LAGYO: 5

Anania We' Saphira

1Anania ga: mang: ra" byu dayaug we' yao" yham sang myhi" Saphira wa yao: shid' zo: sang: ra" yo myid gaung daqhae: re aung" pye' ako". 2Ngadqere: yao" yham sang myhi" nho: myid vang" ru we' yo phug' ngaui mae" damyo" re yao: yao" qhid' mae" myho" to: yang: dang: ra" gu: re lagyo: qe: lo, khug khyo yeqhaug' byid' ra". 3Petru wa Anania we"- Nao wa yo myid gaung phug' ngaui daqhae: re myho" to" ra" khyo" yang Gyang: Lho" Byo re mhug' ava". Ni" gaung pe" mung: Satan re eib nhao: i? 4Ai: yo myid gaung wa maaung: shi" rere: aire nao sang: ra". Aung" pye' thao rere: ai: yo myid gaung phug' ngaui wa ni" ngaui ngad: ra". Ai re nao pe" mung: airu: kad' nae" myid: phyid' i? Nao wa byu re mhug' ru mangad:- Mao"So re mhug' ru ngad: ra"- ga: yao: re ta" ra". 5Anania wa ce: dao: re the' gyo: we' dalhang: dae shid: lang" lo" ra". Ai: khyo re the' gyo" ra" mo, alhab' wa gyai gyo" gyaug: ako". 6Zolau: qe li" yang: Anania mao gaung re pin: dau: yang thab' mung: taung gaung khyo dao: thug' lo" mung: yenyhab' pye' ako".

7Sam yo, qug ko kyo thao re Anania yham sang myhi" wa pe" boe" va" rure maba lo: joe" vao li" ra". 8Ailao" Petru wa ni" shid' tao yo myid gaung aung" ra" ngaui cegu: alhab' ngad va" i?

Ngo re ta" kyo: la,- ga: yao: re lham: myid' ra". Alao" yao: wa ngad va"- aigu: alhab' ngad va"- ga: phaug' tau" ra".

9Airumung: Petru wa Ni" yham sang pho" we' ni" shid' zo: wa Mao"So: Byo re jham" qu" nae" qhid' mae" pe" mung: myid jho" vang" yang: myid: phyid' ko" i? Ni" yham sang pho" re yedao: nyhab' pye' ko" ra" mo, wa ana" kham: dung: nhad' mae joe" lo: avako". Yao: bam wa nao rere: taung gaung khyo dao: thug' lo" li" genae"- ga: ta" ra". 10Ailao" jao" ai: myiqe: wa Petru khyid qao: mae shid: lang" lo" ra". Zolau: qe joe" vao lo: re- ai: myiqe: myhi" shid: jo; rure lomyao mung:- yao: bam wa ai: myiqe: myhi" mao gaung re taung gaung khyo vo; thug' lo" mung: yham sang pho" nhae mae yenyhab' pye' ako". 11Ai: phung: geim" we' ai: khyo re the' gyo" ra" mo, wa gyai gyo" gyaug: ako".

Mug' Pho: Ve, Lho Jham We' Mug' Pho: Mau" Jham

12Lagyo: qe: lo, khyo" yang mo,byu qe: phaung mae mug' pho: ve, lho jham myo: sho' we' mug' pho: mau" jham myo: sho' kad' qhu" ako". Lam khug: ra" mo, alhab' wa- Sholamon zaung yham mae daga" za: ham: phaung: na: ako". 13Mo,byu qe yao: bam re gyai khin" ta" gesho' ngad yang: re:- gaje qe wa khag' re: yao: bam we' mavae" zam" ko" ngad: ra". 14Ngadqere: Mao"So re lam khug: ra" yauggai- myiqe: qe wa ai: phaung mae je yang: laung" li" ra". 15Petru su" lai: lo" re no phyo: qo" mo, damyo" mae yao" bao qab khalhao" qab: zao" vashao: ga:- no phyo: qhug' ra" mo, re hau" mo" khyodang jham khyo dao: thug' li" mung:- yab qo jham phaung: thin jham: dao mae li" lhang" to" ako". Yao: bam airu: kad' ko" ru wa lagyo: qe kad' ra" lo, mau" gai jham: nho: ashi: ngad: ra". 16Yerusalem lhang" gam: vogaung: jham mae" mo,byu qere: no phyo: qhug' ra" mo, makhyang" ra" yui zaung: ra" mo, re jhui" li" ako". Yao: bam alhab' mo, gai shao: lo" byaug: ako".

