यूहन्ना 19

राज्यपाल पिलातुस यीशु मरणे सज्जा शुणाण

1त राज्यपाल पिलातुसे यीशु नी कइ चाबुके बइ मडवा। 2त सपाही कांटि के मुकुट गुढि कइ तसे मगिरि जुए ला त यक लम्मु कच्चु काए रंगी कमीर#19:2 ईं रंगे कमीर तपल सद अमीर त राजे टब्बरे मेह्‍णु डबतेथ। डबाई। 3त तस भेएड़ एई कइ मखोल बणाई कइ बोलुण लगे, “ए यहूदी मेह्‍णु के राजीया, तें जइ भो!” त तस पुठ चटाका देन्तेथ।

4तोउं पिलातुसे दुबारी बाहर एई कइ तेन्हि यहूदी नेती जे बोलु, “हेरे, अउं तस दुबारी बाहर अण्हता, ताकि तुसी पता लगाल कि इस केआं ज्यादा डन देण जे तस अन्तर मोउं होर कोई दोष ना मेआ।” 5त यीशु कांटि के मुकुट त कच्चु काए रंगी कमीर डब कइ बाहर निथा त पिलातुसे तेन्हि जे बोलु, “हेरे, से बिचारा मेह्‍णु ई भो।” 6जपल मुख्य पुजारे त देहरे सपाही यीशु हेरु त लियार दी कइ बोलु, “ए क्रूस पुठ ढनाण, क्रूस पुठ।” त पिलातुसे तेन्हि जे बोलु, “तुस अपफ एस घिन कइ क्रूस पुठ ढिनिए, किस कि मोउं एस अन्तर कोई दोष ना मेता।” 7त तेन्हि यहूदी बोलु, “हें बि नियम असा, जेसे बेलि ए मरणे सज्जा पाणे लेएक असा, किस कि एन अपफ जे परमेश्वरे कुआ भुणे दावा किओ असा।” 8जपल पिलातुसे ईं बोक शुणी त सुआ डर गा। 9त यीशु जुए साते मेहेल अन्तर घेई कइ पिलातुसे तस केआं पुछु, “तु कोठियाणि भो?” पर यीशु तस जे कुछ बि ना बोलु। 10त पिलातुसे तस जे बोलु, “तु मोउं जुए किस बोक ना कता? तोउ कि पता नेईं ना तोउ छड़ देणे त क्रूस पुठ ढनाणे हक मोउं केईं असा?” 11यीशु तस जे बोलु, “अगर परमपिता परमेश्वर तोउ मोउं पुठ हक ना दुतो भुन्ताथ त मोउं पुठ तें कुछ बि हक ना थिआ। तोउं त जेन धोखा दी कइ अउं तें हवाले किओ असा, तसे पाप तोउ केआं बि बध असे।”

12ई बोक शुण कइ पिलातुसे तस छड़ देण चहु, पर यहूदी लियार दी दी कइ बोलु, “अगर तु अस छड़ देन्ता त तु रोमी राजा कैसरे मितर ना भो, किस कि जे बि अपफ जे राजा बोता त से कैसरे बराबरी कता।”

13ई बोक शुण कइ पिलातुसे यीशु बाहर घिन गा त चौरुड़ पुठ जे नीआ, जेस जे इब्रानी भाषा अन्तर “गब्बता” बोते त पंची करणे सिंहासन पुठ बिश गा। 14ए बचणे त्योहारे तेयारी करणे रोज थिआ त दिसाई कोई बाराह बजो थिए। त पिलातुसे यहूदी मेह्‍णु जे बोलु, “हेरे, ई भो तुं राजा!” 15पर तेन्हि लियार दी कइ बोलु, “घिन गा, घिन गा त अस क्रूस पुठ ढना।” त पिलातुसे तेन्हि केईआं पुछु, “तुं राजा कि मोउं क्रूस पुठ ढनाण ना?” त मुख्य पुजारे बोलु, “कैसर छड़ दी कइ हें होरा कोई राजा नेईं!” 16तोउं तेन तेन्के मांग मन कइ यीशु सपाही के हवाले किआ, ताकि तस क्रूस पुठ ढनाल।

