San Lucas 12

Jesús yaj'u̶xpu̶ky ko ka'p mu̶baad pu̶n ñaybyu̶da'agyii oyjya'ay pu̶nu̶ ka'p naty jyaanchu̶ch

1Janch ka'anaag mil je̱'e̱ ja'ay nimujkku̶xy je̱'e̱ Jesús, janch du'un najty amiñ u̶xyu̶py y'oknay'adij y'oknay'abonu̶u̶yu̶gu̶xnu̶. Chi je̱'e̱ Jesús dyiscípulotu̶jk jayu̶jp mu̶dmu̶dyaaky; myu̶naañ: “Naygyweentu̶'ajtu̶gu̶x mu̶u̶d yu̶'u̶ fariseo ja'ay ajku̶xy, neby jya'ayyaj'u̶xpu̶jkku̶xyu̶ñ. Je̱' ko janch'oy yajxón je̱'e̱ kyapx myu̶dyaakku̶xy, y ka'p du'un kuydyuungu̶xy. 2Je̱' ko ka'p jii tii mu̶dyiibu̶ ijtp amechu̶, nu̶kxy kya'ani'igu̶xu̶'u̶gy. Nan ka'p jii tii mu̶dyiibu̶ ijtp ayu'uch, nu̶kxy kya'ayajnejwu̶'u̶y. 3Wan mu̶dyiibu̶ ayuuku̶ch mu̶dyiibu̶ agu̶ miichtyu̶'ajty tu̶ mgapxy tu̶ mmu̶dya'agyu̶ñ ajku̶xy, yajnejwu̶'u̶wu̶p je̱'. Y mu̶dyiibu̶ amechu̶ tu̶ mnayyajmu̶dmu̶dyaaku̶gu̶xy ku'u'aku̶'u̶y jiiby tu̶gooty, mu̶k je̱'e̱ yajmu̶dyaakwa'kxu̶ch jim tu̶jkku'uduum.

Pu̶n mu̶baad ndzu̶gu̶u̶yu̶m

(Mt 10.28-31)

4Chi je̱'e̱ Jesús jyakmu̶naañ: “Miich mu̶gu'uktu̶jk ajku̶xy, u̶u̶ch miich nnu̶maaygyu̶xypy ko ka'p je̱'e̱ ja'ay mdzu̶gu̶u̶ygyu̶xu̶ch mu̶dyiibu̶ naty je̱'e̱ mnaaxni'kx xyaj'o'ogaanu̶ygyu̶xpu̶ñ, je̱' ko ka'p je̱'e̱ ni tii jaktúnu̶ch ajku̶xy. 5U̶u̶ch miich n'awaanu̶yu̶py ajku̶xy pu̶n mu̶baad mdzu̶gu̶u̶ygyu̶xyu̶ñ: je̱' mdzu̶gu̶u̶ygyu̶xu̶py je̱'e̱ Dios mu̶dyiibu̶ je̱'e̱ jugy'ajtu̶ñ pu̶jkpu̶ñ, y ko naty tu̶ okpu̶ky, myu̶u̶d je̱'e̱ ane̱'e̱mu̶ñ neby je̱'e̱ aanu̶mu̶ pu̶da'agu̶chu̶ñ ma je̱'e̱ ayoodaaktu̶ñ. Je̱'e̱ju̶tz tu̶y jaanch mdzu̶gu̶u̶ygyu̶xu̶py.

6“¿Nej ka'p je̱'e̱ ja'ay joon muuxy tókku̶xy mu̶gooxk mye̱jtzpeexyu̶ch? Dios ni tu'ug je̱'e̱ joon muuxy ka'aja'aydyu̶góy. 7U̶xtu̶ je̱'e̱ mgu'uwaay ajku̶xy agu̶ mu̶choy je̱'e̱ Dios mu̶u̶du̶ch tu'ugjáty tu'ugjáty. Y paady ka'p mdzu̶gu̶u̶ygyu̶xu̶ch. Jaktzoowu̶ miich ni'igyu̶ ajku̶xy ma je̱'e̱ Dios winduuyu̶ñ, ni'igu̶ ka'p je̱'e̱ mayjyoon maymyuuxy ajku̶xyñu̶ba.

