মার্ক 13
13
আছুং খঃ রাক
(মথি ২৪:১-৩৫; লূক ২১:৫-৩৩)
1যীশু যাখা ওয়িইপাসানা ক্যংগা থুঃওয়ক লাঃরি, য়াংখা তিবি তয়ক যীশু প্রলিরি, “ছারা, ক্রি, মন্হক আগ্রি আগ্রি ক্যকলিঃ, অর আহ্লা আহ্লা ওক ইং!”
2যীশু তিবিগু প্রলিইরি, “নাংগা দিঃ আলুংচাগো আগ্রিই আগ্রিই ম্রাংরি, য়িগিলি দিঃ ক্যক লুংরো-তগ্যক আথাকমা তগ্যক মিহিমু; আলুংচাগা ফ্রুবলৈফু।”
3নক্কা যীশু ওয়িপাসানা ক্যং আপ্রেইং ব্রাক জৈতুন তং আথাকমা থৈং হিকলিরিখা, য়াংখা পিতর, যাকোব, যোহননা আন্দ্রিয়চা তিতিকি তিতি মিংগেলিরি, 4“কোবাং ঙারোগু প্রবা, যাখা দিঃচারো ফ্রইফুলিঃ? যা লুমুয়িং ম্রাংরো, ঙারো সিকফুলিঃ-য়াকচা ফ্রইফু আখিং ক্যাহ্লাব্যা?”
5যীশু য়াংসুউরোগু প্রলিইরি, “ক্রি, তয়কলি নাংরোগু মিলিংরাঅং। 6লুঃউম্যারোচা ঙাক নাঃমিগো য়ুউ লাঃরো প্রঃমি, ‘ঙা য়াংসুউ’ অর লুঃউম্যারোগু লিংলিফু। 7যাখা নাংরো চঃ আসেং অর চঃ থাঃফু ক্রাগেমি য়াংখা মক্রককেলিগি। য়াংচারোচা আম্হেং ফ্রইফু, য়িগিলি য়াংখা মুতুংসি। 8তুখু লুঃউম্যুও-অর তু-লুঃউম্যুওগো ছেংগ্যাংফাক লুঃউকমি, মাং তাবা অর তাবাগো ছেংগ্যাংফাক লুঃউকরো চঃ থুঃওয়কমি। যে যে আঃরামা মিঃয়াংনা আঃচাআ খংবাংমি। ছুগি য়াংচারোচা ওয়িদানা চাঃদুংসি।
9“নাংরো সিঃদিনা নিংগে। লুঃউরো নাংরোগু তাঃরা চঃসা লুঃউরোবামা তিঃ পিইমি অর তাঃরা চেঃরেমা দুঃনা সেঃখেংমি। ঙা কিজু প্রি ওকখ্যুকসানা মাংরো হ্রিইগা রেঃরাফু। য়াংসুউরো হ্রিঃগা ঙাক আক্রংলিলাগো য়ুউরো, নাংরো সাকসি পিইরাফু। 10হিকচা আলুং যেম্যুওমা হ্রিইগা থাওরা ফুরা ঈ আকং সাদাংগো ক্যঞারাফু। 11যাখা নাংরোগু তিঃরো তাঃরা চৈফু কিজু য়ুউ লাঃফু, য়াংখা যা প্ররাফুলি য়াংচাগো হ্রিইগাকাবাং মেচেংজাগি। য়াং আখিংমা নাংরোগু যা প্রঃ পিইফুলি, নাংরো য়াংচা প্রগেলি, আক্রংগা নাংরো প্রফু য়াংচামুহু প্রলনৈংঅংছুগি সেংস্যাংস ওয়িঞেংনা চাঃগা প্রফু।
12“ঞিং-ঞিংগো, ফাখাং সাঃগো সেঃ বৈফু কিজু তিঃ পিইলিমি। সাঃ-সিঃমিংরোচা মিখাং-ফাখাংগো ছেংগ্যাংফাক লুঃউকরো য়াংসুউরোগু সেঃ বৈফু। 13ঙা কিজু আলুংসুউ নাংরোগু মুংগেমি, য়িগিলি যাসু আছুং রকঅং সিঃখেংরো হিকফু, য়াংসুউ ক্যুওয়েম্রকফু।”
14“লুঃউগো আপ্যাকচি লুকচা মকং ওয়েথুউগো, যাদেমা নিং মাসাংলি, নাংরো য়াংচাগো য়াংদেমা ম্রাংফু-যাসু ফেঃতিলি, য়াংসুউ নাঃলিবেচি-য়াংখা যাসুরো যিহুদীয়ামা নিংগেতি, য়াংসুউরো তংদেংদুঃ ব্রি লাঃগেলি। 15যাসু ইংখংমা হিকফু, য়াংসুউ তুখুমাসা য়ুফু কিজু অকতু সাকরো ইংদুঃ মুওয়ংরাঅং। 16যাসু খ্রেংমা হিকরিলি, য়াংসুউ কোঃরুং য়ুফু কিজু মাপ্রেংরাঅং। 17য়াংখা যাসুরো কোঃওয়েংসিনা আশ্যিগো নুঃও তৈইতি, য়াংসুউরো ওয়িদানা কংগং খেংফু! 18ছুংতংগে দিঃচারো আখেংরাকমা মফ্ররাঅং, 19আক্রংগা য়াং আখিংমা যা ওয়িদানা রাঃফু য়াংচা কাবা তিম্রিরিকাবাং আগু লকতং মফ্রসিই অর য়াং নকলি মফ্রপ্যা। 