মথি 27
27
পীলাত মাং হ্রিইগা আস্যাং যীশু
(মার্ক ১৫:১; লূক ২৩:১,২; যোহন ১৮:২৮-৩২)
1আরোং আখিংমা ছারাগ্রিইরোনা ওয়াগ্রিই গংখ্যুকরো আলুংসুউ যীশুগো সেবৈফুব্যা ম্হেকেলিইরি। 2য়াংসুউরোচা যীশুগো খ্যুয়েং য়ুউ লাঃলো রোমীয়গো ওকখ্যুকসুউ পীলাত সিথিকগো একেলিইরি।
যিহুদা সিই লাঃখাচা
(প্রেরিত ১:১৮,১৯)
3যীশুগো রেংসুউরো আলাকমা যাসুউ তি পিইলিইরি, য়াং যিহুদাচা যীশুগো তাঃরামা আপ্রই খ্যাচাগো ম্রাংলো চিইমা কংগং দুঃখাওয়া রালিইরি। য়াংসুউচা য়াং ছারাগ্রিইরোনা ওয়াগ্রিই গংখ্যুকরোদুঃ লাঃলো য়াং সাব্রা সুংছি টেংগাগো প্রেং পিইলো প্রলিইরি, 4“ঙা আপ্রই মিহিকরি লুঃউগো তি পিইলো আপ্রই লুকরি।”
য়াংসুউরো প্রগেলিইরি, “ঙুরোমা যা ফিই ক্যারি? নাং য়াংচাগো সিকমি।” 5য়াংখা যিহুদাচা য়াং সাব্রাগো ওয়িইপাসানা ক্যংমা রুঅং বৈলো লাঃখারি অর লৈংফাংমা ক্রু ছুয়িলো সিই লাঃখারি।
6ছারাগ্রিইরোচা য়াং সাব্রাগো য়ুউলো প্রগেলিইরি, “দিঃ টেংগাগো ওয়িইপাসানা ক্যংমা থাঃচা মকং মুহুক আক্রংগা দিঃ টেংগাচা স্যুই আফুও।” 7নক্কা য়াংসুউরো আতৈংবাং প্যাংলো য়াং টেংগানা নেংঙেংখ্রা লুঃউরো আতুওয়ক কুমারমা আঃরা ওয়িগেলিইরি। 8য়াং আতুওয়ক য়াং আঃরাগো আগুতয়ং ‘স্যুই আঃরা’ প্রগেতি। 9য়াংচাচা রিসিই যিরমিয়গা নিংলো যা প্রলিইরি, য়াং চাঃগাচা অাব্রিচুং ফ্রইরি: “য়াংসুউরো সুব্রা সুংছিই য়ুউগেলিইরি। য়াং টেংগাচা য়াংসুউগো ওয়িচা। ইস্রায়েলীরোচা য়াংসুউ আতুওয়ক দিঃ আফুগো প্যাংগেলিইরি। 10ফোরা যাপুয়েং ঙাগো আনা খ্যালিইরি, য়াংপুয়েং য়াংসুউরোচা কুমার আতুওয়ক আঃরা য়াং টেংগানা য়ুউগেরি।”
আস্যাং যীশুগো তাঃরা চৈচা
(মার্ক ১৫:২-১৫; লূক ২৩:৩-৫; যোহন ১৮:৩৩—১৯:১৬)
11ছুগি য়াংখা যীশুচা ওকখ্যুকস্যাং সিথিক পীলাত মাং হ্রিইগা রে হিকলিইরি। সিথিকচা যীশুগো মিংলিইরি, “নাং যিহুদীরোমা মাং লঃ?”
