PHAO: THUG' 15

Moshe Nho: Nghaui" caung:

1Ailao" Moshe we' Israel byu qe wa Asang re ce: nghaui" caung" ako".

Ngo wa Asang re Nghaui"caung: nae"- pe"mung:ga"re yao: wa phungbao bo: ra" aung doe; rure qo" yu: to" ava".

Yao: wa myao: jham re we' yao: bam: dao mae zaung: ra" mo, re tham: khug khyo pye' zaui: pye' ava".

2 Asang wa nga" nho: qam: bo: ra" gug: gam byid: yaug ngad: ra".

Yao: wa ngore khyad' yu yaug ngad: ra". Yao: wa nga" Mao"So ngad mung:- ngo wa yao: re caung:khin" byid: nae".

Nga" pho" nho: Mao"So ngad mung:- ngo wa yao" qi" qhang: ra" khyo re nghaui" caung: nae".

3 Asang wa gye sulhe: zug: ngad: ra". Yao" mang wa Asang ngad: ra".

4Yao: wa Egutu gyetab re we' gye myao: lhin" jham re tham: khug khyo pye' zaui: pye' ra".

Gai thao" ra" zug: qe wa Tham: Ne khug mae nab: shid' lo" ako".

5No; ra" tham: wa yao: bam re nhai" pye' ra".

Yao: bam wa athai: khyo laug zang we' dakhyo: nab: lo" ako".

6 Asang we"- ni" lo, yo lo, wa gyaug phug' tho' ra" qam so' ngad: ra".

Aiwa gyevo qere aje, aman" khyug' pye' ra".

7Ni" gyevo qere ni" phung dagu" qam: so' yang aung: pye' ra".

Ni" nhag' yo" ru myishae de; thug' li" mung: yao: bam re khovho re we' dakhyo: nga" pye' ra".

8Tham: dao khyo nao la mad: ke' mung: qid wa myhao sho' bam: do, lo" ako".

Aiwa khinqae we' dakhyo: din: din: ye; li" ako".

Tham: mae" no; thao" ra" jo, qo wa myid kang dam: boe" li" ra".

9Gyevo wa- ngo wa yao: bam re cao" khe' mung: yao: bam re myhi nae" ngo wa yao: bam jo,nho" jham re kho' pye' byid: mung:.

Ngo o: ra" nho" yu: pye' byid: nae".

Ngo wa nga" shae re she: yu mung:- yao: bam qo" ra" gu: alhab' re yu: pye' nae"- ga: ta" ra".

10Ngadqere: Asang nao so' dalhang mad: thug' ke' lao"- Egutu byu qe nab: shid: lo" ako".

Yao: bam wa qu" gyaug qu" lhaung sho' ra" qid mae xa we' dakhyo: nab: lo" ako".

11 Asang we"- so qe: phaung gaung: mae nao we' khag' dau: ra" i? Mug: pho: gyang" lho" rumae nao we' khag' dau: ra" i?

Mug'pho: lo, mau" we' qam: bo: thao" ra" mau" zo" jham re nao we' dakhyo: khag' qo" kad' i?

12Nao wa ni" lo, yo lo, re yheim" ke' mung: myid gaung wa ngonhaung" gyevo qere myug: pye' ra".

13Nao wa naoyao" dao:so: re jhaug' zaug yaug ngad mung: nao khyad' yu va" ra" byumyu" re jhui" ye" ra".

Nao wa ni" qam: so' khyo" yang yao: bam re ni" nho: gyang" lho" ra" mung" khyo jhui" ye" ra".

14Byumyu" qe the' gyo: gemung:- yao: bam wa gyaug: nin" ako".

Philisti byu qe wa gyaug: jheim: byaug ako".

15Edom mung" mae" au: jhaung qe wa gyaug: din: pye' ako".

Moba mung" mae" sulhe: qe wa gyaug: nin" na: ako".

Khanan byu qe wa yao: bam: vae" ra" myid byaug: byaug: ako".

16Gyaug: ru we' din: ru wa yao: bam dao mae gyo" zag: lo" ako".

Asang we"- yao: bam wa ni" qam: so' re myao mung:-

jeim kad' rumae" nao: yang lhoe' ke' byid' ra" ni" byu qe su" lai: lo" gesho'-

gyaug yang: masho: majhin ye; jo; ako".

17Nao wa yao: bam re jhui" vao lo mung:-

Asang we"- ni" yham mo" re nao yao: kad' to" ra"- ni" bam dao mae yao: bam re lonha: to" ra".

18 Asang we"- nao wa apyad ato mae kho:kham ngad: li" nae" ga: nghaui" caung" ako".

Miriam Nho: Nghaui"caung:

19Israel byu qe wa tham: gaung: myid ho yo khyo" su" lai: lo" ako". Ngadqere: Egutu byu qe: gye myao: lhin" jham yao: bam myao: jham we' keim: mo, tham: khyo ye" lo" gelao"- Asang wa qid re jhui" tug' lo mung:- yao: bam re lonhai" pye' ra".

20Arun nho: yao: bai: lapa myhi" Miriam wa yao" lo, be, jhu jao kheim" re yu: yu: ra". Myiqe: alhab' yao" thao cao" mung:- lo, be, thung ngai re be,- yang go" ako". 21Miriam wa- Asang re nghaui" caung: ge,- pe"mung:ga"re yao: wa phungbao: ra" aung doe; rure qo" yu: to" ava".

Yao: wa myao: jham re we' yao: bam: dao mae zaung: ra" mo, re tham: khug khyo pye' zaui: pye' ava"-

ga: yao: bam re nghaui" caung: byid' ra".

Qid Kho:

22Ai: thao Moshe wa Israel byu qere Tham: Ne mae" Shura din"pyad' yo khyo jhui" ye" lo" ra". Ai din"pyad' yo khyo" sam ba su" ye" lo" ako". Ngadqere: qid maqhug' ko" ngad: ra". 23Yao: bam wa Mara ga: mhang" ra" jo, qo khyo joe" ye" ako". Ngadqere: aimae jo; ra" qid wa gyai kho: yang: yao: bam aire maqo" shaug' ngad: ako". Airumung: ai: jo, qo re Mara ga: mhang" ru ngad: ra". 24Mo,byu qe wa Moshe re nyhung mung:- ngonhaung" qid pe" shaug' zai i? ga: myid' ako". 25Moshe wa Asang re kyid kyid ga: akyu" mho' ra". Asang wa yao: re sag' khyaung: anau" dakhyaung: qhu" byid' ra". Airu qid khyo pye' ke' re gai: shaug' ra" qid boe" li" ra".

Aitau mae Asang wa yao: bam re tarha" byid: mung: yao: wa yao: bam rere: jham" qu" ra". 26Yao: wa- Naonhaung" wa ngo jo: ein: myid: jho: ra" khyo kad' mung:- nga" dao: jham re phug' cao" ra" khyo" yang nga" mho dao: re bin sho' tae" gyo: ko" ngad: re wa- Egutu byu qere ngo te' byid' ra" no daja" yang: re: naonhaung" re ngo qobo dae mabyid: nae" ngo wa naonhaung" re no gai byid' ra" yaug Asang ngad: ra"- ga: ta" ra".

27Thao: ba re qid thug' daxe: shid' lam: we' laso' lae" gae nhad' xe gae yaug: ra" Elim khyo joe" ye" ako". Aitau mae yao: bam wa qid yae mae jamu kad' yang: na: ako".

Currently Selected:

PHAO: THUG' 15: LHCL

Highlight

Compare

Copy