लुका 8
8
येशुला रोः पेःगेन्दी पेःन्पीःजाक्या
1चीङ ङीःमा तीङ्ला येशु कोन्ज्योइ क्याःल्खापकीइ बारेला याःबु लेःङ्गो टाःम्देरा क्याःसा-क्याःसा ओःले युःल युःलला काःल्सी। चीङ्ङी थाल योबाक्याङ खुङ ङीमुरा काःल्सी। 2हेन्डीक्यालाःम्ले टाःक्योक ओःले नाःजाक्यालाःम्ले टाःक्योक चीङ पेःन्पीःजाक्याङ खुङगीइ तीङ्ला काःल्सी। खुङक्या नाःङ्ला मरीयम मग्दलीनी लाःकेन्दी तीःनथाल हेन्डी क्याःप्ती टाःच्युक्योक पेःन्पीःजाङ एःके; 3हेरोद क्याःल्बुइ नोःर क्युःक्या तागेन्दी खुजासकीइ पेःमे योआन्ना, ओःन्डुलेरा सुसन्ना ओःले राःङ्सा माःङ्बुरा पेःन्पीःजाक्याङ एःके, दीखुङक्याइ येशु ओःले खुङगीइ योबाक्याला नोःरक्या तेर्ती रोः पेःउके।
सेन चुगेन पेदाम
(मत्ती १३:१-९; मर्कुस ४:१-९)
4युःल युःललाःम्ले मीःक्या ओःङ्दीरा तेःसी। माःङ्बुरा मीःक्या रुःप काःल्मीःजीक येशुइ खुङक्याला एःन्डुबा पेदाम लाःसी: 5“मेःराङ चीग मीःइ काःल्दी सीःङ्ला सेन ताप्सी। सेन ताप्सुना ताप्सुनारा चीङ सेनक्या लाःमला लेप्सी ओःले मीःक्याइ नेम्सी ओःले च्याःज्युङ्माक्याइ ओःङ्दी साःतेर्सी। 6काःजे सेनक्यादी तोः चीग्रा एःक्योक तोःरोक सेबीला लेप्सी। ओःला केजेनी केसी, इःनाङ चीःम्बा सेबी म्याःकाराङ काम्दीहाल्तीसी। 7काःजे सेनक्यादी छेर्माङक्याइ पुःङ नाःङ्ला लेप्सी ओःले छेर्माङक्याइ पुःङ ङीमुरा केसी ओःले ओः छेर्माङ्गीइ पुःङ छ्योम्बो काःल्दी ओः पुःङक्याला चीप्चे मातेर। 8ओःले काःजे सेन लाःना याःबु नेमु सेबीला लेप्सी ओःले केदीमाराङ क्याःलेङ ल्हामा गुणा ब्रुम्दो कोःङ्सी।” एःजे लाःमीःजीक येशुइ लाःसी, “काःखोक्याइदी कोःगेन नाम्ज्यो एःपा, ओःखोक्याइ कोःज्युक।”
पेदामगीइ लेःन
(मत्ती १३:१०-२३; मर्कुस ४:१०-२०)
9येशुइ योबाक्याइ खुङला दीखो पेदामगीइ लेःन ची इःङे लाःती टीःसी। 10येशुइ खुङक्याला लाःसी, “ख्याक्यालादी कोन्ज्योइ क्याःल्खाप नाःङगीइ तामक्या सेगेन नावा तेर्ती एः। इःनाङ राःङ्साक्यालादी दी तामक्या पेदाम लाःतीमाराङरा लाःकुएः ओः सोङ्गारा, खुङक्याइ तजे नी तउए तानाङ मेःथोङ एः ओःले कोःजे नी कोःउए कोःनाङ मेसेए।#यशैया ६:९