Pu̶njaty ka'p mu̶dzo'oydyúñ je̱'e̱ Jesús mayjya'ayjyooty

(Mt 10.32-33; 12.32; 10.19-20)

8“U̶u̶ch miich nnu̶maaygyu̶xypy ko pu̶njaty u̶u̶ch xyñigapxp xyñimu̶dyaakp mayjya'ayjyooty ko u̶u̶ch xymyu̶bu̶ky xymyu̶jpu̶da'agy, u̶u̶ch je̱' je̱'e̱ ja'ay mu̶dyiibu̶ tzon tzajpjooty, nigapxe̱e̱mbyu̶ch je̱'e̱ du'umbu̶ ja'ay nandu'un ma je̱'e̱ Dios y'ángelestu̶jk winduuy ajku̶xyu̶ñ ko u̶u̶ch tu̶ ngu'ubú̶ky. 9Peru̶ je̱'e̱ mu̶dyiibu̶ u̶u̶ch xykyuyu'tzpu̶ñ mayjya'ayjyooty, nan nguyu'udze̱e̱mbyu̶ch je̱'e̱ jiiby ma je̱'e̱ Dios y'ángelestu̶jk winduuy ajku̶xyu̶ñ.

10“Dios wyinme̱kxeemby je̱'e̱ ja'ay mu̶dyiibu̶ u̶u̶ch du'un, u̶u̶ch je̱' je̱'e̱ ja'ay mu̶dyiibu̶ tzon tzajpjooty, ju̶bu̶k xyñigapxp xyñimu̶dyaakpu̶ñ. Je̱'e̱ju̶tz tu̶y ka'p winme̱kxa'añ je̱'e̱ mu̶dyiibu̶ je̱'e̱ Espíritu Santo mu̶gapxtu̶gooybyu̶ñ.

11“Ko je̱'e̱ mmu̶dzip xyajnú̶kxu̶ch ajku̶xy ma je̱'e̱ naymyujktaaktu̶ñ o ma je̱'e̱ jueezu̶ñ y ma je̱'e̱ tuungmu̶u̶dpu̶ ajku̶xyu̶ñ, ka'p mdaju̶ch mmáyu̶ch ajku̶xy neby mnayñi'igapxtuuttu̶gu̶xu̶chu̶ñ, y ka'p mwinmáyu̶ch ajku̶xy neby mmu̶naangu̶xu̶chu̶ñ. 12Ko naty timypyaady mu̶naa mgápxku̶xu̶chu̶ñ, je̱'e̱ Espíritu Santo xy'awaanu̶p ajku̶xy neby mu̶baad m'adzoogu̶xyu̶ñ.”

Ka'p je̱'e̱ kumeeñ'adu̶u̶ m'adzojkku̶xy

13Chi je̱'e̱ ja'ay nidu'ugtu̶ mayjya'ayjyooty nu̶maay je̱'e̱ Jesús:

—Windzú̶n, nu̶maayu̶ygyu̶ch je̱'e̱ nbuya'ay ko u̶u̶ch wan xymyu̶dyajwa'kxy mu̶dyiibu̶ u̶u̶ch je̱'e̱ ndaj ndeedy ijty pyu̶da'agy'ajtypyu̶ñ ajku̶xy.

14Y chi je̱'e̱ Jesús y'adzoowu̶:

—Mu̶gu'ug, ¿pu̶n u̶u̶ch tu̶ xypyu̶da'agy neby je̱'e̱ jueezu̶ñ, o pu̶da'agy yajwa'kxpu̶ ma miich ajku̶xyu̶ñ?

15Chi je̱'e̱ Jesús je̱'e̱ ja'ay nandu'un nu̶maay ajku̶xy:

—Naygyweentu̶'ajtu̶gu̶x, ka'p je̱'e̱ kumeeñ'adu̶u̶ m'adzojkku̶xy. Je̱' ko je̱'e̱ jugy'ajtu̶ñ, ka'p je̱'e̱ ni'idzooku̶ñ'adyii ko tijaty may nmu̶dajtu̶mu̶ch.

