PHAO: THUG' 10
10
Khyag' Phaung"
1-2Ai: thao Asang wa Moshe re kho:kham pho" re yequ" wa,- ngo mug' pho: kad' qhu" ra" au: re Egutu byu qere ngo khoru: ako" asho: boe" nhao: pye' rure naonhaung" yao: zo: qe we' yao: myid: qere naonhaung" qo" ta" kyo: byid' li" genae" qhid' mae" we' yao: bam: phaung gaung: mae ngo ai mug' pho: mau" qo" kad' qhu" nae" qhid' mae" ngo wa kho:kham re we' yao" zug: qere nhag' lam: qao nhao: to: va". Ngo wa Asang ngad: rure naonhaung" alhab' mo, ba: li" genae"- ga: ta" ra".
3Airumung: Moshe we' Arun wa kho:kham jhao" ye: mung:- nao wa ngore lhang: yu nae" khomyhao" joe" sho' ha: na nae" i? Yao: bam ngore qo" caung:pa" geshao:- nga" byumyu" re nhao: ke' wa,.
4Nao xo' yang: ha: na: ngad re wa ne mo" ba ngo wa ni" mung"dan: khyo khyag' phaung" jham re jhui" li" byid: nae".
5Aijham gyai myo: gemung:- myid gaung re bin sho' bam" pye' li" genae". Yao: bam wa lag qu: yang mabe; qheim" pye' ra" gu: ja: khao: ngo" re zo" pye' li" genae"- dang: jo; ra" sag' gae jham re lhao" re: zo" pye' li" genae". 6Yao: bam wa ni" kho:kham kho" mae re- ni" nho: zug: qenho: yham jham mae re: ni" mung" byu qe: yham jham mae re:- byang" jo; li" nae". Yao: bam wa naonhaung" phug' pho" qe myao: qu" ra" ja: tho' jeyang: xo: li" nae" ga: Hebre qenho: Mao"So Asang ta" ra" ein: yao: re yeta" kyo: ge,- ga: ta" ra". Ailao" Moshe wa tug' phao: lo" ra".
7Kho:kham pho" nho: zug: qe wa yao: re- byu ce yaug wa ngonhaung" re khomyhao" joe" sho' qug: khai: byid' na nae" i? Yao: bam: Mao"So Asang re qo" caung:pa" byid: geshao:- Israel byu qere nhao: ke' wa,- Egutu mung" byo; qeim va" rure nao mamyid: beim: i? ga: ta" ako".
8Airumung: Moshe we' Arun re kho:kham pho" jhao" dam: jhui" tug' lo mung:- yao: shid' tao re naonhaung" Mao"So Asang re ye qo" caung:pa" byid' ra". Ngadqere: khyag' za: khag' khag' ye: genae" i? ga: kho:kham pho" myid' ra".
9Moshe wa- ngonhaung" nho: zoshao qe we' mao: zo: qe bobo mung: ngonhaung" alhab' mo, ye: nae" ngad:- ngonhaung" wa ngonhaung" yauggai myiqe zo: qe- ngonhaung" nho: yao- cad' be, jham- nung: jham- re jhui" ye: zai ngad:. Pe"mung:ga"re ngonhaung" wa Asang re nga: yhe' byid' ra" poe yekad' ca" ra"- ga: tau" ra".
10Ailao" kho:kham pho" wa ngo wa naonhaung" yham sang myhi" qe we' zoshao qere khonhae" re: naonhaung" re majhui" lo" nhao nae" ein rure Asang re mang lao: yang: jham tang" ra". Naonhaung" geim lau kad' nae" seim" na ko" ru wa de: de: za: ngad: ava". 11Mangad: nae" naonhaung" nug: re wa- yauggai qe za: ye: mung: Asang re yecaung:pa" gai: ra"- ga: ta" ra". Aimung: Moshe we' Arun wa kho:kham pho" qhid' kheim: mae" khe' thug' pye' ru qhug' ako".
