San Mateo 22
22
Je̱'e̱ ijxpe̱jt ma je̱'e̱ pu̶jkpu̶ yajwinxu̶u̶dúñu̶ñ
(Lc 14.15-24)
1Chi je̱'e̱ Jesús myu̶dmu̶dyaaktu̶gu̶u̶yu̶ ajku̶xy mu̶u̶d je̱'e̱ ijxpe̱jtu̶ñ y ñu̶maayu̶ ajku̶xy:
2“Je̱'e̱ Dios y'ane̱'e̱mu̶ñ du'un je̱' neby je̱'e̱ mu̶j'ane̱'e̱mbu̶ tu'ug mu̶dyiibu̶ xu̶u̶duunu̶ñ ko najty je̱'e̱ y'ung pyu̶ga'añ. 3Chi je̱'e̱ tyuumbu̶du̶jk kejxy ajku̶xy ko je̱'e̱ ja'ay wan nu̶kxy woogu̶xy je̱'e̱ mu̶dyiibu̶ najty mu̶gaaybyu̶ tu̶ yajwoogu̶xyu̶ñ, peru̶ je̱' ka'p je̱'e̱ ku'ubu̶jky ajku̶xy ñú̶kxku̶xu̶ch. 4Chi je̱'e̱ wiingpu̶ tyuumbu̶du̶jk ke̱jxnu̶ba, nu̶maay ajku̶xy: ‘Nu̶maaygyu̶x je̱'e̱ ja'ay je̱'e̱ tu̶u̶bu̶ mu̶gaaybyu̶ yajwoogu̶xy ko tu̶ u̶u̶ch je̱'e̱ kaayu̶ñ uuku̶ñ yam ni'ixu̶'u̶y. Tu̶ u̶u̶ch je̱'e̱ nwaj y je̱'e̱ nno'on nju̶yujk ni'kxu̶bu̶ nyajyaj'o'ogyii, y ku̶xyu̶ yam ni'ixu̶'u̶ y'ijtnu̶; wan miingu̶xy ma je̱'e̱ pu̶jkpu̶ yam yajwinxu̶u̶duna'añu̶ñ.’ 5Peru̶ je̱'e̱ ja'ay mu̶dyiibu̶ mu̶gaaybyu̶ yajwoogu̶xu̶ñ ka'p je̱'e̱ ayuuk kweentu̶tuuñ ajku̶xy. Nije̱' kyamjooty ñu̶kxy ajku̶xy y nije̱' tokpu̶ ye̱jkpu̶ ñu̶kxy ajku̶xy, 6y nije̱' je̱'e̱ mu̶j'ane̱'e̱mbu̶ tyuumbu̶du̶jk majtzu̶ ajku̶xy y kujku̶xy ju̶bijpku̶xy u̶xtu̶ koonu̶ yaj'o'ky ajku̶xy. 7Mu̶'it je̱'e̱ mu̶j'ane̱'e̱mbu̶ mu̶k jyootma'ty, y chi je̱'e̱ soldadotu̶jk ane'emy ajku̶xy ko je̱'e̱ ja'ayyaj'o'kpu̶du̶jk wan nu̶kxy yaj'o'kku̶xy y ni'ino'ku̶ch je̱'e̱ kyajpt ajku̶xy. 8Mu̶'it je̱'e̱ tyuumbu̶du̶jk nu̶maay ajku̶xy: ‘Ku̶xyu̶ yam ni'ixu̶'u̶ y'ijtnu̶ ma je̱'e̱ pu̶jkpu̶ yam yajwinxu̶u̶duna'añu̶ñ, peru̶ je̱'e̱ ja'ay ajku̶xy je̱'e̱ mu̶dyiibu̶ u̶u̶ch mu̶gaaybyu̶ tu̶ nja'ayajwoowu̶gu̶xyu̶ñ, ka'p najty je̱'e̱ pyáttu̶gu̶xyu̶ myiingu̶xu̶ch yaa. 9Miich nnú̶kxku̶x majaty je̱'e̱ mu̶jnu̶u̶ mu̶jtu'uju̶ñ y woogu̶x je̱'e̱ ja'ay ku̶xyu̶ mu̶gaaybyu̶ ma je̱'e̱ pu̶jkpu̶ju̶ñ je̱'e̱ mu̶dyiibu̶ naty mbaatku̶xypyu̶ñ. 10Chi je̱'e̱ tuumbu̶du̶jk ñú̶kxku̶xy ma je̱'e̱ mu̶jnu̶u̶ mu̶jtu'uju̶ñ y woomujktaay je̱'e̱ ja'ay ku̶xyu̶ ajku̶xy je̱'e̱ mu̶dyiibu̶ pyaatku̶xu̶ñ, ju̶bu̶kja'ay y oyjya'ay ajku̶xy y du'un je̱'e̱ tyu̶goot y'ujch mu̶u̶d je̱'e̱ ja'ay ajku̶xy.