16Mu̶'it adayaaba ijxpe̱jt yajmu̶dmu̶dyaaku̶ ajku̶xy:

“Jii ijty kumeeñjya'ay tu'ug mu̶dyiibu̶ najty pyu̶da'agy mu̶j ku̶je̱e̱ tu̶ yajpu̶du̶'u̶gyu̶ñ. 17Mu̶'it je̱'e̱ kumeeñjya'ay wyinmaaydyu̶gu̶u̶y, myu̶naañ: ‘¿Ti u̶u̶ch n'oktunu̶py, je̱' ko ka'p u̶u̶ch nmu̶u̶du̶ch ma u̶u̶ch je̱'e̱ nbu̶da'agy nyajni'igu̶da'agu̶chu̶ñ je̱'e̱ tu̶u̶bu̶ y'ity?’ 18Y chi ku̶'u̶m myu̶naañ jootjooty winma'añjyooty: ‘Tu̶ u̶u̶ch nejwu̶'u̶y tii u̶u̶ch ndunu̶byu̶ñ. Nyajpu̶du̶'kta'awu̶byu̶ch je̱'e̱ ndze̱'e̱x y ngoju̶chu̶ch je̱'e̱ jakmu̶jjátypyu̶; chi u̶u̶ch jiiby ku̶xyu̶ nbu̶gu̶'kta'awu̶ch je̱'e̱ tu̶u̶bu̶ y'ity y ku̶xyu̶ tijátyu̶ch nmu̶dajtypyu̶ñ. 19Mu̶'it u̶u̶ch nnayñu̶ma'awu̶u̶ju̶ch. Mu̶gu'ug may je̱'e̱ mbu̶da'agy pu̶gu̶'u̶gy mjanchmu̶daty mu̶dyiibu̶ ka'anaag jumu̶jt myajtunu̶byu̶ñ: pokx pu̶k, kay u'ug, y xon it.’ 20Peru̶ Dios je̱'e̱ kumeeñjya'ay nu̶maay: ‘Tu̶goygyu'ujuuñ, cham goodz miich m'o'oga'añ, y yu̶'u̶ mu̶dyiibu̶ tu̶ mbu̶gu̶'u̶gyu̶ñ, ¿pu̶n je̱' je̱'e̱'adu̶u̶ju̶p?’ 21Du'un je̱'e̱ du'umbu̶ ja'ay jyajtku̶xy mu̶dyiibu̶ je̱'e̱ myaymyeeñ ku̶'u̶m nigoo yajni'igu̶daakku̶xpu̶ñ, ka'p je̱'e̱ jiiby kyumeeñu̶ch ajku̶xy ma je̱'e̱ Dios winduuyu̶ñ.”

Dios kyweentu̶'ajtypy je̱'e̱ y'ung y'ana'k

(Mt 6.25-34)

22Jak'u̶x'aam je̱'e̱ Jesús dyiscípulotu̶jk nu̶maay ajku̶xy: “Paady nu̶maaygyu̶xy: Ka'p mnidaj mnimaaygyu̶xy tii mgaaygyu̶xu̶py m'uukku̶xu̶byu̶ñ, je̱'e̱ mnijugy'ajtu̶u̶k ajku̶xy, y ni je̱'e̱ wit tukxy tii myajtuungu̶xu̶u̶ybyu̶ñ. 23Je̱'e̱ jugy'ajtu̶ñ jakni'igyu̶ je̱'e̱ choowu̶ju̶ch ni'igu̶ ka'p je̱'e̱ kaayu̶ñ uuku̶ñu̶ba, y je̱'e̱ ni'kx kopt jakni'igyu̶ je̱'e̱ choowu̶ju̶ch ni'igu̶ ka'p je̱'e̱ wit tukxyu̶ñu̶ba. 24Ijxku̶x je̱'e̱ joogy ajku̶xy: ka'p je̱'e̱ ñiip tyuungu̶xy, y ka'p chijkku̶xy tyuungu̶xy, nan ka'p je̱'e̱ che̱'e̱x ni tyu̶jk je̱'e̱ mu̶u̶du̶ch ajku̶xy; y Dios je̱'e̱ mooyu̶p ajku̶xy tii jyú̶kxku̶xu̶byu̶ñ. ¿Nej ka'p mdijy miich jakni'igyu̶ mdzoowu̶ch ajku̶xy ni'igu̶ ka'p je̱'e̱ joon muuxy ajku̶xyñu̶ba? 25Oy pu̶n nigoo mu̶jku̶je̱e̱ jya'ataj jya'amáyu̶ch, ka'p jii ni pu̶n ma miich ajku̶xyu̶ñ pu̶n jadu̶bu̶ñ neby je̱'e̱ jyugy'ajtu̶ñ jak'yajyonu̶chu̶ñ ja'adu'k'hooru̶.#12.25 Neby je̱'e̱ jyugy'ajtu̶ñ jak'yajyónu̶chu̶ñ ja'adu'k-hooru̶: nije̱' wiingpu̶ jaaybyu̶du̶jk myu̶naangu̶xy: Neby je̱'e̱ ñi'kx kyopt jak'yajyonu̶chu̶ñ tu'kku̶'u̶nuux. 26Pu̶nu̶ ka'p mjajtku̶xy neby mduungu̶xu̶ch mu̶dyiibu̶ we̱e̱nu̶ winma'añdyu̶ñ, ¿ti ko mjanchmu̶joottu̶gooygyu̶xy je̱'e̱ wiingpu̶ winma'añ?

