PHAO: THUG' 6
6
1Ailao" Asang wa Moshe re- ana" kho:kham pho" re ngo pe" kad' nae" khyo re nao myao: li" nae". Nga" byu qere nhao: ke' nae" qhid' mae" ngo wa yao: re maqad maqui" kad' nhao nae". Gai gai: yao: yao: bam re yao" mung" mae" keim" thug' ke' sho' ngo wa yao: re maqad maqui" kad' nhao nae" ga: ta"ra".
Mao"So Moshe Re Khai: Ra" Khyo
2Mao"So wa Moshe re- ngo wa Asang ngad:- 3Ngo wa qam: bo: thao" ra" Mao"So khyo" Abraham- Isag- Yaku re na: qhu" byid' lo va" ngadqere: nga" gyang" lho" mang Asang ein: khyo" yao: bam re ngo yao" gaung re maba nhao: lo ngad: ra". 4Yao: bam taung bug qekhyo" na: lai:loko" ra" mung" ngad: ra" Khanan mung" re yao: bam re byid: nae" ein: dao:so: byid: mung: ngo wa yao: bam we' dao: thang" re: kad' to: va". 5Egutu byu qeyang jeim kad' zo" na ko" ra" Israel byu qenho: nokyang: kyang: thoe re ana" ngo the' gyo: va". Aimung: ngo wa nga" dao: thang" re myid: beim: va". 6Aimung: ngo wa Asang ngad: ein: yao: bam re ta" ra" khyo re Israel byu qere ta" kyo: wa,. Ngo wa naonhaung" re khyad' yu mung: Egutu byu qere naonhaung" jeim kad' na rumae" re: lhoe' ke' byid: nae". Ngo wa yao: bam: au: dao mae nga" qam: bo: thao" ra" lo,tau: to' mung: qu" gyaug qu" lhaung sho' ra" qobo dae byid: yang: naonhaung" re ngo khyad' yu nae". 7Ngo wa naonhaung" re ngo yao" byumyu" kad' yu mung: ngo wa naonhaung" Mao"So ngad: li" nae". Egutu mung" mae jeim kad' na: rumae" ngo naonhaung" re lhoe' ke' byid: lao"- ngo wa naonhaung" Mao"So- Asang ngad: rure naonhaung" ba: li" genae". 8Abraham- Isag- Yaku re byid: nae" ein: ngo dao:so: byid' to" ra" mung" khyo naonhaung" re ngo jhui" lo nae". Ngo wa ai: mung" re naonhaung" yao" jo,nho" zai yo khyo" naonhaung" re byid: nae" ngo wa Asang ngad:- ga: ta" ra". 9Moshe wa ceru re Israel byu qere ta" kyo" ra". Ngadqere: yao: bam wa yao" dao: re manug: tae" gyo: ko" ngad: ra". Pe"mung:ga"re yao: bam wa xo sho' se' da: be, khyad' jeim kad' qhug' ruyang byo lae" byaug: ako".
10Ai: thao Asang wa Moshe re- 11Egutu kho:kham pho" jhao" ye: mung: yao: wa yao" mung"dan: mae" Israel byu qere thug' lo" nhao ca" ra" khyo re yeta" wa,- ga: ta" ra".
12Ngadqere: Moshe wa- Israel byu qe lhao" re nga" dao: re tae" gyo: genae" mangad' ru- Pe"mung: kho:kham pho" re ngo yeta" nae" ang: i? Ngo wa dao: jhau maboe" yaug ngad: ra" ga: tau" ra".
13 Asang wa Moshe we' Arun re- ngo wa ni" shid' tao re Israel byu qere Egutu mung" mae" jhui" she: thug' lo" nae" qhid' mae" amyin" byid' to" ra" khyo re Egutu kho:kham pho" re we' Israel byu qere yeta" ge, ga: amyin" byid' ra".
Moshe We' Arun Tao: Nho: Byu Xag'
14Yaku nho: zoqhid' Rubin wa Hanug- Phalu- Hezra- Kami ga" ra" yauggai zo: byid yaug qo" ra". Yao: bam wa yao: bam yao" mang mang: ra" akaung qenho: phug' pho" qe ngad: ako". 15Simon wa Yemue- Yamin- Ohad- Yakhin- Zoha- Shau we' Khanan myhi" mae" khau: ra" Shau ga" ra" yauggai zo: khyaug' yaug qo" ra". Yao: bam wa yao: bam nho: mang mang: ra" akaung qenho: phug' pho" qe ngad: ako". 16Levi wa Gershon- Kohad- Merari ga" ra" yauggai zo: sam yaug qo" ra". Yao: bam wa yao: bam nho: mang mang: ra" akaung qenho: phug' pho" qe ngad: ako". Levi wa apyad 137 zin na: ra". 17Gershon wa Libni we' Shimi ga" ra" yauggai zo: tao qo" ra" Yao: shid' tao wa myid:zo: myo: sho' qo" ako". 18Kohad wa Amram- Izha- Hebrun- Uzie- ga" ra" yauggai zo: byid yaug qo" ra". Kohad wa apyad 133 zin na: ra". 19Merari wa Mahli- Mushi ga" ra" yauggai zo: tao qo" ra". Cebam wa Levi nho: myid:zo: kaung qe ngad: ako".
20Amram wa Arun we' Moshe tao re khau: ra" yao: pho" nho: nhae: mo" Yokhebed re lo, xo' yu: ra". Amram wa apyad 137 zin na: ra". 21Izha wa Kora- Nepheg- Zikhri ga" ra" yauggai zo: sam yaug qo" ra". 22Uzie re:- Mishae- Elzaphan- Sithri- ga" ra" yauggai zo: sam yaug qo" ra".
23Arun wa Amminadab nho: myiqe: zo:- Nashon nho: nhae: mo" Elisheba re lo xo' xo' yu: ra". Yao: wa Arun qhid' mae" Nadab- Abihu- Eleaza- Ithama bam re khau byid' ra". 24Kora wa Assi- Elkana- Abiasab ga" ra" yauggai zo: sam yaug qo" ra". Yao: bam re wa Kora kaung: nho: phug' pho" qe ngad: ako". 25Arun nho: yaug ai zo: Eleaza wa Phineha re khau: ra" Putie nho: myiqe: zo: dayaug re lo, xo' xo' yu ra". Cebam wa yham khaung vin mo, ngad: mung: Levi kaung mae" amyu" qe ngad: ako".
26Arun we' Moshe tao wa Asang ga" ra" yaug Egutu mung" mae" Israel byumyu" qere jhui" thug' lo" ge,- ga: nhao ru qhug' ko" ru tao ngad: ako". 27Yao: shid' tao wa Isreal byu qere nhao: ke' nae" qhug' ko" ra" shid' tao ngad: ako".
Moshe We' Arun Tao Re Byid' Ra" Asang Amyin" Dao:
28 Asang wa Egutu mung" mae Moshe re dao: jhau: au:- 29Yao: wa- ngo wa Asang ngad:- ngo ta" ra" gu: ja: khao: ngo" Egutu kho:kham pho" re ta" kyo: wa,- ga: ta" ra".
30Ngadqere: Moshe wa- ngo dao: jhau maboe" yaug ngad: rure nao ba: ra". Pe" ga: nga" dao: re kho:kham pho" ba: tae" gyo: byid: nae" i? ga: tau" ra".
Currently Selected:
PHAO: THUG' 6: LHCL
Highlight
Share
Compare
Copy
Want to have your highlights saved across all your devices? Sign up or sign in
© Bible Society of Myanmar 2009
