PHAO: THUG' 29

Arun we' Yao" Yauggai Zo: Qere Khin Jaung Qe Khyo" Khoru: Lo, Kai: Byid: Nae" Khyo

(Xeim: Ngaui" 8.1-36)

1Ceru wa Arun we' yao" yauggai zo: qe nga" mau" zo" mae khinjaung qekhyo"- yao: bam: gaung re qhaug' byid: genae" khyo re- nao yao: bam re kad' byid: nae" lo, mau" ngad: ra". Pe" qo mabo: ra" nung: jaung lo: nau" dadau: re we' yao lo: shid' dau: re taung" yu wa,. 2Man" make' lo: gai: thao" ra" jung: gaug cin: man" phaui" yang zhanlun xau we' mug daqhae: kad' wa,- xau we' mangad: lo: daqhae: kad' wa,- daqhae: re xau gyad yang: mug apo: kad' wa,. 3Aijham re gyan dalam: mae ke' mung: nung: jaung lo: we' yao lo: shid' dau: re nao xeim: ngaui" byid' ra" au:- ai: mug jham ngore qhaug' byid: la,.

4Arun we' yao" yauggai zo: qere nga" qhid' kheim: Zaung kham: dung: khyo jhui" li" mung:- caung:pa" thung" we' sin: yang: gaung cid' nhao wa,. 5Ai: thao Arun re khinjaung mai bau: jham ngad: ra"- bau:- bau: qhang- bau: lo, kao:- qao nghoe' pye:- phyid' cui: jham re vhe' wa,. 6Yao: re au: thab' thab' byid: mung: Asang re qhaug' byid' to" ru- ga: lo, yang tung" te' to" ra" qhaug' byid' ru nho: gyang" lho" ra" aso: re ai: au: thab' mae taui" te' byid: wa,. 7Ai: thao gyad byid: nae" xau re yu mung: yao" au: mae vhe' gyad byid: wa,.

8Yao" yauggai zo: qere jhui" li" mung:- yao: bam rere: bau: vhe' wa,. 9Yao: bam phyid' dam: mae phyid' cui: cui: byid: mung: yao: bam au: mae maug kyab' taui" te' byid: wa,. Ceru wa Arun we' yao" yauggai zo: qere nao khoru: lo, kai: byid: nae" ra" khyo ngad: ra". Yao: bam we' yao: bam: myid:zo: qe wa khinjaung qekhyo" apyad ato ngore caung da" byid: nae" ngad: ako".

10Nung: jaung lo: nau" re nga" qhid' kheim: Zaung qhid' au: shad' khyo she: li" mung: Arun we' yao" yauggai zo: qere yao: bam: lo, ai: nung: jaung lo: nau" nho: au: mae kai: genae" qhid' mae" ta" wa,. 11Ai: nung: jaung lo: nau" re nga" gyang" lho" qhid' kheim: Zaung kham: dung: mae se' ge,. 12Nung: jaung lo: nau" nho: sa: daqhae: re yu mung: ni" lo, nyhung' yang phan khyug au: jham mae gyad wa,- ai:thao dang: ra" sa: re phan apan mae vhe' khyo" pye' wa,. 13Ai: thao khug lam khug sang: jham re lham" to" ra" xau alhab'- gai: thao" ra" sang dau- no ce' shid' ce' we' aire lham" to" ra" xau jham re yu mung:- xeim: khyo" phan dao mae ngore ngha" byid: la,. 14Ngadqere: nung: jaung lo: nau" nho: sho:- shoqid au jham re wa jamu taung gaung shad' mae ngha" wa,- ceru wa khinjaung qe: qobo re khyad' pye' byid' ra" xeim: ngad: ra".

15Yao lo: mae" dadau: re she: yu mung: Arun we' yao" yauggai zo: qere ai: yao lo: nho: au: dao mae yao: bam: lo, kai: genae" qhid' mae" ta" wa,. 16Ai: yao lo: re se' yang:- sa: re yu mung: phan: nho: myo, nho byid shad' geim" khyo pyi" sheim: wa,. 17Ai: yao lo: re adau dau je, wa,- khug lam khug sang: we' khyid jham re cid' pye' mung:- au: we' gatau shikhai" jham: nho: adao mae kai: wa,. 18Zo: ve xeim: khyo" ai: yao lo: dau: geim" re phan dao mae ngha" wa,- ce: xeim" nho: ngaui" sheim: wa ngore ngaui nhao: ra".