Lagyo: Qe Yhin" Ru Qhug' Ko" Ra" Khyo

17Ailao"- Khinjaung Yin" we' yao" byin zam" qe ngad: ra" Saduke phung: qe wa lagyo: qere gyai myid nug' li" mung:- yao: bam wa lagyo: qere akhyag yu nae" myid: phyid' ako". 18Aimung: yao: bam wa lagyo: qere taung" yu mung: thaung: khug mae lhaung" to" ako". 19Ngadqere: ai: myi re Asang: nho: mug: lagyo: dayaug wa thaung: kham: dung: jham re phung" pye' yang:- lagyo: qere taung gaung shad' khyo jhui" thug' lo" mung:- 20Naonhaung" ye" lo" ge,- Caung:pa" Yham mae yeye; jo, yang: ce: kao so' daui: ra" khyo asag' khyo alhab' re mo,byu qere ta" kyo: ge, ga:- yao: bam re ta" ra". 21Lagyo: qere: mho dao: gyo: mung:- yao: bam wa ne, kao mug: bo" zo" re Caung:pa" Yham khyo vao ye: yang: mho" shid' byid' ako".

Khinjaung Yin" we' yao" nho: byin zam" cao: qe wa Yuda tarha" qe, do, zabphaung kad' nae" qhid' mae" Yuda au: jhaung lau: de, qere khai: zhang" to" ako". Ai: thao yao: bam wa- lagyo: qere yao: bam: qhid' kheim: khyo jhui" vao li" nae" qhid' mae" amyin" byid: yang: thaung: khyo nhao: ke' ako". 22Ngadqere: gug: gam gyezug: qe joe" ye: ko" re- yao: bam wa thaung: khug mae lagyo: qere maye: myao gelao" tarha" qe, do, phung: khyo dam: tug' lo mung:- 23Ngonhaung" thaung: khyo joe" ye" re- thaung: kham: dung: wa tang tang za: pyid' to" ru we' zaung" mo, re: kham: dung: re nyang" za: zaung" na ko" rure ngonhaung" yemyao:- ngadqere: ngonhaung" thaung: kham: re yephung" ke' re akhug mae khag' rere: mathe' myao- ga: lau thoe lota" kyo" ako". 24Khin jaung qi: qe we' Caung:pa" Yham gug: gam gyezug: qe wa ce: dao: re the' gyo: gelao"- ce: lagyo: qe wa pe" boe" vako" laug i? ga: mug' ako". 25Ai: thao byu dayaug joe" li" mung:- Tae" gyo" qu" ge,- naonhaung" thaung: mae lhaung" to" ra" byu qe wa Caung:pa" Yham mae mo,byu qere mho" shid' na: ako"- ga: yao: bam re ta" ra". 26Alao" Caung:pa" Yham gug: gam zug: pho" wa yao" gyezo: qe we' thug' ye" lo" mung:- lagyo: qere yedam: jhui" tug' lo: ra". Ngadqere: mo,byu qe yao: bam re laug baui: yang pye' genae" rure gyaug gemung: lagyo: qere maqad maqui" makad' ko" ngad: ra".

27Yao: bam wa Lagyo: qere jhui" vao li" mung:- Tarha" qe, do, phung: qe: qhid' kheim: mae ye; jo, nhao: ako". Khinjaung Yin" pho" wa lagyo: qere dao: myid: jham myid' ra". 28Yao: wa- aiyaug: mang re lao: yang: naonhaung" pe" re: mamho" shid' nae" qhid' mae" naonhaung" re ngonhaung" jhaug' za: amyin" byid' to: va"- ngadqere: qu" ge,- Naonhaung" wa Yerusalem vogaung: geim" mae naonhaung" mho" shid' ra" khyo za: byang" sho' kad' to" avako". Amung: naonhaung" wa yao: shid: ra" xao qug: ngonhaung" au: dao mae vhin nug: ako"- ga: lagyo: qere ta" ra".