11“Ko je̱'e̱ mu̶j'ane̱'e̱mbu̶ tyu̶jktu̶gu̶u̶y ixa'añ je̱'e̱ ja'ay je̱'e̱ mu̶dyiibu̶ najty mu̶gaaybyu̶ tu̶ yajwoogu̶xyu̶ñ, chi je̱'e̱ ja'ay tu'ug ijxy ka'p najty je̱'e̱ du'un xyóxyu̶ch neby je̱'e̱ ja'ay ñayxojxu̶gu̶xyu̶ñ je̱'e̱ mu̶dyiibu̶ nú̶kxku̶xpu̶ñ ma je̱'e̱ pu̶jkpu̶ yajwinxu̶u̶dúñu̶ñ. 12Chi nu̶maay: ‘Mu̶gu'ug, ¿neby yaa tu̶ mdu̶gu̶'u̶y, y ka'p du'un mxóxyu̶ch neby je̱'e̱ ja'ay ñayxojxu̶gu̶xyu̶ñ je̱'e̱ mu̶dyiibu̶ nú̶kxku̶xpu̶ñ ma je̱'e̱ pu̶jkpu̶ yajwinxu̶u̶dúñu̶ñ?’ Peru̶ je̱' ka'p je̱'e̱ ni tu'k'aa y'adzooy. 13Mu̶'it je̱'e̱ mu̶j'ane̱'e̱mbu̶ nu̶maay je̱'e̱ mu̶dyiibu̶ najty je̱'e̱ ju̶kxy pu̶ky jim ni'ixu̶u̶ygyu̶xpu̶ñ: ‘Ku̶'u̶xojtz tekyxyojtzku̶x yu̶'u̶ y pu̶daakku̶x jiiby tu̶be̱'py agoodztuum, y jiiby jyu̶'u̶wu̶ch ya'axu̶ch y tyu̶u̶tzke̱e̱du̶ch.’ 14Je̱' ko may je̱'e̱ ja'ay tu̶ jya'ayajwoogu̶xy, peru̶ we̱e̱nu̶ je̱'e̱ win'ixypyu̶ ajku̶xy.”
Yajtu̶u̶gu̶xy pu̶nu̶ mu̶baad je̱'e̱ kube̱jtu̶ñ yaj'yéky o pu̶nu̶ ka'p
(Mc 12.13-17; Lc 20.20-26)
15Ko adaa du'un tyuundaay jyajttaayu̶, chi je̱'e̱ fariseotu̶jk jim chóngu̶xy y oy ñaygyápxu̶gu̶xyu̶ neby je̱'e̱ Jesús mu̶baad yajkapxtu̶gooygyu̶xyu̶ñ y neby mu̶baad mu̶'it xu̶'u̶gu̶xyu̶ñ. 16Chi je̱'e̱ ja'ay kejxy ajku̶xy je̱'e̱ mu̶dyiibu̶ jya'ay'ajtku̶xypyu̶ñ, kipxy mu̶u̶d je̱'e̱ Herodes jya'ay ajku̶xy ko du'un nu̶maaygyu̶xu̶ch:
—Windzú̶n, u̶u̶ch nnejwu̶u̶ybyu̶ch ajku̶xy ko miich tu̶y'ajtu̶ñ mmu̶dya'agy, y ko tu̶y'ajt je̱'e̱ Dios tyu̶y'ajt myaj'u̶xpu̶jku̶ neby je̱'e̱ ja'ay mu̶baad chu̶naaygyu̶xy jyugy'ajtku̶xyu̶ñ du'un neby je̱'e̱ Dios tzokyu̶ñ. Miich ka'p miich je̱'e̱ ja'ay mmu̶jpu̶da'agy nebyjyaty myu̶naangu̶xyu̶ñ, je̱' ko ka'p miich je̱'e̱ ja'ay win'ixy myaj'u̶xpú̶ky. 17U̶u̶ch ok'awaanu̶ygyu̶xk neby miich m'okmu̶naambu̶: ¿Nej mu̶baad u̶u̶ch nmu̶gubety ajku̶xy je̱'e̱ mu̶j'ane̱'e̱mbu̶ romano ja'ay, o ka'p?
