মথি 15
15
আগু ক্যাংগেচা আক্যাং
(মার্ক ৭:১-১৩)
1যিরুশালেমগা ফরীশীরোনা কেইং ছারা লৈগায়াকচা যীশুবাদুঃ লাঃলো প্রগেলিইরি, 2“আয়াংকাবাং কেইং ছারারো পিইচা যা আক্যাং হিকরি, কুবাং তিবিরো য়াংচাগো যাফু মাক্যাংগেলিঃ? চাঃফু হ্রিইগা য়াংসুউরো আলাক মিছিইগে।”
3আফ্রিমা যীশু প্রলিইরি, যা আক্যাং হিকরি য়াংচা আতুওয়ক কুবাংরো, যাফু ফোরা অাঃনাগো মুসুংগেলিই? 4ফোরা প্রলিইরিচাগা, ‘মিখাং-ফাখাংগো রুসিইগে’ অর ‘যাসুউ চাঃগামা মিখাং-ফাখাংগো রুসিই তাঃরা মিহিক, য়াংসুুউগো আমেইং সেঃ বৈরাফু।’ 5য়িগিলি কুবাংরোচা প্র থাঃগেতি, খ্যাংসুমুছু মিখাং মুহুককিলি ফাখাংগো প্ররিছুগি, ‘ঙামা যা ওয়েংনা কুবাং আথক রাঃফুলি, য়াংচাগো ঙা ফোরাগো হ্লুউব্রিইব্যা,’ 6য়াখা মিখাং-ফাখাংগো অর রুসিইফু অলু মিহিকব্যা। কুবাংরোমা দিঃ আক্যাং আতুওয়ক কুবাংরোচা ফোরা তাঃরাগো পিবলৈকেতি। 7ক্রং সুউদরো! কুবাংরোগো য়ুউলো রিসিই যিশাইয় আমেইং চাঃগা প্রলিইরি,
8দিঃ লুঃউরোচা খুনাংগারা ঙাগো রুসিইরিব্যা,
ছুগি য়াংসুউরো চিইদানাচা ঙাগা আওয়িই নিংরি।
9য়াংসুউরোচা আলিং প্যাংলো ঙাগো তাগেতি;
য়াংসুউরো পিইচা সুয়েংসাংচা লুঃউরো লুকচা লৈখুক আক্যাং।
লুঃউরো যাপুয়েং মকং ফ্রইতিলি
(মার্ক ৭:১৪-২৩)
10নক্কা যীশু য়াংসুউরোগো খঃলো প্রলিইরি, “ঙা চাঃগাগো নাথং অর নালিগে। 11ওয়েং আথিদুঃ যা ওয়ংরি য়াংচা মকং মফ্র ছুগি ওয়েংগা যা থুওয়কতিলি য়াংচারা লুঃউগো মকং প্যাংরি।”
12য়াংখা যীশু তিবিরোচা লাঃলো যীশুগো প্রগেলিইরি, “ফরীশীরো কুবাং চাঃগাগো ক্রালো কংগং আহ্রাক রাঃগেরি, য়াংচাগো কুবাং সিকরি লঃ?” 13আফ্রিমা যীশু প্রলিইরি, “যা সারাগো ঙামা গংখাংফুংমা ফাখাং মচলিই, য়াংচারো তাবাং মুক্যুয়েংগো ফঅবৈফু। য়াংসুউরো চাঃগাগো থাফিই। 14আকেইংগো লেং প্রাফু তাওয়েংচা য়াংসুউরো, ছুগি য়াংসুউরো কুঃদৈংগা আকেইং। আকেইংগো আকেইং লেং প্রাগিগা নৈয়কচুং তুওয়ংমা ক্যারি।”
15য়াংখা পিতরচা যীশুগো প্রলিইরি, “কুবাং যা উপমা প্রারি য়াংচা ঙুরোগো নালিঞ্যং প্র।”
16-17যীশুচা প্রলিইরি, “নাংরো আগুতয়ং নামিলিগেসিই? নাংরো যাফু নামিলিলি, যাচা খুনাংগা ওয়েং আথিদুঃ ওয়ংরি, আছুংমা প্রেং থুওক লাঃরি? 18ছুগি যাচা ওয়েং আথিগা থুওয়কতি-য়াংচাচা চিইনুন্হুংগা থুওয়কতি অর য়াংচারোচা লঃউরোগো মকং প্যাংরি। 19চিইনুন্হুংগা মকং চিই, সেফুচা, হিকচা আলুং কামিসু, খুফুচা, আলিং সাকসিই অর মিক্রিনৈংচা থুওয়কতি। 20দিঃচা আলুং লুঃউরোগো মকং প্যাংরি, ছুগি আলাক মিছিইব্রি চাঃগি লুঃউচা মকং মফ্র।”
যিহুদীমুহুক মিঃমাচা ক্যুংলিইরি
(মার্ক ৭:২৪-৩০)
21নক্কা যীশুচা য়াং অাঃরাগো বৈরো সোর অর সীদোন নিংরা রেতু লাঃখারি। 22য়াংদেমা কননীয়গা মিঃমা তয়ক অঃরো য়াংদেমা প্রলিইরি, “অ..ফোরা, দায়ূদ আচৈং, ঙাগো মিত্তা রেঃ। মকং নেঃছুউ কৈংলো ঙা সিমিংচা কংগং দুঃখাওয়া রাঃনিংরি।”
