Luke 20

Iesu na embo amuta ke agi ue pure ena

(Matthew 21:23-27; Mark 11:27-33)

1Eto iji vahai Iesu na temple jo ta mihie God ta duru javotoho avo embomeni ta degi hande unu ingihe mihio priests pepeni te Judea embo ta ke pepeni simba ari embopo te Judea embo pepeni te aingeto Iesu ta degi puvuto 2ke einge ea, “Embo amuna no degi ta sovera ari ikehei humbuto ari emomo ere oe?” ainge eo 3Iesu na ke mine einge ena “Na ainge dombo ungota degi eto ingari ke erena evu ingone. 4John na sovera ari humbuto embo bapataito ere uahija amomo God ta degi eto umbunutemo embo ta degi humbunu?” ainge eto inginu 5ungo oenga ke mine ara eto einge ea “Eto dago John na sovera ari God ta degi humbari ke aisora amo Iesu na aravorate ungo do eto John ke be ae ueve ke ainge aisuja 6rate dago sovera ari embo ta degi humbari ke asora amo embomeni ei mihera amina dago koro na taro pehasora amita be amo John amo God ta peroveta be ke eagora,” ainge ijie 7ke mine ari inono ae enu enana Iesu ta degi “Dago be kiaera” ainge eo 8Iesu na “Aravora namote tapa amuta degi sovera humbuto ere ona avo mane ano ingesova” ainge eto.

‘Grape’ pure mamo ta timu hatirari ke

(Matthew 21:33-46; Mark 12:1-12)

9Embo tapa ta degi timu hatirari ke einge ena, “Eto embo vahai amina ‘grape’ ve pure ta ureto embo nei na simba ara iketo toto enda nei ta iresi pambuna. 10Eto ‘grape’ sari ari iji puvunu ‘grape’ be sari huna umbaja pure mamo na amita pure embo vahai ikenu pahunu, ‘grape’ simba ari embopo kito teto ohimbeo ‘grape’ sari umbae toto egerembeto pambuna, 11Eto amita pure embo nei ikenu pambunu ‘grape’ simba ari embomeni na urumbihe teto ohimbeo ‘grape’ be sari umbae toto pambuna. 12Eto nei ikena amo teo orosa kuhihinu humbuto pure aka ta gosukeo vena. 13Avoeto pure mamo na ke einge ena. ‘Na ari einge aisona, osa ari meni nau avo ikano pambau kito otohu ue mane tasora,’ ainge eto ikenu pahunu ‘grape’ simba ari embomeni na kito 14ke einge sirikea ‘Eto ‘grape’ pure hoteto humbasuja embo puvija erevira avo ungote taro pehau ‘grape’ pure evi ungotenane na oreto umbasira,’ ke ainge 15eto meni avo andito humbuto pambuto huga hokaka ta gosuketo eo venu teo pehena. 16Eto ‘grape’ mamo na puvuto do au? Amina ‘grape’ simba ari embomeni tau pepehekaro ‘grape’ pure amo humbuto embo nei ta ingeni ta ikasuja.” ainge enu enana ingito “Ajae, ejo toai!” ainge eo, 17Iesu na enana be kon eto kito ke einge ena “Rate God ta ke amo einge kajari mihia, ‘Bande gerikari embopo na tutuvi vahai sapura ke ijie toa avo Bada God na humbuto enu bande ta tutuvi be ena’. Ke ainge ena amita be amo ungo do eagove? 18Eto embo amuna tutuvi amita hamo ta veto tasuja amo pejeto memeni aisuja. Eto tutuvi amina embo ta hamo ta veasuja amo embo teto pehekasuja” ainge Iesu na enu irae enu.

Tax koro ikari

(Matthew 22:15-22; Mark 12:13-17)

