APAN AQAO: 31
31
Yaku La Ban Mae" Tug' Phao: Thug' Lo" Ra" Khyo
1La Ban nho: yauggai zo: qe wa- Yaku wa ngonhaung" nho: yao: pho" sang: ra" gu: alhab' re yu: pye' ava". Ngonhaung" nho: yao: pho" sang: ra" gu mae" yao" jo,nho" alhab' re qo" yu: to" ava" ga: ta" na ko" rure the' gyo" ra". 2La Ban re: qhid' phyao: mae" ave, we' dakhyo: jhid' jhid' kug' kug' mangad: lo" rure Yaku myao: ra". 3Ailao" Asang wa Yaku re ni" ba nam ug zo: qe we' ni" phug' pho" qe: mug: khyo dam: tug' lo" wa,- ngo wa nao we' daga" na nae"- ga: ta" ra".
4Airumung: Yaku wa Rakhela we' Lea tao re yao" yao kyaung" cad' kyaung" na: ra" pa: din" mae li" qhug' genae" qhid' mae" dao: pyang: ke' ra". 5Yaku wa yao: shid' tao re naonhae tao: yao: pho" wa ngore ganhae" ru: jhid' jhid' kug' kug' makad' lo" rure ngo ba: qu" pye' va". Ngadqere: nga" pho" nho: Mao"So wa ngo we' daga" na: lo: ra". 6Ngo wa naonhae tao: yao: pho" qhid' mae" nga" qam: o: alhab' we' mau" zaui: byid: va" rure naonhae tao geim" ba: ako". 7Ngadqere: yao: wa ngore mhug' mung: nga" okaung phug' jham re axe lhang lai" pye' ava". Mao"So kam" wa ngore dae te' nae" akhang" yao: re mabyid: ngad: ra". 8Ataug' atung" mung: ra" cad' be, gu: alhab' wa ni" nho: okaung phug' ngad shao: ga: La Ban ta" khao: ngo" yao- cad' kyaung" alhab' ataug' atung" ra" yao" yao nau" cad' nau" jham xao: byid' ako". Amung: ataug' atung" mung: ra" cad' be, jham gu: alhab' wa ni" okaung phug' ngad vashao:- ga: ta" ra". Yao: ta" lao" yao- cad' kyaung" jham alhab' ataug' atung" mung: ra" yao nau" cad' nau" jham xao: byid' ako". 9Mao"So wa naonhae tao: nho: yao kyaung" cad' kyaung" jham re yao: mae" yu: pye' mung: aijham re ngore byid' pye' ra".
10Gug'nyhug' jham amyug: do; ra" ayo, gyo: mae ngo wa yab mo, dalam: mo; yab mo, mae ataug' atung" mung: ru we' atung" tung" mung: ra" cad' be, lo: jham amyug: do, na ko" rure ngo myao: ra". 11Mao"So: mug: lagyo: wa yab mo, mae ngore jhau mung: Yaku we"- ga: ngore yao: ra". Ailao" ngo na: ein: tau" ke' ra". 12Yao: wa xo' mung: qu" wa,- amyug: do; na ko" ra" cad' lo: jham alhab' wa ataug' atung" mung: ru we' atung" ataug' mung: ru jham ngad: ako". La Ban nao re kad' na: ra" gu: alhab' ngo the' myao va" ruyang ceru re ngo boe" nhao: na: ru ngad:- 13Ngo wa myid: beim: nae" aso: khyo" laug baui dabaui re nao qhaug' byid: mung:- ai: laug baui dao mae zhanlun xau gyad yang: ngo nao re thao: ce' to" ra" Bethela jo, qo mae nao re li" na: qhu" byid' ra" yaug Mao"So ngad: ana" nyhang" seim" yang: nao khau: ra" mug: khyo tug' phao: lo" wa,- ga: ta" ra".
