युहन्‍ना 3

नीकोदेमस येशुला फ्रेचेला ओःङ्क्योक

1नीकोदेमस मीःन पेःक्योक मेःराङ चीग फारीसी मीः एःके। खुङ यहुदीक्याइ महासभाइ मेःन्दा चीग एःके। 2कुःङ्मु चीग खुङ येशुसाःला ओःङ्सी, ओःले खुङला लाःसी, “लोबेन, ङीः सेउए, ख्या कोन्ज्योइ ताङ्क्योक लोबेन इःङे, चीलेलाःना कोन्ज्यो ख्या ङीमु म्याः लाःना ख्याइ पेःक्योक दी चुःन्डुलक्या सुइयाङ पेःजे मीःखुए।”

3येशुइ खुङला लाःसी, “तेःन्दामरा ङाः ख्याला लाःके, सुङ सेम्बा पेःदी माके लाःना खुङगीइ कोन्ज्योइ क्याःल्खाप थोङ्जे मीःखुए।”

4नीकोदेमसकीइ खुङला लाःसी, “मीः काःपु काःल्मीजीक काःन्डुले केजे खुउबा ले? ची ओःखो राःङगीइ आमाइ खोक्पाला फीर्च्या स्युःदी केजे खुउबा?”

5येशुइ लेःन लोदी लाःसी, “तेःन्दामरा ङाः ख्याला लाःके, छ्‍यु रा लालाःम्‍ले माकेथुप सुङ कोन्ज्योइ क्याःल्खापला स्युःजे मीःखुए। 6जुबुलाःम्‍ले केक्योक जुबु इःङे ओःले लाःलाःम्‍ले केक्योक ला इःङे। 7ङाःइ ख्याला सेम्बा पेःदी केकोःउए लाःसुना याःमाछाक माने। 8ल्हाबा काःछ्‍योले डोनीतेबा ओःछ्‍योलेरा डोउए। ख्या ल्हाबाइ के कोःउए, इःनाङ ओःखो काःलाःम्‍ले ओःङ्‍गुबा ओःले काःछ्‍योले डोउबा, ओःखो मेसेए। लाःलाःम्‍ले केक्योक थाम्जेर ओःन्डुबारा ओःङ्‍गुए।”

9नीकोदेमसकीइ खुङला टीःसी, “दीखो काःन्डुले ओःङ्‍खु ले?”

10येशुइ खुङला लाःसी, “ख्या इस्राएलगीइ लोबेन इःङे, ओःलेङ दी ताम मासेबा? 11तेःन्दामरा ङाः ख्याला लाःके, ङीःइ ची सेबा ओःखो लाःकुए, ओःले ङीःइ ची थोङ्दी एःपा ओःखोइ पाङ्बु तेर्कुए, इःनाङ ख्याक्याइ ङीःइ लाःक्योक तामक्याला सेमल्हुक मीलुए। 12ङाःइ ख्याक्याला जाम्बुलीङगीइ ताम लाःकासुना नी ख्याक्याइ सेमल्हुक मीलुए लाःना, ख्याक्याला नाःम्खालीङगीइ ताम लाःसी लाःना काःन्डुले सेमल्हुक लुजे खुडो ले? 13नाःम्खालीङलाःम्‍ले पाःप्‍ती ओःङ्क्योक मीःइ पुःबाहेक सुङ नाःम्खालीङला काःल्दी म्याः। 14काःन्डुले मोशाइ उजाड ठाउँला पीतलगीइ प्रुःलला क्याबा, ओःन्डुलेरा मीःइ पुःङ क्याकोःउए। 15ओःले काःखो काःखोइ खुङखाला सेमल्हुक लुबा, ओःखोइ नाःमाङ मीसीगेन मीःली ज्योर्केन एः। 16चीलेलाःना कोन्ज्योइ जाम्बुलीङगीइ मीःक्याला एःन्डुबा च्याःम्बु पेःसी, खुङगीइ राःङगीइ चीग चीग्रा चीग पुःलाङ तेर्सी, ओः सोङ्‍गारा, खुङखाला सेमल्हुक लुगेनक्या सुङ सीःङ्दाक मेःन्डोगेन एः, इःनाङ ओःखोइ नाःमाङ मीसेगेन मीःली ज्योर्केन एः। 17चीलेलाःना कोन्ज्योइ जाम्बुलीङगीइ मीःक्याला माःताक्पा च्याःङ्जेला राःङगीइ पुःला ताङ्क्योक मीःङे, इःनाङ खुङक्याला सेन्च्युजेला ताङ्क्योक इःङे। 18काःखोइ खुङखाला सेमल्हुक लुउबा, ओःखोला माःताक्पा मेःच्याङेन एः, इःनाङ खुङखाला सेमल्हुक मीलुगेन्दीला तोःङ्लारा माःताक्पा च्याःङ्सीःङ्दी एः, चीलेलाःना ओःखोइ कोन्ज्योइ चीग्रा चीग पुःइ मीःनला सेमल्हुक लुदी म्याः। 19खुङक्याला माःताक्पा एःन्डुले क्याःप्कुए, साङ्बुदी जाम्बुलीङला ओःङ्दी एः, इःनाङ मीःक्याइ साङ्बुला भन्दा नाक्जुकला च्याःम्बु पेःसी, चीलेलाःना खुङक्याइ लेःगा माःइबा एःके। 20माःइबा लेःगा पेःगेन थाम्जेरकीइ साङ्बुला ङ्‍याप्च्युक पेःउए। खुङक्याइ पेःक्योक माःइबा लेःगाक्या साङ्बुला थोङ्‍गुए लाःती जीबाइ साङ्बुला मेःयुङ एः। 21इःनाङ तेःन्दामगीइ लेःगा पेःगेन मीःदी साङ्बुला ओःङ्‍गुए, ओः सोङगारा एःन्डुले खुङगीइ पेःक्योक लेःगा कोन्ज्योला पेःक्योक इःङे लाःकेन ताम प्रष्टारा थोङ्‍गुए।”

