San Marcos 4
4
Je̱'e̱ niipu̶ ijxpe̱jt
(Mt 13.1-9; Lc 8.4-8)
1Jesús ja'adu'ook yaj'u̶xpu̶jktu̶gu̶u̶y ma je̱'e̱ mejypya'aju̶ñ. Y mayjya'ay janch nayñi'imugu̶u̶yu̶ ma je̱'e̱ Jesús najty yajpaadyu̶ñ, paady je̱'e̱ Jesús barcu̶jooty tyu̶gu̶u̶y mu̶dyiibu̶ najty jiiby mejypya'aju̶ñ, y chi jiiby ñaxwech, y je̱'e̱ mayjya'ay mejypya'a najty je̱'e̱ ajku̶xy. 2Mu̶'it je̱'e̱ mayjya'ay yaj'u̶xpu̶jktu̶gu̶u̶y mu̶u̶d je̱'e̱ ijxpe̱jtu̶ñ ka'anaagnáx.
Ko yaj'u̶xpu̶jky, chi myu̶naañ: 3“Amdoo'ijtku̶x adaa ayuuk: Du'un ja'ay tu'ug choñ niipu̶. 4Y ko je̱'e̱ tu̶u̶md wu̶jy, chi je̱'e̱ pyajk oy nije̱'e̱játy kya'ay mu̶jtu'ugujk, y chi je̱'e̱ joon myiiñ ajku̶xy y piiwu̶'ktaay je̱'e̱ tu̶u̶md ajku̶xy mu̶dyiibu̶ najty tu'ugujk tu̶ kya'ayu̶ñ. 5Nije̱' je̱'e̱ tu̶u̶md oy kya'ay tzaa'agujk ma je̱'e̱ naax najty we̱e̱nu̶ju̶ñ, je̱'e̱ tu̶u̶md pe̱kyu̶ je̱'e̱ jim myujxy, je̱' ko je̱'e̱ naax najty ka'p myápxyu̶ch, 6peru̶ ko je̱'e̱ xu̶u̶ pyu̶dzu̶u̶my, chi je̱'e̱ tu̶u̶md no'ky, je̱' ko ka'p najty je̱'e̱ tyiktztu̶gu̶'u̶yñu̶ naaxjooty, chi tyu̶u̶ch. 7Nije̱' je̱'e̱ tu̶u̶md oy kya'ay eptyjyooty wu̶dzatzjooty, y ko je̱'e̱ epty wu̶dzatz yoondaaktaaky, chi y'epty'e̱e̱my'o'ktaay y ka'p tyu̶u̶m'ajty. 8Peru̶ nije̱' je̱'e̱ tu̶u̶md oy kya'ay ma je̱'e̱ oyñaaxu̶ñ winja'atzkujk y chi myujxy, y tyu̶u̶m'ajt may'eemby; nije̱'e̱játy tu'ugpu̶ tu̶u̶md ipxmajk je̱'e̱ y'ijty, y jadu'ugpu̶ tu̶u̶md tu̶gu̶'px je̱'e̱ y'ijty, y nan je̱'e̱ jadu'ugpu̶ tu̶u̶md mu̶go'px je̱'e̱ y'ijty.”
9Ko je̱'e̱ Jesús mu̶dya'agy yajmaay chi jyakmu̶naañ: “Pu̶njaty adaa ayuuk winju̶wu̶'u̶waamb, wan winju̶wu̶'u̶y.”
Tii je̱'e̱ ijxpe̱jt du'un ñigapxypy
(Mt 13.10-17; Lc 8.9-10)
10Ko je̱'e̱ mayjya'ay ñú̶kxku̶xnu̶, chi je̱'e̱ Jesús naydyu'um wyu̶'u̶my. Y chi je̱'e̱ jaknimaybyu̶ mu̶dyiijáty najty panú̶kxu̶gu̶xpu̶ñ y je̱'e̱ nimajmé̱tzkpu̶ discípulotu̶jk ñimu̶jwa'ku̶ ajku̶xy, y yajtu̶u̶wu̶ ajku̶xy neby je̱'e̱ ijxpe̱jtu̶ñ du'un wyimbu̶dzu̶myu̶ñ. 11Chi je̱'e̱ Jesús y'adzoowu̶ ajku̶xy: “Miich ajku̶xy, Dios du'un xyajnejwu̶u̶ygyu̶xp je̱'e̱ yu'uchpyu̶ y'ane̱'e̱mu̶ñ kyu'utujku̶ñ, peru̶ je̱'e̱ wiingja'ay ijxpe̱jtu̶ñ'eemby u̶u̶ch je̱'e̱ ku̶xyu̶ nyajmu̶dmu̶dya'agy ajku̶xy, 12y oy du'uñdyu̶ jya'awindú̶kxu̶ch ajku̶xy, ka'p y'ijxku̶xu̶ch, y oy du'uñdyu̶ jya'amu̶dówu̶ch ajku̶xy, ka'p winju̶wu̶u̶ygyu̶xu̶ch, ka'pu̶ jyootwimbídu̶ch ajku̶xy ma je̱'e̱ Diosu̶ñ, y nan ka'pu̶ je̱'e̱ pyoky yajwinmé̱kxu̶ch ajku̶xy.”
