Luk 1

1-2Ariee, Tiofilus!

Imó bee ghanena rore. Enembo oruabe námanda gorotova eini-eini donu siroruturia, aná gegembuguturie. Númanda nundubari-mi jo gembambi re. Tago, númane aria, avona fururota, eini-eini donu siroruturia-nu dibemi gigigea, kotú irugeta egeguturia-dava, tanana ea, ananu gegembuguturie. 3-4Avore, amó beago donu siroruturia-nu tutunovareta kuvia geruta refere-gea, ená gaga simbugea gembua indú utasira, aná taubana re. Ená gaga utaita rora-nu iruguturota, imó donu niningara-da bee tanana ea goghó adi rei-gefere. Yata bua gi!

1:5-38 Jon Bafutaito Ari Kato Fufiria-da Gaga Re.

5 # 1 Chr 24:10 Kini Herot umó Judia enemboda beforo righari ea, Israel enembo kaifa eta uria aghade, fristi* eini, ragaro Sekaria, vitirie. Umó Aron da mambube Abiya da mambube maneda rorova siroruturie. Kotú unda evetu Elisabet beago, umó nuabua Aron da evetube eini re. 6God da dibeva ungá unda irari taubana re. Kotú God da Agho Dari gaga donu reiria-nu, aghá egegeta urie. 7Tago, Sekaria da evetu Elisabet eero-gea, mendi sasingu fumbambi irirota, emboko evetuko egeguturie.

8Fefera eini Abiya undida buro ari fefera buburiturieta, Sekaria God da dibeva buro eta urie. 9Aghá ueta, fristi mane daiyagha egegeta uria aghagonu urota, fristi avona God du Tafaroro Ari Kambova* terua, ooru munodenu bua dungari-du rea kikindo gaegeguturieta, Sekaria da ragaro isagha urie. 10Aná ooru munode dungarida fefera buburituria aghade, aná tafaroro aita desuturia enembo isaghava burutugea jijiregea, God du tumogha baĩ urota, benunu egeguturie.

11Sekaria na aná ooru munode dungarida faro ingo bee kena jiria irieta, Jojabeeda anerami undava isagha urie. 12Aghá ueta, Sekaria gia, orumi ekade ingode dano dadada ueta-gea, 13anerami undú eghá ririe, “Mania oru ata! God inda benunu ningie. Inda evetu Elisabet mendi fumbaita rouvie. Unda ragaro Jon righadi rere! 14Kotú unda siroraita rouvia-mi, ingá imode kotú enembo oruabede dano gangoro egegaita rosoravore. 15#Num 6:3Anada bee mo, umó Jojabeeda dibeva embó jojabe eini iraita rouvie. Umó vaini de, kotú uvu fakarade undambi aita rouvie. Nueda uro rovareta siroraita rouvia-va Asisi Kakara undava asugea iraita rouvie. 16Unona minono rirota, Israel enembo niningigea neno kaverota bua, númanda Jojabee God dava furaita rouvie. 17#Mal 4:5-6Kotú umó sei Jojabeeda dibe kena furaita rouvie. Umó eto-bato feroveta sei ragaro Elaijafuria aghagonu, God da Asiside anode bua furaita rouvie. Kotú unona irari-da emboro irugota, sasingu mane nue numamode besiga rousua-nu doa, neno dabako egegaita rousue. Kotú, gogore kakato nghaĩ itota, neno kaverea, irari taubananu nundubaita rousue. Aghá ea, unona Jojabeeda furaita rouvia-da gaga rata, enembo niningigea, neno kaverea, Jojabeeda furaita rouvia feferanu kaifa egegaita rousue.”

18Aghá ririeta, Sekaria na aná aneradu eghá ririe, “Amó emboko etore, kotú anda evetu umó mendi sasingu fumbarida ghaeko serigea vitie. Daiyagha andava siroradu?” 19#Dan 8:16; 9:21Aghá ririeta, aná anerami mino eghá ririe, “Anda ragaro aná Gebriel re. Amó God da dibeva jiria irita rore. Indú gaga taubana rari-du ninengetueta etere. 20Tago, imó anda gaga ningia gaabee ambi etora-du, oreki enavareta ya, aná mendi siroraita rouvia feferava, imó aná gunga ea iraita roravore.” aghá ririe.

21Aghá ueta, enembo natofo nanjogo dano, “Sekaria Tafaroro Ari Kambo rova donu urota viti?” rea, mana-mana egeguturie. 22Aghade, umó Tafaroro Ari Kambo rovareta bubua furia númandava be fangea, gaga rari mana-mana ea, ingomi tovoto urie. Aghá ueta gigigea, umó barau geruria-nu tanana egeguturie. Avore, Sekaria gunga ea irirota, 23unda tafaroro ari fefera sidara urieta, umó kaverea, naava arie.

24Aghá uria-da ambova, unda evetu Elisabet tambouvude urie-gea, kambo rova nungia irieta, marabe ingo yoveni sidara urie. 25Aghade, Elisabet umó eghá ririe, “Oreki Jojabeena andú ivata jojabe eini etue. Unona sonembetueta, enemboda dibeva anda meka sidara etue.”