11दीखो पेदामगीइ लेःन दीखो इःङे, सेन लाःक्योक कोन्ज्योइ ताम इःङे। 12लाःमला लेप्क्योक सेन लाःक्योकदी खुङक्याइ कोन्ज्योइ ताम कोःजे नी कोःउएः, इःनाङ सेमल्हुक लुदी सेन्जे माःज्योर्च्युक लाःती शैतान ओःङ्गुए ओःले खुङक्याइ सेम नाःङ्ले कोन्ज्योइ ताम खेर्तीहाल्तीउए। 13तोःरोक सेबीला लेप्क्योक सेन लाःक्योकदी खुङक्याइ कोन्ज्योइ ताम कोःदी केःदाङ पेःदेरा लेःङ्गुएः इःनाङ ओःखोइदी नाःङ्थुप चार्ङे मेःयोङ्ए। खुङक्याइ सेमल्हुक याःम्बाचीगला चीग्रा ओःङ्गुए ओःले काःबु रा तुःक्पु ज्योर्कासुना सेमल्हुक तोर्कुएः। 14छेर्माङगीइ पुःङला लेप्क्योक सेन लाःक्योकदी खुङक्याइ कोन्ज्योइ ताम नी कोःउए इःनाङ जाम्बुलीङगीइ, नोःर क्युःक्याइ ओःले कीपुइ तुःङालगीइ पेःसुना खुङक्यालाःम्ले चीङ ब्रुम्दो मेःकोःङएः। 15नेमु सेबीला लेप्क्योक सेन लाःक्योकदी मेःन्दा काःजेइ कोन्ज्योइ ताम कोःउएः ओःले ङेरी पेःदी कोःक्योक तामला याःबुले सेमला ज्याउए ओःले ब्रुम्दो माःकोःङ्थुपरा खुङक्या सेमल्हुक लुदी तेःकुएः।
छेमीइ साङ्बु
(मर्कुस ४:२१-२५)
16सुइयाङ छेमी थेप्ती नेकीइ मीउपए, ओःले फाम्री वाःला इप्ती मेःज्याए। छेमी नी खीम नाःङ्ला ओःङेनक्याला साङ्बु ओःङ्ज्युक लाःती थोम्बो ठाउँला ज्याउए। 17एःन्डुलेरा इप्ती ज्याक्योक तामक्या ची काःजे एःपा, ओः थाम्जेर तेङेन्दी एः ओःले उप्ती ज्याक्योक तामक्या ची काःजे एःपा, ओः थाम्जेर साङ्बुला ख्योङेन्दी एः ओःले थाम्जेरकीइ सेगेन एः। 18ओः सोङ्गारा ख्याक्याइ कोःक्योक तामक्याला याःबुले सेम तेर चीलेलाःना सु ङीमु एःपा, ओःखोला ताःरुङ तेर्केन एः, इःनाङ सु ङीमु म्याःपा, ओःखो ङीमु एःक्योककाङ फ्रोगेन एः।”
येशुइ आमा ओःले नोःक्या
(मत्ती १२:४६-५०; मर्कुस ३:३१-३५)
19ङीःमा चीग येशुइ नोःक्या ओःले आमा खुङला फ्रेचेला ओःङ्सी। ओःले मीःक्याइ पोर्चोमगीइ पेःसुना खुङक्याइ येशुला फ्रेचे माःखु। 20मेःराङ चीग मीःइ येशुला लाःसी, “ख्याइ आःमा ओःले नोःक्या ख्याला फ्रेचेला फीला कुःतेःती एः।” 21इःनाङ येशुइ खुङक्याला लाःसी, “कोन्ज्योइ ताम कोःगेनक्या ओःले ङीःङेनक्यारा ङाःइ आःमा ओःले नोःक्या इःङे!”