Jesús kapxtu̶y je̱'e̱ niipu̶ ijxpe̱jt
(Mt 13.18-23; Lc 8.11-15)
13Chi je̱'e̱ Jesús ñu̶maayu̶ ajku̶xy: “¿Nej ka'p adaa ijxpe̱jt miich mwinju̶wu̶u̶ygyu̶xyu̶? Y pu̶nu̶ ka'p mwinju̶wu̶u̶ygyu̶xy, nan ka'p je̱'e̱ wiingpu̶ ijxpe̱jt mwinju̶wu̶u̶ygyu̶xu̶ch. 14Je̱'e̱ mu̶dyiibu̶ kapxwa'kxp je̱'e̱ Dios y'ayuuk du'un je̱' neby je̱'e̱ mu̶dyiibu̶ tu̶u̶md niipu̶ñ. 15Nije̱' du'un je̱'e̱ ajku̶xy neby je̱'e̱ tu̶u̶md mu̶dyiibu̶ tu'ugujk ka'awu̶ñ; chi je̱'e̱ Dios y'ayuuk mu̶doowu̶ ajku̶xy, y ko mu̶doogu̶xy, chi je̱'e̱ mu̶jku'u ñimiinu̶gu̶xyu̶ y yajpu̶dzu̶u̶mdaayu̶xu̶ je̱'e̱ Dios y'ayuuk mu̶dyiibu̶ naty tu̶ yajni'iby ma je̱'e̱ jyoot wyinma'añ ajku̶xyu̶ñ. 16Nije̱' du'un je̱'e̱ ajku̶xy neby je̱'e̱ tu̶u̶md mu̶dyiibu̶ tzaa'agujk ka'awu̶ñ: ko je̱'e̱ Dios y'ayuuk mu̶doogu̶xy y chi ku'ubu̶jkku̶xy agujk jootkujk, 17peru̶ ka'p je̱'e̱ may tyiktztu̶gu̶'u̶yñu̶ ajku̶xy, ka'p je̱'e̱ oy tu'ug'aa tu'ugjoot mu̶bu̶jkku̶xy, paady je̱'e̱ Dios y'ayuuk u̶xmajtzku̶xnu̶ ko je̱'e̱ win'u̶u̶mbu̶ agapxu̶u̶ybyu̶ paatku̶xy o ko yaj'u̶xwu̶dijt yajpawu̶dijtku̶xy mu̶u̶d je̱'e̱ Dios y'ayuuk kyu̶xpu̶. 18Nije̱' du'un je̱'e̱ ajku̶xy neby je̱'e̱ tu̶u̶md mu̶dyiibu̶ eptyjyooty wu̶dzatzjooty ka'awu̶ñ: ko mu̶doogu̶xy je̱'e̱ Dios y'ayuuk, 19peru̶ je̱'e̱ ajuy adogu̶u̶ je̱'e̱ je'eyu̶ y'aa'ajtypy jyoot'ajtypy ajku̶xy mu̶dyiibu̶ ya yajpaatp ma adayaaba naaxwiiñu̶ñ y je̱'e̱ kumeeñ'adu̶u̶ janch jootmé̱tzu̶gu̶xp, y du'un it ku̶xyu̶ okje̱'e̱'ajtta'awu̶ch ajku̶xy. Y ku̶xyu̶ adaa du'umbu̶ je̱'e̱ Dios y'ayuuk yajtu̶gooygyu̶xp ma je̱'e̱ ja'ay ajku̶xyu̶ñ y ka'p je̱'e̱ Dios y'ayuuk yajmayu̶'u̶y. 20Peru̶ jii nije̱' ajku̶xy mu̶dyiibu̶ amdoo'ijtku̶xpu̶ñ y mu̶bu̶jkku̶xy je̱'e̱ Dios y'ayuuk, y mayu̶u̶by je̱'e̱ Dios y'ayuuk ma je̱'e̱ jyoot wyinma'añ ajku̶xyu̶ñ. Du'un je̱'e̱ nije̱' ajku̶xy neby je̱'e̱ tu'ugpu̶ tu̶u̶md mu̶dyiibu̶ ipxmajk ijtu̶ñ, nije̱' du'un neby je̱'e̱ mu̶dyiibu̶ tu̶gu̶'px ijtu̶ñ y nije̱' du'un neby je̱'e̱ mu̶dyiibu̶ mu̶go'px ijtu̶ñ.”
