PHAO: THUG' 39

Khinjaung Qe: Qhid' Mae" Mai Bau: Kad' Ra" Khyo

(Phao: Thug' 28.1-14)

1Yao: bam wa- gyang" lho" jo, qo mae caung da" byid' au: khinjaung qe ve; nae" mai bau: jham re anyug mung: ra" khyang- amo, mung: ra" khyang- sug' gug khyang ne qo; yang kad' to" ra" khid: ra" bau: qhang jham kad' ako". Asang: yang Moshe re amyin" byid' to" ru we' dakhyo: yao: bam wa Arun qhid' mae" khinjaung mai bau: jham kad' byid' ako".

2Yao: bam wa bau: lo, kao: re- jid: mo" pin: gai we' kad' mung:- khyang nyug- khyang mo,- sug' gug khyang ne- qhang khyang jham: yang kad' ako". 3Yao: bam wa qhang re be; pye: mung: akhe' ngai ngai nyae" phyid' yu mung: jid: mo" pin: gai we' lhag'- khyang nyug- khyang mo,- sug' gug khyang ne jham we' lhag' ke' yang: kad' ako". 4Qo" gai: taui" te' nae" qhid' mae" bau: lo, kao: qhid' mae" lo, sin vin taui: shid' khe' re kad' mung: shid' shad' geim" mae taui" te' ako". 5Asang: yang Moshe re amyin" byid' to" ru we' dakhyo:- dakhye' ru za: boe" sho' khyang daja" yang za: gyai yaung" sho' qo; to" ra" phyid' cui: re ai: bau: lo, kao: mae te' ako". 6Yao: bam wa u nug' laug jham re kho' nyhang" mung:- qhang kham" kad' te' ako". Ai: dao mae Yaku nho: yauggai zo: daxe: shid' zo" mang jham re thug' kyaung" te' ako". 7Yao: bam wa Asang: yang Moshe re amyin" byid' to" ru we' dakhyo:- Israel byumyu" daxe: shid' kaung re gaung tha" khyo" kad' nae" qhid' mae" aire bau: lo, kao: re taui" ra" lo, sin: taui: mae te' ako".

Qao Nghoe' Pye: Re Kad' Ra" Khyo

(Phao: Thug' 28.15-30)

8Yao: bam wa bau: lo, kao: re we' dakhyo: khyang zai jham daja" yang za: qao nghoe' pye: re kad' mung: khu: daja: za: thug' nag: shaung: te' ako". 9Aiwa byid khyug daqi" qi" ngad mung: shid' pyae khaug' to" ru ngad: ra"- qhang: phyao: dathu- lu phyao: dathu bo: ra". 10Yao: bam wa ai: dao mae phug' de; ra" laug sin" jham byid jin te' ako". Sao qhid' jin mae patamya- utaphya- mya jham re te' ako". 11Shid' jin ein: jin mae laug ne- nila- sein jham re te' ako". 12Sam jin ein: jin mae vakintu- mahoya laug sin"- gomug' jham re te' ako". 13Byid jin ein: mae myed yoe- unug- nagatoe laug sin" jham re te' ako". Aijham re qhang kham" akhyao khug mae ke' ako". 14Israel byumyu" daxe: shid' kaung nho: gaung tha" ngad: nae" qhid' mae"-laug sin" daxe: shid' ce' mae"- ce' khao: ngo" mae Yaku nho: yauggai zo: dayaug nho: mang re dace' re thug' kyaung" te' ako". 15Yao: bam wa qao nghoe' pye: qhid' mae" taui: we' dakhyo: sham" to" ra" qhang gyang" taui: re kad' ako". 16Qhang kham" akhyao shid' lam: we' qhang kheim" shid' kheim" re kad' mung:- ai shid' kheim" re qao nghoe' pye: nho: akhyug tho' mae te' ako". 17Yao: bam wa qhang taui: shid' khe' re akheim" shid' kheim" mae te' mung:- 18Gatau shid' thao wa qhang kham" akhyao shid' lam: mae taui" te' ako". Ceru: qhid' kheim: shad' bau lo, kao: re taui" ra" lo, sin taui: mae taui" te' ako". 19Qhang kheim" shid' lam: re kad' mung:- bau: lo, kao: khyo lo" thao" ra" qao nghoe' pye" nho: o: pyae akhyug khyug mae te' ako". 20Yao: bam wa qhang kheim" shid' lam: dam: kad' mung: bau: lo, kao: qhid' kheim: shad' lo, sin taui: o: dau gyai yaung" sho' qo; to" ra" phyid' cui: atho' khyab' khyo: nhae mae dashad' dakheim" taui" te' ako". 21Yao: bam wa Asang: yang Moshe re amyin" byid' to" ru we' dakhyo: qao nghoe' pye: wa phyid' cui: atho' mae de; jo, mung:- bau: lo, kao: we' gatau tau maboe" shao:- qao nghoe' pye: mae" akheim" we' bau: lo, kao: mae" akheim " re taui: nyug yang taui" to" ako".