যীশুচা আফ্রি পিইলিইরি, “কুবাং অামেইং চাঃগাগো প্রলিইরি।”
12ছারাগ্রিইরোনা ওয়াগ্রিই গংখ্যুকরোচা যীশুগো তুবুং আপ্রই ক্যাগেলিইরি য়িগিলি যীশু তুখুউলি আফ্রি মিপিইলিই। 13য়াংখা সিথিক পিলাতচা যীশুগো প্রলিইরি, “য়াং লুঃউরো নাককো মন্হক আপ্রই খ্যাগেতি-য়াংচাগো নাং মাক্রালঃ?” য়িগিলি যীশু তুখুওয়েংলি আফ্রি মিপিইলিই। 14য়াংচাগো ম্রাংলো সিথিকচা কংগং এংঅলিইরি।
15কিতাং রাক পুয়িইমা তখক মুক্যুয়েং সিথিকচা লুঃউরো সায়াচা তয়কচিইগো থংগা রুওয়েতি। দিঃচা য়াং সিথিকমা আক্যাং হিকলিইরি। 16য়াং আখিংমা বারাব্বা নাঃমিনা দাম্রাগ্রিই তয়ক হিকলিইরি। 17লুঃউরো তেরেমা চুককেরিখা পীলাতচা লুঃউরোগো মিংলিইরি, “নাংরো যা লুওগেতিলিঃ? নাংরোবামা ঙা যাসুউগো রুওয়েফুলিঃ, বারাব্বাগো মুহুককি যাসুউগো ফোরালং প্রগেতি য়াং যীশুগো লঃ?” 18সিথিক পীলাত সিকচাগা, লুঃউরো যীশুগো মিক্রিনৈংব্রি তি পিইগেচা।
19সিথিক পীলাত যাখা কুঃ পেংলাংমা থৈংলো হিকরি য়াংখা সিথিক মায়াচা দিঃ চাঃগা প্রলো রুওয়েলৈতি, “আপ্রই মিহিকরি লুঃউগো নাং তুখুউলি মাপ্যাংগি আক্রংগা গিনি ঙা ইংমাকমা য়াংচা আতুওয়ক কংগং দুঃখাওয়া রালিইরি।”
20য়িগিলি ছারাগ্রিইরোনা গংখ্যুক ওয়াগ্রিইরোচা লুঃউরোগো চুও তঃলিইরি যাফুলিছুগি য়াংসুউরোচা বারাব্বাগো তংগেঞ্যং অর যীশুগো সেবৈফু আতুওয়ক প্রগেঞ্যং। 21নক্কা সিথিকচা লুঃউরোগো মিংলিইরি, দিঃ ন্হইয়কমা ঙা যাসুউগো নাংরোমা রুওয়েফুলিঃ?
য়াংসুউরো প্রগেলিইরি, “বারাব্বাগো রুওয়ে।”
22য়াংখা সিথিকচা য়াংসুউরোগো প্ররিইরি, “ছুগি যাসুউগো ফোরালং প্রগেতি য়াং যীশুগো য়ুউরো ঙা যা প্যাংফুলিঃ?”
য়াংসুউরো আলুংসুউ প্রগেলিইরি, “য়াংসুউগো থুউমা খেবলৈ।”
23সিথিকচা প্রলিইরি, “যাফুলিঃ, য়াংসুউ যা আপ্রই লুকরিলিঃ?”