18Peru̶ je̱' ajku̶xy winju̶wu̶u̶yu̶xu̶ je̱'e̱ Jesús jyu̶bu̶kwinma'añ ajku̶xy je̱'e̱ mu̶dyiibu̶ najty myu̶dajtku̶xypyu̶ñ, chi ñu̶maayu̶ ajku̶xy:
—Miich tzo'oydyu'untúk miich ajku̶xy, ¿ti u̶u̶ch ko miich xyjyoot'ijx xywyinma'añ'ijxku̶xy? 19Yaj'ijxku̶ch je̱'e̱ meeñ ajku̶xy mu̶dyiibu̶ je̱'e̱ kube̱jtu̶ñ mu̶u̶d mgubetyu̶ñ ajku̶xy.
Chi je̱'e̱ denario meeñ tu'ug yajnimiinu̶, 20y chi je̱'e̱ Jesús yajtu̶u̶wu̶ ajku̶xy:
—¿Pu̶n adaa y'awinnax y pu̶n je̱'e̱ xyu̶u̶ yam yujkja'ay miimb ma adaa meeñu̶ñ?
21Chi y'adzooy ajku̶xy:
—Je̱'e̱ mu̶j'ane̱'e̱mbu̶.
Mu̶'it je̱'e̱ Jesús ñu̶maayu̶ ajku̶xy:
—Pues mooygyu̶x je̱'e̱ mu̶j'ane̱'e̱mbu̶ je̱'e̱ mu̶dyiibu̶ je̱'e̱ mu̶j'ane̱'e̱mbu̶ paattu̶bu̶ñ, y mooygyu̶x je̱'e̱ Dios je̱'e̱ mu̶dyiibu̶ je̱'e̱ Dios paattu̶bu̶ñ.
22Ko adaa du'un mu̶dooy ajku̶xy, chi mu̶k yajnú̶kxy yajju̶wu̶u̶y ajku̶xy y u̶xmajtzku̶xnu̶ y ñú̶kxku̶xnu̶.
Yajtu̶u̶gu̶xy pu̶nu̶ juugypyu̶gaam je̱'e̱ o'ogyjya'ay ajku̶xy
(Mc 12.18-27; Lc 20.27-40)
23Nan je̱'e̱ mu̶'it xu̶u̶, chi je̱'e̱ saduceotu̶jk oy nije̱' ijxku̶xy je̱'e̱ Jesús. Je̱'e̱ saduceotu̶jk du'un je̱'e̱ myu̶naangu̶xy ko ka'p je̱'e̱ o'ogyjya'ay jyuugypyu̶gaangu̶xy, paady adayaaba mu̶dya'agy yajmu̶dmu̶dyaaky ajku̶xy:
24—Windzú̶n, du'un je̱'e̱ Moisés myu̶naañ ko pu̶nu̶ jii pu̶n y'o'ogy pu̶ky ya'aydyu̶jk y pu̶nu̶ ka'p je̱'e̱ y'ung ni tu'ug tu̶ yajwu̶'u̶my, je̱' pyuya'ay paattu̶p pú̶gu̶ch je̱'e̱ ku'o'ogytyo'oxyu̶jk wan du'un yaj'ungpaadu̶ch mu̶u̶d je̱'e̱ pyuya'ay gyu̶xpu̶ mu̶dyiibu̶ naty tu̶ y'o'ogyu̶ñ. 25Bueno, jii ijty je̱'e̱ ja'ay tu'kke̱'e̱xk ma u̶u̶ch ajku̶xyu̶ñ nijuxtujk ijty je̱'e̱ tyu'kke̱'e̱xk'ajtku̶xy agu̶ ya'aydyu̶jk. Chi je̱'e̱ kob'ung jayu̶jp pyu̶jky y chi je̱'e̱ tyo'oxyu̶jk u̶x'o'ky. Je̱' ko ka'p ni tu'ug yaj'ungpaaty, chi je̱'e̱ jyu̶dzu̶my je̱'e̱ ku'o'ogytyo'oxyu̶jk windumbu̶jky. 26Nandu'un je̱'e̱ mu̶me̱tzkpu̶ jyajty, y nan kujeky je̱'e̱ mu̶du̶gu̶u̶kpu̶, u̶xtu̶ koonu̶ nijuxtujku̶ mu̶dtzu̶naay abu̶dzu̶u̶mdaaygyu̶xy je̱'e̱ to'oxyu̶jk y u̶x'o'ktaay ajku̶xy. 27Y ko du'un y'o'ktaaygyu̶xy, chi je̱'e̱ to'oxyu̶jk oy nandu'un y'o'knu̶. 