26Anada ambova, Elisabet umó tambouvude ea irieta, marabe ingo yoveni sidara ea, ingo yoveniva dabako sidara uria-da rova, God na anera ragaro Gebriel nu, ariri mose einidava gaga rari-du ninenguturieta vorea, roo enda Galili anava naa ragaro Nasaret buburiturie. 27#Mat 1:18Aná aririda ragaro aná Meri re. Meri umó embó eini, ragaro Josep du datu dighari vitiria re. Kotú, embó Josep umó aná Kini Devit da mambube eini re. 28Aná anera aria, Meri dava bubua eghá ririe, “Meri, vitera? Jojabee inda irari gia, neno gangoro urota, imó ea simbuguturota, ingá vitie.”

29Aghá ririeta, Meri duduku ea, mana-mana urie-gea, “Ená anera mo, ghanena goroto doda etu?” nundubuturie. 30Tago, anera umó Meri du eghá ririe, “Mania oru ata! God inda irari-du gangoro rouvie. 31#Mat 1:21Atá ningi! Imó tambouvude ea, mendi fumbaita rora-da ragaro Iesu righi! 32#2 Sam 7:12-13, 16; Is 9:7God Iti Bee itiva vitia-mi ‘Umó anda mendi re.’ raita rouvie. Aghade, God na nuabua Kini Devit da avo asumbari utota bua, enembo kaifa aita rouvie. 33Gaa bee, nuabua Jekop da Mambube mane unona tumanadu beforo righaita rouvie. Kotú unda kaifa#1:33 Ii, Gaga Isuri Ari Kambesi anava, gaga dumeni gaga Natofo da tuva vitia-nu irugea gia, tanana adi! aita rouvia fefera, jo nanjigo aghade tano ambi aita rouvie.”

34Aghá riria-du, Meri aná aneradu eghá ririe, “Amó siroruturera kombo undiri ambi vitere. Daiyagha ea, ená ivata andava siroradu?” 35Aghá ririeta, anera mino eghá ririe, “Asisi Kakara indava asugea irirota, God Iti Beevami imó afuregaita rouvie. Amindu, aná mendi kakara siroraita rouvia-du, ‘God da Mendi bee re.’ raita rousue. 36-37#Gen 18:14God na eghago ata sirorari jo fakara irambi re. Inda nomono Elisabet nu nundubadi rere! Umó eero gaa reta rousue. Tago, God na ritata, umó unda evetuko feferava soká baita rouvie. Oreki marabe ingo yoveni sidara ea, ingo yoveni dabako sidara aita rouvie.” 38Aghá ririeta ningia, Meri mino eghá ririe, “Amó Jojabeeda sabua* re. Amindu do-gea, andava inda retora aghagonu siroroe!” aghá ririeta, aná anera ningia doa seriguturie.

1:39-45 Meri Da Elisabet Dava Esega Aria Re.

39Aghá uria-da ambova, Meri erea, tatavami Judia frovensiva bogu naa eini dafaru kena vitiria-va arie. 40Aria, Sekaria da kambova terua, Elisabet tambua, ghanena urie. 41-42Aghade Elisabet Meri da ghanena niningua, unda uro rova soká yavi-yavi ueta, God da Asisi Kakarami Elisabet da neno rova vovorurieta, be koko fugia eghá ririe, “Evevetu oruabeda rorova, God da ea simbugari indava vitie. Kotú inda fumbaita rora mendi beago, God na ea simbugaita rouvie. 43Kotú, imó anda Jojabeeda aya re. Andava esega etera, jo aghá ari inono irambi re. Tago, gangoro rore. 44Amó inda ghanena niningua, jo gaimbo ambi soká anda uro rova gangorogha eka ingo ghusu-ghasa etue. 45Imó Jojabeeda donu rita-nu gaabee utara-du, unda ea simbugari indava irota, unda donu indú rita aná sirorea, gaa bee aita rouvie.”

1:46-56 Meri Na God Du Raga Rirota, Didivuria Daa Re.

46 # 1 Sam 2:1-10 Aghade, Asisi Kakara mi Meri da neno rova gaitueta, daa didivurota eghá ririe,

“Anda neno dano ututurota, Jojabeedu raga rere.

47Kotú anda neno roomi God anda Sonemba katodu gangoro rore.

48 # 1 Sam 1:11 Anada bee mo, amó unda sabua* tuva bee re.

Tago, unona amó nundubetue. Aghá-gea, oreki reta yaita rouvia enembo dano andú,

‘God da ea simbugari Meri dava vitie,’ regegaita rousue.

49God ano katomi andú ivata jojabe eini etue.

Unda ragaro aná kakara bee re.

50Kotú enembo avona God du oru aita rouvia-da imendi gamendidava

unda kauta kavevera iraita rouvie.

51Kotú unda ingomi ivata anogha urota,

enembo nendufa raga rirota righiaveta ereta rousuria-nu tuviturieta,

airo-airo egeguturie.

52 # Job 5:11; 12:19 Unona reaveta, roo enda dumenida kini mane

númanda asumbari kambesi doa, serigea sabua egegutuaveta,

sabuami vitia kini egegeta urie.

