युहन्ना 5
5
पोखरीइ सुःरला नेःपा मीः टाःक्योक
1ओः तीङ्ला यहुदीक्याइ मेःलीङ चीग एःके, ओःले येशु यरुशलेमला काःल्सी। 2यरुशलेमला लुःक मीःन पेःक्योक कोःइ सुःरला पोखरी चीग एःके, ओःखोला हीब्रु तामला बेथस्दा लाःकुए। ओः पोखरीइ छुरफारलेदी ङाथाल दलानक्या एः। 3ओःला मी मेथेङेन्दी, स्याःल्ठाक ओःले चा खोङ्क्योक माःङ्बुरा नेःपाक्या ङ्याःल्दी तेःक्योक ओःङ्गुके। [खुङक्या काःखो तीःजीला पोखरीइ छ्यु योःङ्डो लाःती कुःदी तेःकुके। 4चीलेलाःना तीःजी-तीःजीला प्रभुइ स्वर्गदुत ओःङ्दी पोखरीइ छ्यु योङ्तेर्कुके। छ्यु योःङ्क्योक तीःजीला थाम्जेर भन्दा तोःङ्ला काःखो स्युःबा, ओःखोइदी काःन्डुबारा नाःजा एःनाङ टाःउके।]#५:४ काःजे ग्रीक तामगीइ तोःङ्गीइ कोन्ज्योइ छेला दीखो पद म्याः।
5ओःला लोः खाल चीग रा च्याप्केथुप नेःपा काःल्योक मेःराङ चीग मीः एःके। 6येशुइ ओः मीःला ओःला ङ्याःल्दी तेःक्योक थोङ्सी। ओःले खो माःङ्बुरा लोःमीःजीक नेःपा काःल्योक छोर्ती येशुइ खुङला लाःसी, “ची ख्योला टाःगेन सेम एःपा?”
7ओः नेःपाइ खुङला लाःसी, “हजुर, काःखो तीःजीला छ्यु योःङ्बा ओःजे तीःजीला ङाःला पोखरीला लुतेर्केन मीः सुङ म्याः। ङाः स्युःजे छोल्सुना छोल्सुनारा राःङ्सा मीः ओःला तोःङ्लारा स्युःसीःङ्गुए।”
8ओःले येशुइ खुङला लाःसी, “लोःङ ओःले राःङगीइ तेन खुर्ती डो।” 9ओः तेःकासुरा ओः मीः टाःसी ओःले राःङगीइ तेन खुर्ती डोगाला स्युःसी।
इःनाङ ओः ङीःमु यहुदीक्याइ थाङ सोगेन ङीःमा एःके। 10ओः सोङ्गारा, यहुदीक्याइ गोछेस्योक्याइ ओः टाःक्योक मीःला लाःसी, “तीःरीङ उःइ थाङ सोगेन ङीःमा इःङे, ओःले उःइ छ्येइ ठीम अनुसार ख्योइ तेन खुर्चे मेःयुङे।”
11इःनाङ ओःखोइ खुङक्याला लेःन लोदी लाःसी, “काःखोइ ङाःला टाःच्युबा, खुङगीइरा ङाःला लाःसी, ‘राःङगीइ तेन खुर्ती सुङ।’”
12खुङक्याइ ओःखोला टीःसी, “ख्योला तेन खुर्ती सुङ लाःकेन मीः सु इःङे?”
