिट्टॆ?” 24येसुऎ आक्खाचि खानावाँ ऎम्पिटुचि, “कॆ सङ्क आन्ना एक्क खानावाँ सिम्कानि, कॆ सिम्मिम्पा खानावाँ ऎम्पिटिङ्नि हाङ्ग काङॆ हाम्पा ढुप्पाट्ट टक्चामानुङ् इघा योम्पक् यिगुकुङ् लोमॆ लोखानि। 25लु इसाम्नॆ, युहान्नाऎ बाप्टिस्मा पिॽमॆ ढुप्पाट्ट हाम्पा टक्चाउवॆ? निवाँहाङ्बाङ् रु याॽमिबाङ्?” ग खेमुचिहाङ् आक्खाचि उम्चि टाङ्पा टाङ्पाबि गर कासामि, “ह कानिऎ माङ् लोमॆ? निवाँहाङ्बाङ् लोमा सङ्क मरहाङ्ग आन्नॆ खो मान्ठा निवाँयुङ् मालॆटाम्नॆ टा? कामानुङ् सिमुकि। 26याॽमिबाङ् लोमा सङ्क किसिमा लु, मान्ठाभनॆ चोब्न याॽमिचिऎ युहान्ना निवाँहाङ्मि खानावाँ लोखुबा कामानुङ् मिन्युक्सामि।”
27मसॆ आक्खाचिऎ येसु लोसुचि, “काङकॆ लेसुम्कानि।” हाङ् खोसॆ आक्खाचि लोसुचि, “आक्रहाङ्ग काङॆ सङ्क हाम्पिऎ ढुप्पाट्टबाङ् इघा योम्पक् मुमे पाइकुङॆ लोमॆ लोसानिनि।”
हिप्पा पासामि काठा
28“आन्ना माङ् मिनुकानिहा? एक्क याॽमिमि हिप्पा पासाचि चुआचि। खो टुम्मि पासाबि खाराहाङ् लोसु, ‘पासो, आयु खारॆहाङ् आङ्गुर बारिबि योम्पक् मुसो।’ 29आक्कसॆ लोसु, ‘काङा खॆःॽङानि’ टर एच्छक् डॆङ्पि उम् निवाँ ऎम्पकाहाङ् योम्पक् मुःसि खारा। 30हाङ् आपा होइक पासाबि सङ्क खाराहाङ् आक्रक्न लोसु। आक्कसॆ ‘का खॆःॽङा’ लोसु टर खो योम्पक्पि चाइ माखॆ। 31ह इघा हिप्पा पासाचिबि आसॆ चाइ आपॆ लोमिम्पा खानावाँ खेमुवॆ?” खोचिऎ लोसुचि, “टुम्मिऎ चाइ” हाङ् येसुऎ आक्खा याॽमिचि लोसुचि, “चाइबान कॆ आन्ना लोकानि, यावॆङ्ग लाखुबाचि हाङ् चरॆक्माचि आन्नाबाङ् याॽल निवाँहाङ्मि हाङ्डाम्पि भॆनुक्मि। 32मान्ठाभनॆ बाप्टिस्मा पिक्खुबा युहान्ना आन्ना निवाँनेन् लाम्फु खाङ्मिसि टाआ। आन्नॆ खो निवाँयुङ मालॆटाम्नि टर यावॆङ्ग लाखुबाचि हाङ् चरॆक्माचिऎ निवाँयुङ् लॆटुचि। आक्खा खानावाँ खाङाम्नि हाङ्स आन्ना टाङ्पाम् हिङ्वाबाङ् माऎम्पाकानि हाङ् खो निवाँयुङ् मालॆम्टाम्नि।”
आङ्गुर बारि हाङ् आढिया लाखुबाचि
(मारकुस १२:१-१२; लुका २०:९-१९)
