Luke 4
4
Yeisu ana vakakona tetelina
(Madiu 4:1-11; Maki 1:12-13)
1E kina go goi ikayaoda, sákala Iyoridani ikalave go, Balomayana iivakede yoyowo sinaena. 2Maliyalina poti (40) goi Yeisu ivaakakone. Ago amo maliyalinayadi goi geya ikaiketa. Tuwo maliyalinayadi sikavava, Tauyana loga bogina ikámasa. 3E Totagiwayayana idigo kana,
‘Kom moitamo Yaubada Natuna ae? Tauna gurewa ame kulovināe bego imalakawoinu.’
4Go kina Yeisuyana idigo kana,
‘Geya! goi idigo kana,
“Geya awoinu kaka goi kita tomota yawoida bei dedevidi.”’
Atukeda 8:3
5Yeisu ibóbwara ikavava, Totagíwaya itaoya, Yeisu ikabi, itukoe go, geya mgoninamo aba lovina liliuna poyapoya goi ivatuluko. 6Tuwo Totagiwayayana idigo kana,
‘Yau magu lovina tauna avatau neta latuwogu aba lovinayadi adi lovina madi esaesa avini, itoboinegu avini. Tauna bei avinim, e yoim bei gagaina. 7Tauna neta kom kusakululu yau yaigu, madabokina kom im kaba lovina.’
8Go kina Yeisuyana idigo kana,
‘Geya! Gínina Kimaasabaina idigo kana,
“Moe ida Yaubada yaina tasaakulūlu be anetava yaina tataaimāmina.”’
Atukeda 6:13
9E Totagíwaya Yeisu ikabimnei itukoe inave Yerusalema goi go, Yaubada ina Vada Kimaasabaina goi imwerae, e Vadayana yatana toina goi iyato. Tuwo idigo kana,
‘Bego kom moitamo Yaubada Natuna ae? Tauna ameko goi kupēla kusōu go, geya kuvailaita. 10Moe moitamo. Gínina Kimaasabaina idigo kana,
“Yaubada ina ilovinaedi
bei simatakavatem.
11Nimadi goi bei siyoisim,
govila bei gurewa goi aem isaiko.”’
Same 91:11-12
12Go kina Yeisu idigo kana,
‘Geya! Gínina Kimasabainayana idigo kana,
“Yauwe imi Yaubada taabu kovaakakōne.”’#Tat 17:2.
Atukeda 6:16
13Totagiwayayana ina vakakona liliudi Yeisu yaina bogina ilukavavedi, ikalave go, inuwonúwana kana, ‘Nava tuta ana toboine baige akaluvila.’
Yeisu ina guinuwa Galili goi tetelina
(Luke 4:14—9:50)
Yeisu ina paisewa italavaite go, da Nasareta siikatae tetelina
(Maki 1:14-15; 6:1-6)
14Yeisu manaa togaga Baloma Kimaasabaina goi ikaluvila ina Galili. Tuwo Tauyana valena inúnuwo ina asa liliudi amo dadavayana goi. 15Galili goi ivanibiníbita go, sikamooitamoe.
16Ivanibiníbita ima ina kasa toina Nasareta go, goi nakae ina sinapu, e ina Diyuu idi kaba tugúguna goi isiu itusobu. Niga itaoya, latuwona Gínina Kimaasabaina ikatuyaivi. 17Tuwo Yaubada ina Aiseya ina buki nuunumina sivini ikabi ikimalelei. Ikimalelei, Aiseya ina gínina tayamo ilusale, ibabane. Gininayana ikatuyaivi idigo kana,
18‘Yauwe Balomaina yaigu goi ikaaiyaka
unana ikawoigu
bei toosobudi yaidi goi atalavaite.
Ietunegu bei kidi yoowonidi#4:18 Yoowonidi: Ame nakona tovayaviya neta yaviya goi geya sitogageta, go sem boda siyoisidi, siyowóidi be sinavedi idi kasa goi. yaidi goi
adi talígava be tokebo yaidi adi kidedevina atalavaitedi,
bei tokaiyakomou ataligeidi,
19bei Yauweyana ina yabobona ina sowóduwo ana tuta
bogina ima atalavaite.
Tauna ina kawoiyana pasina
Balomaina yaigu goi ikaaiyaka.’
Aiseya 61:1-2
20Bukiyana Yeisu ikatuyaivi ikavava, inunumimnei, buki ana tomatakavata ivini go, itusobu. Itusobu go, tomota madabokiidi aba tugugunayana goi sidumaakavate. 21E Tauyana ilatuwokoidi idigo kana,
‘Moe Gínina Kimaasabaina konovenove ame tuta bogina imalatomota yau yaigu.’
22Tuwo tomota liliudi Yeisu sikamoitamoe bego Tauyana todedevina be nakae ina livala Yaubada ina kanuwóiya manuna, e pasidi sikainaopa kadi,
‘Go ame Iyosepa natuna ae?’
23Go kina Yeisu idigo kana,
‘Nakona livalakaibala ame bei kolatuwokoigu kami,
“Kom tokidedevina, toinim kukidedevinēm. Kaga nakae kanove Kapaneumi goi bogina kuguuinuwe, ameko toinim im kasa goi nakae kuguinūwe.”’