येशुइ ल्हाबालुजुपला छ्याबे जोक्योक
(मत्ती ८:२३-२७; मर्कुस ४:३५-४१)
22ङीःमा चीग येशु योबाक्याङीःमु टुःला जासी ओःले खुङक्याला येशुइ लाःसी, “उः छोइ फार्केनछ्योले डोगा।” ओःले खुङक्या टुःला जादी डोगाला स्युःसी। 23डोसुना डोसुनारा येशु ङी लोःसी। छोला इःक्पु चीगलारा छ्योम्बो ल्हाबालुजुप ओःङ्सी ओःले छ्युइ हादी टुःला स्युःगाला स्युःसी ओःले खुङक्याला छ्योम्बो काःबु काःल्सी। 24ओः सोङ्गारा योबाक्याइ येशुला लाङ्सी ओःले लाःकाला स्युःसी, “लोबेन, लोबेन, उःक्या नी बीङ्जे छोल्सीःङ्सी।” दीखो कोःदी येशु लाःङ्सी ओःले ओः ल्हाबालुजुपला ओःले छ्युइ हादीला हाप्स्याल तेङ्सी। ओःखोरा तीःजीला ओः ल्हाबालुजुप ओःले ओः छ्युइ हादी छ्याबे तेःसी। 25येशुइ योबाक्याला लाःसी, “खोइ, ख्योक्याइ सेमल्हुक लुक्योक?” खुङक्या जीसी ओःले याःमाछाक्का काःल्सी, ओःले एःन्डुले राःङ राःङलारा ताम लाःकाला स्युःसी, “खुङ सु इःम्बा? खुङगीइ हाप्स्याल तेङ्मीःजीक नी छ्यु रा ल्हाबाइयाङ खुङगीइ ताम ङीःङेन दुबा।”
हेन्डी क्याःप्क्योक मीः टाःक्योक
(मत्ती ८:२८-३४; मर्कुस ५:१-२०)
26येशु ओःले खुङगीइ योबाक्या गालील छोइ फार्केनगीइ गेरासेनसकीइ देसला लेप्सी। 27येशु टुःलाःम्ले पाःप्सुना ओः क्याःसाइ मेःन्दा चीग हेन्डी क्याःप्क्योक मीः खुङला फ्रेचेला ओःङ्सी। ओः मीःइ माःङ्बुरा ङीःमामीःजीक केःला मेःकेःङ्के ओःले खीमलाङ माःतेपा तुःर्साइ#८:२७ तुःर्सा दी तुःर्साक्यादी छ्योम्बो च्यार्का तोःनाङ्ला जोदी एःके। दी तुःर्साक्या मीःक्याइ च्यार्का तोः तुप्ती फुक च्योःङ्रा जोदी एःके। फुकक्याला तेःकेन पेःउके। 28येशुला थोङ्दी खुङगीइ छ्योम्बो के तेङ्सी ओःले खुङगीइ तोःङ्ला खाप्लु क्याःप्तेरा छ्योम्बो केइ लाःसी, “ए येशु, थाम्जेरलेङ छ्योम्बो कोन्ज्योइ पुः, ख्याइ ङाःला ची पेःजे चाल्क्योक? वासी एः, ङाःला तुःक्पु मातेर!” 29येशुइ हेन्डीला मीःलाःम्ले थेङेन आज्ञा तेर्क्योक सोङ्गारा ओः मीःइ एःन्डुबा लाःती एःके। माःङ्बुरा थाङ्मा ओः हेन्डीइ ओः मीःला जुम्दी एःके। च्याल्दाइ खुङगीइ लाःक्पा काङ्बा ताःम्दी ज्यासुनाङ खुङ हेन्डीइ ल्हेइ पेःगासुना च्याल्दा चेतीमाराङ उजाड ठाउँछ्योले छ्योङ्गुके।