27“Ijxku̶x yu̶'u̶ aaybyu̶jy ujtzpu̶jy neby yeegyu̶ñ: ka'p yu̶'u̶ tyuungu̶xy, ni ka'p xyuuygyu̶xy jyú̶pku̶xy. Y u̶u̶ch miich nnu̶maaygyu̶xypy ko ni je̱'e̱ mu̶j'ane̱'e̱mbu̶ Salomón mu̶u̶d ku̶xyu̶ je̱'e̱ oyjyatypyu̶ wyit tyukxy, ka'p je̱'e̱ du'un ñayxojxu̶ neby adayaaba aaybyu̶jy ujtzpu̶jyu̶ñ. 28Pu̶nu̶ Dios je̱'e̱ du'un xojxp yu̶'u̶ aay yu̶'u̶ ujtz mu̶dyiibu̶ cham jajtu̶bu̶ñ ma yu̶'u̶ tun koptu̶ñ, y kujaboom naty yajno'knu̶ ma je̱'e̱ hoornu̶ju̶ñ, ¡miich mdijy da'a xykya'a'okni'ixoxu̶p ajku̶xy, miich ja'ay ajku̶xy mu̶dyiibu̶ we̱e̱nu̶ mu̶bu̶jkku̶xpu̶ñ! 29Ka'p mnidaj mnimaaygyu̶xy, y ka'p m'u̶xtaaygyu̶xy tii mgaaygyu̶xu̶py m'uukku̶xu̶byu̶ñ. 30Adaa du'umbu̶ je̱'e̱ naaxwiiñjya'ay ku̶xyu̶ ñidaj ñimaaygyu̶xypy, peru̶ miich ajku̶xy mu̶u̶d miich je̱'e̱ mDios Teedy ajku̶xy mu̶dyiibu̶ nejwu̶u̶ybyu̶ñ ko miich ku̶xyu̶ tijaty myajmayjyajtku̶xy. 31Jayu̶jp mu̶joottu̶gooygyu̶x je̱'e̱ Dios y'ayuuk tyu̶y'ajt, y mu̶'itnu̶ ku̶xyu̶ mbaatku̶xu̶ch mu̶dyiibu̶ naty myajmayjyajtku̶xypyu̶ñ.

Jugy'ajtu̶ñ mu̶jpu̶ jiiby tzajpjooty

(Mt 6.19-21)

32“Ka'p mdzu̶gu̶u̶ygyu̶xy, mu̶dyiibu̶ du'un neby je̱'e̱ borreegu̶ju̶ñ, miich mniwe̱e̱nu̶ miich ajku̶xy, peru̶ je̱'e̱ Dios Teedy du'un tzojkp xymyo'owaangu̶xy je̱'e̱ ane̱'e̱mdaakt jiiby tzajpjooty. 33Tókku̶x tijaty mu̶u̶du̶ñ ajku̶xy, y ni'imooygyu̶x je̱'e̱ mu̶dyiibu̶ yajmayjyajtku̶xpu̶ñ. Yaj'oyu̶u̶ygyu̶x je̱'e̱ meeñ'idu̶'u̶ñ mu̶dyiibu̶ ka'p nimu̶naaxu̶u̶ tyúgu̶chu̶ñ. Je̱'e̱ kumeeñ'adu̶u̶ mu̶dyiibu̶ ka'p nimu̶naaxu̶u̶ kyú̶xu̶ch tyu̶góyu̶chu̶ñ jiiby tzajpjooty, ma je̱'e̱ me̱e̱tzpu̶ ka'p mu̶baad tyu̶gu̶'u̶yu̶ñ, y ma je̱'e̱ ukxytyu̶u̶ng ka'p mu̶baad yajwindu̶góyu̶ñ. 34Pu̶nu̶ mu̶u̶d je̱'e̱ mgumeeñ'ajtu̶ñ miich ajku̶xy yaa naaxwiiñ, nan yaayu̶ je̱'e̱ mjoot mwinma'añ je'eyu̶ ajku̶xy, y pu̶nu̶ mdzojkku̶xypy je̱'e̱ oybyu̶ mu̶dyiibu̶ je̱'e̱ Dios ye̱ge̱e̱mbyu̶ñ, nan mu̶dajtku̶x je̱'e̱ mjoot mwinma'añ jim jaboom jaboom ma je̱'e̱ Diosu̶ñ.

