Luke 10

Yeisu ina tovatotowanayao seventitu (72) ietunedi sina sipaaisewa tetelina

1E moe guinuwayadi sikavava, Tomoya ina yaidi goi seventitu (72)#10:1 Seventitu: Buki ame ana kopi maniyedi kadi, ‘Seventi’ (70). ikinavedi ina paisewa manuna. Adi taiyuwo adi taiyuwo ietunedi bei sivakumgo sina asa liliudi goi tomota sikatubayasidi Tauyana ina sowóduwo manuna. 2E livalakaibala goi ilatuwokoidi idigo kana,

‘Tánuwo bogina iloboina go, todibayoya geya sibadebadeta. Tauna toni tánuwo yaina goi kokawanōi bego topaisewa ietunedi sima sidibayoya.#Mad 9:37-38. 3Kōna go, ami dodōkana! Komi nakae aetunemi kona guna kaleyayao yaidi goi; tauyadi weiniya woliwoli sasasaidi nakae.#Mad 10:16. 4Imi mani saisairina o imi wasare o imi sendoro aiyuwoina taabu kookabīdi.#Mad 10:9-10; Mak 6:8-9; Luk 9:3. Geya vatau tayaamo kootagōne enao iitukika.

5E ava vada goi neta siuyaonemi, kosīu go, mainao kodīgo kami,

“Tuboina ikaaiyaka yaimi.”

6Neta moeko goi toni vada totuboina, imi tuboinayana ikaaiyako vata tauyana yaina. Ago neta tauyana geya totuboina geya, e tuboinayana ikaluvilamna iwo yaimi.#Mad 10:12-13. 7E vadayana goi siuyaaonemi kokaaiyāka go, ava kawoinu o ava bwae siivinimi, kokāika be konīm. Topaisewa itoboinedi bei adi maisa sibabane.#Mad 10:10; 1Ko 9:14; 1Ti 5:18. Go taabu kokanadamadāmana vada tayamo tayamo goi. 8Ava kasa goi kosiu neta toni kasa siuyaonemi, e ava kawoinu siivinimi, moe kokāika. 9Ago tokatówana asayana goi kokidedevinēdi namlieta kolatuwokōidi kami,

“ bogina imaiyaba yaimi bei itoboinemi kosiu.”#Mad 4:17; Mak 1:15; Luk 10:11.

10E ava kasa goi kosiu neta toni kasa geya siuyaonemita, kōna asayana ana kenao goi go, toni kasayadi kolatuwokōidi kami,

11“Bei kakalavemi go, imi kasa kaukauna aema goi nakae kasapinunui kakalave.#Mad 10:14; Mak 6:11; Luk 9:5; Gui 13:51. Moe imi katumátala bego Yaubada itavileiyemi. Ago ame konuuwāisi: Yaubada ina kalibúbuna bogina imaiyaba.”#Mad 4:17; Mak 1:15; Luk 10:9.

12Go ame alatuuwokoimi konōve: Takínona ana tuta tomota amo asayana goi adi liuna bei gagaina namlieta kidi da Sodoma.#Abv 19:24-28; Mad 10:15; 11:24.

13Komi da Korasini be da Betesaida konovēgu! Da Taya#Ais 23:1-18; Isi 26:1—28:26; Iyl 3:4-8; Emo 1:9-10; Sak 9:2-4. be da Saidoni tomota goyogoyoidi. Go neta guna silosidi be selekau dabadi goi siyatoidi. Komi boi itoboinemi nakae kotugavila go, geya koguinuweyeta. O komi da Korasini be da Betesaida ami toovalugo! 14Komi takínona ana tuta goi ami liuna bei gagaina toina namlieta kidi da Taya be nakae da Saidoni.

15Komi da Kapaneumi nakae. Manakae? Konuwonúwana Yaubada bei ikilagasimi yábana goi? Moe geya, go sem bei ilavemi kosou kona goi!#Ais 14:13-15; Mad 11:20-27.

16Avatauwa neta komi imi livala siinovedi, moe nakae yau guna livala siinovedi.#Mad 10:40; Mak 9:37; Luk 9:48; Iyo 13:20. Avatauwa neta komi sikaataemi, moe nakae yau sikaataegu. E avatauwa neta yau sikaataegu, moe nakae guna toetuna siikatae.’

Ibóbwara ikavava, adi taiyuwo adi taiyuwo ietunedi sina.

17E niga ina tovatotowanayaoyadi seventitu (72) madi uyáwana sikaluvilamna sima sidigo kadi,

‘Tomoya, nakae, neta yoim kavatoi, sopama sikabikaone.’

18E idigo kana,

‘Tutayana dimoniyadi sikabikaonemi ida Kaleya agitegite ana kaigigita matabuwona ávila nakae yábana goi isousou. 19Konovēgu. Togaga bogina avinimi be itoboinemi moteta be gániva kovakavatedi nakae ida Kaleya ina togaga madabokina kokinenete go, geya tayaamo kaga itoboine iyogedegedemi.#Sam 91:13. 20Ego kouyāwana gagaina bego yoimi yábana goi Yaubada bogina iginidi namlieta kouyāwana bego dimoni sopami sikabikaonedi.’

21Amo tutayana goi pasina Yeisu iuyáwana idigo kana,

‘Tamagu, kom yábana be poyapoya idi Tomoya. Guna guinuwayadi adi yagoina bogina kuvamoudi kidi madi nanamsa be madi yagoina yaidi goi go, kidi gogómana nakae yaidi goi guna guinuwa adi yagoina bogina kukaiwoduwedi. Tauna ayapaliyem. Moitamo Tamagu, moe im guinuwayana im nuwonúwana goi ivauyaonem.’