29Petru we' lagyo: qe wa- Ngonhaung" wa byu: mho dao: re tho' Mao"So: mho dao: re je: gyo: ca"- ga: phaug' tau" ako". 30Ngonhaung" phug' pho" qe: Mao"So wa naonhaung" yang pyao: zang mae jin" se' pye' ra" Yesu re shid: ru mae" daui: to" li" nhao: ava". 31Israel byumyu" re myid tha" nae" we' yao: bam: qobo khyad' pye' byid' ru qhug' nae" qhid' mae" Mao"So wa yao: re khyad' yu yaug we' au: jhaung khyo" yao" lo, yo shad' mae tau: to' to" ava". 32Ai: khyo jham we' sin: mung: ngonhaung" wa sagse: qe ngad: ra". Mao"So: mung dao: re phug' cao" ra" mo, re byid' ra" Mao"So: jhaung qhu" Gyang" Lho" Byo re: sagse: ngad: ra"- ga: phaug' tau" ako".

33Tarha" qe, do, phung: mae" mo, cedao: re the' gyo: gelao"- gyai nhag' gyo" yo: gemung:- yao: bam wa lagyo: qere se' pye' nug: ako". 34Ngadqere: yao: bam mae" mo,byu qe alhab' mo; yang phug' myao" ra" jham: tung" pho" Gamale ga: mang: ra" Pharishe dayaug wa tarha" qe, do, phung: mae" to" ye; li" mung:- 35Lagyo: qere taung gaung shad' khyo jhui" thug' lo" nae" amyin" byid' ke' yang:- Tarha" qe, do, phung: mae" mo, re- Israel mao:nhaung qe we"- cebam re naonhaung" pe" ru: kad' nae" rure lha" yang: kad' ge,. 36Pe"mung:ga"re qhid' phyao: mataung" myao" shire Thuda ga: mang: ra" yaug wa yao: yao" gaung re au: jhaung qi: dayaug ngad: ga: ta" mung:- thug' li" ra" au:- byu byid yo ko yao" thao cao" ako". Ngadqere: yao: re se' pye' thao re yao" thao cao" ra" mo, wa dayaug dakhyo byo: sin" lo" byaug gemung: yao" mau" zo" baui" lo" byaug: ra". 37Ai: thao re gae gaung: japhin: re gaug: yu: ra" yo, gyo: mae Galile byu Yuda thug' li" mung:- mo,byu qere yao" thao cao" genae" qhid' mae" poe: ra". Yao: re: se' pye' ru qhug' mung: yao" thao cao" ra" mo, wa dayaug dakhyo byo: sin" lo" byaug: ako". 38Airu: mung: naonhaung" re ngo ta" geli"- cebam re naonhaung" akhyag dayu ge,. Yao: bam re sae za: qu" to: ge,- yao: bam yaung: to" ru we' kad' ra" mau" zo" wa xao su byu qemae" qhid: ru ngad: re wa ai wa baui" lo" byaug: li" nae". 39Ngadqere: ai:gu: wa Mao"So mae" ngad: re wa naonhaung" yao: bam re maqo" gai: aung: pye' genae". Naonhaung" wa Mao"So re gye kad' ru doe; li" genae"- ga: ta" ra". Yuda tarha" qe, do, phung: mae" mo, wa Gamale nho: pha,jhi" byid' rure khae: yu: ako". 40Yao: bam wa lagyo: qere khai: vhao" yu mung: yao: bam re be, yang:- Yesu mang re lao: mung: khonhae" re: dadam: kho" kyo: ge, ga: yao: bam re amyin" byid' ako". Ai: thao re yao: bam wa lagyo: qere nhao: ke' ako". 41Lagyo: qe wa Yesu mathao mae qho' phyo' rure kham zo: nae" man" ra" mo, khyo" Mao"So wa yao: bam re sun" yu byid: va" ruyang yao: bam wa ngaui bau" ru we' Yuda tarha" qe,do, mae" thug' lo" ako". 42Ba khao: ba ngo" Caung:pa" Yham mae re: mo, byu qe: yham mae re: yao: bam wa Yesu wa Meshia ngad: ga" ra" Ngaui Bau" Lau Dao: gai re xo' yang: mho" shid' kho" kyo: byid' ako".

Currently Selected:

LAGYO: 5: LHCL

Highlight

Copy