33येसुऎ आक्खाचि लोसुचि, “ह होइक काठा खेमाम्नॆ। एक्क बाखामि टुङ्घङ्पा चुआ। खोसॆ खोम् बाखाबि आङ्गुर टिसु हाङ् गॆअङ्मॆअङ् बॆङु हाङ् आक्कुबि आङ्गुर यिःक्ठाम् एक्क यिःॽलुङ् सङ्क मुसु हाङ् एक्क खोप्रि सङ्क हेबु। हाङ् आक्क आङ्गुर बारि आढिया लाखुबाचि पिट्डाउचिहाङ् खो चाइ होइक हाङ्टेम्पि खाइटा। 34आङ्गुर बिग्मॆ लः साप्पु हाङ् टुङ्घङ्पॆ टाङ्पाम् भाग लासि आढिया लाखुबाचिबि खोम् योम्पक् मुखुबाचि पाङ्हाङ्सुचि। 35टर आढिया लाखुबाचिऎ खोम् योम्पक् मुखुबाचि लाबुचिहाङ एक्क चाइ रगुचि, होइक सेरुचिहाङ् होइक चाइ लुङ्कॽवाऎ डॆःरुचि। 36फेरि टुङ्घङ्पॆ याॽलबाङ् सङ्क डिरिक् खोम् योम्पक् मुखुबाचि पाङ्हाक्सुचि, टर आक्खाचि सङ्क आक्खा आढिया लाखुबाचिऎ याॽलहाचि रक्न लॆटुचि।
37“डॆङ्पि खोसॆ आक्खाचिऎ ‘काम् पासा ग नुःर लॆकुचि’ मिन्से आढिया लाखुबाचिबि उम् पासा पाङ्हाङ्सु। 38टर आढिया लाखुबाचिऎ पासा खाङ्टकुचि हाङ् टाटाङ्पाबि गर कासामि, ‘आक्क ग टुङ्घङ्पामि पासा रे, लु खो सेरुम्ये हाङ् उम् चासुम् ङाबुम्यॆ।’ 39हाङ् खोचिऎ खो लाबुचिहाङ् आङ्गुर बारिबाङ् बाहिरा लाखॆटुचिहाङ सेरुचि।”
40येसुऎ आक्खाचि लोसुचि, “आक्क आङ्गुर बारिमि टुङ्घङ्पा टाहाङ खोसॆ आक्खा आढिया लाखुबाचि माङ् लॆकुचॆ?” कामानुङ् येसुऎ सिमुचि। 41आक्खाचिऎ लोसुचि, “टुङ्घङ्पॆ आक्खा हिङ्वा याॽमिचि सेरुकुचि हाङ् खोम् बारिबि सिमिम्पा ठःका हॆक्मार काम्नुःर खो हाबिखुबा होइढा आढिया लाखुबा याॽमिचि पिकुचि।” 42हाङ् येसुऎ आक्खा याॽमिचि सिमुचि, “माल् आन्नॆ हानाम्स निवाँनॆन् साब्चिराबि साप्मिम्पा खानावाँ मापाडालिटिटाम्नॆ?
‘हाम्पिऎ लुङ्कॽवा ठक्खुबाचिऎ योम्पक् पिॽनि कामानुङ् कॽलाङ्सुचि
म लुङ्कॽवान चोब्बाङ् योम्पक् पिक्खुबा लुङ्कॽवा लिसा।#खोम्मिम्पासाम् ११८:२२-२३
गरक्मा योम्पक् ग पारभु निवाँहाङ्बान लिसा। गरक्मा खानावाँ ग कानिम् लागि आक्खॆॽमॆ खानावाँ रेम।’
43“मसॆ कॆ आन्ना लोकानि, निवाँहाङ्मि हाङ्डाम आन्नाबाङ् ङाप्लाङ् हाङ् उम्चा सिखुबा होइक एक्क हॆॽनि बारेक् पिइ। 44आक्क लुङ्कॽवा सक्पि हेक्खुबा चाइ चेप्सिखॆ हाङ् पक्बःहाङ् आसा सक्पि आक्क लुङ्कॽवा हेड्ढिन् आक्क चिःप्सिकु।”
45ढ्या याटाङ्पाचि हाङ् फारिसिचिऎ आक्क काठा खेमुचि हाङ् ग काठाऎ काङ्कान ठक्मिम्पा लोमॆ वाबुचि। 46मसॆ खोचिऎ येसु लाप्मा मिट्टुचि, टर याॽमिचि नुङ् किसिखारामि, मान्ठाभनॆ याॽमिचिऎ येसु निवाँहाङ्मि खानावाँ लोखुबा लोकुचि।
Currently Selected:
मट्टि 21: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
