Luke 18

Embo okose te evohu doru te ta timu hatirari ke

1Eto enana pari ta pegogo eagora kaiketo pari ara Iesu na ambotani ta degi timu hatirari ke na einge ena, 2“Eto da vahai ai ta koto ta ke ingito sirikari embo okose amo God hotembae eaguja eto embo tunga humbae eaguja embo avo mihinu 3da amita evohu doru vahai amina amita degi kaiketo puvutohue penunu einge ere ijiahija, ‘Na hondate eto embo nau degi ta kitoho ere ova avo ke siriketo ejo tambu ai,’ penunu ainge pere ijioi 4ingito ingarako ue mihahija umo oenga einge hotembena, ‘Na God hotembae ue embo tunga humbae ue iragona 5te evohu doru emina kaiketo penunu ijioi ingihovona tohene oje memenga ehija avoeto amita ngahia deire avo ano tambu aisuja.’ 6ke ainge ena, amo koto ta ke sirikari embo sapura amina ena avoeto 7God javotoho amita embomeni na iji te mume te mahainge amita degi penunu ijiroro amo iji koso be ingito ingarako ue iroute? 8Na ungota degi erena amo God na amita embomeni mahu sausau hondate aisuja. Rate Embo ta Meni puvuresuja amina God humota ari embo enda ei ta hambautemo mane hambau?” ainge eto.

Embo heriso temple jota pari ea amita timu hatirari ke

9Iesu na embomeni nei uhoho amina na javotohora ijie embo nei sapurara ke ainge ari embomeni amita degi timu hatirari ke einge ena 10“Embo heriso pari asi temple ta pambua vahai amo Pharisee ari embo eto vahai amo tax koro humbari embo aingeto horeo 11Pharisee ari embo amina heteto pari einge ena, ‘Embo nei ke sokova ijie koro pegene eagora nei ke pepeni poekagora nei tiha paiha eagora nei amo tax humbari embo puvija erevira ainge ari sapura neite neite eagora te na ainge mane avoeto God, na umo osa ere ona. 12Na hura tapa amita jo ta iji heriso heriso donda ajirekagona eto nau donda tapa avo kaheke kaheke eto tapa 10 ainge iketo vahai humbuto temple ta ikagona,’ pari ainge pere ijinu 13tax humbari embo amo hoi ta heteto amita ari sapura avo hotembihe humo kouketo mihie jenge torue pari einge ena, ‘God, na ari sapura embo rate jo e’ pari ainge ijinu 14God na ingito tunga javotoho ue hotembeto toruhunu ereto amita bande ta pambuna, Pharisee ari embo aingeko manera. Eto embo amuna umo oenga jakeka aisuja embo amo au isapa aisuja rate meni isapa sira eto aisuja embo avo au embo peni aisuja.”

Iesu na meni isasaraho ta siro ta ingeni tembena

(Matthew 19:13-15; Mark 10:13-16)

15Eto iji amikote embomeni na meni isasaraho avo Iesu na ingeni hamo ta tembaja humbuto puvuo, ambotani na kito haekihe isembea 16rate Iesu na kito meni isasaraho amita degi hurora jage eto ke einge ena, “Meni isasaraho mane haekasova te evu nau degi ta hurore. Meni isasaraho amo na humota eagora eto embo amuna ainge dombo na humota aisuja amina God ta tihi jigari ta horasuja. 17Na ke be na ungota degi erena embo amuna meni isapasira eto hurae aisuja amina mane God ta tihi jigari ta horasuja.” ainge enu.

