MARKU 14

Yesu Re Se' Pye' Nae" Khug' Seim" Ru

(Mathe 26.1-5; Luka 22.1-2; Yohan 11.45-53)

1Lai co' Poe we' Man" Make' Poe joe" nae" shid' ba ca" shi" au:- khinjaung qi: qe we' Tung" Pho" qe wa Yesu re sae za: taung" yu mung: se' pye' nae" qhid' mae" pha,jhi" khyug' na: ako". 2Ngadqere: yao: bam wa mo, byu qe malhun" li" geshao:- poe ba na gyo: gu: mae makad' gejhao" ga: jho" ta" ako".

Bethani Mae Yesu Re Xau Vhe' Gyad Byid' Ra" Khyo

(Mathe 26.6-13; Yohan 12.1-8)

3Yesu wa Bethani mae mao gae: boe" qu" ra" Simon: yham mae zozo" na: au:- myiqe: dayaug wa gyai phug' de; ra" Mu Ra Na: Du: xau laug gyang" thaug' dathaug' cili" mung: Yesu au: mae ai: xau li" vhe' sheim: byid' ra". 4Ai: tau mae na: ra" mo, damyo" wa aire nhag' qu" yo" ru we'- pe"mung: ai: xau re amyid: avho: kad' pye' ra" i? 5Ai: xau re ngaui kye' sam yo je mae aung: mung: myaung sho: mo, re qo" gae byid: zai ngad: ra" ga:- yao: cao: jho" ta" ru we' ai: myiqe: re qobo vhin: ako".

6Ailao" Yesu wa- yao: yao: sae za: na shao:- naonhaung" yao: re pe"mung: khin jang: na ko" i? Yao: wa ngore gai: ra" mau" kad' byid' ava". 7Pe"mung:ga"re myaung sho" ra" mo, wa khonhae" re: naonhaung" we' daga" za: na: ako". Ngadqere: ngo wa naonhaung" we' khonhae" re: abang mabyid na: jo, nae" mangad:- 8Yao: kam" wa yao: qo" gai: kad' ra" gu: kad' ava"- yao: wa nyhab' pye' nae" qhid' mae" nga" gaung re gau: qhid' khae" yang: xau gyad byid' ava". 9Airumung: ngo naonhaung" re dang za: ta" ru wa Ngaui Bau" Lau Dao: re kho" kyo" lo" ra" myid gye, geim" khyi" khao: ngo" mae ce: myiqe: re beim: so: nae" qhid' mae" yao: kad' ra" mau" zo" re ta" kyo" li" genae"- ga: ta" ra".

Yesu Re Ab Byid' Pye' Nae" Qhid' Mae" Yuda Myid Vang" Ra" Khyo

(Mathe 26.14-16; Luka 22.3-6)

10Ai: thao daxe: shid' yaug mae bo: ra" Yuda Iskarud wa Yesu re ab byid' pye' nae" qhid' mae" khinjaung qi: qejhao" thug' ye" lo" ra". 11Yao: bam wa yao" dao: re the' gyo: gelao" ngaui mung: yao: re ngaui byid: nae" ga: dao:so: byid' ako". Yuda wa Yesu re ab byid' pye' nae" khoau: yo" nae" rure qho: na: ra".

Yesu Yao" Mho" Zo: Qe We' Lai Co' Poe Myi" Xeim Zo" Ra" Khyo

(Mathe 26.17-25; Luka 22.7-14, 21-23; Yohan 13.21-30)

12Ai: Lai co' poe xeim: yao nau" re se' ra" Man" Make' mug Poe ba na joe" nae" daba kyo shi" au:- yao" mho"zo: qe wa Yesu re Ngonhaung" wa ni" qhid' mae" Lai co' Poe myi" xeim re nao ngonhaung" re khotau mae yenyhang" seim" to: nhao nug: i? ga: myid' ako".