14Lea we' Rakhela nhae tao wa- ngonhae tao: yao: pho" mae" ngonhae tao qo" yu nae" pe" re: madang lo: ga: Yaku re phaug' tau" ako". 15Yao: wa ngonhae tao re taung bug qere we' dakhyo: kad' ra". Yao: wa ngonhae tao re aung" pye' mung: ana" ngonhae tao: aphug' ngaui jham alhab' rere: yao yao: yhung: zo" pye' ava". 16Ngonhae tao: yao: pho" lo, mae" Mao"So yang yu: pye' byid' ra". Ce: jo,nho" jham alhab' wa ngonhaung" we' ngonhaung" nho: myid:zo: qe: jo,nho" ngad: ra". Mao"So: yang nao re ta" ru we' dakhyo: kad' wa,- ga: ta" ako".
17-18Airumung: Yaku wa Khanan mung" mae" yao: pho" nho: mug: khyo tug' phao: lo" nae" qhid' mae" seim" nyhang" ra". Yaku wa yao" zoshao qe we' yao" yham sang myhi" jham re gola:u jham: dao mae zhaung yang: Mesopotamia mung" mae yao: the' yu: ra" gu: ja: khao: ngo" we' yao" gug'nyhug' kyaung" alhab' re yao" qhid' au: mae keim" lo" ra". 19La Ban wa yao" yao jham re yao mug' qaug nae" qhid' mae" ye" lo" byaug mung: yao: mana thao re Rakhela wa yao: pho" nho: yham khug yham vin so alho re khug' yu: ra". 20Yaku wa yao: phao: lo" rure La Ban re maba nhao lo: qo" pyag' aung: pye' ra". 21Yaku wa yao: sang: gu: ja: khao: ngo" re yu: yang: phyad phyad za: lo" ra". Yao: wa Uphrad gyaung: re gau" de, mung: Gilead bam mug: khyo do, ye" ra".
Yaku Re La Ban Cao" Khe' Ra" Khyo
22Sam ba thao re Yaku khug' phao: lo" byaug va" ga" rure La Ban re ta" kyo" ako". 23La Ban wa yao" byu qere jhui: mung: Gilead bam mug: mae Yaku re myhi sho' nhad' ba cao" khe' ra". 24Ai: myi re Mao"So wa yab mo, mae La Ban jhao" joe" li" mung:- Lha" wa,-Yaku re pe" khyo" re: dakyaug' nhin" wa,- ga: ta" ra". 25Yaku wa bam dao mae yao" jamu re kad' to: mung: La Ban re: yao" ba nam qe we' daga" Gilead bam mae yao" jamu re kad' ra". 26Ailao" La Ban wa Yaku re nao wa ngore pe"mung: pyag' yang: gyekhe' poe mae" taung" lo" ra" myiqe: qere we' dakhyo: nga" myiqe: zo: qere pe"mung: jhui" phao: lo" i?
27Nao wa ngore pyag' yang: ngore mata" lo: pe"mung: khug' phao: lo" i? Nao ngore ta" ngad: re wa jhu jao we' lo, be, jhu jao kheim" thoe we' ngaui ngaui bau: bau: za: nao re nhao: ke' zai ngad: ra". 28Nao wa ngore nga" myid: jham re bobaug baug nae" we' nga" myiqe: zo: qere au" ke' nae" akhang" lhao" re: mabyid: ngad: ra". Airu: kad' ru wa ago mau" zo" ngad: ra". 29Ngo wa nao re dae te' nae" qam: qo" yaug ngad:- ngadqere: amyi ni" pho" nho: Mao"So wa pe" rure: nao re makyaug' nae" qhid' mae" ngore ta" peim: byid' ra". 30Nao yham khyo gyai gaung yug yang: phao: lo" rure ngo ba: ra". Ngadqere: nao pe"mung: nga" yham khug mae" yham vin so alho jham re khug' ciphao i? ga: ta" ra".