য়াংখা লুঃউম্যারোচা অরলি আম্যা অলো প্রগেলিইরি, “য়াংসুউগো থুউমা খেবলৈই।”
24যাখা সিথিকচা ম্রাংরি য়াংসুউ তুখুউলি মাপ্যাংনৈং-অরবাং আম্যা রংরাং ফ্রইতি, য়াংখা সিথিকচা রিই য়ুউলো লুঃউরো হ্রিইথাকমা আলাক ছিইলো প্রলিইরি, “দিঃ লুঃউগো সেবৈফু আতুওয়ক ঙাগো তুখুউলি আপ্রই মিহিক; নাংরো য়াংচাগো সিকমি।”
25আফ্রিমা লুঃউম্যারোচা প্রগেলিইরি, “ঙুরোনা ঙুরোমা সাঃরোচা য়াংসুউ সিইচা আপ্রইকো খেংফু।” 26য়াংখা সিথিক পীলাতচা বারাব্বাগো রুওয়েলৈতি ছুগি যীশুগো কংগং আম্যা ক্রুছকপুউনা সেলো থুউ খেংফু আতুওয়ক পিইলিইরি।
চৈ সুরুয়িরো আঃরি-আসুয়েং প্রুকচা
(মার্ক ১৫:১৬-২০; যোহন ১৯:২,৩)
27য়াংখা ওকখ্যুকস্যাং সিথি পীলাত সুরুয়িরোচা যীশুগো য়ুউলো ইং আথিদুঃ লাঃখাগেতি অর হিকচা সুরুয়িরোগো যীশু লিফাক-লাকচি চুকচিইলিইরি। 28য়াংসুউরোচা যীশু অাওয়েকো খ্যুওয়েলো রেরে আওয়ে তিথিগো ওয়েচিইগেলিইরি। 29নক্কা য়াংসুউরো চুউনুয়িনা গংভং তুখুক লুকলো যীশু আগংমা ওয়েচিইগেলিইরি অর ঞ্যাফাক্কা দুক তুখ্যং পিইগেলিইরি। য়াংনক যীশু হ্রিইগা পছতুক তুকলো আসুওয়েং প্যাংলো প্রলিইরি, “যিহুদীরোমা মাং অংম্রাংবাজি!” 30য়াংখা য়াংসুউরো যীশু কেইংথামা চুওয়েংছিই বৈকেলিইরি অর য়াং দুকনা যীশু আগংমা প্রেং প্রেং বুককেলিইরি। 31যীশুগো সুওয়েংব্রিইনক য়াংসুউরো য়াং আওয়েকো খ্যুওয়ে য়ুউলো কুঃ আওয়েকো ওয়েচিইলো থুউ খেফু আতুওয়ক য়ুউ লাঃগেলিইরি।
থুউ আথাকমা আস্যাং যীশু
(মার্ক ১৫:২১-৩২; লূক ২৩:২৬-৪৩; যোহন ১৯:১৭-২৭)
32য়াংচাগা থুওয়ক লাঃখা সুরুয়িরোচা কুরীনী ম্রুমা শিমোন নাঃমিনা লুঃউ তয়ককো তুয়িইগেলিইরি। সুরুয়িইরোচা য়াংসুউগো যীশু থুউগো রুওয়ক য়ুউফু আতুওয়ক আনা প্যাংগেরি। 33-34নক্কা য়াংসুউরো ‘গলগথা’ প্রফুছুগি ‘আগং আখুওয়েং আঃরা’ দুঃ লাঃলো যীশুগো আখ্যুয়েং রলো আরাক সকচিইগেলিইরি। যীশুচা খুনাংমা থিলো অর সকফু মিক্রিলিইব্যা।
35যীশুগো থুউমা খেপ্রিইনক সুরুয়িরোচা মিফক লুকলো যীশু আওয়ে-আচাগো কুঃরো আতুওয়ংমা ফুঃয়ুউগেলিইরি। 36নক্কা য়াংসুউরো য়াংদেমা থৈংলো যীশুগো চংগেলিইরি। 37য়াংসুউরো থুউ খেচামা যীশু আগং আথাক্কা আপ্রই নাঃমিগো রুইকেকেলিইরি, “দিঃ যীশুচা যীহুদিরোমা মাং।” 