13Ailao" Yesu wa yao" mho"zo: shid' yaug re- Ni" shid' zo: vogaung: khug khyo vao ye: ge,- Qid am vo; ci: ra" yauggai dayaug wa ni" shid' zo: re lham: tug: yu: li" nae". 14Yao" thao cao" lo" mung: yao: vao lo" ra" yham mae" yham sang re- ngo nga" mho"zo: qe we' daga" Lai co' Poe myi" xeim zo: nae" bang" do, qe, khai: mae ngad: ra" i? ga: Mho" Pho" myid: nhao: ke' ra" ein: ta" ge,- 15Ailao" yao: wa ni" shid' zo: re nyhang" seim" jin" to: va" tho' pyae mae" qe, mo" daqe, re ceim" shid' byid' li" nae" Ai: qe, mae ngonhaung" qhid' mae" myi" xeim yenyhang" to: ge,- ga: pin mung: nhao: ke' ra".

16Mho"zo: shid' zo: wa thug' ye" lo" mung: vogaung: khug khyo vao ye" lo" ko" re- yao: shid' zo: re: Yesu ta" ke' ru we' dakhyo: yemyao gelao"- Lai co' Poe myi" xeim re yenyhang" ako".

17Ana" cad' sham" zo" re Yesu wa mho"zo: daxe: shid' yaug we' daga" joe" lo: ra". 18Yao: bam zaung: jo, mung: zozo: jaung: mae zo zo" na ko" au: Yesu wa- ngo naonhaung" re dang za: ta" ru wa- ngo we' zo zo" na: ra" naonhaung" mae" dayaug wa ngore gyevo: lo, khyo ab byid' pye' li" nae"- ga: ta" ra".

19Airumung: yao: bam wa nhag' gyo" kaug' ru we' dayaug: thao dayaug Yesu re- Ai: yaug wa ngo ngad nae" i? ga: myid' ako".

20Yesu wa Ai: yaug wa daxe: shid' yaug mae bobo mung: ngo we' daga" dakhug' mae za: mug jam zo: yaug ngad: ra". 21Pe"mung:ga"re Jham: Mugsug' mae tung" to" ru we' dakhyo: Byu: Yao: Zo: wa shid kham: nae"- ngadqere: Byu: Yao: Zo: re gyevo: lo, khyo ab byid' pye' ra" yaug wa byuxa:vaqoe, qhug' nae"- ai: yaug wa makhau: li" ngad: re yao" qhid' mae" je: gai zai ngad: ra"- ga: ta" ra".

Asang: Myi" Xeim Zo: Poe

(Mathe 26.26-30; Luka 22.14-20; 1Korinthu 11.23-25)

22Amung: yao: bam zozo" na ko" au: Yesu wa mug re yu: yu yang:- Mao"So re jeju bin: caung: byid: lao" aire cug' phai" mung:- Yu zo: ge,- ce wa nga" gaung ngad: ga: ta" mung: mho"zo: qere gae byid' ra".

23Yesu wa sabyi keim rere: yu: yu mung: Mao"So re jeju bin: caung: byid: lao"- mho"zo: qere byid' ra". Yao: bam alhab' ai: keim mae" shaug' ako". 24Yesu wa- Ce wa byu myo: sho' mo; qhid' mae" sheim: pye' ra" Mao"So: dao: thang" re dazid thaung" te' to" ra"- nga" sa: ngad:. 25Ngo naonhaung" re dang za: ta" ru wa- Mao"So: Mung"dan: mae sabyi asag' re ngo qhug' shaug' ra" ba na joe" sho' ngo wa ce: sabyi re khonhae" re: dam: shaug' nae" mangad:- ga: ta" ra".

26Ai: thao yao: bam wa caung: nghaui" dalam: bin: caung: lao" Zhan:lun: bam khyo thug' ye" lo" ko" ra".