22Ikawanoi ikavava, seventituyadi (72) ilatuwokoidi idigo kana,

‘Kaga liliuna Tamagu nimagu goi bogina iyatoidi.#Iyo 3:35. Tamaguyana anetava yau Natuna iyagoidokoigu. Yau agutava Tamagu ayagoidoko go, avatauwa neta akinavedi bei Tamagu avatulukoidi, e bei siyagoidoko.’#Iyo 10:15.

23Yeisu itugavila ina tovatotowanayao aditava ilatuwokoidi kana,

‘Avatauwa sigite kaga komi matami goi bogina koogitedi, e adi dedevina bogina sibabane. 24Moitamo. Ame alatuuwokoimi konōve: Boi nimatu Yaubada ina badabadaidi be nakae tolovina badabadaidi latuwodi bego sigite kaga koogitegu aguuinuwe go, geya sigitedita. Latuwodi bego sinove kaga kaga koonovedi avatulúkwana go, geya sinovedita.’#Mad 13:16-17.

Livalakaibala guma Samériya ina guinuwa dedevina manuna

25Yaubada ina tayamo itaoya; latuwona Yeisu ina vatulúkwana ivakakone. Tuwo idigo kana,

‘Tovatulúkwana, kaga aguuinuwe bei yawoigu vata ababane?’

26‘ buki goi Mosese manakaena yawoida vata manuna igini? Manakaem kulumavivisi?’ Yeisu kaena.

27E tonanamsayana kana,

‘Mosese ilatuwokoida kana,

“ ida Yaubada komataakoīye atemi madabokinakova goi be yawoimi madabokinakova goi be imi togaga madabokinakova goi be nuwomi madabokinakova goi.”#Mad 22:37; Mak 12:30.

Atukeda 6:5

Aiyuwoina kana,

“Siyami komataakoīye nakae toinimi komatakooiyemi.”’#Mad 5:43; 19:19; 22:39; Mak 12:31,33; Rom 13:9; Gal 5:14; Ibe 13:1; Yem 2:8.

Vininabeso 19:18

28E Yeisu idigo kana,

‘Bogina kudigoyabe. Moe nakae kuuguinūwe, bei yawoim vata kubabane.’

29E Yaubada ina Katukeda ana tolumavivitayana ivakibala; latuwona bego ana kaigigita tauyana , tuwo Yeisu ilatuwoko idigo kana,

‘Go siyagu avatau bego itoboinegu amatakoiye?’

30Yeisu livalakaibala goi ikatumapu idigo kana,

‘Tayamo koroto Yerusalema goi isou inonoina Yeriko manuna. Inonoina go, tovaináwana maniyedi enao goi ivalobodedi. Ivalobodedi, to korotoyana siyoisi, ana kwama, konana nakae liliudi sikabidi go, tauyana silaui. Ikavava, nakae kaamasina enao goi sikalave go, sina.

31E amo tutayana tayamo isousou amo enaoyana goi imamaima, korotoyana igite go, ivasigege enao ta dadava goi ivatabale ina. 32E Livai tubuna tayamo nakae isou ima amoko goi tovailaiyana igite, tuwo ivalabelabena igitedoko. Igite go, ivasigege enao ta dadava goi ivatabale ina.

33E tayamo imamaima go, ikandobala korotoyana igite, tuwo ivalabelabena korotoyana igitedoko. Igite, inuwokapisiye. 34Tuwo ikabidi, ibala ima tovailaiyana ina kaipíyama kiyaudi goi isiwoidi go, ipaimidi. E ipaimidi ikavava, toinina ina ase yatana goi tovailaiyana ikailagasi. Ikavava, inave vada ogaoga goi imatakavate.

35Vanuwo itomo, mani aiyuwo ikabidi, vadayana ana torugwáuta ivini idigo kana,

“Tovailai kumatakavāte. Neta kaga tuwaina kuemaisi tauyana ina matakavata manuna, gobe niga guna kaluvila goi yau bei amapu.”’

36Yeisu kana,

‘Kom manakaem kunuwonúwana? Korotoyadi adi taito yaidi goi ava koroto tovailai ivasiyanedoko?’

37‘Tauyana inuwookapisi’, tolumavivitayana kaena.

E Yeisu idigo kana,

‘Kūna go, nakae kuguinūwe.’

Marita be Meri tetelidi

38E Yeisu mana tovatotowanayao taiyao sinonoina go, asa tayamo goi sisiu. E vavina tayamo yoina Marita amo asayana goi ikaaiyaka, ina vada goi Yeisu iuyaone.#Iyo 11:1. 39Ago Maritayana ana gómana yoina Meri. Meriyana Tomoya aena goi iitusobu, ina vatulúkwana itaaiyakeke. 40E kina go Maritayana vaipolu ana katubayasi badabadaidi manudi inuuwotúkala. E tuwo ibala ima Yeisu kikina itaoya idigo kana,

‘Tomoya, guna gómana kugite? Geya dedevina ikaiyako beso go, yau aguta apaaisewa ae? Tauna kulatuwōko bego ima ivaitegu.’

41Go kina Tomoyayana idigo kana,

‘Marita, Marita, dogoi badabadaidi manudi kunuuwotúkala, nakae nukotom taitáiya iuyoi. 42Go tayamo dogoi itoboine kuguinuwe, moe guna vatulúkwana kutaiyakeke. Ame moitamo. Meri kugite? Tauyana dogoi dedevina bogina ikinave iguuinuwe go, geya vatau tayaamo bei isanabode.’

Currently Selected:

Luke 10: GVS

Highlight

Copy