Je̱'e̱ lámpara ijxpe̱jt
(Lc 8.16-18)
21Nandu'un je̱'e̱ Jesús jyaknu̶maayu̶ ajku̶xy: “¿Nej mu̶baad je̱'e̱ ja'ay ju̶u̶n yajtoybyú̶ky, y mu̶'it pu̶da'agu̶ch cajoon pa'tku̶'u̶by o ku̶jx pa'tku̶'u̶by? Ka'p, je̱'e̱ ju̶u̶n jim ku̶xtuum je̱'e̱ yajpu̶da'agy, wan du'un mu̶k tyú̶kxu̶ch. 22Nan ka'p ni pu̶n ni tii túnu̶ch ayu'uch, y nu̶kxy kya'ani'igu̶xu̶'u̶gy; y nan ka'p ni pu̶n ni tii túnu̶ch amechu̶, y nu̶kxy kya'ayajmu̶doy'áty. 23Pu̶njaty adaa ayuuk winju̶wu̶'u̶waamb, wan winju̶wu̶'u̶y.”
24Nandu'un je̱'e̱ Jesús jyaknu̶maayu̶ ajku̶xy: “Kweentu̶tuungu̶x adaa ayuuk mu̶dyiibu̶ yam nyajmu̶dmu̶dyaakku̶xypyu̶ñ. Mu̶u̶d je̱'e̱ mgu̶'u̶mguípxu̶ñ ajku̶xy mu̶dyiibu̶ mu̶u̶d mkípxku̶xyu̶ñ, je̱' je̱'e̱ Dios mu̶u̶d xykyípxku̶xu̶ch, y xyjyakmo'owu̶p ajku̶xy pu̶njaty u̶u̶ch je̱'e̱ n'ayuuk xymyu̶doowu̶u̶ybyu̶ñ. 25Pu̶n tijaty mu̶u̶du̶ñ, jak'yajmo'owu̶p je̱'e̱ ni'igyu̶; peru̶ pu̶n tii ka'amu̶u̶du̶ñ, jaktimyajpú̶gu̶p je̱'e̱ ni'igyu̶ oy u̶xyu̶py we̱e̱nu̶ ja'adimy myu̶dajtpu̶.”
Je̱'e̱ tu̶u̶md ijxpe̱jt mu̶dyiibu̶ ye̱kpu̶ñ
26Nandu'un je̱'e̱ Jesús myu̶naañ: “Je̱'e̱ Dios y'ane̱'e̱mu̶ñ du'un je̱' neby je̱'e̱ ja'ay tu̶u̶md ni'iby ma je̱'e̱ kyamu̶ñ. 27Ko ñiipta'ay, mu̶'it myu̶'o'knu̶ y mya'aybyu̶du̶'knu̶ba kujaboom, y du'un je̱'e̱ xyu̶u̶ tiempo yajnáxy, je̱'e̱ tu̶u̶md mujxp je̱' y yoomb je̱'. Peru̶ je̱'e̱ kugam ni ka'anejwu̶'u̶y je̱' neby je̱'e̱ tu̶u̶md myuxyu̶ñ y yeegyu̶ñ, ma je̱'e̱ mu̶k'ajt paadyu̶ñ. 28Je̱' ko je̱'e̱ naax ku̶'u̶m mu̶k'ajt je̱'e̱ mu̶u̶du̶ch neby je̱'e̱ tu̶u̶md mu̶baad yaj'yóñu̶ñ. Jayu̶jp je̱'e̱ y'aay'úng pyu̶dzu̶my, y chi je̱'e̱ pyu̶jy pyu̶dzu̶u̶mnu̶ y jak'u̶x'aam je̱'e̱ tiempo pyu̶dzu̶u̶mnu̶. 29Y ko je̱'e̱ tyu̶u̶m myu̶jaanu̶, chi je̱'e̱ ja'ay yajpu̶du̶'kku̶xnu̶, je̱' ko tu̶ je̱'e̱ xu̶u̶ du'un paadnu̶ mu̶naa pyu̶du̶'knu̶chu̶ñ.”