19Gatau yao lo: rere: she: yu mung:- Arun we' yao" yauggai zo: qere ai: yao: lo: nho: au: dao mae yao" bam: lo, kai: genae" qhid' mae" ta" wa,. 20Aire se' mung:- sa: daqhae: re yu yang: Arun we' yao" yauggai zo: qenho: lo, yo shad' nobyin: mae re: lo, yo lo,- lo, mo" cae: mae re: lo, yo khyid- khyid mo" cae: mae re: gyad byid: wa,- dang: ra" sa: re phan: nho: myo, nho byid- shad' geim" khyo pyi" sheim: wa,. 21Phan dao mae" sa: daqhae: re we' gyad ra" xau daqhae: re yu mung: Arun re we' yao" mai bau: jham mae re: yao" yauggai zo: qere we' yao: bam: mai bau: jham: dao mae vhag' sheim: byid: wa,- ailao" yao: re:- yao" yauggai zo: qere:- yao: bam: mai bau: jham re: ngore qhaug' to" ru ngad: li" nae".

22Yao lo" nho: xau- xau de; ra" shomyi:- khug lam khug sang: re lham" to" ra" xau- gai: thao" ra" sang: dau- xau lham" to" ra" no ce' shid' ce'- lo, yo paung sin jham re lhai" shao: yu wa,. 23Amung: Ngo re ngaui" byid' to: va" ra" gyan khug mae" mug jham mae" daja: mae" dakhai" khai" yu wa,- zhanlun xau we' kad' to" ra" mug dakhai"- zhanlun xau mabo: ra" mug dakhai" mug po: dakhye' re yu wa,. 24Ce: zo:ve alhab' re Arun we' yao" yauggai zo: qe: lo, khug mae ke' byid: mung: gakai: lai jhaung qhu" khyo" aire ngore qhaug' byid: nae" ta" wa,. 25Ai: thao yao: bam: lo mae" aijham re yu mung:- zo:ve xeim: khyo" phan dao mae- phad' ngha" byid' ra" xeim: adao mae ngore phad' ngaui" byid: la,. Ce: xeim" nho: ngaui" sheim wa ngore ngaui nhao: ra".

26Ce: yao lo" nho: qao sho: re yu mung: gakai: lai jhaung qhu" khyo" aire ngore qhaug' byid: la,- ce: gug'nyhug' mae" ce: dau wa ni" qhid' mae" ngad: li" nae".

27Khinjaung re lo, kai: byid' ra" au:- lo, kai" rumae ci: ra" yao lo: nho: qao gao we' paung sin wa gakai: lai jhaung qhu" khyo" ngore qhaug' byid: mung: aire khinjaung qe: qhid' mae" gatau kad' to: wa,. 28Nga" byumyu" qe yao: bam: zam" khug: ra" xeim: re ngaui" byid: ko" au:- ai: gug'nyhug' nho: qao gao we'- paung sin wa khinjaung qe: qhid' mae" ngad: ga" ru ai wa nga" nho: magai: lai" pye' ra" myid: phyid' khyo ngad: ra". Ceru wa Asang ngore mo,byu qeyang byid' ra" jhaung qhu" ngad: ra".

29Arun nho: khinjaung mai bau: jham re yao" myid:zo: qe: lo, mae ab byid: nae" ngad: ra". Airulao"- yao: bam wa ai: mai bau: jham ve, yang xau vhe' sheim: lo, kai: ru qo" khae: yu: genae" ngad: ra". 30Khinjaung khyo" Arun nho: khu mae xo' zaui" ra" Arun" nho: yauggai zo: we' Gyang" Lho" Jo, Qo mae caung da" nae" nga" qhid' kheim: Zaung khyo vao: ye" ra" yaug wa ai: mai bau: jham re nhad' ba lam: lam: ve, nae" ngad: ra".

