लूका 21
21
गरीब विधवाई दान
1तोउं यीशु हेरु कि अमीर मेह्णु अपु अपु दान दानपात्र अन्तर छाण लगो असे। 2तोउं तेन यक गरीब विधवा बि तेस अन्तर दुई टामे मेलकी#21:2 यहूदिया राज्य अन्तर टामे मेलकी सोबी केआं कम मुल बाड़ा थिआ। छान्ति काई। 3त तेन बोलु, “अउं तुसी जे बोता कि देहरे दानपात्र अन्तर छाणे बाड़ी बुच इन विधवाई सोबी केआं ज्यादु छउ। 4किस कि सोबी अपु अपु सुआ धन अन्तरा दान दुतो असा, पर एन अपु गरीबी अन्तरा बि अपु पूरी कमाई दान अन्तर दी छइ।”
देहेर उजुड़णे भविष्य वाणि
मत्ती 24:1-14; मरकुस 13:1-13
5फि जिखेईं कुछ मेह्णु देहेर बारे बोलु लगो थिए कि से कीं बधिआ बधिआ घोड़ी बइ त मेह्णु दुतो अब्बल अब्बल कीमति चीजी बइ बणो असा।#1 इति 29:1-5 त यीशु बोलु, 6“से रोज बि एन्ते, जेस अन्तर ए जे सोब तुस हेरण लगो असे ए सोब उपीड़ घेन्तु त एठि घोड़ पुठ घोड़ बि ना रेहन्ते।”
बुखता एण बारे निशाण
7त तेन्हि यीशु केआं पुछु, “ए गुरु, ए सोब कपल भुन्तु त ए सोब बोक पूरी भुणे निशाण की की भुन्ते?” 8तेन बोलु, “खबरदार बिशे कि तुसी कोई ना ठगयाल। किस कि में नओं नी कइ सुआ जेईं एन्ते त बोते, ‘अउं सेईंए भो’ त ईं बि बोते कि, ‘से टेम एई गो असा’। तुस तेन्के बोक ना माने। 9जिखेईं तुस लड़ाई त बगावती बारे शुणते त न डरुं, किस कि एन्के पेहले भुण जरूरी असु; पर से टेम झट ना मुकता।”
10यीशु तेन्हि जे हउ बि बोलु, “जाति जाति बुच त राज्य राज्य बुच लड़ाई भुन्ति। 11बोडे बोडे भुंजल एन्ते। जगाई जगाई अकाल एन्ते त महामारी एन्ती। अम्बर पुठ भयंकर घटना भुन्ति त डरौणी डरौणी अवाजे शुणती। 12पर इन्हि सोब बोकी केआं पेहले से में नओं बझई जुए तुसी टान्ते, त भुंजान्ते, त टजे#21:12 मूल भाषा अन्तर “अराधनालय”, जेठि यहूदी मेह्णु परमेश्वरे पूजा कतेथ। एस जगाह अन्तर मेह्णु अपु अपु झगड़े त होरी बोके मुकाण जे एन्तेथ। पता ए जगाह चेली भुंजाणे जगाह बण गई, किस कि चेले बि तठि दुआ प्रार्थना कतेथ। हवाले कइ छते। त अफसर त राजी के सम्हाणि पेश कर कइ तुसी पुठ दोष लान्ते, त से तुसी जेहेल अन्तर छते। 13पर ए तुसी जे में बारे उगाह देणे मौका बणता। 14#लूका 12:11,12तोउं त अपु अपु मन अन्तर सोच रखे, कि तुसी पेहला ईं केआं कुछ बोलुणे चिन्ता ना करीण। 15किस की अउं तुं धे ईं बोक त बुद्धि देन्ता कि जेस कोई दुश्माण काट ना सकते होर ना केसेरी पुग बटते। 16में चेला भुणे बझई जुए तुं अविश्वासी ई बोउ, भाई भेण, होरे रिश्तेदार त मितर बि तुसी भुंजान्ते त सपाही केआं टोवाई छते; बल्कि केसे केसे त मार बि छते। 17में चेला भुणे बझई जुए सोबी जाति मेह्णु तुसी जोई बैर कते। 18पर से तुं अमर जीवन जुए कुछ बि ना कइ बटते। 19तुस ई सोब सेही कइ अपु जीवन बचान्ते।”
यरुशलेम शेहर उजुड़णे बारे भविष्य वाणि
मत्ती 24:15-21; मरकुस 13:14-19
