মার্ক 10
10
মিঃয়া খুওয়াফু আক্রংলিলাগো সুয়েংসাং পিইচা
(মথি ৫:৩১,৩২; ১৯:১-১০; লূক ১৬:১৮)
1নক্কা যীশু য়াং আঃরাগু বৈরো যিহূদিয়া প্রিনিমা অর যর্দন খ্যং অরতাব্রাকতু কুউখাগেতি। লুঃউম্যারোচা প্রেংরো যীশুবামা চুককেলিরি। য়াংখা যীশু কোঃ আখিং আলৈই লুঃউরোগু সুয়েংসাং পিইলিরি। 2য়াং আখিংমা লৈগায়ক ফরীশী লাঃরো যীশুগো চেংফু কিজু প্রগেলিরি, “মোশি পিইচা ওয়ে আলৈই খ্যাংসুউমুছু মিঃয়াগো খুওয়া সাংলঃ?”
3যীশু প্রলিরি, “মোশি নাংরোগু যা আঃনা পিইলিইরিলি?”
4য়াংসুউরো প্রগেলিইরি, “মোশিগা খুওয়াজা রুইরো মিঃয়াগো খুওয়াফু খুওয়ং পিইলিইরি।”
5যীশু প্রলিইরি, “ঙারো চিই কেগেং কিজু মোশি দিঃ আঃনা রুই পিইলিরি। 6ছুগি দিঃচালি রুইরো হিকরি, কাবা তিম্রিরিখা ‘থাওরা ফুরাচা য়াংসুউরোগু য়কক্যানা মিঃমা লুকরো ম্রিজিলিইরি। 7দিঃচা কিজু লুঃউচা মিখাং-ফাখাংগো বৈরো মিঃয়ানা পংরো নিংফু, 8অর য়াংসুউরো নৈয়ক কাইংথা তুখু ফৈফু।’ য়াংচা কিজু য়াংসুউরো নৈয়কমুহু, তয়কতৈব্যা। 9য়জংছুগি থাওরা ফুরা যাচাগো পংলিরি, লুঃউরোচা যাফু খুয়িখ্যাংলি।”
10য়াংনক য়াংসুউরো ইংদুঃ ওয়ংখাগেতি অর তিবিরোচা যীশুগো প্রেংরো থুউ আক্রংলিলাগো য়ুউরো মিংগেলিরি। 11য়াংখা যীশু প্রলিরি, “খ্যাংসুউমুছু কোঃ মিঃয়াগো বৈরো আখ্রা মিঃমাগো ইংথং প্রুকতিছুগি, য়াংসুউ কোঃ মিঃয়াগো য়ুউরো কামিসু লুকতি। 12অর মিঃয়ারা লাংগো বৈরো আখ্রা লুঃউগো ইংথং প্রুককি, য়জংছুগি য়াংসুউলি কামিসু লুকতি।”
আস্যাং যীশুনা আমৈরো
(মথি ১৯:১৩-১৫; লূক ১৮:১৫-১৭)
13নক্কা লুঃউরো আশ্যি আমৈরোগু যীশুবাদুঃ য়ুউ লাঃগেতি, যাফুলিছুগি যীশু য়াংসুউরো আপমা আলাক থাঃঅং। ছুগি তিবিরোচা থুউ লুঃউরোগু হককেলিরি। 14যীশু য়াংচাগো ম্রাংরো চিই মাঃসায়াব্রি তিবিরোগু প্রলিরি, “আশ্যিরোগু ঙাদুঃ লাঃফু পিই, ছিই মাঃথাগি; আক্রংগা থাওরা ফুরা ঈ নেংঙেংদচা দিঃ পুয়েং আমৈরোকিজুরা। 15ঙা নাংরোগু আম্হেং প্ররি, আশ্যি সাঃ-সিমিংঞ্যং থাওরা ফোরা ঈ শানানাগো লাক মেখেংগি, তয়কলি খ্যাংঞ্যংবাং লুকলিইফি থাওরা ফুরা ঈ নেংঙাইংদ দুঃ মুওয়ংনৈংমু।”
16য়াংনক যীশু থুউ আশ্যি সাঃ-সিমিংরোগু কো রাংখুওয়ংদুঃ সিংলিরি অর য়াংসুউরো আগংমা আলাক তাংরো ছুক পিইলিইরি।
সিঃথি লুঃউ তয়ক
(মথি ১৯:১৬-৩০; লূক ১৮:১৮-৩০)
17যীশু প্রেংরো যাখা লেংদুঃ থুওয়কলিইরি য়াংখা লুঃউ তয়কচা ব্রিইলো যীশুদুঃ লাঃলিইরি অর যীশু হ্রিইগা পছতুক তুকরো প্রলিরি, “অ ছারা, কোবাং তয়ক লুঃউঃউ আকং। ঙাগো প্রবা, নিকবেং বাওয়াগো রাঃফু কিজু ঙা যা লুকরাফুলি?”