30येशुइ खुङला टीःसी, “ख्योइ मीःन ची इःङे?” खुङगीइ लाःसी, “फाउज” चीलेलाःना खुङला माःङ्बुरा हेन्डीक्या क्याःप्ती एःके। 31हेन्डीक्याइ येशु ङीमु वासी पेःसी, “ङीःला अतल कुण्डला#८:३१ अतल कुण्डला अतल कुण्डला हेन्डीक्याला अन्तीम सजाय मातेर्थुप कादी ज्याउए लाःती ठीवा साल्गुके। डोगेन आज्ञा मातेर।” 32ओःलाइ काःङगीइ देपला पोर्चोम चीग फाक्या साःदेरा एःके। ओःले ओः हेन्डीक्याइ येशु ङीमु ओः फाइ पोर्चोमला स्युःगेन आज्ञा लाङ्सी। येशुइ खुङक्याला लाःसी, “सुङ।” 33ओः हेन्डीक्या ओः मीःलाःम्ले थेङ्दी फाक्या नाःङ्ला स्युःसी। ओः तेःकासुरा फाइ पोर्चोम प्य्राःलाःम्ले माःर्ला छ्योङ्देरा काःल्दी छोला ताःप्ती बीङ्दी सीसी।
34एःन्डुबा थोङ्दी फा छोगेनक्या छ्योङ्सी ओःले ओःखो ताम ओः युःलकाःङ ओःले राःङ्सा सुःरकीइ युःलक्याला टाःम्सी। 35माःङ्बुरा मीःक्याइ ची काःल्दी दुबा लाःती ताजेला येशुसाःला ओःङ्सी। तोःङ्ला हेन्डीक्या क्याःप्क्योक मीः ताःसे नावा याःबु काःल्दी केःला केःङ्दी येशुइ काङ्बाइ सुःरला तेःतीरहीतीक्योक खुङक्याइ थोङ्सी। दीखो थोङ्दी खुङक्या माःङ्बुरा जीसी। 36दीखो थोङेनक्याइ ओः मीः काःन्डुले टाःक्योक थाम्जेर ताम राःङ्साक्याला लाःसी। 37ओः तीङ्ला ओः क्षेत्रइ थाम्जेर मीःक्याइ येशुला लाःसी, “ख्या दीलाःम्ले सुङ।” चीलेलाःना खुङक्या माःङ्बुरा जीबा पेःदी एःके। ओः सोङ्गारा येशु लोःदी डोजेला टुःला जासी। 38ओः तेःकासु हेन्डीक्या तेङ्क्योक ओः मीःइ येशुला वासी पेःदी लाःसी, “हजुर ङाःलाङ ख्याइ ङीमुरा खेर्ती सुङ।” इःनाङ येशुइ खुङला एःन्डु लाःती ताङ्सी, 39“ख्या राःङगीइ खीमला सुङ ओःले कोन्ज्योइ ख्याला ची पेःदी एःपा, ओः ताम राःङ्साक्याला लोःप।” येशुइ खुङला पेःक्योक तामगीइ बारेला ओः मीःइ युःलकाःङरा लाःतेरा काःल्सी।
याइरसकीइ पोःमो ओःले मेःन्दा चीग नेःपा पेःन्पीःजा
(मत्ती ९:१८-२६; मर्कुस ५:२१-४३)
40येशु लोःदीमाराङ ओःङ्गासुना मीःइ पोर्चोमगीइ खुङला तोःङ्ज्याङ पेःसी, चीलेलाःना खुङक्या खुङला कुःदी तेःती एःके। 41याःम्बा चीग तीङ्ला याइरस लाःकेन मेःराङ चीग यहुदीक्याइ जोम्साखीमगीइ छेस्यो मीः ओःङ्दी येशुइ तोःङ्ला पीमु चुदी वासी पेःदी लाःसी, “ङाःइ खीमला ओःङ्तेर। 42चीलेलाःना ङाःइ लोः चीङ्ङीइ चीग्रा चीग पोःमो सीजे छोल्दी एः।” खुङगीइ वासी कोःदी येशु खुङ ङीमु काःल्सी। येशु डोदेरा पेःगासुना मीःक्याइ खुङला छ्योसीःलेरा फुल्देरा एःके।
