PHAO: THUG' 27

Phan

(Phao: Thug' 38.1-7)

1Qhoje; sag yang phan dalam: kad' wa,- aiwa byid khyug ngad qo: ra". Qhang phyao: ngo" daung"- lu phyao: ngo" daung" myhao phyao: sam daung" ngad qo: ra". 2Ai: phan byid khyug mae khyug te' wa,- ai: khyug jham wa phan we' dasho: za: ngad ca" ra". Phan geim" re gyid: bo" yang thab' pye' wa,. 3Myiqe, khae nae" ug' the"- ce' bao"- khug'- anghoe:- myi: ug' the" jham re kad' wa,- ce: zai alhab' re gyid: bo" yang kad' ca" ra". 4Gyid: bo" kyao" re kad' mung: akhyug khyug mae gyid: bo" lo, zaui: akheim" byid lam: te' wa,. 5Ai: kyao" re phan nhad' aqao: mae te' wa,- airulao"- ai wa phan agaung: daqi" khyo myhi nae" ngad: ra". 6Dao nae" gyang: yao: re qhoje; sag' yang kad' mung:- aire gyid: bo" yang thab' pye' wa,. 7Ai: phan re vo; ra" au: qhid' mae" phan shid' shad' geim" mae te' to" ra" lo,zaui: akheim" khug mae jhoe" zaui: to: wa,- 8Bam dao mae ngo nao re qhu" byid' ra" adai: ato' re cao" yang:- phan re sag' khao" yang akhug mae akeim akhaung: to: yang: kad' wa,-

Asang Qhid' Kheim Mae" Zaung Re Kyae" Lhang" To" Ra" Alhaung"

(Phao: Thug' 38.9 20)

9Nga" qhid' kheim: mae" Zaung qhid' mae" vang" re gai: ra" jid: mo" pin" yang kyae" lhang" nae" qe, kyo pin: lung: kad' wa,- mug: thao shad' mae" qe, kyo pin: lung: re qhang phyao: dayo daung" kad' mung:- 10Ai: qhid' mae" gyid: bo" zang pan mae zhaug' ra" gyid: bo" zang shid' xe zang mae ngaui: yang kad' ra" anghoe: we' kyao" jham re kad' wa,. 11Mug: am: shad' mae" re: ai we' dakhyo: kad' wa,- 12Ba vao shad' qhid' mae" qe kyo pin: lung: re qhang phyao: ngo" xe daung" kad' mung:- zang pan daxe we' zang daxe zang kad' wa,- 13Kham: dung: shad' ngad: ra" ba thug' shad' qhid' mae" re: lu phyao: ngo" xe daung" ngad qo: ra". 14-15Kham: dung: lo, kaung:- lo, yo shad' qhid' mae" qe, kyo pin: lung: re daxe: ngo" daung" kad' mung: zang pan sam lam: we' zang sam zang kad' qo: ra". 16Kham: zang yao" qhid' mae" wa- mhai: nyhug- amo, sug' gug ne jham we' qo, mung: thug' nag: shaung: to" ra" jid: mo" pin: gai: yang kad' ra" qhang phyao: shid' xe daung" bo: ra" qe, kyo pin: lung: dalam: ngad ca" ra". Aire zang pan byid lam: we'- zang byid zang: yang zaui" ci nae" ngad: ra". 17Vang" lhang" gam: zang alhab' re ngaui qae khyao" yang jho" xo' to: yang: aijham: anghoe: re ngaui: yang kad' mung: zang pan jham re wa gyid: bo" yang kad' qo: ra". 18Vang" wa qhang phyao: da yo daung" lu phyao: ngo" xe daung"- myhao phyao: ngo" daung" bo qo: ra". Qe,kyo pin: lung: jham re jhid: mo" pin: gai we' kad' mung:- zang pan jham re wa gyid: bo" yang kad' ca" ra". 19Ai: Zaung khug mae ci: ra" zai kug jham alhab' Zaung daung" zang jham alhab'- vang" qhid' mae" zai jham wa gyid: bo" yang kad' ca" ra".

Myikaug' Re Caung: Ra" Khyo

(Xeim: Ngaui" 24.1-4)

20Myi" thao khao: ngo" myi: qo" te' to: sho' myikaug' qhid' mae" gai: thao" ra" zhanlun xau nao jhao" cili" genae" qhid' mae" Israel byu qere amyin" byid: wa,- 21Arun we' yao" yauggai zo: qe wa- Dao: Thang" Ban" qhid' au: mae" qe, kyo pin: lung: taung gaung shad' nga" qhid' kheim: Zaung khug mae myikaug' kad' to: qo: ako". Nga" qhid' kheim: mae ai: myikaug' wa myi" mug: cad' mae" ne, kao joe" sho' de; jo; ca" ra". Israel byu qe we' yao: bam: myid:zo: qe wa ce: amyin" dao: re apyad ato phug' cao" ca" ako".

Currently Selected:

PHAO: THUG' 27: LHCL

Highlight

Compare

Copy