23য়াংখা যীশু য়াংসুউগো তুখুওয়েংলি চাঃগা মপ্রলিই। য়াংখা তিবিরোচা লাঃলো যীশুগো আতংবেং প্রাংলো প্রগেলিইরি, “য়াংসুউগো রুয়েলৈফিই আক্রংগা য়াংসুউ ঙুরো নক্কা কংগং অঃরি।” 24আফ্রিমা যীশু প্রলিইরি, “ঙাগোচা ইস্রায়েল আচৈংমা প্যয়কচা ছুয়িইরোদুঃরা রুওয়েলৈতি।”
25য়াং মিঃমাচা যীশুবাদুঃ লাঃলো হ্রিই খুঃলো প্রলিইরি, “আস্যাং, ঙাগো দিঃ কিজুগো প্রুকপা।”
26যীশুচা প্রলিইরি, “সাঃ-সিমিং আঃচারোগো খুয়িই হ্রিইগা বৈকি মকং।”
27মিঃমাচা প্রলিইরি, “আমেইং চাঃগা, আস্যাং; য়িগিলি ইংস্যাং আঃচা খুংগা যাচা ক্যারি, য়াংচারোগোরা খুয়িই চাঃরি।”
28য়াংখা যীশু প্রলিইরি, “নাং কংগং আম্যা ক্যুংরি। নাং যাপুয়েং লুরিলি, য়াংপুয়েং ফ্রইলিইফিই।” অর য়াংখা খ্যাং খ্যাং য়াংসুউ সিমিংচা কেংমালিইরি।
লিঃথং লুঃউগো আঃচা পিইখ্রাং
(মার্ক ৮:১-১০)
29নক্কা যীশুচা য়াং আঃরাগো বৈরো গালীল ম্র কেইংনা কেইংনাগা লাঃলিইরি অর তং তদংমা তাকলো থৈংলিইরি। 30য়াংখা লুঃউরোচা আকিই, আকেইং, লাকসিই, পাবা অর যে যে সানাসিরোগো যীশুবাদুঃ য়ুউ লাঃগেলিইরি। য়াংসুউ য়াং সানাসিরোগো যীশু আখ্রিই আরাংমা থাগেলিইরি অর যীশু য়াংসুউরোগো অাকং প্যাংলিইরি। 31যাখা লুঃউরোচা পাবা চাঃগা প্রচাগো ম্রাংগেলিইরি, আলাক আসিইচা আকং ফ্রইরি, মাঃলানৈংচা লাঃনৈংরি অর আকেইংচা ম্রাংরি য়াংখা লুঃউরোচা এংঅগেলিইরি অর ইস্রায়েরীয়রো থাওরা ফোরাগো খিইম্যুয়েংগেলিইরি।
32য়াংনক যীশু কুঃ তিবিরোগো খঃলো প্রলিইরি, “দিঃ লুঃউরো আতুওয়ক ঙা সানারি অাক্রংগা গিনি সুংরাক ফ্রইব্যা-য়াংসুউরো ঙানা নিংগেতি অর য়াংসুউরোবামা তুখুলি আঃচা মিহিক। দিঃ প্রাসানানা ঙা য়াংসুউরোগো মুরুওয়েখ্যাং; রুওয়েকি য়াংসুউরোচা লেংমা মঃনৈংরি।” 33তিবিরোচা যীশুগো প্রগেলিইরি, “দিঃ তিদিং চুছুয়িই আঃরামা দিঃ লুঃউ তোবুংগো পিইফু রুটি ঙুরো যাগা রাঃফুলিঃ?”
34যীশুচা তিবিরোগো প্রলিইরি, “নাংরোবামা রুটি মনৈইস্যাক হিকরিলি?”
তিবিরোচা প্রলিইরি, “রুটি খনৈস্যাক অর লৈগং ঙাশ্যি হিকরি।”
35-36লুঃউরোগো কেইংফামা থৈংফু আনা পিইলো যীশুচা য়াং খনৈস্যাক রুটিনা ঙারোগো য়ুউলিইরি। নক্কা যীশুচা থাওরা ফোরাগো কিজু তাংলো য়াংচারোগো ফিলিলো তিবিরো আলাকমা পিইলিইরি অর তিবিরোচা য়াংচারোগো লুঃউরোগো পিইগেলিইরি। 37হিকচা আলুংসুউ ওয়েং তিব্রি চাঃগেলিইরি অর যা আপিরো ক্যা হিকলিইরি, তিবিরোচা য়াংচারোগো ককলো খনৈখুক খারাংমা অাব্রি থিগেলিইরি। 38যাসুউরো চাঃগেলিইরি য়াংদেমা মিঃমানা আশ্যিরোচাগো মুকৈংব্রি য়ক্ক্যাসাসাক লিঃথং হিকলিইরি। 39য়াংনক লুঃউরোগো রুওয়েলো যীশুচা লংমা তাকলো মগদন নিংরোদুঃ লাঃখারি।
Currently Selected:
মথি 15: BBSRMZ
Highlight
Share
Copy
Want to have your highlights saved across all your devices? Sign up or sign in