13इःनाङ राःङला टाःच्युगेन मीः सु इःम्बा, खोइ ङोःसेदी म्याःके, चीलेलाःना मीःइ पोर्चोम एःकारा येशु ओःलाःम्ले काःल्सीःङ्दी एःके।
14ओः तीङ्ला येशुइ खोला कोन्ज्योइ मन्दीरला फ्रेसी ओःले लाःसी, “तादो, ख्यो टाःदी एः। फीर्च्या लाःयो माःबे, मीःङे लाःना ख्योला तोःङ्ला भन्दाङ ताःरुङ माःइबा ओःङेन एः।”
15खोला टाःच्युगेन मीः नी येशु इःङेन दुबा लाःती ओः मीःइ यहुदीक्याइ छेस्योक्यासाःला काःल्दी लाःतेर्सी। 16ओः सोङ्गारा, यहुदीक्याइ येशुला तुःक्पु तेर्काला स्युःसी, चीलेलाःना खुङगीइ दी लेःगा थाङ सोगेन ङीःमाला पेःदी एःके। 17इःनाङ येशुइ खुङक्याला लाःसी, “ङाःइ आबाइ तेन्दुरा लेःगा पेःउए। ओः सोङ्गारा, ङाःङ लेःगा पेःदीरा तेःके।”
18दी ताम कोःदी यहुदीक्या ताःरुङ सीःताङगीइ लाःसी, “खोइ ङाःल सोगेन ङीःमाला लेःगा पेःजे मेःयुङे लाःकेन ठीमला चीग्रा तोड्तीदी म्याः, इःनाङ कोन्ज्योलाङ राःङगीइ आबा लाःती राःङला कोन्ज्यो च्योःङ्रा जोदी एः। ओःखोला नी सेराकोः।”
कोन्ज्योइ पुःइ आङ्ज्या
19ओः सोङ्गारा, येशुइ खुङक्याला लेःन लोदेरा लाःसी, “तेःन्दामरा ङाः ख्याक्याला लाःके, पुः राःङगीइ चीङ पेःजे मीःखुए, इःनाङ आबाइ ची पेःक्योक थोङ्बा ओःखो चीग्रा पेःउए, चीलेलाःना आबाइ ची पेःबा पुःयाङ ओःन्डुरा पेःउए। 20चीलेलाःना आबाइ पुःला च्याःम्बु पेःउए, ओःले खुङ राःङगीइ पेःदी तेःक्योक थाम्जेर लेःगा पुःला तेङ्तेर्कुए। दी भन्दा छ्योम्बो लेःगा खुङगीइ पुःला तेङ्तेर्केन एः, ओःले ख्याक्या याःमछाक नेकेन एः। 21आबाइ सीक्योकक्याला सोम्बो लोदी नाःमाङ मीसीगेन मीःली तेर्क्योक च्योःङ्रारा पुःयाङ राःङगीइ सेम थेक्योकक्याला नाःमाङ मीसीगेन मीःली तेर्केन एः। 22चीलेलाःना आबाइ सुइदीङ ठीम मेःबेए, इःनाङ थाम्जेर ठीम पेःगेन लेःगा पुःला तेर्ती एः। 23ओः सोङ्गारा, थाम्जेरकीइ आबाला काःन्डुले सेःसा पेःउबा ओःन्डुलेरा पुःला सेःसा पेःगेन एः। इःनाङ पुःला सेःसा मेःबेगेन्दीइ खुङला ताङेन आबालाङ सेःसा मेःबेए।
24ङाः ख्याक्याला तेःन्दामरा लाःके, काःखोक्याइ ङाःइ ताम कोःबा ओःले ङाःला ताङेन्दीला सेमल्हुक लुबा, खुङक्या ङीमु नाःमाङ मीसीगेन मीःली ओःङ्गुए। खुङक्याला माःताक्पा मेःच्याःङेन एः, इःनाङ खुङक्या सीक्योकलाःम्ले मीःलीला काःल्सीःङ्क्योक ओःङ्गुए। 25तेःन्दामरा ङाः ख्याक्याला लाःके, ओः तीःनाम ओःङ्देरा एः ओःले ओः तीःनामदी ओःङ्सीःम्दी ए, ओःले सीक्योकक्याइ कोन्ज्योइ पुःइ के कोःगेन एः, ओःले ओःखोला कोःगेनक्या सेन्ङेन एः। 26चीलेलाःना आबा कोन्ज्यो राःङ ङीमु मीःली एः ओःले ओःन्डुलेरा खुङगीइ राःङगीइ पुःलाङ मीःली तेर्केन आङ्ज्या तेर्ती एः। 27ओःले कोन्ज्योइ खुङला ठीम पेःगेन आङ्ज्या तेर्ती एः, चीलेलाःना खुङ मीःइ पुः इःङे। 28ख्याक्या ङाःइ ताम कोःदी याःमाछाक माने चीलेलाःना ओः तीःनाम ओःङ्देरा एः, ओः तीःनामला थाम्जेर सीक्योक मीःक्याइ मीःइ पुःइ के कोःगेन एः, 29ओःले खुङक्या सीक्योकलाःम्ले सोम्बो लोःगेन एः। याःबु लेःगा पेःगेनक्यादी सोम्बो लोःदी नाःमाङ मीसीगेन मीःली ज्योर्केन एः ओःले माःरीक्पा लेःगा पेगेनक्यादी सोम्बो लोःदी दण्ड ज्योर्केन एः।