येशु रा बप्‍तीस्मा तेर्केन युहन्‍ना

22ओः तीङ्ला येशु रा खुङगीइ योबाक्या यहुदीया क्षेत्रला काःल्सी, ओःले ओःला खुङक्या ङीमु चीङ ङीःमा तेःसी ओःले मीःक्याला बप्‍तीस्मा तेर्सी। 23युहन्‍नाइयाङ सालीमगीइ सुःरला एःक्योक एनोनला बप्‍तीस्मा तेर्तेरा एःके, चीलेलाःना ओः ठाउँला माःङ्बुरा छ्‍यु एःके। ओःला मीःक्या ओःङ्दी तेःकुके ओःले बप्‍तीस्मा लेःङ्‍गुके। 24(ओः तेःकासुथुप युहन्‍नाला चेङाङला कादी म्याःके।)

25ओः तेःकासुरा युहन्‍नाइ योबाक्याइदी मेःराङ चीग यहुदी ङीमु चाङ्मा ओःङेन ठीमगीइ बारेला टाःटेः काःल्सी। 26ओः सोङ्‍गारा, खुङक्या युहन्‍नासाःला काःल्सी ओःले खुङला लाःसी, “लोबेन, यर्दन लुःङ्बाइ फार्केनला एःकासुना ख्या ङीमु मेःराङ चीग मीः एःके। ख्याइ ङीःला ओःखोइ बारेला पाङ्बु तेर्सी। तादो, खुङगीइ बप्‍तीस्मा तेर्तेरा एः, ओःले थाम्जेर खुङसाःला डोदेरा एः।” 27युहन्‍नाइ लेःन लोदी लाःसी, “कोन्ज्योइ मातेरथुप मीःइ चीयाङ ज्योर मीःखुए। 28‘ङाः थार्च्युगेन ख्रीष्ट मीःङे, इःनाङ ङाः नी खुङ भन्दा तोःङ्ला ताङ्क्योक इःङे’ लाःकेन ङाःइ पाङ्बु ख्याक्या राःङगीइरा कोःदी एः। 29नामा सेम्बा माःक्पा सेम्बाइदी इःङे। माःक्पा सेम्बा ङीमु तेःकेन खुङगीइ रोःइ माःक्पा सेम्बाइ के कोःदी खुङ केःदाङ क्याःप्कुए। ओः सोङ्‍गारा, ङाःइ खाम्साङ्बु ताः छाङ्दी एः। 30खुङ बढ्तीदेरा डोकोःउए, इःनाङ ङाःदी घट्तीदेरा डोकोःउए।”

नाःम्खालीङलाःम्‍ले ओःङ्क्योक पुः

31युःलाःम्‍ले ओःङेन्दीदी थाम्जेर भन्दा छ्‍योम्बो इःङे। जाम्बुलीङलाःम्‍ले एःकेन्दी जाम्बुलीङगीइदी इःङे ओःले जाम्बुलीङगीइ तामरा लाःकुए। इःनाङ नाःम्खालीङलाःम्‍ले ओःङेन्दी थाम्जेर भन्दा चोइदी इःङे।

32खुङ राःगीइरा थोङ्क्योक ओःले कोःक्योक पाङ्बु तेर्कुए। इःनाङ खुङगीइ लाःक्योक पाङ्बुला सुइयाङ स्वीकार माःबे। 33इःनाङ काःखोइ खुङगीइ लाःक्योक पाङ्बुला ग्रहण पेःदी एःपा, ओःखोइ कोन्ज्यो तेःन्दाम इःङे लाःकेन तामगीइ दास्यी तेर्कुए। 34काःखोला कोन्ज्योइ ताङ्दी एःपा, ओःखोइ कोन्ज्योइ ताम चीग्रा लाःकुए, चीलेलाःना कोन्ज्योइ खुङला माःङ्बु पेःदी चाङ्मा ला तेर्कुए। 35आबाइ राःङगीइ पुःला च्याःम्बु पेःउए ओःले थाम्जेर थोक खुङगीइ लाःक्पाला तेर्ती एः। 36कोन्ज्योइ पुःला ङीःङेन थाम्जेरला खुङगीइ नाःमाङ मीसीगेन मीःजी तेर्केन एः। काःखोइ खुङगीइ पुःखाला सेमल्हुक मालुबा ओःखोक्याला खुङगीइ नाःमाङ मेःपोःन मीःली मेतेर्केन एः, इःनाङ कोन्ज्योइ क्रोध खुङक्याखाला तेन्दुरा लेप्केन एः।

Currently Selected:

युहन्‍ना 3: SYW

Highlight

Copy