Tzu̶k ni'ixu̶'u̶ ijtu̶m ajku̶xy

35“Ni'ixu̶u̶ygyu̶x je̱'e̱ mjoot mwinma'añ, du'un neby je̱'e̱ mwit m'yujkxátzku̶xyu̶ñ ko mduundu̶gu̶'u̶waangu̶xy; y du'un neby je̱'e̱ mlámpara myajtooybyu̶jkku̶xyu̶ñ ko mdzuunaxaangu̶xy, juugy mja'ay'e̱xaangu̶xy je̱'e̱ Windzú̶n Dios. 36Ni'ixu̶'u̶ ijtku̶x du'un neby je̱'e̱ mu̶duumbu̶du̶jk mu̶dyiibu̶ je̱'e̱ wyindzú̶n ja'ay'e̱jxku̶xpu̶ñ ko naty wyimbijtnu̶ ma je̱'e̱ pu̶jkpu̶ju̶ñ. Chi ko naty kyugapxu̶'u̶y, mu̶k'eemby je̱'e̱ tyu̶jk yaj'awaatzu̶yu̶ch. 37Jootkujk je̱'e̱ du'umbu̶ mu̶duumbu̶du̶jk ajku̶xy ko je̱'e̱ wyindzú̶n naty jya'ady, y pyaattu̶gu̶xu̶ch tzuum juugy. Janch tu̶y'ajtu̶ñ du'un nu̶maaygyu̶xy ko je̱'e̱ windzú̶n ku̶'u̶m yajnaxwe̱tztaayu̶gu̶xu̶ch ma je̱'e̱ kaaybye̱jtu̶ñ, y yajkay yaj'u'ugú̶ju̶ch ajku̶xy. 38Jootkujk je̱'e̱ du'umbu̶ mu̶duumbu̶du̶jk ajku̶xy oy je̱'e̱ wyindzú̶n myinu̶ch mu̶jkuwa'kxychuum o moñyu̶, y pyaattu̶gu̶xu̶ch naty jim juugy chuunajxku̶xy. 39Y nejwu̶u̶ygyu̶x adaa du'un miich ajku̶xy: ko je̱'e̱ kudu̶jk u̶xyu̶py oknejwu̶'u̶y tii hooru̶ je̱'e̱ me̱e̱tzpu̶ myina'añu̶ñ, chi u̶xyu̶py je̱'e̱ juugy chuunaxy y ka'p je̱'e̱ tyu̶jk ye̱gu̶ch nu̶kxy je̱'e̱ ja'ay tyu̶gooty myeech. 40Miich ajku̶xy nandu'un ni'ixu̶'u̶'ijtku̶x, mu̶naa naty ka'p tii mdajku̶xy mmaaygyu̶xyu̶ñ, mu̶'it u̶u̶ch nmina'añ, u̶u̶ch je̱' je̱'e̱ ja'ay mu̶dyiibu̶ tzon tzajpjooty.”

Je̱'e̱ tuumbu̶ tu'uda'agypyu̶ y je̱'e̱ ka'pu̶ tuumbu̶ tyu'uda'agyu̶ch

(Mt 24.45-51)

41Chi je̱'e̱ Pedro Jesús yajtu̶u̶y:

—Windzú̶n, ¿pu̶n adaa ijxpe̱jt tu̶ myajmu̶dmu̶dya'agy, u̶u̶ch je'eyu̶ ajku̶xy o nigu̶xyu̶ je̱'e̱ ja'ay ajku̶xy?