Yesu Re Petru Ha: Pye' Nae" Ru Re Gau: Qhid' Khae" Yang: Ta" Ru

(Mathe 26.31-35; Luka 22.31-34; Yohan 13.36-38)

27Yesu wa yao: bam re naonhaung" alhab' mo, ngore to: co' mung: tao" phao: byaug genae"- pe"mung:ga"re Jham: Mugsug' mae Mao"So wa yao zaung" yaug re se' mung: yao jham wa byo: sin" lo" byaug: li" genae"- ga: tung" to" ra". 28Ngadqere: ngo daui: to" li" thao re naonhaung" qhid' au: mae Galile khyo ye" lo" na: li" nae"- ga: ta" ra".

29Ailao" Petru wa- yao: bam alhab' mo, nao re phao: cug' to: co' gengadqere: ngo wa nao re khonhae" re: maphao: cug' to: co' nae"- ga: Yesu re ta" ra".

30Yesu wa Petru re- ngo nao re ta" ru wa ana" myi yao: qo, shid' kheim: mateim shire nao wa ngore sam lhang ha: pye' li" nae"- ga: ta" ra".

31Ngadqere: Petru wa- ngo nao we' daga" shid qo: li" ngadqere: nao re ngo maha: pye' nae" ga: je yang: phin" ta" ra".

Mho"zo: gaje alhab' mo, re: ai we' dakhyo: ta" ako".

Getseman Khyae Mae Yesu Akyu" Mho" Ru

(Mathe 26.36-46; Luka 22.39-46)

32Yesu we' mho"zo: qe wa Getseman ga: mhang" ra" jo, qo khyo joe" ye" ako". Yesu wa yao" mho"zo: qere- ngo akyu" mho' na: au: naonhaung" cemae zaung: jo, lao: ge,- ga: ta" co' ra". 33Amung: yao: wa Petru- Yaku we' Yohan bam re yao: we' daga" jhui" ye" lo" ra". Yesu wa gyai qi: sho' myid myo: myid laug qug: khai: qhug' ra". 34Alao" yao: wa yao: bam re- Nga" nhag' lam: shid naeqhi" yao: gyai kaug' qhui: ra"- naonhaung" cemae lha" mung: lao" na shige,- ga: ta" ra".

35Yesu wa aimae" dajhid' zo: lai: ye: mung:- myid gaung mae yegoe; jo, yang:- Gai: boe" ngad: re wa ai: yo, khyin: lai: lo" shao: ga:- 36Aba- Pho" we"- nao wa alhab' re qo" kad' boe" yaug ngad: ra". Amung: ce: qug: khai: khyag' qhui: ra" keim re ngo mae" yu: pye' byid: la,- ngadqere: ngo o: ra" khyo" mangad:- nao o: ra" khyo" ngad vashao: ga: akyu" mho' ra".

37Yao: dam: tug' lo: re yao: bam yab: myhid' jo; rure lomyao lao"- Yesu wa Petru re- Simon we"- nao yab: myhid' jo; i? Nao wa yo, qug dalam: khalhao" maqo" lhaug' na i? 38Naonhaung" wa ju" phyo' ru khyo magyo" lo" nae" qhid' mae" lha" mung: akyu" mho' na ge,- byo wa nug kao bau ngadqere: gaung sho: wa qam: nang" ra".

39Alao" yao: dam: ye: mung: azhao: mae" dao: we' dakhyo: akyu" dam: mho' ra"- ga: ta" ra". 40Yao: dam: tug' lo: re- yao: bam wa myo, qid gyai la: geyang: yab: myhid' jo; rure lodam: myao: ra". Ailao" yao: bam wa Yesu re khoru: dam: phaug' tau: nae" maba logengad: ra".

