San Mateo 15

Mu̶dyiibu̶ je̱'e̱ ja'ay yajpokykya'ab

(Mc 7.1-23)

1Mu̶'it je̱'e̱ Jesús nije̱' ñimiinu̶ je̱'e̱ fariseotu̶jk y je̱'e̱ Dios y'ane̱'e̱mu̶ñ windzu̶ndu̶jk ajku̶xy mu̶dyiibu̶ najty jim Jerusalén tu̶ chóngu̶xyu̶ñ, y chi yajtu̶u̶wu̶ ajku̶xy:

2—¿Ti yu̶'u̶ mdiscípulotu̶jk ko ka'p kuydyuungu̶xy u̶u̶ch je̱'e̱ ni'ap kostumbre ajku̶xy? ¿Ti je̱'e̱ ane̱'e̱mu̶ñ ko ka'p kuydyuungu̶xy ka'p kyu̶'u̶bujku̶xy ko naty kyayaangu̶xy y'u'ugaangu̶xy?

3Chi je̱'e̱ Jesús y'adzoowu̶ ajku̶xy:

—¿Y miich ti miich ko nan ka'p mguydyuungu̶xpu̶ je̱'e̱ Dios y'ane̱'e̱mu̶ñ y je̱'e̱ mgu̶'u̶mgostumbre miich je'eyu̶ mguydyuungu̶xypy? 4Je̱' ko du'un je̱'e̱ Dios myu̶naañ: ‘Yajmu̶j'ajtku̶x je̱'e̱ mdaj mdeedy ajku̶xy,’ y ‘Pu̶n je̱'e̱ tyaj o je̱'e̱ tyeedy ju̶bu̶k axu̶u̶g nigapxp nimu̶dyaakpu̶ñ, ni'igu̶ o'ogu̶p je̱'’. 5Peru̶ miich ajku̶xy du'un miich mmu̶naangu̶xy ko mu̶baad je̱'e̱ ja'ay je̱'e̱ tyaj o je̱'e̱ tyeedy nu̶maaygyu̶xy: ‘Ka'p mu̶baad mbubety ajku̶xy, je̱' ko je̱'e̱ mu̶dyiibu̶ u̶u̶ch ku̶xyu̶ nmu̶dajtypyu̶ñ je̱'e̱ Dios u̶u̶ch je̱'e̱ tu̶ nyajwinwaanu̶'u̶y’; 6y ko wanpú̶nu̶ch pu̶n du'un mu̶naambu̶ñ, ka'p y'okmu̶dzibu̶'u̶ju̶ñu̶ch pube̱jtku̶xu̶ch je̱'e̱ tyaj o je̱'e̱ tyeedy ajku̶xy. Y du'unu̶tz je̱'e̱ Dios y'ane̱'e̱mu̶ñ tu̶ mgapxykyu'udé̱nu̶ ajku̶xy ko je̱'e̱ mgu̶'u̶mgostumbre mjanchpadunaangu̶xy. 7¡Tzo'oydyu'untúk miich ajku̶xy! Tu̶y'ajtu̶ñ je̱'e̱ du'un neby je̱'e̱ Dios y'ayuuknajtzkapxu̶u̶ybyu̶ Isaías myu̶naañu̶ñ, ko du'un myu̶naañ:

8‘Adaa ja'ay du'un yu̶'u̶ kyápxku̶xy myu̶dyaakku̶xy neby u̶u̶ch je̱'e̱

jaanchpyu̶ xychoky xyajmu̶j'átyu̶ñ ajku̶xy,

peru̶ janch ju̶gue̱m jyoot wyinma'añ yu̶'u̶ ajku̶xy ma u̶u̶chu̶ñ.

9Ni'inadu̶gu̶'u̶bu̶ u̶u̶ch yu̶'u̶ xywyin'u̶u̶gu̶xy xywyinyaaxku̶xy;

y je̱' yu̶'u̶ y'u̶xpu̶jku̶ñ'ajtypy ajku̶xy je̱'e̱ ane̱'e̱mu̶ñ mu̶dyiibu̶

je̱'e̱ ja'ay ku̶'u̶m tu̶ yajkojku̶xyu̶ñ.’