18যীশু য়াংসুউগো প্রলিইরি, “ঙাগো যাফু আকং প্ররিলি? থাওরা ফুরা ঈ মুহুকপ্রি তয়কলি আকং মুহু। 19নাংগা আঃনারোগু সিইরি- ‘আসাক মেঃসেকি, কামিসু মুলুককি, মুখুগি, আলিং সাকসিই মিপিইগি, মিলিংগি, মিখাং-ফাখাংগো রুসিঃ।’”
20লুঃউচা যীশুগো প্রলিরি, “ছারা, আশ্যিকাবাং ঙা দিঃচারোগু সুংলো লাঃবারি।”
21য়জংছুখা যীশু য়াংসুউদুঃ হ্লিক্রিলিরি অর ওয়াসানা প্রিজুংলো য়াংসুউগো প্রলিইরি, “নাকমা তুখু অলুক হিকরিসি। লাঃলি, নাকমা যা হিকরি, য়াংচা আলুংচা রংরো ছাংরিসারোগু হ্লুউলৈই। য়হ্লকব্রিঃমা নাং নেঃফুং উচাগো রাঃমি। য়াংনক লাঃরো ঙামা তিবি ফ্রইখিলি।”
22দিঃ চাঃগাগো ক্রারো থুউ লুঃউচা ম্যাকন্হা খ্যয়েং ফ্রইলিইরি। য়াংসুউমা আম্যাগ্রি উচা-পয়চি হিকলিইরি কিজু য়াংসুউ চিইচা নকলিইরি।
23য়াংখা যীশু লিফাকলাকচি ক্রিরো তিবিরোগু প্রলিইরি, “উকচাস্যাংরো থাওরা নেংঙেংদদুঃ ওয়ংফুচা কংগং খংখিরি!”
24তিবিরোচা যীশু চাঃগাগো ক্রারো এংঅগেলিরি। যীশু প্রেংরো প্রলিইরি, “সাঃরো, যাসুউরো উকচা-পয়চি আপমা খিকরো নিংরি, য়াংসুউরোচা থাওরা ফুরা নেংঙেংদদুঃ ওয়ংফু কংগং খংখিরি। 25উচাস্যাংরো থাওরা ফুরা ঈ নেংঙেংদদুঃ ওয়ংচাথাকপাং প্রফুছুগি এঃ নাঃফাগা কুলোউ ওয়ংরো লাঃচাবাং লু-উলিরিসিই।”
26য়জংছুখা তিবিরোচা অরলি আম্যা এংঅফুয়ি ফ্রইরো কোঃরো কোঃরো আথিমা চাঃগা প্রগেলিচাগা, “য়জংছুগি যাসু আপ্রইইকা কিতাংনৈংলি?”