41Yesu wa sam lhang ein: lhang dam: tug' lo lao"- yao: bam re naonhaung" ana" joe" sho' yab: myhid' mung: no" na genhaung i? Ga" va"- Yo, khyin: joe" va"- Qu" ge,- Byu Yao: Zo: wa qobo jab qenho: lo, khyo ab: pye' ru qhug' ava". 42To" ge,- ngonhaung" ye" lo" gelang: se,- Qu" ge,- ngore ab byid' pye' yaug wa joe" li" na: ava"- ga: ta" ra".

Yesu Re Taung: Ko" Ra" Khyo

(Mathe 26.47-56; Luka 22.47-53; Yohan 18.3-12)

43Yesu airu: jhau: na shi" au:- daxe: shid' yaug mae bobo ra" Yuda wa khinjaung qi: qe- Tung" Pho" qe we' lau: de, au: jhaung qeyang nhao: ke' ra" shae tam"- thaung kang ci: ra" byuphung: we' daga" joe" li" ra". 44Yesu re ab byid' pye' yaug wa- ngo bobaug baug: ra" yaug wa naonhaung" o: ra" yaug ngad: ra"- yao: re taung" yu mung: nyang" za: zaung" yang: jhui" lo" ge,- ga: yao: bam re ave, byid' to" ra".

45Amung: Yuda wa joe" li" we' Yesu jhao" te' ye" lo" mung:- Mho" Pho" we"- ga: ta" mung: bobaug yebaug: ra". 46Ailao" yao: bam wa Yesu re taung: mung: tang za: zaui" zag: ci: ako". 47Ai: ayae mae ye; jo; ra" mo, mae" dayaug wa yao" shae pyang: she: yu yang: Khinjaung Yin" nho: jeim pho" dayaug: nokhye' qam" phyid' khyo" pye' byid' ra". 48Yesu wa yao: bam re- Damya, re taung" ruru: ngore taung: nae" qhid' mae" shae we' thaung kang we' li" ko" i? 49Ngo wa ba khao: ngo" Caung:pa" Yham mae mho" shid' mung: naonhaung" we' daga" na ngad yang: re: naonhaung" ngore mataung: ko" ngad: ra". Ngadqere: Jham: Mugsug' wa jab byang" lo ca"- ga: ta" ra".

50Ailao" mho"zo: qe alhab' mo, wa Yesu re to: co' mung: tao" phao: lo" byaug: ako".

51Jid: mo" pin: dau za: yang" ci: ra" zolau: dayaug wa Yesu thao cao" ye" lo" ra". Yao: bam yao: re taung: nae" seim" gelao"- 52Yao: wa jid: mo" pin: dau re to: co' mung: gaung pyad' tao" phao: lo" ra".

Yuda Tarha" Qe, Do, Mae Yesu Re Myid' Ca: Qu" Ko" Ra" Khyo

(Mathe 26.57-68; Luka 22.54-55, 63-71; Yohan 18.13-14, 19-24)

53Ai: thao yao: bam wa Yesu re Khinjaung Yin" yham khyo jhui" ye" ako". Khinjaung qi: qe alhab' mo, we' Tung" Pho" qe alhab' wa ai: mae zang" ham: na: bam: ako". 54Petru wa Khinjaung Yin" nho: yham vang" khug khyo joe" sho'- va: va: mae" Yesu thao cao" ye" ra". Yao: wa khinjaung yin" qe: gug: gam qe we' daga" zaung: jo, mung: myikhyeim" mae myi: bogao: na: ra". 55Khinjaung yin" qe we' Yuda Tarha" qe, do, geim" mae" lau: de, qe alhab' wa Yesu re qo" se' pye' nae" qhid' mae" sagse: qho gengad yang: re: yao: bam mathe' qho ko" ngad: ra". 56Sagse: myo: sho' mo, wa Yesu re gye kad' yang: mhug' ta" ako". Ngadqere: yao: bam: dao: majho" zhaung: ngad: ako".