10Mu̶'it je̱'e̱ Jesús je̱'e̱ mayjya'ay mu̶j'yaaxy y nu̶maay ajku̶xy:

—Amdo'ijtku̶x adaa n'ayuuku̶ch y okwinju̶wu̶u̶ygyu̶x: 11Ku̶xyu̶ je̱'e̱ ju̶kxy pu̶ky mu̶dyiijáty awakjooty tu̶gu̶yu̶u̶by ka'p je̱'e̱ ja'ay yajpokykya'ay. Je̱'e̱ju̶tz tu̶y je̱'e̱ ja'ay yajpokykya'ab je̱'e̱ mu̶dyiibu̶ awakjooty pu̶dzu̶u̶mbu̶ñ.

12Mu̶'it je̱'e̱ discípulotu̶jk nimu̶jwa'kku̶xy je̱'e̱ Jesús y chi yajtu̶u̶y ajku̶xy:

—¿Nej mnejwu̶u̶by du'un ko je̱'e̱ fariseotu̶jk tu̶ jyootma'tku̶xy ko du'un tu̶ mu̶doogu̶xy neby tu̶ mmu̶na'añu̶ñ?

13Chi je̱'e̱ Jesús y'adzoowu̶ ajku̶xy:

—Wan timymyu̶dyii u̶xpu̶jku̶ñ mu̶dyiibu̶ u̶u̶ch je̱'e̱ nDeedy tzajpjootypyu̶ ka'p tu̶ pu̶da'agyu̶ñ, ku'udu̶góyu̶p je̱'. 14U̶xmajtzku̶x yu̶'u̶ fariseotu̶jk, wiindz yu̶'u̶ ajku̶xy mu̶dyiibu̶ je̱'e̱ myu̶wiindzja'ay wijtzyo'oygyu̶xpu̶ñ. Y pu̶nu̶ je̱'e̱ wiindzja'ay je̱'e̱ myu̶wiindzja'ay tu'ug wijtzyo'oybyu̶, pues nime̱tzk je̱'e̱ jyutku'uga'agu̶xu̶ch.

15Mu̶'it je̱'e̱ Pedro je̱'e̱ Jesús nu̶maay:

—Kapxtu̶u̶wu̶gyu̶ch ajku̶xy yu̶'u̶ tu̶u̶bu̶ u̶u̶ch xyajmu̶dmu̶dyaakku̶xy.

16Chi je̱'e̱ Jesús y'adzooy:

—¿Nej nan ni miich je̱'e̱ ka'p mwinju̶wu̶u̶ygyu̶xyu̶? 17¿Nej ka'p mnejwu̶u̶ygyu̶xy ko ku̶xyu̶ je̱'e̱ ju̶kxy pu̶ky mu̶dyiijáty awakjooty tu̶gu̶yu̶u̶by, jiiby aajooty moxjooty je̱'e̱ ñu̶kxy y chi kujeky pyu̶dzu̶u̶mnu̶ ma je̱'e̱ ni'kxu̶ñ? 18Peru̶ je̱'e̱ mu̶dyiibu̶ awakjooty pu̶dzu̶u̶mb, jiiby je̱'e̱ chooñ ma je̱'e̱ ja'ay jyoot wyinma'añdyu̶ñ, y je̱'e̱ju̶tz je̱'e̱ ja'ay yajpokykya'awu̶p. 19Je̱' ko jiiby ma je̱'e̱ ja'ay jyoot wyinma'añdyu̶ñ jiiby je̱'e̱ ju̶bu̶kwinma'añ chooñ, je̱'e̱ ja'ayyaj'o'ogu̶u̶ winma'añ, je̱'e̱ wiingpu̶ to'oxyu̶jk mu̶dtuundu̶goyu̶u̶, je̱'e̱ to'oxyu̶jk mu̶dtuundu̶goyu̶u̶ ma naty ka'p pyú̶kyñu̶ju̶ñ, je̱'e̱ me̱e̱dzu̶u̶, je̱'e̱ anu̶u̶'adu̶u̶ y je̱'e̱ nay'oj nayya'axu̶u̶. 20Adaa du'umbu̶tz je̱'e̱ ja'ay yajpokykya'awu̶p; peru̶ ko kyay y'u'ugy jaygyu̶'u̶bujy oy je̱'e̱ ane̱'e̱mu̶ñ ka'akuydyúñ, ka'p je̱'e̱ yajpokykya'ayii.