38য়াংসুউরো অর ন্হইয়ক দাম্রাগোলি থুউ খেকেলিইরি, য়াংসুউরোগো যীশু ঞ্যাফাক্কা তয়ক বিফাক্কা তয়ক। 39যা লুঃউরো য়াং লেংগা লাঃগেতি য়াং লুঃউরোচা যীশুগো য়ুউলো সুওয়েংগেলিইরি, 40“নাং মুহুক লঃ-ওয়িপাসানা ক্যংগো ফ্রুলো প্রেংলো সুংরাকমা ছক পিইনৈংফু! য়াং পুয়েংছুগি আগু কুওগো কুও কিছিম্হে। নাংরা থাওরা ফোরা সাঃ ফ্রইকি থুউগা রুওয়ে সাকলে।”
41ছারাগ্রিইরোনা কেইংছারারো অর ওয়াগ্রিই গংখ্যুকরোলি যীশুগো আঃরি-আসুওয়েং প্যাংলো প্রগেলিইরি, 42“য়াংসুউ লুঃউরোগো কিছিরি, কুওগোকুও কিছি মিছিন্হই। য়াংসুউগা ইস্রায়েলরোমা মাং! আগু থুউ খেচাগা সাক লাঃবেচিই। য়াংপুয়েংছুগি ঙুরো য়াংসুউগো ক্যুংফু। 43য়াংসুউচা কংগং থাওরা ফোরাগো ক্যুংরি; আগু থাওরা ফোরারা য়াংসুউ রুসিইচাগো চিই প্যরিছুগি য়াংসুউগো কিতাংবেচিই। য়াংসুউগা কুওগোকুও থাওরা ফোরা সাঃ খেংরি।” 44যা দাম্রারোগো যীশুনা আতুউ থুউ খেলিইরি, য়াংসুউরোলি তেজেতৈং চাঃগা প্রলো যীশুগো চাগাদাং প্রগেলিইরি।
আস্যাং যীশু সিইচা
(মার্ক ১৫:৩৩-৪১; লূক ২৩:৪৪-৪৯; যোহন ১৯:২৮-৩০)
45য়াংরাকনিক মৈদি তিছি ন্হনাড়ি কাবাং সুংরাড়ি তৈঅং প্রিলুংচা মমৈ হিকলিইরি। 46সুংখ্যাক ল্হক তিইলো যীশুচা অলো প্রলিইরি, “এলী, এলী, লামা শবক্তানী,” প্রফুছুগি “ঙামা ফোরা, ঙামা ফোরা, যাফু ঙাগো ফ্রুকলো লাঃরিব্যালি?”
47যাসুউরো য়াংদেমা রেহিকগেলিইরি, য়াংসুউরো আতুওয়ংমা লৈগায়কচা ক্রালো প্রগেলিইরি, “য়াংসুউ এলিয়গো খরি।”
48য়াংসুউরোগা তয়কচা খ্যাং খ্যাং ব্রিই লাঃলো আরাকমা ন্হলো ফঃ তুখুক য়ুউলিইরি অর দুক তুখ্যং আগংমা খ্যুয়েংলো যীশুগো সকফু পিইলিইরি। 49অর লুঃউরোচা প্রগেলিইরি, “হিকবেচিই, ক্রিমি এলিয় লাঃলো য়াংসুউগো মাফুুঃ লাঃফুলঃ।”
50যীশু প্রেংলো আনা অব্রিইনক আসাক চুকতিলিইরি। 51য়াংখা ওয়িপাসানা ক্যংমা তুওয়েংখাগা আওয়েচা আথাক্কা কাবাং অক রকঅং ন্হইখ্রেং চুউক ক্যাখারি; অর ঙায়াং লুকলো আগ্রিই আগ্রিই ক্যকলুং কুয়ি লাঃখারি। 52সাংগ্রুচা লৈংখুক লঃ লাঃখারি অর থাওরা ফোরাগো রুসিইলো যাসুউরো সিই লাঃখারি-য়াংসুউরোমা লৈংগায়ক হ্রাং থাঃগেরি। 53য়াংসুউরো সাংখ্যুয়েংগা থুওয়ক লাঃগেলিইরি অর যীশু আসিইগা হ্রাং থাঃব্রিইনক সেংস্যাংস ম্রু যিরুশালেনদুঃ লাঃখাগেতি। য়াংসুউরো য়াংদেমা লুঃউ তুবুংগো আম্রাং পিইগেলিইরি।