31Yaku wa ni" myiqe: zo: qere ngo mae" nao jhui" yu: pye' byid: maba ein: myid: jho yang: gyaug mung: ngad:- 32Ngadqere: cetau mae" khag' lo, mae ni" yham vin so alho jham re nao qho: qhug' re yao: wa se' pye' ru qhug' li" nae"- sagse: khyo" cemae ngonhaung" byu qe na: ako". Ni" zai alhab' re qho: yu mung: alhab' re yu: yu wa,- ga: tau" ra". La Ban nho: yham vin so alho jham re Rakhela khug' ci to" rure Yaku maba ngad: ra".
33La Ban wa Yaku nho: zaung khug khyo vao ye: yang: yepaui: qho: ra". Ai: thao Lea nho: zaung khug khyo we' jeim myhi" shid' zo" nho: zaung khug khyo re: vao ye: yang: yepaui: qho: ra". Ngadqere: La Ban wa yao" mae" yham vin so alho jham maqho: qhug' ngad: ra". Ai: thao yao: wa Rakhela nho: zaung khug khyo vao ye" ra". 34Rakhela wa ai: yham vin so alho jham re yu: to: mung: gola:u do: thaung khug mae ke' to: yang: yao: wa ai: dao mae zaung: jo; ra". La Ban wa zaung geim" re paui: qho: ra" ngadqere: ai: mae" yham vin so alho jham re maqho: qhug' ngad: ra". 35Rakhela wa yao: pho" re- nga" pho" we"- ngore nhag' dayo: la,- ngo wa ni" qhid' kheim: mae magai: to" ye, ngad: ra". Ngo wa mai ci: ra"- ga: ta" ra". La Ban wa paui: qho ngadqere: yao" yham vin so alho jham re maqhug' qho ngad: ra".
36Ailao" Yaku wa nhag' yo" thug' li" mung:- ngo pe" ja" qobo shad' va" i? Ngo pe" tarha" re lhoe" yang: nao ngore cao" khe' taung" i? 37Ana" nao wa nga" zai alhab' re paui: qho: pye' ava". Ni" yham khug zai pe" ja: re qho: qhug' va" i?-ni" byu qe we' nga" byu qe qo" the' myao genae" qhid' mae" cetau mae aijham re phoe' thug' to: wa,- nga" shid' yaug khoyaug lam: jo: rure yao: bam re myid: phyid' nhao wa,- 38Ngo wa nao we' daga" na: ru ana" shid' xe zin ngad va"- ni" yao myhi" we' ni" cad' be, myhi" jham maxao" yhan" ko" ngad: ra". Ngo wa ni" gug'nyhug' mae" cad' lo:- yao lo: dadau: re: mase' zo" qu"- 39Gug'nyhug' dadau: dau: re seyo: gug'nyhug' yang se' khao: ngo"- ngo wa khonhae" re: ai: qhid' mae" aseim" kham byid' ra". Nga" qobo mangad: rure nao re qhu" byid: nae" qhid' mae" aire nao jhao" ngo maci lo byid:- myi" re- mangad: lao" na" re khug' lo" ra". Pe" ja" gug'nyhug' ngadqere: nao ngore khyug' nhao: ra". 40Ngo wa myo: sho' lhang na" gaung mae" alaung re ngo kham zo: mung: myi" mae" gyo, ngin" rure kham zo" lo: ra". Ngo wa yab maqhug' zo" lo ngad: ra". 41Ngo wa ce ru: shid' xe zin lam: lam: nao we' na: lo va". Ngo wa myiqe: zo: tao re the' sho' daxe: byid zin mau" zaui: byid: mung: gug'nyhug' kyaung" qhid' mae" khyaug' zin mau" zaui" lo va". Airu ngad sho' ngadqere: nao wa nga" okaung phug' re axe lhang lai" pye' byid' ra". 42Nga" phug' pho" bam: Mao"So- Abraham nho: Mao"So- Isag nho: Mao"So ngo we'daga" mana ngad: re wa nao wa ngore lo, cin nhao: ke' gau ngad: ra". Ngadqere: Mao"So wa nga" qug: khai: re we' ngo zaui" lo: ra" lo, mau" re myao byid' ava". Aimung: yao: wa amyi yao" dao: kho' rure byid' ava"- ga: ta" ra".