53Enembo baimana itatama egegutua-nu, undari taubana manemi unduturie.

Kotú gugua-ghayafade enembodu,

donu utambi ninenguturieta, tefo igiguturie.

54-55 # Gen 17:7 Kotú unda sabua embó Abraham dava be gajituria,

ananu nundubuturota, Abraham da mambube mane

Israel enembo tumanadu sonembeta rouvie.”

56Aghade, Meri ungá Elisabet gha irieta, marabe bakode seriguturieta, Meri kaverea, unda naava arie.

1:57-66 Jon Bafutaito Ari Katoda Siroruturia Re.

57Anada ambova Elisabet unda soká fumbari fefera buburiturieta, itatama ea, mendi reta fufirie. 58Jojabee na Elisabet dava unda kauta kavevera iruguturia-nu niningigea, Elisabet unda enembo totofode, kotú unda kambo kasava irita uria enembode unda kambova furia numonde danode gangoro egeguturie. 59#Lev 12:3Avore, onembo 8 sidara urieta, aná sokáda vii mendó andoro divegea, unda numamo, Sekaria da akau ririkigaita rea, fufuguturie. 60Tago, nuena eghá ririe, “Tefo, unda ragaro aná Jon righaita rosore.” 61Aghá ririeta, aná enembo eghá regeguturie, “Avotago, inda totofoda rova enembo eini ragaro Jon, aná tefo re,” 62Anada ambova Sekaria unda mendi ragaro donu ririkigasua-nu tanana egegaita isusu egeguturie.

63Aghá egeguturieta, Sekaria na fae gembari-da eini-einidu benunu urieta, ututurieta bua, unda mendida ragaro “Jon” gefirie. Aghá urieta, aná enembo gigigea be angea bee sidara egeguturie. 64Gaimbo ambi, Sekaria da be ifegea, kotú unda aveva dambu urieta, umó God du raga ririe. 65Aghá urieta, númanda kambo kasava vitiria enembode kotú naava enembode dano ningia, oru egeguturie. Aghá urieta, anada gaga Judia Frovensi ootokena aria, kambesi dano fafate urie. 66Enembo avona niningiguturia-mi, mana-mana egegea, mino-mino uriga eghá egeguturie, “Ená mendi mo, ambova daiyagha adu?” aghá regeguturia-da bee mo, Jojabeeda ano aná undava vitirie.

1:67-80 Sekaria Da Didivuria Daa Re.

67Aghade, Sekaria dava Asisi Kakarami asuguturieta, donu ambova siroraita rouvia-nu rirota, eghá ririe,

68“Namonde anda Israel enemboda Jojabee God du raga regegore!

Anada bee mo, unda enembo bunditurieta vitiria-nu

etia sonembetue.

69-70Unda donu aita riria-nu, feroveta kakara mane seibe sei

irita egeguturia-mi isaghava regeguturie. Ananu sirorari-du rea,

unda sabua* kato Devit da mambube maneda gorotova

namonde anda Sonemba kato ano tofo, ninenguturieta furie.

71Aghade unona namonde amó gitofoda ingova,

kotú namonde amó injigha eta rousua enemboda ingova rougea,

baita be gajiturie.

72Aghá urota, umó namonde anda mambube manedava

unda Be Gajari Anogha#1:72 Ii, Gaga Isuri Ari Kambesi anava, gaga dumeni gaga Emboro God Dava da tuva vitia-nu irugea gia, tanana adi! kotú Kakara Bee riria-nu nundubuturota,

númandu neno mema urota, kaifa tavo aita ririe.

73Avore, God undufako namonde anda afa Abraham dava

donu aita be gajituria, aná evere:

74-75Unona namonde amó gitofoda ingova rougea bata-gea,

unda natofo kakara ea, ari taubana egeguturota,

gitofoda dibeva oru ambi, umonu tumanadu tumogha baĩ aita rosore.”

76-77 # Mal 3:1 Aghá rea, Sekaria na kaverea, unda sokádu eghá ririe,

“Anda mendi, inda gaga beago vitie.

Enembo indú God Iti beevada feroveta eini gaa raita rousue.

Anada bee mo, Jojabee númanda ari akokogo

nundubea gia dotuturota, númane sonembaita rouvia-da gaganu rata,

unda natofo niningigari-du rea, inona Jojabeeda dibe kena irurota,

unda emboro ea simbugaita roravore.

78-79 # Is 9:2 Anada bee mo, namonde anda God kauta kavevera urota,

namonde amó roboghami unduta rouvie.

Rifo atea, fefera vitiaveta, bingoi sidara eta rouvia

aghagonu, God da sonembade unanade uutuvareta janimbota,

namonde amó tumbava irirota, amburari oru egegeta rosora

enembodava oru sidara ata, namonde amó siriri arida emborova

igigaita rosore.”

80Atá, Jon da asisi ano ueta, umó neno nundubarigha baborurie. Baboruria, umó uvu tefo kotú enembo irambi kambesiva aria irieta, unda Israel enembodava minono rari fefera buburiturie.

Currently Selected:

Luk 1: BJZ

Highlight

Copy