27যীশু য়াংসুউরোদুঃ হ্লি ক্রিরো প্রলিইরি, “লুঃউ দিঃচাগো মনৈং ফ্রনৈংরি, য়িগিলি থাওরা ফুরাবামা মনৈংরিছুরো মিহি; থাওরা ফুরাবামা আলুংচা নৈংসাংরি।”
28পিতর যীশুগো প্রলিইরি, “ক্রি, ঙারোগা হিচা আলুং বৈরো কোবাং তিবি ফ্রইকেরি।”
29আফ্রিমা যীশু প্রলিইরি, “ঙা নাংরোগু আম্হেং প্ররি, খ্যাংসুউমুছু ঙা কিজু অর থাওরা ফুরা ঈ আকং সাদাং কিজু ইং-য়া, ঞিংনা-অঃমা, মিখাং-ফাখাং, সাঃ-সিঃমিং অর আঃরা-খ্যং বৈকেলিরি, 30য়াংসুউ দিঃ খৈমা য়াংচাথাক আপ্রইেং তাঃরা আম্যা ইং-য়া, ঞিংনা-অঃমা, মিখাং, সাঃ-সিঃমিং অর আঃরা-খ্যং রাঃমি অর য়াংচারোনা আতু ঞ্যচিলি খেংরাফু; অর হ্রিদুঃ বাওয়ামা য়াংসুউ নিবেং বাওয়াগো রাঃফু। 31য়িগিলি যাসুরো পাথামা অাসুয়িমা হিকরি, য়াংসুউরো আতুওয়ংগা লৈগায়কচা আছুংদুঃ ক্যাফু, অর যাসুরো আছুং আসুয়িমা হিকরি, য়াংসুউরো আতুওয়ংগা লৈগায়ক পাথামা আসুয়িগো রাঃফু।”
প্রেংরো আস্যাং যীশু সিইফুচা চাঃগা
(মথি ২০:১৭-১৯; লূক ১৮:৩১-৩৪)
32য়াংনক যীশুনা তিবিরোচা যিরুশালেংদুঃ লাঃখাগেতি। যীশুচা তিবিরো হ্রিইগা হ্রিইগা লাঃরি; তিবিরোচা তুখুউলি তুওয়ক মাঃরাব্রি যীশুনা আতু লাঃগেলিরি অর যা লুঃউরো নক্কা লৈকেতি য়াংসুউরো ক্রকরো ক্রকরো নক্কা লৈকেতি। যীশু প্রেংরো কোঃ তিবি তিছিনৈয়ককো তেরেতুঃ খঃয়ুউরো, কোঃ আপমা যা ফ্রইফুলি য়াংচাগো প্রপ্রালিরি। 33যীশু প্রলিইরি, “ক্রি, ঙারো যিরুশালেংদুঃ লাঃগেতি। য়াংদেমা মনুসাওয়া সাঃগো য়েপুরোহি গংখ্যুকরোনা কেইং ছারাবামা তিঃ পিইফু। য়াংসুউরো মনুসাওয়া সাঃগো তাঃরা চৈরো য়াংসুউগো সেঃবৈরাফুছুরো তিজিতৈং ম্হেফু অর যিহুদীমুহু লুঃউরো আলাকমা থিঃফু। 34যিহুদীমুহু লুঃউরোচা য়াংসুউগো আঃরি-আসুয়েং প্রুকফু, য়াংসুউ কাইংথামা তুওয়েংছি বৈফু, য়াংসুউগো কংগং ক্রোও দুকনা সেঃলো সেঃবলৈফু। সুংরাক নক প্রেংরো য়াংসুউ হ্রাং থাঃফু।”
যাকোবনা যোহন আতংবেং থাঃচা
(মথি ২০:২০-২৮)
35নক্কা সিবদিয়মা সাঃ যাকোবনা যোহন যীশুবামা লাঃরো প্রগেলিরি, “ছারা, ঙারো ছেংদাচাগা দিঃচা , ঙারো যাচাগো তংফুলি-ঙারো কিজু কোবাং য়াংচা লুঃউকমি।”
36যীশু প্রলিইরি, “নাংরো কিজু ঙা যা লুকফুলিঃ? নাংরো যা লুরিলি?”
37য়াংসুউরো প্রগেলিইরি, “কোবাং যাখা রংখ্রিদনা নেংঙেংদগো চুঃফুলি য়াংখা ঙারো নৈয়কচা বিফাককা তয়ক-ঞাফাক্কা তয়ক থৈরাঞ্যং।”
38যীশু প্রলিইরি, “নাংরো যা লুরিলি, য়াংচাগো মিঃসিগে। যা দুঃখুওয়া লংবেংশ্যি (পিয়ালা) ঙা চাঃফু লাঃরি, য়াংদেমা নাংরো চাঃনৈফু লঃ? য়জংমুহুকিলি যা মাঙ্গালা ছংগো ঙা লাক খেংফু, য়াংচাগো নাংরো লাক খেংনৈফু লঃ?”