Yaku We' La Ban Agyo: Mae Myid Vang" Khyo Kad' Ra" Khyo
43La Ban wa- ce: myiqe: nau" qe wa nga" myiqe zo: qe ngad: ako". Yao: bam: zo: dau qe wa ngo sang: ra" mo, ngad: ako". Amung: ce: gug'nyhug' kyaung" jham wa nga" mae" ngad: ra". Gaigai: yao: cetau mae nao myao: ra" gu: ja: khao: ngo" wa nga" mae" ngad: ra". Ngadqere: ngo wa myiqe: zo: qere we' yao: bam: zo: dau qere pe" khyo" re: maqo" tam" yu lo" ruyang- 44Ngo wa nao we' myid vang" khyo kad' nae" jin" jin" ngad va". Nga" shid' zo" nho: myid: vang" khyo re myid: beim: nhao nae" qhid' mae" laug baui bam dalam: kad' to: lang:- ga: tau" ra".
45Airumung: Yaku wa myid: beim: nae" axam: khyo" laug zang re gaug: yu yang: zhaug' ra". 46Yaku wa yao" byu qere laug baui jham daqhae: re gaug: zhang: lo mung: bam: to: nae" ta" ra". Ai: thao yao: bam wa laug zang bam nhae mae yao: bam vae: zo" ako". 47La Ban wa ai: re Yegara Sahadutha ga: mhang" ra". Yaku wa aire Gale ga: mhang" ra". 48La Ban wa Yaku re ce: laug zang bam wa nga" shid' zo: geim" re myid: beim: nhao nae" ngad: li" nae"- ga: ta" ra". Ai: mathao mae ai: jo, qo re Geleda ga: mhang" ako". 49La Ban wa nga" shid' zo: dayaug we' dayaug gao" na: ra" ayo, mae Asang wa nga" shid' zo: re qu" na vashao ga: re: ta" ra". Airumung: ai: jo, qo re Mizpa ga: re mhang" ako". 50La Ban wa xo' mung:- nao wa nga" myiqe: zo: shid' yaug re mangad: manghung: kad'- mangad: lao"- gatau myiqe: qere lo, xo' xo' yu yang: ngad: re- ai: khyo re ngo maba sho' ngadqere:- Mao"So wa nga" shid' zo: re lhaug' qhu" na: ein: rure myid: beim: wa,- 51Nga" shid' zo" agyo: mae ngo gaug; bam: to" ra" laug zang bam cemae ngad: ra". Myid: beim: nae" axam: laug zang cemae ngad: ra". 52Ce: laug zang bam we' ce: myid: beim: nae" axam: laug zang shid' ja" geim" wa myid: beim: nae" axam: ngad: ra". Ngo wa ce: laug zang bam re lai yang: nao re khonhae" gye magai: kad' nae" mangad: lao" ce: myid: beim: nae" axam: laug zang re lai yang: ngore gye magai kad' nae". 53Abraham nho: Mao"So we' Naho nho: Mao"So wa nga" shid' zo" agyo: mae dao: kho' li" nae"- ga: ta" ra". Ai: thao Yaku wa yao: pho" Isag caung:pa" byid' ra" Mao"So nho: mang mae ce: dao:so: re zaung nae" qhid' mae" thao: ce' to" ra". 54Yao: wa gug'nyhug' dadau: re se' mung: aire ngaui" xeim: khyo" bam dao mae ngaui" byid' ra". Aimung: yao: wa yao" byu qere vae: zo: khai: ra". Yao: bam bin: zo: gethao re yao: bam wa myi geim" ai: bam dao mae na: jo; ako". 55Thao: ba ne, seim no' mae" La Ban wa yao: myid: bam qe we' yao" myiqe: zo: tao re bobaug baug mung: au" co' yang: yham khyo dam: tug' phao: lo" ra".
Currently Selected:
APAN AQAO: 31: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