To'oxyu̶jk tu'ug mu̶dyiibu̶ ka'p jyudíoja'ayu̶chu̶ñ mu̶bu̶jky je̱'e̱ Jesús

(Mc 7.24-30)

21Chi je̱'e̱ Jesús jim choñ y ñu̶kxy ma je̱'e̱ Tiro y Sidón naaxjootyu̶ñ. 22Mu̶'it je̱'e̱ cananea to'oxyu̶jk tu'ug ñimiinu̶ mu̶dyiibu̶ najty jim tzu̶naaby ma je̱'e̱ jimbu̶ naaxu̶ñ; cham mu̶k yaaxke'egy:

—¡Windzú̶n, David y'ok'ung y'ok'ana'k, u̶u̶ch pa'a''ayoog! ¡Ka'a'óybyu̶mu̶u̶d u̶u̶ch je̱'e̱ ndo'oxy'úng!

23Peru̶ je̱'e̱ Jesús ka'p je̱'e̱ ni du'uñdyu̶ adzooy. Mu̶'it je̱'e̱ dyiscípulotu̶jk ñimu̶jwa'ku̶ ajku̶xy y myu̶waandaak myu̶nukxtaaku̶ ajku̶xy:

—Nu̶ma'a yu̶'u̶ jiibu̶ to'oxyu̶jk ko wan nu̶kxnu̶, je̱' ko nigoo yu̶'u̶ u̶x'aam xyjyanchpawu̶dijtu̶m ajku̶xy; cham xypyayaax xypyajojku̶m ajku̶xy.

24Chi je̱'e̱ Jesús y'adzooy:

—Je̱'e̱du̶'ajty u̶u̶ch je̱'e̱ Dios tu̶ xyajniguéxy je̱'e̱ judío ja'ay ajku̶xy mu̶dyiibu̶ tu̶goydyuum yajpaatku̶xpu̶ñ ma je̱'e̱ Israel ñaax kyajptu̶ñ.

25Chi je̱'e̱ to'oxyu̶jk oy jim ñayñajtzkojxtu̶na'awu̶'u̶yii ma je̱'e̱ Jesús wyinduuyu̶ñ, cham myu̶na'añ:

—¡Windzú̶n, u̶u̶ch pube̱jtk!

26Chi je̱'e̱ Jesús y'adzoowu̶:

—Ka'p du'un y'óyu̶ch ko je̱'e̱ ung ana'k je̱'e̱ tzajkaagy nbu̶jku̶yu̶ch ajtu̶m y nmooyu̶mu̶ch je̱'e̱ uk ajku̶xy.

27Mu̶'it je̱'e̱ to'oxyu̶jk y'adzooy:

—Tu̶y'ajtu̶ñ je̱'e̱ du'un, Windzú̶n; peru̶ u̶xtu̶ uk paad je̱'e̱ tzajkaagy abu'uxk kaaygyu̶xp mu̶dyiibu̶ ka'ab ma je̱'e̱ wyindzú̶n myeesu̶ ajku̶xyu̶ñ.

28Mu̶'it je̱'e̱ Jesús je̱'e̱ to'oxyu̶jk nu̶maay:

—¡To'oxyu̶jk, janchmu̶j miich je̱'e̱ mmu̶bu̶jk'ajtu̶ñ! Wan du'un tuñyii jadyii neby mdzokyu̶ñ.

Y timymyu̶'ityu̶ je̱'e̱ tyo'oxy'úng oy cho'ogy.

Jesús je̱'e̱ maybya'amja'ay yajtzo'ogy

29Chi je̱'e̱ Jesús jim choñ y jya'ty ma je̱'e̱ Galilea mejypya'aju̶ñ, chi pyejty ma je̱'e̱ kopt tu'ugu̶ñ y ñaxwech jim. 30Mu̶'it je̱'e̱ mayjya'ay jim ñayyo'oymyujku̶gu̶xy ma je̱'e̱ Jesús najtyu̶ñ. Yajnú̶kxku̶xy najty je̱'e̱ tekymya'atja'ay ajku̶xy, je̱'e̱ wiindzja'ay ajku̶xy, je̱'e̱ ku̶'u̶ma'atja'ay ajku̶xy, je̱'e̱ uumja'ay ajku̶xy y may je̱'e̱ pa'amja'aydyu̶jk ajku̶xy, chi pu̶daaky ajku̶xy ma je̱'e̱ Jesús tyekymyu̶jku̶ñ, y je̱' yajtzooktaay je̱'. 31Je̱'e̱ mayjya'ay mu̶k je̱'e̱ yajnú̶kxy yajju̶wu̶u̶y ajku̶xy ko du'un ijxy ajku̶xy ko je̱'e̱ uumja'ay najty tu̶ kyapxu̶'kku̶xy, ko je̱'e̱ ku̶'u̶ma'atja'ay najty tu̶ chookku̶xy, ko je̱'e̱ tekymya'atja'ay najty tu̶ yo'oyu̶'kku̶xy y ko je̱'e̱ wiindzja'ay najty tu̶ wyindu̶kxu̶'kku̶xy. Chi je̱'e̱ mayjya'ay je̱'e̱ xu̶u̶ Dios ku'umaaydyu̶gu̶u̶y ja'aymye̱jtztu̶gu̶u̶y ajku̶xy je̱'e̱ Israel ja'ay Dios ajku̶xy.

