San Marcos 15

Jesús yajpaady ma je̱'e̱ Pilato wyinduuyu̶ñ

(Mt 27.1-2, 11-14; Lc 23.1-5; Jn 18.28-38)

1Ko xyu̶u̶mu̶u̶y, chi je̱'e̱ teedy windzu̶ndu̶jk mu̶u̶d je̱'e̱ amu̶jja'aydyu̶jk, je̱'e̱ Dios y'ane̱'e̱mu̶ñ windzu̶ndu̶jk y ku̶xyu̶ je̱'e̱ judío ja'ay myu̶jjuntu̶'ajtpu̶du̶jk ñayyo'oymyujku̶ ajku̶xy. Y je̱'e̱ Jesús ku̶'u̶xóch yajnú̶kxku̶xy, y yajku̶'u̶du̶gu̶u̶ygyu̶xy je̱'e̱ Pilato. 2Chi je̱'e̱ Pilato yajtu̶u̶y je̱'e̱ Jesús:

—¿Nej miich je̱' je̱'e̱ judío ja'ay Myu̶j'ane̱'e̱mbu̶ ajku̶xy?

—Chi je̱'e̱ Jesús y'adzooy:

—Miich du'un mmu̶naamb.

3Je̱' ko janch xu̶'u̶wu̶gu̶xp najty je̱'e̱ teedy windzu̶ndu̶jk mu̶kta'agy mu̶u̶d je̱'e̱ xu̶'u̶wu̶ñ ka'anaagnáx, 4chi je̱'e̱ Pilato je̱'e̱ Jesús ja'adu'ook yajtu̶u̶y:

—¿Nej ka'p nej m'adzowa'añu̶? Okmu̶dow, janch mayñax yu̶'u̶ yam xyjyanchxu̶'u̶gu̶xy.

5Peru̶ je̱'e̱ Jesús ka'p je̱'e̱ y'adzooy, y mu̶k je̱'e̱ Pilato yajnú̶kxy yajju̶wu̶u̶y.

Jesús y'o'ku̶ñ yajmo'oy

(Mt 27.15-31; Lc 23.13-25; Jn 18.38—19.16)

6Ñajtzmadzu̶u̶by najty je̱'e̱ Pilato je̱'e̱ pujxtu̶jkja'ay tu'ug, je̱'e̱ mu̶dyiibu̶ je̱'e̱ naax kajpt najty tyimyujkwe̱e̱mbyu̶ñ mu̶j Pascuaxu̶u̶jooty. 7Pujxtu̶jk'u̶ñaaby najty je̱'e̱ ja'ay jim tu'ug je̱'e̱ mu̶dyiibu̶ xu̶u̶'ajtpu̶ñ Barrabás, kipxy mu̶u̶d je̱'e̱ myu̶gu'ugtu̶jk ajku̶xy mu̶dyiibu̶ najty mu̶u̶d tu̶ jya'ayyaj'o'kku̶xyu̶ñ mu̶naaba je̱'e̱ gobierno romano najty tu̶ nibu̶du̶'kku̶xyu̶ñ. 8Chi je̱'e̱ mayjya'ay jya'ty ajku̶xy, y yujkwaandu̶gu̶u̶ygyu̶xy ma je̱'e̱ Pilátoju̶ñ ko je̱'e̱ pujxtu̶jkja'ay tu'ug najtzmadzu̶'u̶wu̶ch du'un neby najty kyostumbre'atyu̶ñ. 9Chi je̱'e̱ Pilato y'adzoowu̶ ajku̶xy:

—¿Neby mdzojkku̶xypy miich ko nnajtzmadzu̶u̶yu̶ch ajku̶xy je̱'e̱ judío ja'ay Myu̶j'ane̱'e̱mbu̶ ajku̶xy?

10Je̱' ko ñejwu̶u̶by najty je̱'e̱ du'un ko paady najty je̱'e̱ teedy windzu̶ndu̶jk je̱'e̱ Jesús tu̶ ku̶'u̶ye̱jkku̶xy ko najty je̱' kya'ayajmu̶'oy'ijxku̶xypy neby najty tyuñu̶ñ. 11Chi je̱'e̱ teedy windzu̶ndu̶jk je̱'e̱ mayjya'ay agapxu̶u̶ygyu̶xy ko wan yujkwaangu̶xy ñajtzmadzu̶u̶yu̶xu̶ch ajku̶xy je̱'e̱ Barrabás. 12Chi je̱'e̱ Pilato yajtu̶u̶wu̶ ajku̶xy:

—¿Y neby u̶u̶ch yu̶'u̶ ja'ay ndúnu̶ch, je̱'e̱ mu̶dyiibu̶ miich mdijku̶xypyu̶ñ je̱'e̱ judío ja'ay Myu̶j'ane̱'e̱mbu̶ ajku̶xy?