Je̱'e̱ mostazu̶ pajk ijxpe̱jt
(Mt 13.31-32; Lc 13.18-19)
30Nandu'un je̱'e̱ Jesús myu̶naañ: “¿Nej m'ok'a'ixu̶u̶ygyu̶xy je̱'e̱ Dios y'ane̱'e̱mu̶ñ? ¿O ti mu̶baad mu̶u̶d n'okyajkipxyxu̶u̶yu̶mu̶ch? 31Je̱'e̱ Dios y'ane̱'e̱mu̶ñ du'un je̱' neby je̱'e̱ mostazu̶ pajk mu̶dyiibu̶ yajniip ma je̱'e̱ kamu̶ñ. Y janch mutzk je̱', ka'p du'un ni mu̶dyiibu̶ ujtzpajk yajpaady ya naaxwiiñ, 32peru̶ ko yajni'iby, chi yeegy janch mu̶jjáty ka'p du'un ni mu̶dyiibu̶ ujtzu̶ñu̶ba, janch mu̶jjáty je̱'e̱ y'aakx, u̶xtu̶ joon muuxy jim pe̱'e̱mb amaagu̶xp ma je̱'e̱ y'aakx y'adu̶chu̶'u̶yu̶ñ.”
Neby je̱'e̱ Jesús najty yekyu̶ñ je̱'e̱ ijxpe̱jtu̶ñ
(Mt 13.34-35)
33Du'un najty je̱'e̱ Jesús je̱'e̱ mayjya'ay yaj'u̶xpú̶ky je̱'e̱ Dios y'ayuuk tyu̶y'ajt mu̶u̶d je̱'e̱ ijxpe̱jt ka'anaagnáx, neby adayaabu̶ju̶ñ y u̶xtu̶ mabaad winju̶wu̶u̶ygyu̶xyu̶ñ. 34Agu̶ ijxpe̱jt najty yaj'u̶xpu̶jkypy ajku̶xy, peru̶ abu̶ky najty je̱'e̱ dyiscípulotu̶jk ku̶xyu̶ kapxtu̶u̶wu̶yu̶ ajku̶xy.
Jesús yajwa'kxú̶py je̱'e̱ poj y je̱'e̱ mejy
(Mt 8.23-27; Lc 8.22-25)
35Ko kyoodzu̶u̶y je̱'e̱ mu̶'it xu̶u̶, chi je̱'e̱ Jesús dyiscípulotu̶jk nu̶maay:
—Tzu̶k jim'eemby nu̶u̶'awiimb najxu̶m ajku̶xy.
36Mu̶'it je̱'e̱ mayjya'ay u̶xmajtzku̶xnu̶ y mu̶dtzoñ je̱'e̱ Jesús ajku̶xy barcu̶jooty ma najty je̱'e̱ je'emy y'u̶ña'ayu̶ñ, y jiiby najty wiing barco nandu'un mu̶dyiibu̶ mu̶u̶d kipxy chóngu̶xyu̶ñ. 37Chi mu̶kpoj tu'ug myiiñ, je̱'e̱ mejy nigoo najty y'okjanchje̱'tznu̶ y janch tu̶gu̶u̶by najty je̱'e̱ nu̶u̶ barcu̶jooty, ja'awe̱njáty najty je̱'e̱ kya'a'ujtznu̶ mu̶u̶d je̱'e̱ nu̶u̶. 38Peru̶ je̱'e̱ Jesús jim barco u̶x'aam najty je̱'e̱ tu̶ myu̶'o'ogy ma tu'ug ku'ugóñu̶ñ. Chi yajma'aybyu̶du̶'ky ajku̶xy y nu̶maay ajku̶xy:
—¡Windzú̶n! ¿Nej ka'p mgweentu̶túñ ko yam nguinaanu̶m ajku̶xyu̶?
39Mu̶'it je̱'e̱ Jesús pyu̶du̶'ky y ju̶jpkugapxu̶u̶y je̱'e̱ poj, y je̱'e̱ mejy ko najty jyanchmu̶jje̱'tzpéty ma je̱'e̱ bárcu̶ju̶ñ y nu̶may:
—¡Amón! ¡Wa'kxú̶p!
Chi je̱'e̱ poj mu̶k'eemby myoondu̶gooydyaay, y chi du'uñyu̶ ku̶xyu̶ wya'kxu̶jptaay. 40Mu̶'it je̱'e̱ dyiscípulotu̶jk nu̶maay ajku̶xy:
—¿Ti ko mjanchtzu̶gu̶u̶ygyu̶xy? ¿Nej ka'p mmu̶bu̶jkku̶xy ko u̶u̶ch je̱'e̱ Dios myu̶k'ajt nmu̶dajtu̶yu̶?
41Peru̶ je̱' ajku̶xy mu̶k najty je̱'e̱ jyanchtzu̶gu̶u̶ygyu̶xy; cham ñayyajtu̶u̶wu̶gu̶xy amíñ u̶xyu̶py:
—¿Pu̶n ja'ay adaa da'a, u̶xtu̶ poj y mejy yu̶'u̶ kapxymyu̶doowu̶p?
Currently Selected:
San Marcos 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