Jesús ja'ay mu̶daaxk mil yajkáy

(Mc 8.1-10)

32Chi je̱'e̱ Jesús dyiscípulotu̶jk yaaxu̶ y chi nu̶maay ajku̶xy:

—Mú̶ku̶ch adaa mayjya'ay njanchpa'a''ayóy ajku̶xy, je̱' ko cham mu̶du̶gu̶u̶g xu̶u̶ maabu̶ u̶u̶ch ya nmu̶dja'tku̶xyu̶ñ y ka'p ni tii mu̶u̶du̶ch ajku̶xy tii kyaaygyu̶xu̶py y'uukku̶xu̶byu̶ñ. Ka'p u̶u̶ch ayuu ngue̱jxwimbidaangu̶xy ma je̱'e̱ jyu̶u̶n tyu̶jk ajku̶xyu̶ñ, je̱' ko tzojku̶ mumjaty tu'ugujk yuu'o'kku̶xu̶ch.

33Chi je̱'e̱ dyiscípulotu̶jk ñu̶maayu̶ ajku̶xy:

—Peru̶ ¿neby je̱'e̱ kaayu̶ñ uuku̶ñ ya nbaattu̶mu̶ch ajku̶xy mu̶u̶d adaa mayjya'ay neby adaa it lugaar yaaju̶ñ, maa ka'p pu̶n chu̶na'ayu̶ñ?

34Chi je̱'e̱ Jesús yajtu̶u̶wu̶ ajku̶xy:

—¿Naag je̱'e̱ tzajkaagy miich mu̶u̶du̶ch ajku̶xy?

—Chi y'adzooy ajku̶xy:

—Juxtujk y mu̶u̶d je̱'e̱ akx'ung me̱tzk tu̶gu̶u̶g.

35Mu̶'it je̱'e̱ Jesús myu̶naañ ko je̱'e̱ mayjya'ay wan naxwe̱tztaaygyu̶xy naaxkú̶xy, 36chi je̱'e̱ juxtujkpu̶ tzajkaagy konu̶'ky y je̱'e̱ me̱tzk tu̶gu̶u̶gpu̶ akx'ung, y ko je̱'e̱ Dioskujuuyu̶p yejky ma je̱'e̱ Diosu̶ñ, chi adugu̶u̶y y mooy je̱'e̱ dyiscípulotu̶jk ajku̶xy, y je̱' je̱'e̱ yajwa'kxku̶x ma je̱'e̱ mayjya'ayu̶ñ. 37Nigu̶xyu̶ je̱'e̱ mayjya'ay kyaay y'uuky ajku̶xy janch ku'uxyu̶, y jyakyajpu̶du̶'kku̶x je̱'e̱ tzajkaagy kaaydyúk y je̱'e̱ akx tzu'tztúk juxtujk kach mu̶dyiibu̶ najty tu̶ ñadu̶gu̶'u̶yu̶ñ. 38Mu̶daaxk mil najty je̱'e̱ ya'aydyu̶jktu̶jk ajku̶xy mu̶dyiibu̶ kaaygyu̶x uukku̶xu̶ñ, abu̶ky je̱'e̱ to'oxyu̶jktu̶jk y je̱'e̱ pi'k'ana'ktu̶jk ajku̶xy. 39Chi je̱'e̱ Jesús je̱'e̱ mayjya'ay u̶xke̱jxnu̶, y chi byarcu̶tu̶gu̶u̶y y ñu̶kxy jim Magadán naaxjooty.#15.39 Nije̱' jaaybyu̶du̶jk myu̶naangu̶xy: Magdala.

Currently Selected:

San Mateo 15: MIXE

Highlight

Copy