39য়াংসুউরো প্রগেলিইরি, “হুকপারি, খেংনৈবাফু।”
য়াংখা যীশু প্রলিইরি, “যা দুঃখাওয়া লংবেংশ্যি(পিয়ালা) চাঃফু, নাংরোলি আম্হেং য়াংদে চাঃগেমি, অর যা মাঙ্গালাগো ঙা লাক খেংফু, য়াংচাগোলি নাংরো লাক খেংগেমি, 40য়িগিলি ঙাক ঞাফাক্কা মুহুকিলি বিফাক্কা আথৈং পিইফু তাওয়েং ঙামা মিহি। য়াং আঃরা কিজু যাসুরোগু ম্হেরো হিকরি, য়াংসুউরো য়াং আঃরাগু রাঃফু।”
41আখ্রা ছিঃয়ক তিবি দিঃচাগো ক্রারো যাকোবনা যোহনগো মেং পাগেলিরি। 42য়াংখা যীশু আলুংসুউগো তলৈংমা খঃরো প্রলিরি, “নাংরো সিইরিচাগা, যিহুদীমুহু লুঃউরোমা গংখ্যুক ওকখ্যুকসুরো যিহুদীমুহুরোমা মাং ফ্রইতি অর য়াংসুউরোমা গংখ্যুকরোচা, য়াংসুউরো আপমা আনা খ্যারি। 43ছুগি নাংরোমা দিঃচা ফৈফু মাসাং, প্রফুছুগি নাংরোবামা যাসুউ আগ্রি ফ্রইখ্যাংলি, য়াংসুউগো নাংরোবামা লুককিসা ফৈরাফু, 44অর যাসুউ পাথামা ফ্রইখ্যাংলি, য়াংসুউগো আলুংসুউবামা ছাঃমা খেংরাফু। 45ম্হেরো থাঃগে, মনুসাওয়া সাঃচা খেংচাঃফু মাঃলা, প্রফুছুগি লুককিফুরা লাঃচা অর লুঃউম্যারোগু আক্যুয়েতাঃরা কিজু কোঃ আসাককো আঃফু পিইরো, য়াংসুউরো আসাককো থাঃরো কোঃ আসাককো ছুংজিফু লাঃরি।”
আকেইং বরতীময় কেইংমালিরি
(মথি ২০:২৯-৩৪; লূক ১৮:৩৫-৪৩)
46নক্কা যীশুনা তিবিরোচা যিরীহো ম্রুদুঃ লাঃখাগেতি। যাখা যীশুচা তিবিরোনা কংগং লুঃউম্যারোনা ম্রুগা থুঃওয়ক লাঃরিখা, তীময়েমা সাঃ বনতীময় নাঃমিনা আকেইং তয়ক আহ্লুঃউখেংসাবামা থৈংহিকলিরি। 47“দিঃ লুঃউচা নাসরত রুওয়াগা যীশু,” দিঃ চাঃগাগো ক্রারো য়াংসুউ অঃরো প্রলিচাগা, “দায়ূদ আচৈং যীশু, ঙাগো মিত্তা থাঃবা।”
48য়জংছুগি লুঃউম্যারোচা য়াংসুউগো হকরো তিঃতি নিংফু প্রগেলিরি, য়িগিলি য়াংসুউচা অরলি আম্যা অঃরো প্রলিরি, “দায়ূদ আচৈং, ঙাগো মিত্তা থাঃবা।”
49যীশু তেংরো প্রলিরি, “য়াংসুউগো খঃলৈই।”
লুঃউরোচা আকেইং লুঃউগো খঃরো প্রগেলিরি, “মক্রককি থাঃ। ছারা নাককো খঃরি।” 50য়াংখা য়াংসুউ কোরুংগো বৈরো খুংরো থাঃলিইরি অর যীশুবাদুঃ লাঃলিইরি।
51যীশু য়াংসুউগো মিংলিইরি, “ঙা নাক কিজু যা লুকফুলিঃ? নাং যা লুরিলি?”
আকেইংচা প্রলিইরি, “ছারা, ঙা ম্রাংফুচাগো লুঃউবারি।”
52যীশু প্রলিইরি, “লাঃলি, নাং ক্যুংরি কিজু কংগং কংরি।”
য়জংছুখা য়াং লুঃউচা খ্যাং খ্যাং ম্রাংলিরি অর লেংমা যীশু নক্কা নক্কা লৈলিরি।
Currently Selected:
মার্ক 10: BBSRMZ
Highlight
Share
Copy
Want to have your highlights saved across all your devices? Sign up or sign in
