মার্ক 7
7
দিঃ খঃমা সুংগেচা আক্যাং
(মথি ১৫:১-২০)
1যাসুউরো যিরুশালেংগা লাঃগেতি, য়াংসুউরোমা লৈগায়ক ফরীশীনা কেইং ছারারোচা যীশুবামা আচুক ক্যাগেলিরি। 2য়াংসুউরো ম্রাংগেলিরি, যীশু তিবিরোমা লৈগায়ক আলাক মিছিইব্রি, আঞ্যনা চাঃআ থৈংগেরি। 3ফরীশীরোনা হিচা আলুঃউং যিহুদীরোচা আয়াংখা রাকমা কেইং ছারারো পিইচা আক্যাংগো কৈং লাঃগেতি, য়াং আক্যাং আলৈই-আলাক মিছিইব্রি মাঃআচারা। 4জিইগা প্রেংখা য়াংসুউরো আলাক-আখ্রিঃ মিছিইব্রি তুখুউলি মাঃআচা। দিঃচাগো মুহুকপ্রি য়াংসুউরো অর যে যে আক্যাং ক্যাংগেতি, প্রফুছুগি ওঃ, খুওয়ক, লংবেং যে যে ছিইরাফু।
5য়াংচা কিজু ফরীশীরোনা কেইং ছারারোচা যীশুগো মিংগেলিরি, “আয়াংখা কেইং ছারারো পিইচা, যে আক্যাং ক্যাংরো লাঃচা-কোবাং তিবিরো য়াংচাগো মুসুংগে যাফুলিঃ? য়াংসুউরোগা আলাক মিছিইব্রি চাঃআগেতিব্যা।”
6যীশু আফ্রি পিইলিরি, কোবাংরো ক্রংসুউদ! কোবাংরো আক্রংলিলাগো য়ুরো রিসিই যিশাইয় আম্হেং চাঃগাগো প্রলিরি। যিশাইয় চাউমা রুইরো হিকচাগা:
দিঃ লুঃউরোচা ঙাগো খুনাংরানা রুসিচা,
ছুগি য়াংসুউরো চিই নুনুংচা ঙাগা আওয়িই নিংরি।
7য়াংসুউরো ঙাগো আঃম্মা রুসিইরি,
য়াংসুউরো সুয়েংসাং পিইচা, লুঃউ লুকচা লৈংখুক আক্যাংগো রুসিচারা।
8কোবাংরোগা থাওরা ফুরা পিইচা আঃনাগো পিঃরো লুঃউ পিইচা দিঃ খঃইমা আক্যাংগো ক্যাংগেতি।
9যীশু য়াংসুউরোগু অরলি প্রলিইরি, “থাওরা ফুরা আঃনাগো পিঃরো, কোরো লুকচা আক্যাংগো ক্যাংফু কিজু, আহ্লা লেংগু কোবাংরোচা আহ্লা সিইরো হিকরি। 10প্রফুছুগি, মোশি প্রলিইরি, ‘মিখাং-ফাখাংগো রুসিইগে’ অর যাসুউ চাঃগামা মিখাং-ফাখাংগো য়ুউরো আক্রেং চাঃগা প্ররি, য়াংসুউগো আম্হেং সেঃবৈরাফু।’ 11ছুগি কোবাংরো প্রগেতিচাগা, খ্যাংসুউমুছু কো মিখাং-ফাখাংগো জং প্রগি, ‘ঙাক যা অলুক মুহুকি ওয়েংনা মিখাং-ফাখাংগো কিজু থকমানৈংরি ছুগি, য়াংচা অল্হুউগ্রিই,’ প্রফুছুগি থাওরা ফুরাবামা অল্হুউগ্রিউ পিইলৈতি।, 12য়জং লুকতিছুগি য়াংসুউগো অর মিখাং-ফাখাং কিজু তুখুউলি মুলুুকরাব্যা। 13য়জংপ্যাংরো কোবাংরোচা, কোবাংরোমা দিঃ খঃমা আক্যাংগো সুওয়েংসাং পিইরো, থাওরা ফুরা ঈ তাঃরাগো পিইবলৈতি। দিঃচাগো মুহুকপ্রি অরলি কোবাংরো যে যে অলুক লুককেতি।”