Gatau Khinjaung Mai Bau: Jham Re Kad' Ru

(Phao: Thug' 28.31-43)

22Bau: lo, kao: khug mae" bau: qhang wa khye' geim" re sug' gug khyang anyug: yang qo, to" ru ngad: ra". 23Au: qhid' mae" bau: lung: te' mung: ai majad: lo" nae" qhid' mae" qo; to" ra" pin" yang lhang" gam: ce' to" ru ngad: ra". 24-26Yao: bam wa- Asang: yang Moshe re amyin" byid' to" ru we' dakhyo:- ai: bau: qhang khyid dau athao lhang" gam: mae khyang nyhug- khyang mo,- sug' gug khyang ne: we' jid: mo" pin: gai: yang khaung shi: ce' jham kad' te' mung:- dace' kyo yang: yang: qhang gyang" jhu jham re kad' te' ako".

27Yao: bam wa Arun we' yao" yauggai zo: qe: qhid' mae" bau: jham- 28Au: thab'- maug kyab' jham- jid: mo" lhodaung: jham- 29Jid: mo" pin: we' khyang nyhug khyang mo,- sug' gug khyang ne jham: yang thug' nag: shaung: to" ra" jid: mo" pin gai phyid' cui: jham re Asang: yang Moshe re amyin" byid' to" ru we' dakhyo: khyab' shaung byid' ako". 30Yao: bam wa qhaug' byid' ru: nho: gyang" lho" ra" aso: khyo" qhang gyang" yang shaung: pye' ra" qhang pye: dalam: kad' mung: ai: dao mae Asang re qhaug' byid' to" ra"- ga: tung" te' ako". 31Yao: bam wa Asang: yang Moshe re amyin" byid' to" ru we' dakhyo: aire taui: anyug: yang: au: thab' qhid' kheim: shad' mae taui" te' ako".

Mau" Zo" Re Zaui" Pin" Ra" Khyo

(Phao: Thug' 35.10-19)

32Lo" thao" mae Asang: qhid' kheim: Zaung kad' ra" mau" zo" alhab' re bin: kad' ako". Israel byu qe wa Asang: yang Moshe re amyin" byid' to" ru we' dakhyo:- ja: khao: ngo" re kad' ako". 33Yao: bam wa Zaung we' yao" zai kug jham ngad: ra" anghoe: jham- sag' pye: jham- akyao" jham- zang jham- zang pan jham- 34Ane: yang xug' to" ra" yao qid mhao: mug:- shoqid gai mhao: mug:- akyo pin: lung:- 35Laug pye zam" bo: ra" Dao: Thang" Ban"- yao" gyang: yao:- apyid'- 36Jaung: we' yao" zai kug alhab' we' Mao"So re qhug' byid' ra" mug- 37Qhang gyang" yang kad' ra" myikaug' tao"- myikaug' jham- yao" zai kug jham alhab'- myikaug' xau- 38Qhang phan- gyad xau- sheim nae pyo" ra" ja: Zaung kham: dung: qhid' mae" akyo pin: lung:- 39Gyid: bo" phan we' gyid: bo" kyao"- gyang: yao:- yao" zai kug jham- cid' nae" jarung: we' ainho: ug' tao"- 40Alhaung" qhid' mae" akyo pin: lung: jham- zang we' zang pan jham- alhaung" kham: dung: qhid' mae" akyo pin: lung:- ainho: taui: jham- zang taui: daung" zang jham- Zaung mae ci ca" ra" zai kug jham alhab'- 41Khinjaung Arun we' yao" yauggai zo: qe: qhid' mae" gyang" lho" mai bau: jham Gyang" Lho" Jo, Qo mae khinjaung qe ve; nae" gyad: ra" mai bau: jham Moshe jhao" cili" ako". 42Israel byu qe wa Asang: yang Moshe re amyin" byid' to" ru we' dakhyo:- mau" alhab' re kad' ako". 43Moshe wa ja: khao: ngo" re ca: qu" mung:- yao: bam wa Asang:yang amyin" byid' to" ru we' dakhyo: alhab' re kad' vako" rure myao: ra". Airumung: Moshe wa yao: bam re shaman" byid' ra".

Currently Selected:

PHAO: THUG' 39: LHCL

Highlight

Copy

Compare