19Judea ta ke pepeni simba ari embopo te priests pepeni te na ungo avoembo Iesu na hihi tirina avo ingito iji amikote Iesu andito humbasi uje ea rate embomeni tapa na enana ta degi memenga ikasora avo hotembeto joru ue 20iji nei simba ea. Eto Iesu ke sapura do au ingito humbuto Rome ta gavana okose amita ingeni ta ikasi uje eto kito harika embopo ikeo pambuto Iesu ta hihi avo ingesi keko ijie 21pambuto Iesu ta degi ke einge ea, “Ahe poekari embo, umo ke be na pere embo ta ke te ari te avo hotembae ue God ta ke avo javotoho na ahe poekagoa avo dago kiarira 22avoeto no degi ta eto ere ingihera, ungotena Judea ta ke pepeni joru ue tax koro Rome ta gavana Caesar ta ikarote mane ikaro?” Ainge eo 23Iesu na enana ta jo ta hotembari heriso avo kito 24ke einge ena, “Ungota koro vahai humbuto ikevu kione,” ainge enu ikeo humbuto einge ena, “Koro hamota embo ta tombu kikiva ari emite javo kajari te amo amutare?” ainge enu 25“Caesar ta ra” eo Iesu na ke einge ena, “Aravora Caesar ta donda kito amo Caesar ta ikevu eto God ta donda kito amo God ta ikevu,” ainge enu 26ingito Iesu na ke sapura nei do ae rate ke javotoho ena avo ingito haha puha eto ke ambupu ea.

Peheto vasiri te erari amita ke avo Iesu na ena

(Matthew 22:23-33; Mark 12:18-27)

27Eto Sadducees embomeni na vasiri te erari avo ke be ae ue ere ijiahera avo Iesu ta degi puvuto 28ke einge eto ingia, “Ahe poekari embo. Eto Moses na ke amo einge kajena. ‘Embo ta ae meni umbae mihirou ivu pehasuja, eto namei na namei hondate eto jimbuto ve ikasuja’ ainge Moses na kajena 29eto embo tapa 7 amo jo vahai ta amina meni bugo na jimbuna eto ae meni umbae mihinu ivu pehenu 30bugo ta kane amina jimbuna amo meni umbae mihinu ivu pehena 31eto ainge pere ue pambuto gasi meni amina jimbuna amo ainge meni umbae pehena 32eto ambo be ta amo evohu amina pehena. 33Eto enana tapa 7 avo vasiri te erasora amo evohu amo embo amuta ae au?” ainge eo 34Iesu na ke mine einge ena, “Embomeni eha mihera amina jimbagora 35te vasiri te erari iji puvurou God na embo siriketo au erasora rate mane jimbasora 36amita be amo embo na vasiri te erari avo hoteto humbuto ehako mane pehasuja te Anera ga inono ue God ta meniundi aisora. Eto vasiri te erari amita ke be amo Moses na ke kajena. 37Eto Moses na ji vasa evikihina amita jo ta ke einge ingina ‘Na Abraham ta God, Isaac ta God, eto Jacob ta God ra,’ ainge ijinu ingina avoeto kajena. 38Avoeto God amo embo pehari ta God manera te embo vasiri te iragora amita God. Eto embo tapa amo God ta degi vasiri te ra,” ainge enu 39ke pepeni simba ari embopo nei uhoho na “Ahe poekari embo no ke javotoho ehea” ainge eo 40embo tapa na eto ingari ke nei ae joru ue toa.

Keriso amo Meni amutare?

(Matthew 22:41-46; Mark 12:25-37)

41Rate Iesu na enana ta degi ke einge ena, “Embomeni na do eto Judea ta hondate embo Keriso amo King David ta ahije ke eagore? 42Eto King David amina book javo ‘Psalms’ ai ta ke einge kajena, “God na na David nau Bada ta degi ke einge ena, ‘Nau ingeni be ei ta arumbeto iriro 43nane no kitoho teto ikano inena utu na hatiresoa,’ ke ainge David na kajena. 44Eto David na Judea ta hondate ari embo Keriso amo nau Bada ra ena avoeto amo daingeto amita ahije au?” ke ainge eto.

Judea ta ke pepeni simba ari embopo ta ari avo kogue irivujo

(Matthew 23:1-36; Mark 12:38-40)

45Embo tapa ingiho amita ambotani ta degi ke einge ena, 46“Eto ungo Judea ta ke pepeni simba ari embopo ta ari avo kogue irivujo, eto enana bo jajavotoho kokoso avo aseto market ari degi ta ururoro kito osa ue pekara eagora. Eto nei amo ke kasari bande ta horeto embo pepeni ta avo arumba ai ta arumbagora eto pondo iji te embomeni kito otohu ara tihi ta arumbagora. 47Eto nei amo evohu dodoru ta donda avo sio humbagora eto embomeni amita pari amo jo na ae rate toho hamo na pari kokoso kakoso eto sinenekagora, avoeto God na enana ta hajire siriketo memenga pajire ikau kesora.”

Currently Selected:

Luke 20: OKVH

Highlight

Copy