PHAO: THUG' 37
37
Dao: Thang" Ban" Kad' Ra" Khyo
(Phao: Thug' 25.10-22)
1Bezale wa qhang phyao: shid' daung" dathu- lu phyao: dadaung" dathu- myhao phyao: dadaung" dathu bo: ra" Dao: Thang" Ban" re qhoje; sag' yang kad' ra". 2Yao: wa aire akhug shad'- adao shad' mae qhang: yang lham: mung: ayae cao" yang: qhang bug ke' ra". 3Yao: wa aire vo, nae" qhid' mae" qhang kheim" byid kheim" kad' mung: dashad' mae shid' kheim" kheim" byid khyid geim" mae te' ra". 4Yao: wa qhoje; sag' yang dao nae" gyang: yao: kad' mung: aire qhang: yang thab' pye' ra". 5Aimung: Ban" nho: shad' khao: ngo" mae" akheim" jham: mae gyang: yao: ke' to" ra". 6Yao: wa qhang gyang" yang- qhang phyao: shid' daung" dathu- lu phyao: dadaung" dathu bo: ra" apyid' kad' ra". 7Amung: yao: wa apyid' athao mae qhang: yang kherubin: dalam: lam: kad' te' ra". 8Yao: wa ai shid' lam: re apyid' we' dasho: za: boe" sho' kad' ra". 9Kherubin shid' lam: wa apyid' dao mae yao: cao: myo,nho jho" qang mung: ai shid' lam" nho: phyid: to" ra" daung jham wa ai: ban" re nghoe' to" ra".
Mao"So Re Qhaug' Byid' Ra" Mug Kai" Ra" Saboe" Kad' Ra" Khyo
(Phao: Thug' 25.23-30)
10Yao: wa qhang phyao: shid' daung"- lu phyao: dadaung"- myhao phyao: dadaung" dathu bo: ra" jaung: re qhoje; sag' yang kad' ra". 11Yao: wa aire qhang gyang" yang thab' mung: ayae lhang" gam: qhang bug ke' ra". 12Amung: yao: wa danghoe' bo: ra" anhad' re saboe" lhang" gam: kad' te' mung: ai: anhad' ayae re qhang bug ke' ra". 13Yao: wa aire dao nae" qhid' mae" qhang kheim" byid lam: kad' mung: jaung: khyid byid khyug geim" mae te' ra". 14Jaung: re dao nae" gyang: yao: jhoe" zaui nae" akheim" jham re ai: anhad' nhae mae te' ra". 15Yao: wa ai: gyang: yao: re qhoje; sag' yang kad' mung: aire qhang: yang thab' ra". 16Yao: wa jaung: qhid' mae" ban khug' jham ngad: ra" ban the"- keim- zhogam: qid kang: jham we' sabyi qang: qhaug' byid' rumae ci: nae" khug' jham re qhang gyang" yang kad' ra".
Myikaug' Tao" Kad' Ra" Khyo
(Phao: Thug' 25.31-40)
17Yao: wa myikaug' tao" re qhang gyang" yang kad' ra" myikaug' apan re we' alo, rere: qhang: yang kad' ra". Aire athaung: jham- bin: bu" jham bobo yang: shaung: te' to" ra" bin: jham re asho: dazo" za: kad' ra". 18Dashad' mae sam kaung kaung te' mung: khyaug' kaung kad' ra". 19Ai: khyaug' kaung mae" kaung khao: ngo" mae athaung: jham: abu" jham we' bu" jo; ra" almon bin: bu" pad' we' dau: ra" bin: pad' sam pad' shaung: te' ra". 20Myikaug' lo, wa athaung: jham abu" jham we' bu" jo; ra" almon bin: bu" pad' we' dau: ra" bin: bu" pad' byid pad' shaung: te' ra". 21Akaung sam zam" mae" zam" khao: ngo" nho: aqao: mae athaung: dalam: lam: de; ra". 22Athaung: jham- akaung jham we' myikaug' tao" wa qhang gyang" daje, mae" za: kad' to" ru ngad: ra". 23Yao: wa myikaug' tao" qhid' mae" myikaug' nhad' lam: we' aijham nho: qhid' mae" nye, zai" jham- ban the" jham re qhang gyang" yang kad' ra". 24Myikaug' tao" we' yao" zai kug alhab' re kad' nae" qhang gyang" shid' xe joe: re ci yang: kad' ra".
Sheim Nae Ja: Phad' Ngaui" Ra" Phan Kad' Ra" Khyo
(Phao: Thug' 30.1-5)
25Yao: wa sheim nae ja: ngha" nae" qhid' mae" qhoje; sag' yang phan dalam: kad' ra". Aiwa byid khyug ngad mung:- qhang phyao:- dadaung"- lu phyao: dadaung"- myhao phyao: shid' daung" bo: ra". Byid khyug mae" khyug jham rere: sag' pye: dadau: za" yang za: kad' ra". 26Yao: wa aire adao mae re:- ayae byid shad' alhab' mae re:- khyug jham mae re: qhang gyang" yang thab' pye' mung:- lhang" gam: yang: qhang bug ke' ra". 27Amung: yao: wa dao nae" qhid' mae" gyang: yao: shid' yao: jhoe" zaui nae" qhang lo, zaui: akheim" shid' lam: re kad' mung:- ai: ayae kham" qhang bug o mae shid' shad' geim" mae te' ra". 28Yao: wa gyang: yao: re qhoje; sag' yang kad' mung: aire qhang: yang thab' ra".
Gyad Xau We' Nae Pyo: Ja: Phaung: Ra" Khyo
( Phao: Thug' 30.22-38)
29Yao: wa sheim nae pyo" ra" ja: gyad xau re we' dakhyo:- gyang" lho" ra" gyad xau re we' sheim nae pyo" ra" ja: agyang" rere: phaung: yu: ra".
Currently Selected:
PHAO: THUG' 37: LHCL
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Myanmar 2009