28Bueno, y ko naty je̱'e̱ jyuugypyu̶jkku̶xy, ¿mu̶dyiibu̶ je̱'e̱ nijuxtujkpu̶ tu'kke̱'e̱xkpu̶ da'a okto'oxyu̶jk'adu̶u̶ju̶p je̱'e̱ to'oxyu̶jk, je̱' ko nigu̶xyu̶ je̱'e̱ tu̶ to'oxyu̶jk'ajtu̶gu̶xyu̶?
29Chi je̱'e̱ Jesús y'adzoowu̶ ajku̶xy:
—Miich ajku̶xy mgapxtu̶gooygyu̶xp du'un, je̱' ko je̱'e̱ Dios ñaky ka'p mnejwu̶u̶yu̶ ajku̶xy ni je̱'e̱ Dios myu̶k'ajtu̶ñ. 30Ko naty je̱'e̱ o'ogyjya'ay jyugypyu̶jkku̶xy, je̱'e̱ ya'aydyu̶jktu̶jk y je̱'e̱ to'oxyu̶jktu̶jk ka'p je̱'e̱ pyu̶gaan y'u'ugaangu̶xnu̶,#22.30 Nije̱' wiingpu̶ versión myu̶na'añ: y nan ka'p je̱'e̱ y'ung y'ana'k ñaymyo'owaanu̶gu̶xnu̶ ko wan pu̶jkku̶xy uukku̶xy. du'un je̱'e̱ y'idaangu̶xnu̶ neby je̱'e̱ ángelestu̶jk mu̶dyiibu̶ jiiby tzajpjooty ajku̶xyu̶ñ. 31Y tu̶y'ajt je̱'e̱ du'un ko je̱'e̱ o'ogyjya'ay jyuugypyu̶gaangu̶xy, ¿nej ka'anu̶ miich mgápxku̶xyñu̶ ko je̱'e̱ Dios du'un ku̶'u̶m myu̶naañ. 32‘U̶u̶ch je̱'e̱ Abraham Dyios, je̱'e̱ Isaac Dyios y je̱'e̱ Jacob Dyios’? ¡Y je̱'e̱ Dios ka'p je̱'e̱ Dyios'aty ma je̱'e̱ o'ogypyu̶ja'ay ajku̶xyu̶ñ, je̱'e̱ Dios, Dios'ajtp je̱' ma je̱'e̱ juugypyu̶ja'ay ajku̶xyu̶ñ!
33Ko je̱'e̱ mayjya'ay adaa du'un mu̶dooy ajku̶xy je̱'e̱ Jesús y'u̶xpu̶jku̶ñ, chi mu̶k yajnú̶kxy yajju̶wu̶u̶y ajku̶xy.
Je̱'e̱ ane̱'e̱mu̶ñ ni'igyu̶ jakmu̶jpu̶
(Mc 12.28-34)
34Chi je̱'e̱ fariseotu̶jk ñayyo'oymyujku̶ ajku̶xy ko oy du'un nejwu̶u̶ygyu̶xy ko je̱'e̱ Jesús je̱'e̱ saduceotu̶jk najty tu̶ yaj'amóñ, 35y chi nidu'ugtu̶ Dios y'ane̱'e̱mu̶ñ windzu̶ndu̶jk, neby mu̶baad joot'íxy winma'añ'íxyu̶ñ, chi yajtu̶u̶y:
36—Windzú̶n, ¿mu̶dyii ane̱'e̱mu̶ñ ni'igyu̶ jakmu̶j ma je̱'e̱ Dios kyu'utujku̶ñ myiñu̶ñ?