यीशु क्रूस पुठ ढनाण

मत्ती 27:32-44; मरकुस 15:21-32; लूका 23:26-43

17त यीशु अपु थम जेस पुठ से ढनाण थिआ, कन्‍हे पुठ कर कइ यरुशलेम केआं बाहर तेस जगाह तकर गा, जेस जे “खोपड़ी के जगाह” बोते त इब्रानी भाषा अन्तर “गुलगुता” बोते। 18तठि तेन्हि से त होरे बि दुई मेह्‍णु क्रूस पुठ ढनिए। यक बउंआ कना, यक देहणा कना त यीशु बुच रखा। 19पिलातुसे यक दोषपत्र#19:19 तेस जमाने रोमी अधिकारी दोषी के दोष यक फटे पुठ लिख कइ मगिरि पुठे थम जोई लान्‍तेथ। त सोबी पता लगताथ कि तेस मेह्‍णु मरणे सज्जा किस मेओ असी। लिखवाई कइ क्रूस पुठ लाई छड़ा। तस पुठ लिखो थिउ,

“नासरते यीशु, यहूदी के राजा।”

20ए दोषपत्र सुआ यहूदी मेह्‍णु पढ़ा, किस कि जेस जगाह यीशु क्रूस पुठ ढनाओ थिआ, से शेहरे भेएड़ ईं थी त दोषपत्र बि इब्रानी, लतीनी त यूनानी भाषा अन्तर लिखो थिआ। 21त यहूदी मेह्‍णु के मुख्य पुजारे पिलातुस जे बोलु, “यहूदी मेह्‍णु के राजा” ना लिख, पर लिख कि “एन बोलु कि अउं यहूदी मेह्‍णु के राजा भो।” 22पर पिलातुसे तेन्हि जे बोलु, “मेईं जे लिखो असु, सेईंए रेहतु। तस ना बदिल सकते।” 23यीशु क्रूस पुठ ढनाणे पता, जे झिणे यीशु थिए, तेन्हि नी कइ सपाही चोउर बांट की। यक यक बांट यक यक सपाही जे। त कमीरी बि थी जे मगिरि केआं खुरी तकर बड़ाओ थिआ त तेन्हि अपफ बुच बोलु, “अस चीरीं, पर चले अस लखिर छते कि ए केसे नओं निस्ता”। 24त सपाही तिरुह किउ। ए घटना तोउं भुई, ताकि धरमे कताब अन्तर लिखो बोक कि

“तेन्हि में झिणे अपफ बुच बांटे त में कमीरी जे लखिर छइ”#छुआंरी 22:18

पूरु भो।

25त यीशु ई, त मौसी, क्लोपासे जुएली मरियम, त मगदला ग्रांए मरियम यीशु क्रूसे भेएड़ ईं खड़ खड़ थी। 26यीशु अपु ई त से चेला जेस जुए से होरी केआं ज्यादा परेम कताथ तस अपु भेएड़ खड़ खड़ हेर कइ अपु ईया जे बोलु, “ईया! इढ़िया पता ए तें कुआ भो”। 27त तेस चेले जे बोलु, “ए तें ई भो।” त तढ़िया पता से चेला यीशु ईये ख्याल रखण लगा।

यीशु मरुण

मत्ती 27:45-46; मरकुस 15:33-41; लूका 23:44-49

28तोउं यीशु पता लगा कि परमेश्वरे जेस कम करण जे से लंघो थिआ, से पूरु भोई गो असु, त तेन धरमे कताबे बोक पूरी भुण जे बोलु, “मोउं टिश लगो असी।”#छुआंरी 69:21; 22:15 29तठि सिरके बइ भरो यक लोठु थिउ त तेन्हि स्पंज सिरके जुए सेल कइ जूफे नओएं बुटे लठि बइ तसे आसी जे छइ। 30यीशु से सिरका चखा, तोउं तेन बोलु, “अब में कम पूरु भु।” तोउं से अपु मगिर उनकुशेर कइ मरि गा।

