यूहन्ना 20

यीशु मरण केआं दुबारी जीण त अपु चेली दर्शण देण

(20:1—21:25)

यीशु मरण केआं दुबारी जीण

मत्ती 28:1-8; मरकुस 16:1-8; लूका 24:1-12

1पता हफ्ते पेहला रोज, जे ऐतवार थिआ, पथवारी ईं मगदला ग्रांए मरियम तेस कुड केईं आई त कुड पुठ दुतो पठ घराओ का। 2त से तठिआ दौड़ दी कइ शमौन पतरसे त तेस चेले केईं आई जेस जुए यीशु सोबी केआं ज्यादा परेम कताथ#यूहन्ना 13:23; 19:35 त तेस जे बोलु, “केनि प्रभु लाश कुड केआं किढ़ कइ कुरेह नीओ असी; त असी पता नेईं कि तेन से कोठि रखो असी।”

3त पतरस त होरा चेला, तेस कुड केईं जे गे। 4से दुहिए यक सात दौड़ुण लगो थिए, पर पता होरा से चेला पतरस केआं अगर निस कइ कुड पुठ पेहले पूज गा। 5त उनकुशी कइ अन्तर टलि झड़ो काई, पर अन्तर ना गा। 6तोउं पतरस तसे पता पता एई कइ तठि पुजा त अन्तर घेई कइ टलि झड़ो काई। 7त से मझीन जे यीशु मगिरि जोई बन्हो थिउ, से टलि जुए नेईं, पर यक होरी जगाई चोफलियेर कइ रखो काउ। 8तोउं होरा चेला जे कुड केईं पेहलाई पुजो थिआ, से बि अन्तर गा त हेर कइ विश्वास किआ कि यीशु जीन्ता भोई गो असा, 9(किस कि तेन्हि अपल तकर धरमे कताब अन्तर जे लिखो असु कि तस मर कइ दुबारी जीण असु, से ना समझतेथ।)

यीशु मरियम जुए मीण

मत्ती 28:9-10; मरकुस 16:9-11

10त से चेले अपु जगाई जे पैटे। 11पर मगदला ग्रांए मरियम रोलती रोलती तठि कुडे भेएड़ खड़ खड़ बिश गई त कुड अन्तर हेरुण जे उनकुशी, 12त हेरु कि दुई स्वर्गेदूत हच्छे चमकिले झिणे लाई कइ जेठि यीशु लाश रखो थी तठि बिशो असे। यक मगिरि कना त होरा तसे खुरे कना 13तेन्हि दुहि बोलु, “जिल्हाणुआ! तु किस रोलुण लगो असी?” त तेन तेन्हि जे बोलु, “कोउं जेईं में प्रभु घिन गो असे त मोउं पता नेईं से कोठि रखो असा।” 14ई बोते बोते से पतूं खिरकी त यीशु तठि खड़िए का, पर तेन से ना पिछाणा 15यीशु तस जे बोलु, “जिल्हाणुआ! तु किस रोलती? केस तोपुण लगो असी?” त तेन से माली समझ कइ तस जे बोलु, “भाई साहबा! अगर तुस तस घिन गो असे, त छने मोउं जे बोलीण दिए कि कोठि रखो असा, त अउं तस घिन घेन्ति।” 16यीशु तस जे बोलु, “मरियमा!” त तेन ता जे खिरक कइ तस जे इब्रानी भाषा अन्तर बोलु, “रब्बुनी” मतलब “ए गुरु”। 17यीशु तस जे बोलु, “मरियमा, अपल तकर अउं स्वर्ग, अपु बोउ केईं जे गोओरा नेईं। मोउं टाइ ना रख। पर घेई कइ में चेली जे बोल कि अउं अपु त तुं परमपिता परमेश्वर केईं खड़िया घेन्ता।” 18त तेन घेई कइ चेली जे बोताउ, “मेईं प्रभु का त तेन मोउं जे ई बोक बोली।”

यीशु चेली जोई मीण

19तेस रोज ब्यादली टेम, जे हफ्ते पेहला रोज थिआ, यहूदी नेती हेर डर कइ चेली दुआर खुणुक कइ कठे थिए। तपल अजगता यीशु एई कइ तेन्के बीचो बुच खड़ भोई गा त बोलु, “परमेश्वर तुसी शान्ति दिए।” 20ई बोते बोते तेन तेन्हि अपु हतेउ त टशवाड़ हराला। तोउं चेले प्रभु हेर कइ खुश भोई गे। 21यीशु फि तेन्हि जे बोलु, “परमेश्वर तुसी शान्ति दिए; जीं बोउए अउं लंघा, तीं अउं बि तुसी लंघान्ता।” 22ई बोल कइ तेन तेन्हि पुठ फुक दिती त तेन्हि जे बोलु, “शुची आत्मा नीए। 23जेन्के पाप तुस माफ कते, तेन्के से पाप माफ भोई घेन्ते। जेन्के पाप तुस माफ ना कते, तेन्के से पाप माफ ना भुन्ते।”#20:23 यीशु चेली शुची आत्मा शिचालती त चलान्ती। तोउं त यीशु तेन्के धे ईं हक दुतो असा। #मत्ती 18:18; 16:19 24पर यीशु इन्हि चेली जुएई मीणे टेम तेन्हि बाराह चेली बुचा यक चेला मतलब थोमा, जेस जे जूंठ बि बोते, से तेन्हि जुए नेओथ। 25त जपल होरे चेले तस जे बोलुण लगे, “असी प्रभु काआ”, त तेन तेन्हि जे बोलु, “जोउं संख अउं अपफ तसे हतेउ मीखी निशाण ना हेरुं, त तसे तेस घा पुठ अपु हतेउ ना छुआउं, तोउं संख अउं विश्वास ना कता।”

यीशु थोमा जुए मीण

26त अठूं रोज पता, चेले यक गी अन्तर दुआर चढ़ि कइ थिए। त थोमा बि तेन्हि जुए थिआ। त यीशु एई कइ तेन्के बीचो बुच खड़ भुई कइ बोलु, “परमेश्वर तुसी शान्ति दिए।” 27तोउं तेन थोमा जे बोलु, “थोमा, एई कइ में टशवाड़ पुठ अपु अंगुली ला। त शक करण छड़ दे त मोउं पुठ विश्वास कर!” 28त थोमे बोलु, “ए में प्रभु, ए में परमेश्वरा!” 29यीशु तस जे बोलु, “ए थोमा! तेईं त मोउं हेर कइ विश्वास किओ असा। पर जेन्हि मोउं हेर कइ ना बल्कि बजन हेरणे मोउं पुठ विश्वास किआ, परमेश्वर तेन्हि सुआ अशुश देन्ता।”

इस कताब लिखणे मकसद

30यीशु हउ बि सुआ चमत्कारे कम अपु चेली के सम्हाणि कर कइ हराले जे इस कताब अन्तर नेईं लिखो। 31पर ई सोब बोक तोउं लिखो असी ताकि तुस ए विश्वास करियेल कि यीशु परमेश्वरे कुआ “मसीह” भो। त तेस पुठ विश्वास कर कइ तसे नओएं बेलि तुसी अमर जीवन मेईंए।

Currently Selected:

यूहन्ना 20: pgg

Highlight

Copy