31Arun we' yao" yauggai zo: qere lo, kai: byid' rumae ci: ra" yao lo: sho: re yu mung:- aire gyang" lho" jo, qo mae xaug' wa,. 32Nga" qhid' kheim: Zaung kham: dung: mae ai: sho: re gyan khug mae dang: jo; ra" mug we' daga" zo: nae" ngad: ako". 33Yao: bam wa yao: bam: lo, kai: byid' rumae caung:pa" thung" we' sin: yang: qobo khyad' rumae ci: ra" sho: re zo: nae" ngad: ako". Aiwa gyang" lho" ru ngad yang: ai: zo:ve re khinjaung qe za: gai: zo" ra". 34Sho: daqhae:- mangad: lao"- mug daqhae: ne, kao re magan: zo" pye' ngad: re- aire ngha" pye' ca" ra". Aire magai: zo: ngad: ra"- pe"mung:ga"re ai wa gyang" lho" ru ngad: ra".

35Ngo nao re amyin" byid' to" ru we' dakhyo: Arun we' yao" yauggai zo: qe: qhid' mae" lo, kai: byid' ra" khyo re nhad' ba tab byang" sho' kad' wa,. 36Qobo khyad' byid' ru qhug' shao:- ngaui" xeim: khyo" nung: jaung lo: dadau: ba khao: ngo" nao ngore ngaui" byid: qo: ra". Ce wa phan re kyang" san: pye' li" nae". Ai: thao aire gyang" lho" nhao nae" qhid' mae" zhanlun xau vhe' gyad byid: wa,. 37Ceru re ba khao: ngo" nhad' ba lam: lam: kad' wa,- airulao"- phan wa bin sho' gyang" lho" byaug mung:- dayaug yaug mangad: lao"- daja: ja: aire the' tin: lao"- gyang" lho" ru nho: qam: so' yang dae te' ru qhug' li" nae".

Ba Khao: Ngo" Xeim: Ngaui" Byid' Ra" Khyo

(Gyaung: Su: 28.1-8)

38Joe" lo nae" ayo, ba khao: ngo" mae dazin bo: ra" yao nau" shid' dau: phan dao mae phad' ngaui" byid' la,. 39Ne, kao re yao dadau:- myi" thao re dadau: xeim: ngaui" byid: la,. 40Sao qhid' mae" yao nau" re zhanlun xau gyang" sam Loga we' lhag' to" ra" jung: gaug cin man" phaui: gai dakyin: je we' ngaui" byid: la,- xeim: khyo" sabyi qang: sam Loga vhe' khyo" pye' nae" ngad: ra". 41Yao nau" shid' dau: ein: dau: re cin man"- zhanlun xau- sabyi qang: jham ne, kao re ngaui" byid' ra" nho" nho" we' myi" thao re xeim: ngaui" byid' la,- ce wa ngo Asang re qhaug' byid' ra" zo:ve ngad mung:- ai ngaui" sheim wa ngore ngaui nhao: ra". 42Joe" lo nae" ayo, alhab' mae ce: phad' ngaui" ra" xeim: re nga" qhid' kheim: Zaung kham: dung: mae" nga" qhid' kheim: mae ngaui" byid: ca" nae" ngad: ra". Aitau mae nga" byu qere ngo li" qhug' mung:- nao re dao: jhau nae". 43Aimae Israel byu qere ngo li" qhug' nae"- nga" qhid' kheim: mae" bao qhui: ra" bo" bao wa ai: jo, qo re gyang" lho" nhao: li" nae". 44Ngo wa ai: Zaung re we' Phan re gyang" lho" nhao nae". Amung: ngo wa Arun we' yao" yauggai zo: qere khinjaung qekhyo" ngore caung da" byid: genae" qhid' mae" kho' to: nae". 45Ngo wa Israel byumyu" phaung mae na nae". Amung: ngo wa yao: bam: Mao"So ngad nae". 46Ngo wa yao: bam re Egutu mung" mae" jhui" thug' lo: ra" yao: bam: Mao"So Asang ngad: rure yao: bam ba: li" genae". Airulao" ngo wa yao: bam: phaung mae qo" na: ra". Ngo wa yao: bam nho: Mao"So Asang ngad: ra".

Currently Selected:

PHAO: THUG' 29: LHCL

Highlight

Copy

Compare