54চৈবুনা যাসুউরো যীশুগো চংনিংতি য়াংসুউরোচা ঙায়াং লুকচানা অর প্রাসানারোগো ম্রাংলো কংগং ক্রককেলো প্রগেলিইরি, “আমেইং য়াংসুউ থাওরা ফোরা সাঃ হিকলিইরি।”
55মিঃমা লৈগায়কলি য়াংদেমা আওয়িইগা রে ক্রিহিকগেলিইরি। যীশুগো প্রুকজুফু আতুওয়ক য়াংসুউরোচা গালীল ম্রুকাবাং যীশু নক্কা নক্কা লাঃগেতি। 56য়াংসুউরোমা হিকলিইরি, মগদলীনী মরিয়ম, যাকোবনা যোষেফ মিখাং মরিয়ম অর সিবদিয়মা সাঃ যাকোবনা যোহন মিখাং।
যীশুগো সাংগ্রোচা
(মার্ক ১৫:৪২-৪৭; লূক ২৩:৫০-৫৬; যোহন ১৯:৩৮-৪২)
57নিং ওয়ংখা অরিমাথিয়া রুওয়াগা যোষেফ নাঃমিনা উচ্চাস্যাং তয়ক য়াংদুঃ লাঃলিইরি। য়াংসুউলি যীশু তিবি হিকলিইরি। 58সিথি পীলাতমা লাঃলো য়াংসুউচা যীশু আলংগো তংলিইরি। য়াংখা সিথি পীলাতচা যীশু আলংগো পিইফু আতুওয়ক আনা পিইলিইরি। 59যোষেফচা যীশু আলংগো য়ুউ লাঃলো অাওয়ে সেসেং তিথিনা রঃলিইরি, 60অর যা আসৈই সাংখ্যুয়েংরা যাচা য়াংসুউ কুঃ আতুওয়ক তংগো থুওয়ংলো তুউ থাঃলিইরি-য়াংদেমা আলংগো থাঃলিইরি। নক্কা য়াং সাংখ্যুয়েং আওয়ামা ক্যকলুংগ্রিই তুলং ছুও বৈখালো য়াংসুউ লাঃখারি। 61ছুগি মগদরীনী মরিয়মনা অর তয়ক মরিয়ম য়াংদেমা য়াং সাংখ্যুয়েং হ্রিইগা থৈং হিকগেলিইরি।
62মুলাংখা প্রফুছুগি পুয়ি মুলাংখা ছারাগ্রিইরোনা ফরীশীরোচা সিথি পীলাতমা চুককেলো প্রগেলিইরি, 63“আস্যাং, ঙুরো তুওয়ক রাঃগেরি-য়াং আলিং লুঃউচা হ্রাং নিংফু প্রলিইরি, ‘ঙা সুংরাক নক হ্রাং থাঃফু।’ 64য়াংচা কিজু আনা পিই যাফুলিছুগি সুংরাক তৈঅং সাংখ্যুয়েংরাগো চংনিংফুচা। মচংগি য়াংসুুউ তিবিরোচা য়াংসুউ কেইংথাগো স্যুও য়ুউ লাঃলো লুঃউরোগো প্রমি, ‘য়াংসুউচা আসিইগা হ্রাং থাঃব্যা।’ য়াংখা পাথামা লিংচাথাক আছুংমা লিংচাচা কংগং আগ্রিই ফ্রইমি।”
65য়াংখা সিথি পীলাতচা য়াংসুউরোগো প্রলিইরি, “চংসারোগো য়ুউ লাঃলো, কুবাংরো যাপুয়েং নৈংরিলি য়াংপুয়েং চংজিইগে।” 66য়াংখা য়াংসুউরো লাঃলো ক্যক আথাকমা লাকম্হে তুখুক প্যাংগেলিইরি অর চংসারোগো য়াংদেমা চংজিইলো সাংখ্যুয়েংগো কংগং আহ্লাপা চংফু আতুওয়ক প্যাংগেলিইরি।
Currently Selected:
মথি 27: BBSRMZ
Highlight
Share
Copy
Want to have your highlights saved across all your devices? Sign up or sign in