20“जपल परदेशी सेना यरुशलेम शेहर बटेरती, त ईं समझे की इसे उजुड़णे टेम भोई गो असा। 21तिखेईं जे यहूदिया राज्य अन्तर भोल से पहाड़ी इलाके जे नश घिए; त जे यरुशलेम शेहर अन्तर भोल से तठिआ बाहर घेई गे; होर जे बाहर कमाण लगो असे, से तेस अन्तर ना घिए। 22किस कि ए बदला नेणे रोज असा जिखेईं परमेश्वर बदला नेन्ता। जे जे बि नियम अन्तर त भविष्य वक्ते लिखो असु से एन्हि रोज अन्तर पूरा भोई घेन्तु। 23तेन्हि रोजी अन्तर जे जिल्हाणु गभुरवाल असी, त जे गभुर दुध पिआन्ती, तस सुआ दुख भुन्ता, किस कि देश अन्तर सुआ कष्ट भुन्ता त सोबी मेह्णु पुठ परमेश्वरे लेहेर एन्ती। 24से तलवारी बइ मर घेन्ते त कुछ कैद भुई कइ सोब देशे मेह्णु बुच पूज घेन्ते। त जपल तकर गैर यहूदी राज करणे टेम खतम ना भुन्ता, तोउं तकर यहूदिया राज्य#21:24 मुल भाषा अन्तर इठि “यरुशलेम शेहर” लिखो असु। अन्तर गैर यहूदी राज कते।”
मनखे कोईये दुबारी एण
मत्ती 24:29-31; मरकुस 13:24-27
25“दिस, जोसुण त तारे पुठ डरौणे निशाण केते त धरती पुठ हर देशी मेह्णु समन्दरे अवाजे बेलि त बोडे बोडे छल्हारे बेलिए डरी कइ बुरे हाल भुन्ते। 26सुआ डरे बझई जुए त धरती पुठ एणे बाड़े कष्ट हेरते हेरते मेह्णु कांया अन्तर कांया ना रेहन्ती, किस कि अम्बरे सम्हाई शक्ति खतम भोई घेन्ति। 27तोउं से मनखे कुआ बोडी ताकत जुए त पूरे महिमा जुए बदेए पुठ एन्ता हेरते।#निसुणे 40:34; 2 इति 7:1-2; दानियेल 7:13; मत्ती 26:64 28जिखेईं ए सोब बोक भुण लगियेल त विश्वास पुठ सुसुर खड़ भुई कइ इ सोब कष्ट सेहण जे तेयार बिशे; किस कि तुं बचुण नीड़ु असु।”
अंजीरे बुटे कथा
मत्ती 24:32-35; मरकुस 13:28-31
29फि यीशु तेन्हि जे यक कथा लाई। “अंजीरे त होरे बुटी कें धे हेरिण दिए। 30जिखेईं तेन्हि पुठ डुन एन्ते त तुसी पता लगता कि बरशाड़ एई गा। 31तिहांणि जिखेईं तुस ई सोब निशाण हेरियेल त बिझ घिए कि परमेश्वरे राज्य पूरी ताकत जुए एण बाड़ी भोई गो असी। 32अउं तुसी जे बोता कि जपल तकर ई सोब पूरी न भोल, इस पीढ़ी अन्त न भुन्ता। #लूका 11:49-51; 13:34-35; 17:22-25; 19:41-44 33अम्बर त धरती खतम भोई घेन्ति, पर में बोक कदी ना मुकती।”
खबरदार बिशे
34“तोउं त, खबरदार बिशे! ईं ना भोल कि तें मन मौज मस्ती, खाण पीण त जीवन होरी चिन्ताई जुओई सुस्त भोई घियेल। त से रोज तोउ पुठ अचानक एई घियेल। 35किस कि से रोज इस धरती सोबी मेह्णु पुठ इहांणि एन्ता। 36तोउं त खबरदार बिशे त हर वकत प्रार्थना कते रिहे कि तुस एणे बाड़ा कष्ट त दुख केआं बच सकियेल त मनखे कोईये अगर खड़ भुणे लेएक भोई सकियेल।”
37तेन्हि दिनि से दिसाई देहेर अन्तर शिचालताथ त राति बाहर घेई कइ जैतुन नओएं फाट पुठ घेई बिश्ताथ।#लूका 19:47 38त रोज पथवारी सोब मेह्णु तसे बोके शुणुण जे देहेर एन्तेथ।
Currently Selected:
लूका 21: pgg
Highlight
Share
Copy
Want to have your highlights saved across all your devices? Sign up or sign in
© 2023 (Active) Wycliffe Bible Translators, Inc. All rights reserved.
Free Reading Plans and Devotionals related to लूका 21
LUKE AND II THESSALONIANS Zúme Accountability Groups
Connecting With God (Luke)
Through the Bible: Luke