13Chi mu̶k yaaxke̱e̱kku̶xy:

—¡Yajcruutzpé̱t miich yu̶'u̶!

14Chi je̱'e̱ Pilato ñu̶maayu̶ ajku̶xy:

—¿Ti yu̶'u̶ tu̶ tuundu̶góy?

Peru̶ chi je̱'e̱ ja'adu'ook yaaxke̱e̱kku̶xnu̶ba:

—¡Yajcruutzpé̱t miich yu̶'u̶!

15Mu̶'it je̱'e̱ Pilato, ka'ayajjootma'ada'añ je̱'e̱ ja'ay ajku̶xy, chi je̱'e̱ Barrabás najtzmadzu̶u̶y; y ko je̱'e̱ Jesús yajwojptaayu̶, chi ku̶'u̶yejky ko wan yajcruutzpedyii.

16Chi je̱'e̱ tziptuumbu̶tu̶jk yajnú̶kxku̶xy je̱'e̱ Jesús ma je̱'e̱ mu̶jtu̶jk tu̶ba'aju̶ñ, y chi je̱'e̱ maybyu̶ tziptuumbu̶tu̶jk ku̶xyu̶ yajnayyo'oymyujku̶gu̶xy. 17Chi je̱'e̱ mu̶j'ane̱'e̱mbu̶wít yajpu̶jkku̶xy je̱'e̱ oy'ukypyu̶ color, y yajku'uje̱nu̶u̶ygyu̶xy tu'ug eptycyoronu̶ ta'agy. 18Chi yaaxtu̶gu̶u̶y jyojktu̶gu̶u̶ygyu̶xy:

—¡Mu̶j ku'umáy miich, je̱'e̱ judío ja'ay Myu̶j'ane̱'e̱mbu̶ ajku̶xy!

19Y jyanchwojpku̶xypy najty mu̶u̶d je̱'e̱ paxy ma je̱'e̱ kyu'ubajku̶ñ, janch nidzuju̶u̶ygyu̶xy y wingojxtu̶naay'amaaygyu̶xy du'un neby je̱'e̱ jaanchpyu̶ windzu̶gu̶u̶ygyu̶xyu̶ñ. 20Ko nixiik yajxiiktaay ajku̶xy, chi je̱'e̱ Mu̶j'ane̱'e̱mbu̶wít oy'ukypyu̶ color yaj'u̶xpu̶jky ajku̶xy y yajpu̶jkku̶xy je̱'e̱ kyu̶'u̶mwít, y chi yajpu̶dzu̶u̶mgu̶xnu̶ yajcruutzpe̱daangu̶xnu̶.

Jesús yajcruutzpe̱jtu̶

(Mt 27.32-44; Lc 23.26-43; Jn 19.17-27)

21Chi je̱'e̱ ja'ay tu'ug mu̶dyiibu̶ Cirene kugajptu̶ñ, mu̶dyiibu̶ xu̶u̶'ajtpu̶ñ Simón, je̱'e̱ Alejandro y je̱'e̱ Rufo tyeedy ajku̶xy, kamjooty najty je̱'e̱ jya'ady. Y ko jim ñaxu̶u̶y, chi je̱'e̱ Simón adzip yajkajpku̶xy je̱'e̱ Jesús kyruutz.

22Chi je̱'e̱ Jesús yajnú̶kxy ajku̶xy ma je̱'e̱ it lugaar tu'ug mu̶dyiibu̶ xu̶u̶'ajtpu̶ñ Gólgota (je̱'e̱ mu̶dyiibu̶ wimbu̶dzu̶u̶mbu̶ñ: “O'kpu̶ Ku'ubajk It”); 23Chi je̱'e̱ Jesús mooygyu̶xy u'ugu̶ch je̱'e̱ vinonu̶u̶ te̱e̱mwu̶díty mu̶u̶d je̱'e̱ mirra tzooy, peru̶ ka'p je̱'e̱ Jesús ku'ubu̶jky. 24Mu̶'it yajcruutzpejty ajku̶xy. Chi je̱'e̱ tziptuumbu̶tu̶jk suerte ijxy ajku̶xy ko najty je̱'e̱ Jesús wyit yajwa'kxaanu̶ ajku̶xy agu̶ je̱' y ixaangu̶xy pu̶n okje̱'e̱'áttu̶bu̶ñ.