14য়াং নাক যীশু লুঃউরোগু প্রেংরো কোবাদুঃ খঃরো প্রলিইরি, “কোবাংরো আলুংসুউ ঙাক চাঃগাগো নাথংগে অর নাঃলিগে। 15-16প্রাংগা যা লুঃউ ওয়েংথিদুঃ ওয়ংরি, য়াংচা লুঃউগো মকং মুলুক, প্রফুছুগি লুঃউরোগা যা প্রাংদুঃ থুওয়কতিলি-য়াংচারা লুঃউগো মকং লুঃউকতি।”
17য়াংনক যাখা যীশু লুঃউরোগু বৈরো ইংদুঃ ওয়ংলিরি, য়াংখা তিবিরোচা থুঃউঃ চাঃগা আদিপিগো মিংগেলিরি। 18যীশু য়াংসুউরোগু প্রলিরি, “নাংরো দকপজং নাঃমিলিগেলি? নাংরো নাঃমিলি লঃ, প্রাংগা যা লুঃউ আথিদুঃ ওয়ংরি, য়াংচা য়াংসুউগো মকং মুলুকনৈং? 19য়াং আক্রংচা ফ্রইতি, য়াংচাগা য়াংসুউ চিইনুন্হুংদুঃ মুওয়ংনৈং ছুগি ওয়েংদুঃরা ওয়ংরি অর নক্কা কেইংথাগা প্রাংদুঃ থুওয়ক লাঃরিব্যা।” দিঃ চাঃগানা যীশু প্রফু ক্রিলিরিচাগা, আলুং আঃচাচা আকং।
20যীশু অরলি প্রলিইরি, “লুঃউ আথিগা যা থুঃওয়ক লাঃরি, য়াংচারা লুঃউগো মকং লুঃউকতি, 21আক্রংগা লুঃউরো আথিমা, প্রফুছুগি চিইনুন্হুংগা মকং চিদানা, হিকচা আলুং কামিসু, খুঃফুচা, সেঃবৈফুচা, 22লঃফা, লুঃউগো মকং লুকফু ছেংদা, আলিং, আপ্যাক, মুংখ্রাং, মিক্রিনৈংখ্রাং, বরি অর আন্হেংচা থুঃওয়ক লাঃরি। 23দিঃ আলুং মকংচা লুঃউ চিই নুনুংগা থুওয়কতি অর লুঃউগো মকং প্যাংরি।”
যিহুদী মুহুক মিঃমা ক্যুংখ্রাং
(মথি ১৫:২১-২৮)
24য়াং নক যীশু, য়াং আঃরাগো বৈরো সোর নেংবুনেংবা আঃরাদুঃ লাঃখারি। যীশু ইং তিইংদুঃ ওয়ংলিরি অর যীশু ক্রিলিরিচাগা-য়াংসুউ নিংরাগু তয়কলি মিসিরাঅং, য়িগিলি যীশুচা নিংখুরো মিনিংনৈংলি। 25য়াংদেমা প্রফুচাঞ্যংছুগি মিঃমা তয়ক হিকলিরি, যাসু সিঃমিংগো মকং নেঃ কৈংরো হিকলিরি। য়াং মিঃমাচা যীশু আক্রংলিলাগো ক্রারো, খ্যাং খ্যাং লাঃরো যীশু আখ্রিমা ওয়েলিরি। 26মিঃমাচা যিহুদীমুহুক অর সুর-ফৈনীকীমা ম্যুইংলিরি। য়াংসুউচা যীশুগো ফাক-য়াকরো আতংবেং থাঃলিরিচাগা, কোবাংচা য়াংসুউরো সিঃমিংগা মকং নেঃকো ন্হাংথুঃউ বলৈপা।