12Ailao" Asang wa Moshe re- khyag' phaung" jham jhui" lo nae" qhid' mae" ni" lo, re Egutu mung" dao khyo tau to' ke' wa,- yao: bam joe" li" mung:- lagqu: yang tang" to: co' ra" yaug yang: jo; ra" gu: ja: khao: ngo" re zo" pye' li" genae"- ga: ta" ra". 13Airumung: Moshe wa yao" zaung: bao" re tau: to' ke' ra". Ailao" Asang wa ba thug' shad' mae" la re ai: mung"dan: dao khyo ai ba ba geim" we' ai myikhyeim hug' nhao: ra". Ne, seim mae wa ai: la: yang khyag' phaung" jham jhui" to: gau ngad: ava". 14Yao: bam wa jham mo" khyo" joe" li" mung: mung"dan: geim" mae thang: jo; ako". Aijham wa khonhae" re: mamyao: qu" ru we' mangad: lao"- Khonhae" re: madam: myao: qu" nae" ngad: ra" myo" thao" ra" khyag' phaung" jham mo" ngad:ako". 15Yao: bam: yang cag' no, sho' myid gaung re bam" pye' ako". Yao: bam wa sag' gae dao mae" shi: bobo yang: lagqu: yang tang" to: co' ra" gu: ja: khao: ngo" re zo" pye' ako". Egutu mung" geim" mae" sag' gae dagae- mangad: lao"- yaug ra" agae dagae mae re: nyhug: ra" ja: pe" daja: re: matang" to: ko" ngad: ra".
16Ailao" kho:kham pho" wa Moshe we' Arun re hin hin za: khai: yu mung: ngo wa ni" shid' tao: nho: Mao"So Asang re we' ni" shid' tao re qobo shad' pye' va". 17Ana" ce dalhang nga" qobo re khyad' pye' byid: mung: ngo mae" ce: shid man" ra" qobo dae re yu: pye' byid: nae" qhid' mae" ni" nho: Mao"So Asang re akyu" mho' byid: la,- ga: ta" ra". 18Moshe wa kho:kham pho" mae" thug' lo" mung: Asang re akyu" mho' ra". 19Aimung: Asang wa ba thug' shad' la mae" gyai thin: ra" ba vao shad' la tha" pye' mung:- ai: la wa jhin khyag' jham re cedao" lo" mung: Tham: ne khyo tug' tao" ke' pye' ra". 20Ngadqere: Asang wa kho:kham pho" re nhag' lam: qao nhao mung:- yao: wa Israel byumyu" qere manhao: ke' ngad: ra".
Mug: Cad'
21Ai: thao Asang wa Moshe re- ni" lo, re mug:gaung khyo tau: to' ke' wa,- ailao" Egutu mung" re no, sang: kyid mug: cad' nghoe' lo" li" nae"- ga: ta" ra". 22Moshe wa yao" lo, re mug:gaung khyo tau: to' ke' lao"- Egutu mung" geim" mae sam ba lam: lam: no, sang: kyid mug: cad' cad' jo; ra". 23Egutu byu qe wa dayaug we' dayaug maqo" jho" myao ngad: ako". Aimung: ai: yo, khyin: gyo: mae dayaug re: yao: yao" yham mae" magao: ngad: ako". Ngadqere: Israel byu qe wa yao: bam na: ra" jo, qo mae bo" bao qo" ako".
24Kho:kham pho" wa Moshe re khai: yu mung:- naonhaung" wa Asang re ye qo" caung:pa" ako". Naonhaung" nho: myiqe: we' zoshao qere lhao" re naonhaung" we' daga" qo" jhui" ye" ra". Ngadqere: naonhaung" yao- cad' be, jham- nung: jham wa cemae na: jo, ca" ra"- ga: ta" ra".
25Moshe wa- Airu lhao" nao wa ngonhaung" re ngaui" xeim: gug'nyhug' jham we' ngonhaung" nho: Mao"So Asang re phad' ngaui" byid' ra" ngaui" xeim: jham ngonhaung" re byid: qo nae"- ga: tau" ra". 26Mangad:- ngonhaung" wa ngonhaung" nho: gug'nyhug' jham re ngonhaung" we' daga" jhui" ye: nae". Dadau: re: manha: to: co' nae". Ngonhaung" Mao"So Asang re caung:pa" rumae ci nae" gug'nyhug' jham re ngonhaung" yao: khyin ca" ra". Ai: khyo majoe" joe" wa yao: re pe" ja" gug'nyhug' yang ngaui" byid: nae" rure ngonhaung" ba nae" mangad:-
27 Asang wa kho:kham pho" re nhag' lam: qao nhao mung: yao: wa yao: bam re manug: nhao: ke' ngad: ra". 28Yao: wa Moshe re- nga" qhid' kheim: mae" thug' lo" wa,- nao re khonhae" re: ngore dadam: myao nhao la,- nao re ngo dam: myao: ra" ba na mae nao shid: li" nae"- ga: ta" ra".
29Moshe wa- nao ta" ru jo: ra". Alao" ngore khonhae" re: madam: the' myao lo nae"- ga: tau" ra".
Currently Selected:
PHAO: THUG' 10: LHCL
Highlight
Share
Compare
Copy
Want to have your highlights saved across all your devices? Sign up or sign in
© Bible Society of Myanmar 2009