25Petyxyu̶u̶ najty ko yajcruutzpejty ajku̶xy. 26Y chi je̱'e̱ leetru̶ yujkjaaygyu̶xy ma je̱'e̱ kyu'uduuyu̶ñ ma najty du'un myu̶na'añu̶ñ tii gyu̶xpu̶ ko yaj'o'ogyiiju̶ñ: “Je̱'e̱ Judioja'ay Myu̶j'ane̱'e̱mbu̶ ajku̶xy.” 27Nan yajcruutzpe̱jtku̶x je̱'e̱ me̱e̱tzpu̶du̶jk me̱tzk mu̶u̶d je̱'e̱ Jesús, tu'ug y'a'oy'eemby y ja'adu'ug y'anajty'eemby. 28[Y du'un du'un yajkuydyuuñ je̱'e̱ Dios ñaky mu̶dyiibu̶ du'un mu̶naambu̶ñ: “Yaj'amu̶choomujk je̱'e̱ Cristo mu̶u̶d je̱'e̱ pokyjya'aydyu̶jk ajku̶xy.”]#15.28 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.

29Je̱'e̱ ja'ay mu̶dyiibu̶ najty jim najxku̶xpu̶ñ y'ojku̶xypy yaaxku̶xypy je̱'e̱ najty, cham je̱'e̱ kyu'ubajk yaj'yu'kxku̶xy y myu̶naangu̶xy:

—¡Miich miñ je̱'e̱ mu̶jtzajptu̶jk myajwindu̶goye̱e̱mby y kudu̶gu̶u̶g xu̶u̶ miñ je̱'e̱ ja'adu'ook myajpu̶du̶'u̶ga'añ, 30nayñiwa'anu̶u̶ miich ku̶'u̶m y mu̶nak jim cruutzkú̶xp!

31Nandu'un najty je̱'e̱ nandu'un nixiik yajxiikku̶xy je̱'e̱ teedy windzu̶ndu̶jk y je̱'e̱ Dios y'ane̱'e̱mu̶ñ windzu̶ndu̶jk ajku̶xy. Myu̶naangu̶xy:

—Wiingja'ay yu̶'u̶ tu̶ yajtzo'ogy, peru̶ ka'p mu̶baad ku̶'u̶m ñayyajtzo'ogyii. 32¡Wan cruutzkú̶xp mu̶naky yu̶'u̶ Cristo, je̱'e̱ Israelpu̶ Mu̶j'ane̱'e̱mbu̶, wan n'ijx ndú̶kxu̶mu̶ch ajku̶xy y nmu̶bu̶jku̶mu̶ch ajku̶xy!

Y u̶xtu̶ je̱'e̱ me̱e̱tzpu̶du̶jk najty ojku̶xp yaaxku̶xp je̱'e̱ Jesús je̱'e̱ mu̶dyiibu̶ najty jim cruutzkú̶xpu̶ñ ajku̶xy mu̶u̶d je̱'.

Ko je̱'e̱ Jesús y'o'ky

(Mt 27.45-56; Lc 23.44-49; Jn 19.28-30)

33Ko kyujkxu̶u̶ju̶u̶y, chi je̱'e̱ naaxwiimbu̶ ku̶xyu̶ kyoodzu̶ydyaay, y tu̶gu̶u̶g hooru̶ du'un y'ijty. 34Je̱'e̱ mu̶'it hooru̶ je̱'e̱ Jesús mu̶k yaaxkeeky: “Eloi, Eloi, ¿lema sabactani?” (je̱'e̱ mu̶dyiibu̶ wimbu̶dzu̶u̶mbu̶ñ: “Dios Teedy, Dios Teedy, ¿ti u̶u̶ch ko tu̶ xyñajtz'ixu̶'u̶y?”)

35Chi nije̱' mu̶dyiibu̶ najty jim tu̶naaygyu̶xpu̶ñ ko du'un mu̶dooy ajku̶xy, chi ñayñu̶maayu̶gu̶xy:

—Okmu̶doogu̶x, je̱'e̱ Dios y'ayuuknajtzkapxu̶u̶ybyu̶ Elías yu̶'u̶ jim yaaxu̶py.

36Mu̶'it nidu'ugtu̶ poyu̶'u̶gyu̶ ñu̶kxy, chi je̱'e̱ pixy pama'tznajxy ma je̱'e̱ vinonu̶u̶ ta'ambu̶ju̶ñ, y chi je̱'e̱ pixy kuxodzu̶u̶y ma je̱'e̱ paxyu̶ñ y yajja'ty du'un ma je̱'e̱ Jesús y'awaku̶ñ neby du'un mu̶baad muugyu̶ñ; cham myu̶na'añ:

—Ok'u̶xmajtzku̶x, tzu̶k ok'ijxu̶m pu̶nu̶ okmiimb je̱'e̱ Elías miñ yajmu̶nagyii ma yu̶'u̶ cruutzu̶ñ.