31त किस कि से रोज खास भक्ति करणे रोजे लिए तेयारी करणे रोज थिआ त यहूदी नेते ना चहन्तेथ कि भक्ति करणे रोज कोई क्रूस पुठ ढणेईए रेहियाल त तेन्हि पिलातुस जे तेन्के जंघ टोड़ुण#19:31 क्रूस पुठ टंगो मेह्‍णु अपु जंघ पुठ अपु भार दी कइ सांस नेन्तेथ त कोई कोई दुई टाई रोज तकर बि जीन्ते रेहन्तेथ। त रोमी सपाही केसे झट मरण जे तेन्के जंघ टोड़तेथ, ताकि से सांस ना नी बटियेल त झट मर घियेल। जे छनेअरे की, ताकि भक्ति करणे रोज पेहला ईं तेन्के लाश भीं किढ़ सकियेल। 32त सपाही एई कइ पेहले औती तसे जंघ टोड़ी, तोउं होर तसे बि जे यीशु जुए क्रूस पुठ ढनाओ थिआ। 33पर जपल से तसे भेएड़ आए त हेरु कि से जाई कपल केईआं मर गो असा। त तेन्हि तसे जंघ ना टोड़ी। 34पर सपाही यक बरछी बइ तसे टशवाड़ कोरा त तथा लहु त पुओणि निसुण लगु। 35जेन मेह्‍णु ए सोब काउ#19:35 ए शयद यीशु चेला यूहन्ना भो, तेन ई उगाह दुतो असा, ताकि तुस बि विश्वास करे। तस पता असा कि तसे उगाही सच्ची असी। 36ई सोब तोउं भु ताकि धरमे कताब अन्तर जे बोक लिखो असी कि

“तसे यक बि हलोटा ना टोड़िन्ता।”#छुआंरी 34:20

से पूरु भो। 37होरी जगाई लिखो ई बोक बि पूरी भुई कि

“से तसे धे हेरते, जे तेन्हि कोरो असा।”#जकर्याह 12:10

यीशु कब्र अन्तर छाण

मत्ती 27:57-61; मरकुस 15:42-47; लूका 23:50-56

38अरिमतिया ग्रांए यूसुफ नओएं यक मेह्‍णु थिआ। से बि यीशु मानताथ, पर ई बोक तेन यहूदी नेती केआं नियोख कइ रखो थी किस कि से तेन्हि हेर डरताथ। तेन पिलातुस जे छनेअरे किउ कि यीशु लाश तस नेण दिए। त पिलातुस तसे छनेअरे मनु त से यीशु लाश नेण जे गा। 39तस जुए नीकुदेमुस बि थिआ जे यक रोज ब्यादि टेम यीशु केईं गो थिआ।#यूहन्ना 3:1,2 तेन कोई 30 किलो खुशबुदार गुगुल त चंनण कठोड़े चुर्ण बणो मसाला#छुआंरी 45:8; उजवाण 7:17; घीत 4:14 अपफ जुए नीओ थी। 40तोउं तेन्हि यीशु लाश भीं किढ़ि त यहूदी मेह्‍णु के कब्र देणे रिवाज मुताविक तस पुठ मसाला लाई कइ कपड़े बइ लपेटी। 41जेठि यीशु क्रूस पुठ ढनाओ थिआ, तठि यक बग थिआ, त तेस बग अन्तर यक नोई कुड थी जे कदी कब्र देणे जे उरतो-बरतो नेओथ। 42किस कि यहूदी के भक्ति करणे रोजे तेयार करणे रोज मुकणे बाड़ा थिआ त तेन्हि से तेस कुड अन्तर रखा, किस कि से कुड नीड़ी थी।

Currently Selected:

यूहन्ना 19: pgg

Highlight

Copy