20আস্যাংরা য়াং রাকরোগু আনৈং মাপ্যাংলিগি, তয়কলি ম্রেলিফু মুহু। ছুগি আস্যাং রুইকক থাঃচা লুঃউঃউরো কিজু, য়াং রাকরোগু থাওরা ফুরা নৈংজিলৈতি। 21য়াং আখিংমা তয়কমুসু নাংরোগু প্ররিছুগি, ‘ক্রি, মশীহ দিঃমা,’ মুহুকিলি ‘ক্রি, মশীহ থুঃউমা,’ নাংরো মুক্যুংগেলিগি; 22আক্রংগা ক্রংসুউদঃ মশীহরোনা ক্রংসুউদঃ রিসিইরো লাঃফু অর আম্যা আম্যা এংঅফুয়ি অলুক লুকমি, যাফুলিছুগি নৈংরিফাক ক্যাগিলি থাওরা ফুরা রুইকক থাঃচা লুঃউরোগু লিংফু। 23খ্যাংচা ফ্রইলি নাংরো সিঃদিনা নিংগে। ঙা হ্রিইগাকাবাং আলুংচা নাংরোগু প্রঃ থাঃলৈতিয়ি।
24“য়াং আখিংমা ওয়িদানা খেংব্রি খ্যাং খ্যাং নিং ওয়ং লাঃফু অর লাঃলি লাঃরং মিপিইব্যা, 25ক্রিরিরোচা গংখাংগা ক্রোই ক্যালাঃফু অর নিংনা লাঃচা তিঃদি মিনিংব্যা। 26য়াং আখিংমা লুঃউরোচা মনুসুওয়া সাঃগো গুংদগ্রি অর রংখ্রিনা মু্ওরিঃ আথিইগা কাবাদুঃ লাঃচাগো ম্রাংগেফু। 27মনুসুওয়া সাঃচা কোঃ তেমেংদরোগু রুওয়েরো কাবা আঃচাকাবাং আতুং রকঅং লিফাকলাকচিগা থাওরা ফুরা ঈ রুইকক থাঃচা লুঃউরোগু তেরেমা লুংচুকফু।
28“সেঃফেংবাংগো ম্রাংলো সাংগে। যাখা য়াং আপাংমা আখাকরো ঞেঞেয়ে ফ্রইরো আরুওয়ক থুওয়কতিলি, য়াংখা নাংরো সিকচাগা-আঃপুরাক ক্যাব্যা। 29য়াংপুয়েং যাখা নাংরো ম্রাংগেমি থুঃউচারো ফ্রইতিব্যা-য়াংখা সিইগেমিচাগা, মনুসুওয়া সাঃচা লাঃরিব্যা, প্রফুছুগি লেংখাওয়া রাংমা রকব্যা। 30ঙা নাংরোগু আম্হেং প্ররি, যাখা য়াংচারো ফ্রইফু-য়াংখালি দিঃ খঃমা লৈগায়ক লুঃউ হ্রাং হিকফুসিই। 31গংখাংনা কেইংফা ছুং লাঃনৈংমি য়িগিলি ঙাক চাঃগাচা তাসাকপেলুং হিকলিমি।
মনুসুওয়া সাঃ যাখা লাঃফুলি?
(মথি ২৪:৩৬-৪৪)
32“য়াং রাক-য়াং আখিং চাঃগাগো তয়কলি মিঃসিই, গংখাং নেঃসারোলি মিঃসিই অর মনুসুওয়া সাঃলি মিঃসি- ফাখাং তয়করা সিকরিব্যা। 33নাংরো সিঃদি রেঃকে, আহ্লাপা নিংগে অর ছুক তংগে, আক্রংগা য়াং রাক যাখা লাঃফুলি নাংরো মিঃসিইগে। 34য়াং রাকচা লাঃফু, যং তয়ক লুঃউঞ্যং; যাসু নেংঙেংখ্রাদুঃ লাঃরি। ইংগো বৈরো লাঃফু হ্রিঃগা, য়াংসুউ ক্যুয়েংরোবামা আলুঃউং তাওয়েংগো পিইলিরি। য়াংসুউচা আলুঃউং ক্যুয়েংগো অলুক পিইলৈতি অর লেংখুওয়া চংসাগো নুঃরোনিংছুরো প্রলিরি।
35“নাংরোলি দিঃ পুয়েং নুঃনিংগে, আক্রংগা ইং ইংস্যাংচা ছেংছারুকমা, মুহুকি মুওয়েদিতৈং, মুহুকি মুউলাংসখা, মুহুকিলি ঞিঃগাঞ্যংখা লাঃফুচাগো নাংরো মিসিই। 36ব্রুংখুনৈং ইংস্যাং লাঃখা, নাংরো ওয়িরো হিকচাগো মাম্রাংরাঅং। 37নাংরোগু যা প্ররিলি, য়াংচা আলুংসুউগো প্ররি, নুঃরো নিংগে।”
Currently Selected:
মার্ক 13: BBSRMZ
Highlight
Share
Copy
Want to have your highlights saved across all your devices? Sign up or sign in