37Peru̶ je̱'e̱ Jesús mu̶k je̱' yaaxkeeky, y chi y'o'ky. 38Y chi je̱'e̱ wit kyu̶tzwa'kxy kujktu̶na'a'eemby, kyu̶tztzóñ ku'uduum u̶xtu̶ y'u̶xku̶daaky mu̶dyiibu̶ je̱'e̱ mu̶jtzajptu̶jk najty mu̶u̶d y'adu̶u̶ydyúkyu̶ch ma je̱'e̱ Dios y'itu̶ñ. 39Je̱'e̱ tziptuumbu̶ windzú̶n mu̶dyiibu̶ najty tu̶naaby ma je̱'e̱ Jesús wyinduuyu̶ñ, ko du'un ijxy ko najty tu̶ y'o'ogy, chi myu̶maañ:

—Jaanchxu̶m adayaaba ja'ay je̱'e̱ Dios ijty y'Ung'adyii.

40Nan jim najty to'oxyu̶jktu̶jk nije̱' ju̶gue̱m myu̶j'ijxku̶xy, ma je̱' ajku̶xyu̶ñ jim najty je̱'e̱ María je̱'e̱ mu̶dyiibu̶ najty Magdala kugajptu̶ñ, y je̱'e̱ María je̱'e̱ Santiago mutzk'ana'kpu̶ y je̱'e̱ José tyaj ajku̶xy, y je̱'e̱ Salomé. 41Adayaaba to'oxyu̶jktu̶jk ajku̶xy tu̶ najty je̱'e̱ Jesús pawu̶dijtku̶xy, y tu̶ najty pube̱jtku̶xy mu̶naaba najty jim Galilea yajpaadyu̶ñ. Nan jim najty nandu'un may yajpaady je̱'e̱ wiingpu̶ to'oxyu̶jktu̶jk ajku̶xy je̱'e̱ mu̶dyiibu̶ najty je̱'e̱ Jesús kipxy tu̶ mu̶dnú̶kxku̶xyu̶ñ jim Jerusalén.

Jesús yajnaaxtu̶gu̶u̶yu̶

(Mt 27.57-61; Lc 23.50-56; Jn 19.38-42)

42Ko chu'uju̶u̶yñu̶ je̱'e̱ viernes tzuu mu̶naa je̱'e̱ judío ja'ay ñayñi'ixu̶u̶yu̶gu̶xyu̶ñ, amay'ajt tu̶gu̶'u̶waangu̶xy je̱'e̱ pokxyxyu̶u̶. 43Chi je̱'e̱ José mu̶dyiibu̶ Arimatea kugajptu̶ñ y mu̶dyiibu̶ nandu'un mu̶jtuungmu̶u̶du̶ñ jyu̶jp'ijxypy najty je̱'e̱ nandu'un ko je̱'e̱ Dios y'ane̱'e̱mu̶ñ myínu̶ch, chi ñayjyootmu̶kmooyu̶ ñu̶kxy ma je̱'e̱ Pilátoju̶ñ y yujkwaanu̶ je̱'e̱ Jesús ñi'kx. 44Pilato mu̶k je̱'e̱ yajju̶wu̶u̶y ko je̱'e̱ Jesús najty timymyu̶k'eemby tu̶ y'o'ogy, chi je̱'e̱ tziptuumbu̶ windzú̶n mu̶j'yaaxy y yajtu̶u̶y pu̶nu̶ jaanch najty tu̶ y'o'ogy. 45Ko je̱'e̱ tziptuumbu̶ windzú̶n je̱'e̱ tu̶y'ajt yejky ko jaanch najty tu̶ y'o'ogy, chi je̱'e̱ Pilato je̱'e̱ Jesús ñi'kx ye̱jku̶ y yajku̶'u̶du̶gu̶u̶y je̱'e̱ José. 46Mu̶'it je̱'e̱ José oybyu̶ poob wit tu'ug juuy y yajmu̶najku̶ je̱'e̱ Jesús ñi'kx, chi mo'oñ mu̶u̶d je̱'e̱ oybyu̶ poob wit. Y pu̶daaky ma je̱'e̱ o'kpu̶ jutu̶ñ tzaague̱e̱tzmu̶jk, y chi je̱'e̱ o'kpu̶ jut yaj'adujky mu̶u̶d je̱'e̱ tzaa. 47Je̱'e̱ María je̱'e̱ mu̶dyiibu̶ najty Magdala kugajptu̶ñ y je̱'e̱ María je̱'e̱ mu̶dyiibu̶ je̱'e̱ José najty tyaj'ajtypyu̶ñ, je'eyu̶ najty je̱'e̱ nigoo wyindú̶kxku̶xy ko je̱'e̱ Jesús yajnaaxtu̶gu̶u̶yu̶.

Currently Selected:

San Marcos 15: MIXE

Highlight

Copy