24E aiyuwoina idigo kana,
‘Moe nakae bei kodige go, ame alatuuwokoimi konōve: Yaubada ina tokabivalavala toinina ina kasa goi tomota geya siuyaoneyeta.#Mad 13:57; Iyo 4:44. 25E ame alivalamoitamo yaimi konōve: Kóbuya badabadaidi ana tuta goi sikaaiyaka. Tala aito be tukówana ainima tayamo goi Yaubada kúwana ikibode,#1To 17:1. tuwo loga gagaina asa liliudi goi isowóduwo. 26Ago Yaubada Iraitiya geya ietuneyeta ina kobuyayadi yaidi goi geya, go sem ietune ina kóbuya tayamo Saidoni asaina tayamo yoina Sarepita goi bego ivaite.#1To 17:8-16. 27Aiyuwoina tolepero badabadaidi Isileli sinaena sikaaiyaka boi tokabivalavala Ilaisa ana tuta goi go, geya kada tayaamo kina Yaubada ikimavade geya, go sem Totuyoyowo tayamo yoina Nemani guma Siriya aneta ikimavade.’#2To 5:1-14.
28Boda liliudi aba tugúguna sinaena Yeisu ina livalayadi sinovedi, gamodi igoyo toina. 29Tuwo sitaoya Yeisu siyoisi sibiu asa moetala goi sikaiwoduwe sinave pasésala bego sivatupuwe isou ikámasa. 30E kina go Yeisu boda yaidi goi ikiwotawotaidi ina.
Yeisu koroto tayamo ikideedevine tetelina
(Maki 1:21-28)
31Yeisu mana sisou sina Kapaneumi, moe Galili asaina tayamo goi sisiu. Go Sabati tamo tamo goi tomota ivatuulukoidi. 32Go ina vatulukwanayana pasina boda sikainaopa, kadi,
‘Tauyana mana lovina ivaatulúkwana!’#Mad 7:28-29.
33Ago da Kapaneumi idi kaba tugúguna goi koroto tayamo ikaaiyaka, ikiinagove. Tauyana niyana gagaina goi iduduwo idigo kana,
34‘Iyaa!#4:34 Iyaa: Da Giriki niyadi goi ame tupwana geya imavadeta. Nakae itoboineda takaigavile kada, ‘Kwalavema!’ Yeisu guma Nasareta, yau guna polava moe geya kom im polava. Manakae? Kuma bei kai kumtulima ae? Kom taum bogina ayagoim. Kom , Yaubada goi kuma.’
35Go kina Yeisuyana ilovinae idigo kana,
‘Tuwo! Kumaigāumo be koroto yaina goi kusowōduwo!’
Tuwo dimoniyana koroto ikinagove, tomota matadi goi ilave isou poyapoya go, korotoyana yaina goi isowóduwo ina. Go kina korotoyana geya ivailaita. 36Tomota madabokidi sikainaopa, taudiva sidigo kadi,
‘Iyaa! Ame kaga isowóduwo? Tauyana mana lovina be mana togaga dimoni iloviinaedi go, moitamo sisowóduwo!’
37Tuwo Tauyana valena inunúnuwo ina asa liliudi dadava amo goi.
Yeisu Pita yaona be tomota ikidedeevinedi tetelina
(Madiu 8:14-17; Maki 1:29-34)
38E Yeisu itaoya aba tugugunayana goi isowóduwo go, ina Saimoni ina vada goi isiu. Ego Saimoniyana yaona (moe monena sinana) ikatówana gagaina, tuwo tauyana manuna sikawanoi Yeisu yaina bego ikidedevine. 39Tuwo ibala ina vavinayana goi isakululu, e ina katówana ilovinae idigo kana,
‘Tauyana kwalāve.’
E mainao atowanayana ikalave. Ikavava, itaoya ina avadi ivaidede.
40E níyala bogina iisaliu, boda liliudi idi bodao madi vísiya o madi katówana simedi Yeisu yaina. E tamo tamo ibisikonedi, ikidedevinedi. 41E dimoni nakae ilovinaedi, e tomota badabadaidi goi sisowóduwo go, madi podeda kadi,
‘Kom Yaubada Natuna.’
Bogina siyagoi Yeisu moe , tauna geya itagonedita sibóbwara.
Yeisu itoboine Vala Dedevina itaalavaite asa liliudi goi tetelina
(Maki 1:35-39)
42E vanuwo itomo, Yeisu isowóduwo aneta ina yoyowo goi. Ago boda sina Tauyana siilusale. Siilusale, siilusale, sibabane simatabodebode kadi,
‘Latuwoma nava takaaiyaka.’
43E kina kana,
‘Itoboine ana ituli ta kasava goi nakae Vala Dedevina manuna atalavaite. Moe pasina tauna Yaubada ietunegu ama. Tauna bei ana ituli ta kasava goi.’
44Tuwo Yudiya goi ivanibiníbita go, Valayana Diyuu idi kaba tugúguna tamo tamo goi itaalavaite.
Currently Selected:
Luke 4: GVS
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