42Chi je̱'e̱ Windzú̶n Jesús myu̶naañ: “¿Mu̶dyii tuumbu̶ je̱', je̱'e̱ mu̶dyiibu̶ tuumb mu̶u̶d je̱'e̱ wyindzú̶n mu̶u̶d je̱'e̱ oyjyoot oywyinma'añ y wij'ajt ke̱j'ajt, y mu̶u̶d je̱'e̱ ane̱'e̱mu̶ñ mu̶dyiibu̶ je̱'e̱ wyindzú̶n mooyu̶bu̶ñ ma je̱'e̱ jyu̶u̶n tyu̶jku̶ñ, ko je̱'e̱ tyuumbu̶ wan jaboom jaboom myooyu̶xu̶ je̱'e̱ kaayu̶ñ uuku̶ñ neby pyadyiiju̶ñ? 43Jootkujk je̱'e̱ du'umbu̶ tuumbu̶ ko naty je̱'e̱ wyindzú̶n wyimbity y pyadu̶u̶ju̶ch kuydyuñ naty du'un neby naty tu̶ ñu̶ma'ayiiju̶ñ. 44Jaanch du'un nnu̶maaygyu̶xy ko je̱'e̱ wyindzú̶n pyu̶da'agu̶u̶ju̶ch mu̶dyiibu̶ ku̶xyu̶ kweentu̶'atu̶bu̶ñ ma je̱'e̱ wyindzú̶n jyu̶u̶n tyu̶jku̶ñ. 45Peru̶ pu̶nu̶ mu̶naamb je̱'e̱ tuumbu̶ ko je̱'e̱ wyindzú̶n jye̱ga'añ mu̶naa myina'añ jya'ada'añu̶ñ, chi mu̶dzibu̶u̶yñu̶ wojptu̶gu̶u̶y kojxtu̶gu̶u̶yñu̶ je̱'e̱ maydyuumbu̶du̶jk y je̱'e̱ to'oxyu̶jk po'oduumbu̶du̶jk, y nan tyu̶gu̶u̶yñu̶ kaaybyu̶ uukpu̶ anaxy y y'uuktu̶gu̶u̶y jyu̶kxtu̶gu̶u̶yñu̶, 46chi je̱'e̱ windzú̶n jya'adu̶ch je̱'e̱ xu̶u̶ mu̶naa naty ka'p tii tajy may, y je̱'e̱ hooru̶ mu̶naa naty ka'p ju̶jp'ixyu̶ñ, chi je̱'e̱ tyuumbu̶ mu̶k tzaachtyúnu̶ch y pu̶da'agu̶ch ma je̱'e̱ mu̶dyiibu̶ ka'p tyu'uda'agyu̶chu̶ñ ajku̶xy.

47“Je̱'e̱ tuumbu̶ mu̶dyiibu̶ nejwu̶u̶by tii je̱'e̱ wyindzú̶n chojkypyu̶ñ, peru̶ ka'p ni'ixu̶'u̶ y'ity ko je̱'e̱ wyindzú̶n naty wyimbity y ni ka'p kyapxymyu̶doy, ni'igyu̶ mu̶k je̱'e̱ yajtzaachtyunu̶ch. 48Peru̶ je̱'e̱ tuumbu̶ mu̶dyiibu̶ ka'p nejwu̶'u̶y tii je̱'e̱ wyindzú̶n chojkypyu̶ñ, y tuñ mu̶dyiibu̶ je̱'e̱ tzaachpyu̶ winmajtzu̶bu̶ñ, we̱e̱nu̶ je̱'e̱ yajtzaachtyunu̶ch. Pu̶n tii may yajmooybyu̶ñ, nan may je̱'e̱ yajmu̶yujkwa'anu̶ch; y pu̶n tii ni'igyu̶ tu̶ mu̶wu̶'u̶myu̶ñ, nan ni'igyu̶ je̱'e̱ yajmu̶yujkwa'anu̶ch.

Jesús kyu̶xpu̶ je̱'e̱ ja'ay ñaymyu̶dzibu̶'u̶yii

(Mt 10.34-36)