57Ailao" byu damyo" to" ye; li" mung: yao" khyo re sagse: mhug' kham mung:- 58Ceyaug wa byu: lo; yang kad' to" ra" ce: Caung:pa" Yham re phyo' pye' mung: sam ba kyo lao" byu: lo; yang makad' ra" Caung:pa" Yham re ngo kad' nae"- ga: yao: ta" rure ngonhaung" the' gyo: va"- ga: ta" ako". 59Ngadqere: yao: bam: sagse: dao: jham re: majho" zhaung: gengad: ra".

60Ailao" Khinjaung Yin" wa mo, phaung gaung: mae" to" li" mung:- Yesu re nao dakheim: re: matau: i? Ni" khyo re yao: bam sagse: kham: na ko" ru wa khoru: i? ga: myid' ra".

61Ngadqere: Yesu wa dakheim: re: matau: lo: sae za: na: ra". Alao" Khinjaung Yin" wa Yesu re nao wa ngaui lho" ra" Mao"So: yao: zo: Meshia ngad: i? ga: dam: myid' ra".

62Yesu wa Ngo ngad:- Byu: Yao: Zo: wa phung qam: so' nho: lo, yo shad' mae zaung: jo; ru we' mug:gaung: jham thaui: we' daga" li" na: rure the' myao: li" genae"- ga: ta" ra".

63Khinjaung Yin" wa yao" adao: bau: qhang lao" cad' pye' mung:- ngonhaung" pe" sagse: qo lo" i? 64Yao: Mao"So re jung" gaui: rure naonhaung" the' gyo: vako" ra". Naonhaung" khoru: myid ko" i? ga: ta" ra".

Yao: bam alhab' wa Yesu re qobo qo" mung: se' pye' qhug' ang: ra" yaug ngad: ra"- ga: ta" ako".

65Damyo" wa Yesu re khata: phoe" sheim: byid' ako". Yao" myo,khung: re thab' pye' byid: yang: zhab' thaung: mung: Nao re khag' zhab' thaung" rure tag: qu" wa,- ga: ta" ako". Khinjaung yin" nho: gug: gam qere: yao: re pyo' ako".

Yesu Re Petru Ha: Pye' Ra" Khyo

(Mathe 26.69-75; Luka 22.56-62; Yohan 18.15-18, 25-27)

66Petru wa ai: vang" khug mae na: jo; au:- Khinjaung Yin" nho: okaung myiqe: nau" dayaug li" mung:- 67Petru myi: gao: na: rure myao lao"- yao: re zhaug' qu" mung: Nao re:- Nazared mae" Yesu we' daga" lhaung" na: ra" yaug ngad: ra"- ga: ta" ra".

68Ngadqere: Petru wa aire ha: pye' mung:- Nao ta" ru ngo maba- Gyo: re: maba: gyo:- ga: ta" ra". Amung: yao: wa vang" kham: nhad' khyo ye" lo" ra".

69Ai: okaung myiqe: nau" yao: re dam: myao lao"- ayae mae ye; jo; ra" mo, re- Ceyaug re: yao: bam: phung: mae" dayaug ngad: ra"- ga: dam: ta" ra". 70Ngadqere: Petru wa aire dam: ha: pye' ra".

Ailao" ai:thao dazab gai re- ai: ayae mae ye; jo; ra" mo, wa Petru re- Gaigai: yao: nao wa yao: bam: phung: mae" ngad: ra". Pe"mung:ga"re nao wa Galile byu ngad: ra"- ga: ta" ako".

71Ailao" Petru wa nhang: myan" nhang: thoe we' Naonhaung" ta" ra" byu ceyaug re ngo maba- ga: jham tang: yang: ta" ra".

72Ailao" jao" qo, shid' kheim: ein: kheim: teim: ra". Petru wa Yesu yao: re Qo, shid' kheim: mateim shire nao ngore sam lhang ha: pye' li" nae"- ga: ta" ra" dao: re dam: myid: beim" li" mung: ngug: ra".

Currently Selected:

MARKU 14: LHCL

Highlight

Copy