30ङाः राःङगीइ नी चीङ पेःजे मीःखु। कोन्ज्योलाःम्ले ङाःइ ची कोःबा, ओःखोरा ठीम ङाः पेःगे, ओःले ङाःइ पेःक्योक ठीमदी डीक्पु एः, चीलेलाःना ङाः राःङला सेम थेक्योक च्योःङ्रा मेःबेए, इःनाङ ङाःला ताङेन्दीला सेम थेक्योक च्योःङ्रा लेःगा पेःउए।
31ङाः राःङगीइ चीग्रा ङाःइ बारेला पाङ्बु तेर्सी लाःना ङाःइ पाङ्बुला तेःन्दामगीइदी लाःती सुइयाङ मेःलाःपए। 32इःनाङ ङाःइ बारेला पाङ्बु तेर्केन्दीदी आबा कोन्ज्योङ इःङे ओःले खुङगीइ ङाःइ बारेला ची लाःपा, ओःखो थाम्जेर तेःन्दाम इःङे लाःती ङाःइ छोर्ती एः।
33ख्याक्याइ बप्तीस्मा तेर्केन युहन्नासाःला ताम कोःजेला मीःक्याला ताङ्सी, ओःले खुङगीइ तेःन्दामगीइ पाङ्बु तेर्ती एःके। 34ङाःइ बारेला मीःक्याइ पाङ्बु तेर्चेला ङाःला मीःक्या कोःक्योक मीःङे, इःनाङ ख्याक्या थार्चे खुज्युक लाःती ङाःइ दी ताम लाःक्योक इःङे। 35युहन्ना नी बार्ती तेःक्योक ओःले चम्कीइतीक्योक छेमी च्योःङ्रा साङ्बु एःके, ओःले ख्याक्याइ इःक्पु चीगकीइ लागी खुङगीइ साङ्बुला केःदाङ पेःजेला सेम पेःसी।
36इःनाङ युहन्नाइ तेर्क्योक पाङ्बु भन्दाङ ताःरुङ छ्योम्बो पाङ्बु ङाः ङीमु एः। ङाःइ आबाइ ङाःला पेःजेला तेर्क्योक लेःगाक्या ङाःइ पेःदेरा एः ओःले दी लेःगाक्याइरा ङाःइ आबाइ ङाःला ताङ्क्योक इःङे लाःती ङाःइ बारेला पाङ्बु तेर्तेरा एः। 37ङाःला ताङेन आबा राःङगीइरा ङाःइ बारेला पाङ्बु तेर्ती एः। खुङगीइ के ख्याक्याइ नाःमाङ कोःदी म्याः, ओःले खुङगीइ छेन्दा नाःमाङ थोङ्दी म्याः। 38खुङगीइ लेःङ्गोला ख्याक्याइ सेमला मेःज्याए चीलेलाःना ख्याक्याइ खुङगीइ ताङ्क्योक मीःला सेमल्हुक मीलुए। 39ख्याक्या छ्येइ पेज्या याःबुले टोःउए, चीलेलाःना ओःला नाःमाङ मीसीगेन मीःली ज्योर्कुए लाःती ख्याक्याइ ठीवा साल्गुए। ओःले ओःखोरा छ्येइ पेज्याइ ङाःइ बारेला पाङ्बु तेर्कुए। 40इःनाङ नाःमाङ मीसीगेन मीःली ज्योर्चेला ख्याक्या ङाःसाःला ओःङ्जे सेम मेःबेए।
41ङाः मीःक्याइ प्रशंसा पेःज्युक लाःती ङाः सेम मेःबे, 42इःनाङ ख्याक्याइ सेमला कोन्ज्योइ लागी च्याःम्बु म्याः लाःती ङाःइ छोर्ती एः। 43ङाः ङाःइ आबाइ आङ्ज्या ख्योङ्दी ओःङ्दी एः, इःनाङ ख्याक्याइ ङाःला ग्रहण मेःबेए। इःनाङ राःङगीइ आङ्ज्या ख्योङ्दी ओःङेन्दीलादी ख्याक्याइ ग्रहण पेःउए। 44ख्याक्याइ चीग्रा चीग कोन्ज्योलाःम्ले ज्योर्केन प्रशंसाला माःछोल्बा चीगकीइ राःङ्सालाःम्ले प्रशंसा छोल्गुए लाःना ख्याक्या काःन्डुले सेमल्हुक लुजे खुउबा ले?
45एःनाङ ङाः ख्याक्याला ङाःइ आबाइ तोःङ्ला माःताक्पा च्याःङे लाःती टेःम्बा मासाल। ख्याक्याइ रेःवा पेःक्योक मोशाइरा ख्याक्याला माःताक्पा च्याःङेन एः। 46ख्याक्याइ मोशाला तेःन्दामरा सेमल्हुक लुक्योक एःना ख्याक्याइ ङाःलाङ सेमल्हुक लुजेके, चीलेलाःना खुङगीइ ङाःइ बारेला प्रुःदी एःके। 47इःनाङ ख्याक्याइ खुङगीइ प्रुःक्योक तामक्याला सेमल्हुक मीलुए लाःना ङाःइ लाःक्योक तामला काःन्डुले सेमल्हुक लुजे खुडो ले?”
Currently Selected:
युहन्ना 5: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