27যীশু য়াংসুউগো প্রলিইরি, “হ্রিইগা সাঃ-সিঃমিংরোচা ওয়াঞ্যং চাঃবেচি, আক্রংগা সাঃ-সিঃমিংরো আঃচাগো য়ুউরো খুয়িইগো পিইচা মকং।”
28য়জংক্রারো য়াং মিঃমাচা প্রলিইরি, “আস্যাং, কোবাং আম্হেং প্ররি, য়িগিলি সাঃ-সিঃমিং আঃচাগা ফুইরো তাংখুং অক্কা ক্যাগি, য়াংচাগুরা খুয়িইরো চাঃরি।”
29যীশু য়াংসুউগো প্রলিইরি, “চাঃগাচা নাং আম্হেং প্ররি। আগু লাঃলিই, লাঃরো ক্রিলিই, মকং নেঃচা-নাক সিঃমিংগা থুওয়ক লাঃখাব্যা।”
30মিঃমাচা য়াংখা ইংদুঃ প্রেং লাঃরো ম্রাংলিরিচাগা, য়াংসুউ সিঃমিংচা ওয়িইরামা ওয়িইরো হিকরি অর মকং নেঃচা থুওয়ক লাঃখাব্যা।
আপাংনা আঃরি লুঃউচা কেইংমালিরি
31য়াংনক যীশু সোর নেংবুনেংবাগু বৈরো সীদোন ম্রুগা নিংরো গালীল ম্রঃবাঃ দিকাপলি নেংবুনেংবা রুওয়ারোদুঃ লাঃলিইরি। 32য়াংদেমা লৈগায়ক লুঃউরোচা নাবাংনা আঃরি লুঃউতয়ককো যীশুবাদুঃ য়ুউ লাঃগেলিরি অর ফাক-য়াকরো আতংবেং থাঃগেলিরি, যাফুলিছুগি যীশুচা য়াং সানাসি আপমা আলাক তাকঅং।
33যীশু লুঃউ আচুক্কা তেরেতুঃ য়ুউ লাঃরো, য়াংসুউ নাঃআ নৈফাক আপক মা কো লাকঞ্যংগো থিঃলিরি। নক্কা তুওয়েংছি বৈরো, য়াং লুঃউঃউ স্যাগো মেংলিরি। 34য়াংনক যীশু গংখাংদুঃ মঃ ক্রিরো, আসাক খ্যারো য়াং লুঃউগো প্রলিইরি, “এপফাথা,” প্রফুছুগি “পুওয়ং লাঃলি।”
35য়জংছুখা থুউ লুঃউমা নাঃআলি লঃলিরি, স্যালি পুওয়ংলিরি অর য়াংসুউচা মাঃআব্রি চাঃগা প্রনৈংরিব্যা। 36যীশু দিঃ আক্রংলিলাগো য়ুউরো লুঃউরোগু মপ্রগিছুরো হেংলিরি। য়িগিলি যীশু য়াংসুউরোগু মন্হক আম্যা হেংরিলি, য়াংসুউরো য়াংথাক আম্যা প্যাংরো আক্রংলিলাগো তয়ককো তয়ক প্রগেলিইরি। 37দিঃ প্রাসানাগো য়ুউরো লুঃউরোচা কংগং এংঅরো প্রগেলিইরি, “দিঃ লুঃউ খ্যাং অলুককোফ্র কংগং জিজিখ্যারো লুকতি। দিঃ লুঃউচা নাঃআবাংরোগু নাঃআক্রাঅং অর পাঃপারোগু চাঃগা প্রনৈংঅং প্যাংরি।”
Currently Selected:
মার্ক 7: BBSRMZ
Highlight
Share
Copy
Want to have your highlights saved across all your devices? Sign up or sign in