49“U̶u̶ch tu̶ nmiñu̶ch ya naaxwiiñ ko u̶u̶ch je̱'e̱ ju̶u̶n nbu̶da'agu̶ch; y ¡oy u̶u̶ch nja'atzóky ko u̶xyu̶py jii ñi'itooyñu̶! 50Nyajnaxu̶u̶ybyu̶ch je̱'e̱ tzaachpyu̶ mu̶j, y ¡mu̶ku̶ch ndajy nmay u̶xtu̶ koonu̶ yajkuydyunu̶ch! 51¿Nej miich mmu̶naangu̶xpu̶ ko tu̶ nmiñu̶ch yaa naaxwiiñ y ko u̶u̶ch je̱'e̱ tzip ma'ad nyajku̶x nyajnaxu̶chu̶cha? U̶u̶ch miich nnu̶maaygyu̶xypy ko kya'abu̶ch. Nyajnaymyu̶dzibu̶'u̶wu̶u̶wu̶byu̶ch je̱'e̱ ja'ay ajku̶xy. 52Jada'achám y jakjiinu̶, jii'adu̶p je̱'e̱ ja'ay mu̶dyiibu̶ nimu̶gooxk tu'kke̱'e̱xkpu̶ naymyu̶dzibu̶'u̶wu̶u̶ju̶p ajku̶xy, je̱'e̱ tu̶gu̶u̶gpu̶ myu̶dzip'adu̶py je̱'e̱ me̱tzpu̶, y je̱'e̱ me̱tzpu̶ myu̶dzip'adu̶py je̱'e̱ tu̶gu̶u̶gpu̶. 53Je̱'e̱ ungteedy tziptunu̶p je̱' mu̶u̶d je̱'e̱ ya'ay'ung y je̱'e̱ ya'ay'ung mu̶u̶d je̱'e̱ tyeedy; nan tziptunu̶p je̱'e̱ ungtaj mu̶u̶d je̱'e̱ tyo'oxy'ung, y je̱'e̱ to'oxy'úng mu̶u̶d je̱'e̱ tyaj; y nandu'un je̱'e̱ xaky tziptunu̶p je̱' mu̶u̶d je̱'e̱ jyu̶xye̱'e̱b y je̱'e̱ ju̶xye̱'e̱b mu̶u̶d je̱'e̱ xyaky.”

Je̱'e̱ xu̶u̶ tiempo tyu̶y'ajt

(Mt 16.1-4; Mc 8.11-13)

54Chi je̱'e̱ Jesús mayjya'ay nandu'un nu̶maay: “Ko m'ijxku̶xy je̱'e̱ jok ye̱e̱g pyu̶du̶'u̶gy ma je̱'e̱ xu̶u̶ kya'ayu̶ñ, chi mmu̶naangu̶xy ko tu'uwaamb, y jaanch je̱'e̱ du'un tyuñyii jyadyii. 55Y ko je̱'e̱ ju̶u̶nboj myiñ, chi mmu̶naangu̶xy ko ambu̶gaamb, y jaanch je̱'e̱ du'un tyuñyii jyadyii. 56¡Tzo'oydyu'untúk miich ajku̶xy! Mjajtku̶xypy oy yajxón neby je̱'e̱ xu̶u̶ tiempo myajkapxku̶xu̶chu̶ñ mu̶dyiibu̶ m'ijxku̶xypyu̶ñ tzajpku̶xy y ya naaxwiiñ, ¿y tiiju̶tz ko mga'ajajtku̶xy neby je̱'e̱ xu̶u̶ tiempo myajkapxku̶xu̶chu̶ñ mu̶dyiibu̶ miimb ku̶daakpu̶ñ?

Jatytimñaymyu̶'oyu̶'u̶wu̶u̶ mu̶u̶d je̱'e̱ mmu̶dzip

(Mt 5.25-26)

57“¿Ti ko miich ku̶'u̶m mga'anaydyu̶ydyuunu̶gu̶xy neby je̱'e̱ tu̶y'ajt tyu'uda'agyu̶chu̶ñ? 58Ko pu̶n xyu̶'u̶wu̶ch y mnú̶kxu̶ch mu̶u̶d je̱'e̱ tu̶u̶bu̶ naty xyu̶'u̶y ma je̱'e̱ kuduungu̶ñ, jak'oy ko je̱'e̱ mmu̶dzip mmu̶dnaygyapx'oyu̶'u̶wu̶u̶ju̶ch tu'u'aam y ka'pu̶ xyajnú̶kxu̶ch ma je̱'e̱ jueezu̶ñ. Pu̶nu̶ ka'p je̱'e̱ mmu̶dzip mmu̶dnaygyapx'oyu̶'u̶yii tu'u'aam, chi je̱'e̱ jueez xykyu̶'u̶yé̱ku̶ch ma je̱'e̱ policía, y je̱'e̱ policía xypyu̶da'agu̶p pujxtu̶gooty. 59U̶u̶ch miich nu̶maaby ko ka'p jiiby mbu̶dzú̶mu̶ch, u̶xtu̶ koonu̶ ku̶xyu̶ mgube̱jta'awu̶ch.”

Currently Selected:

San Lucas 12: MIXE

Highlight

Copy