Iesu na donda embo ta degi ke ena

(Matthew 19:16-30; Mark 10:17-31)

18Embo vahai peni amina Iesu ta degi ke einge eto ingena, “Ahe poekari embo javotoho, ari do ue irari daroho hoteto umbano avo inena ejo ingone” ainge enu 19Iesu na ke mine einge ena “Umo do eto na javotoho ke ere? Eto embo tapa amo jajavotoho manera te God vahai avo javotohora. 20Eto God ta ke pepeni amo umo kiarira: Tiha mane aisoa, embo mane tao pehasora, pegene mane aisoa, embo nei ta ke be na au ingito jandireketo sokova na mane aisoa, eto aja te mama te otohu aisoa,” ke ainge enu 21embo amina einge ena, “Na meni isapa ta ihiketo ari tapa avo javotoho pere ue ere puvuhovona,” ainge enu 22Iesu na ingito ke einge ena, “Ari vahai avo ae ere ova, avoeto pambuto no donda tapa avo ombuto koro humbuto donda ambu embopo ta iketo na ambo ambo asi hae. Eto God ta irari degi ta no donda isapamane mihia avo humbasoa,” ainge enu 23ingito amita haja vaja peni vahai avoeto osaga kogunu 24Iesu na embo avo kogue ke einge ena, “Haja vaja embo na daingeto God ta degi horau, amo ngahia be ra, 25eto o camel na poma ho ta horeto pambari amo ngahia ra aingeko haja vaja embo na God ta tihi jigari degi ai ta horari ngahia be ngahia ra.” ainge enu 26embomeni na ingito ke einge ea, “Embo amunure God na ari sapura ta oreketo humbau?” ainge eo 27Iesu na ke mine einge ena, “Embo na ari inono aera te God ta degi ari tapa amo inono ra” ainge enu 28Peter na Iesu ta degi ke einge ena, “Kijo, dagota donda tapa toto umo ambo ambo ere ora”, ainge enu 29Iesu na einge ena “Na ungota degi ke be erena, embo amuna God na embomeni tihi jigoja amita bande te ae te namei kamei te emamo te meniundi te tapa toasuja 30embo amina pehae mihie donda tohija vahai ainge dombo avo isapamane be humbasuja eto iji kombu te daroho irari humbasuja” ainge ena.

Eto Iesu pambuto Jerusalem ta pehasuja avo ehako enu ingia

(Matthew 20:17-19; Mark 10:32-34)

31eto Iesu na amita apostero 12 avo humbuto oenga iketo ke einge ena, “Kivujo, ungotena da Jerusalem ta pambuhuma. Embo ta Meni ta degi ari do puvuresuja peroveta na mahu kakajekarira avo puvuresuja 32amo Embo ta Meni avo humbuto enda nei embomeni ta ingeni ta ikaro humbuto urumbihe ari sapura nei te nei te ue hamo ta isuva ue 33esi na ejembeto taro peheto iji 3 irae au ehako vasiri te erasuja,” Iesu na ainge ijie harikenu 34ingito ingarako ea amo enana na ingiora ojikari avoeto ingae ea.

Tihi kuru ari embo enu kojena

(Matthew 20:29-34; Mark 10:46-52)

35Eto da Jericho auviho tihi kuru ari embo vahai degi ahone ta arumbeto koro penunu ijie mihina 36amina embomeni isapamane puvuto pahuo asavi ingito asavi amita be amo deire eto inginu 37“Iesu Nazareth embo amina puvuto ere pahua” ainge eo 38ingito jage eto einge ena “David ta Meni Iesu, na jo au kito hondate e,” ainge enu 39embo amita tihi buju ta mihia amina “Embo, umo ke ambu e” ainge ijio isara na jage eto einge ena, “David ta meni Iesu, na kito jo au hondate e” ainge pere ijinu 40Iesu heteto embo avo humbuto hurora ke enu humbuto imihe auviho 41Iesu na “Na no degi ta do ana uje ere oe” ainge enu “Bada, ejo tihi hirikau kione,” ainge enu 42Iesu na “Umo na humota ere oa avoeto no tihi na kijo” ainge enu, 43tihi javotoho enu God jakeka ijie Iesu ambo ambo ena. Eto embo tapa na ari avo kito God jakeka ea.

Currently Selected:

Luke 18: OKVH

Highlight

Copy