37Chi je̱'e̱ Jesús y'adzooy:
—‘Tzok ju̶wu̶'u̶ je̱'e̱ mWindzú̶n Dios mu̶u̶d je̱'e̱ mjoot mwinma'añ ku̶xyu̶, mu̶u̶d je̱'e̱ mjoot m'aanu̶mu̶ ku̶xyu̶ y mu̶u̶d je̱'e̱ m'aa mjoot ku̶xyu̶.’ 38Adayaaba je̱' je̱'e̱ ane̱'e̱mu̶ñ ni'igyu̶ jakmu̶jpu̶ y je̱'e̱ timyjyayu̶jpu̶. 39Y je̱'e̱ mu̶me̱tzkpu̶ du'undu̶gu̶u̶by je̱' neby je̱'e̱ jayu̶jpu̶ju̶ñ, y du'un je̱'e̱ myu̶na'añ: ‘Tzok ju̶wu̶'u̶ je̱'e̱ mmu̶ju̶u̶n mmu̶du̶jk du'un neby miich ku̶'u̶m mnaychogyiiju̶ñ.’ 40Adayaaba me̱tzkpu̶ Dios y'ane̱'e̱mu̶ñ, adaa je̱'e̱ u̶jx'ajtp kopt'ajtp ku̶xyu̶ je̱'e̱ Dios kyu'utujku̶ñ mu̶dyiibu̶ je̱'e̱ Moisés kyujaayu̶ñ y mu̶dyiibu̶ je̱'e̱ Dios y'ayuuknajtzkapxu̶u̶ybyu̶du̶jk yaj'u̶xpu̶jkku̶xu̶ñ.
¿Pu̶n y'ok'ung y'ok'ana'k je̱' je̱'e̱ Cristo?
(Mc 12.35-37; Lc 20.41-44)
41Jim najty je̱'e̱ fariseotu̶jk kya'ayo'oywa'kxku̶xyñu̶, 42chi je̱'e̱ Jesús yajtu̶u̶wu̶ ajku̶xy:
—¿Nej miich m'okmu̶naangu̶xpu̶ mu̶u̶d je̱'e̱ Cristo kyu̶xpu̶? ¿Pu̶n y'ok'ung y'ok'ana'k je̱'?
Chi je̱' je̱'e̱ Jesús adzooy ajku̶xy:
—David y'ok'ung y'ok'ana'k je̱'.
43Mu̶'it je̱'e̱ Jesús ñu̶maayu̶ ajku̶xy:
—¿Peru̶ ti je̱'e̱ David ko je̱'e̱ Espíritu Santo yajkápxu̶, ko du'un nu̶maay: Windzú̶n?
Je̱' ko du'un je̱'e̱ David myu̶naañ:
44‘Je̱'e̱ Windzú̶n Dios nu̶maay u̶u̶ch je̱'e̱ nWindzú̶n:
U̶ña'a yaa a'oy'eemby ma u̶u̶ch je̱'e̱ nnamu̶jku̶ñ,
u̶xtu̶ koonu̶ u̶u̶ch naty je̱'e̱ mmu̶dzip tu̶ nmu̶madaakta'ay,
tu̶ nbu̶da'agyu̶ch mdekypya'tku̶'u̶by.’
45¿Neby je̱'e̱ Cristo mu̶baad y'ok'ung y'ok'ana'k'adyii je̱'e̱ David, y je̱'e̱ David du'un je̱'e̱ ku̶'u̶m myu̶naañ ko je̱'e̱ Cristo Wyindzu̶n'ajtypy?
46Ni pu̶n ni tu'k'aa kya'a'adzoowu̶, je̱'e̱ mu̶'it xu̶u̶ ni pu̶n ni tii ayuuk kya'a'okyajtu̶u̶wu̶nu̶.
Currently Selected:
San Mateo 22: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