43ओः मीःइ पोर्चोमला लोः चीङ्ङीमीःजीक ठा डोगेन नाःजालाःम्ले तुःक्पु ज्योर्क्योक मेःराङ चीग पेःन्पीःजाङ एःके। खुङला काःखोइयाङ टाःच्युदी म्याःके।#८:४३ चीङ छ्येइ पेज्याक्याला एःन्डुबा प्रुःदी एः “खुङगीइ एःक्योक नोःर क्युःक्या मेन मेन्ज्युइ लागी सीःङ्नाङ काःखोइयाङ खुङला टाःच्युदी म्याःके।” 44खुङ क्याःपलाःम्ले ओःङ्दी येशुइ केःलाइ सुःरला देसी, ओः तेःकासुरा खुङगीइ ठा डोगेन नाःजा टाःदीहाल्तीसी। 45येशुइ टीःसी, “ङाःला सुइ देबा?” ओःले थाम्जेरकीइ लाःसी, “ङाःइ नी देदी म्याः।” ओःले पत्रुसकीइ लाःसी, “लोबेन, ख्याला नी मीःक्याइ पोर्चोमगीइ फुल्देरा एः।” 46इःनाङ येशुइ लाःसी, “मीःङे, काःखोइ ङाःला देक्योकरा इःङे चीलेलाःना ङाःलाःम्ले ल्हे थेङ्दी काःल्क्योक ङाःइ छोर्ती एःके।” 47ताः इःप्ती तेःचे मीःखुए लाःती छोर्मीःजीक ओः पेःन्पीःजा जीबाइ दार्तेरा ओःङ्सी ओःले येशुइ काङ्बा तोःङ्ला पीमु चुसी। खुङगीइ येशुला चीले देबा ओःले खुङ ओः तेःकासुरा काःन्डुले टाःबा ओः ताम थाम्जेरकीइ तोःङ्ला लाःसी। 48येशुइ पेःन्पीःजाला लाःसी, “ख्याइ सेमल्हुककीइ पेःसुना ख्याला टाःच्युदी एः, ताः खाम्साङ्बुले सुङ।”
49येशुइ एःन्डु लाःसुना लाःसुनारा याइरसकीइ खीमले मेःन्दा चीग मीः ओःङ्दी याइरसला लाःसी, “ख्याइ पोःमो नी सीसीःङ्सी, ताः लोबेनला तुःक्पु मातेर।” 50इःनाङ दीखो ताम कोःदी येशुइ याइरसला लाःसी, “ख्यो माःजी, सेमल्हुक चीग्रा लुदो, ओःले ख्याइ पोःमो सेङेन एः।” 51याइरसकीइ खीमला लेप्ती येशुइ पत्रुस, याकुब, युहन्ना ओःले पेःन्पीःजाइ आबा आमाला चीग्रा नाःङ्ला ओःङ्जे तेर्सी ओःले राःङ्साक्या सुलाङ नाःङ्ला स्युःजे मातेर। 52ओःला रुःप काःल्क्योक थाम्जेरकीइ पेःन्पीःजा सीक्योक सोङ्गारा ङुःदी तुःङाल पेःदेरा एःके। येशुइ खुङक्याला लाःसी, “माःङु, खुङ नी ङी चीग्रा लोःदी एः, सीदी म्याः।” 53दीखो ताम कोःदी खुङक्याइ येशुला केःमु क्याःप्सी चीलेलाःना खुङक्याला ओः पेःन्पीःजा सीक्योकरा इःङे लाःती टेःम्बा एःके। 54इःनाङ येशुइ पेःन्पीःजाइ लाःक्पा जुम्दी लाःसी, “ए पीःजा, लोःङ!” 55पेःन्पीःजाइ मीःली फीर्च्या लोःदी ओःङ्सी ओःले ओः पीःजा ओः तेःकासुरा लाःङ्सी। येशुइ लाःसी, “दीखो पेःन्पीःजाला चीङ साःगेन स्याः तेर।” 56पेःन्पीःजाइ आबा आमा याःमाछाक्क काःल्सी। इःनाङ येशुइ खुङक्याला आज्ञा तेर्तेरा लाःसी, “दीखो ताम सुलाङ माःलाःप!”
Currently Selected:
लुका 8: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
