Luka 3
3
Ken vinavatei vavakatsep e Ioanes mi ka ni sinusuruiv
(Mataio 3:1-12; Marko 1:1-8; Ioanes 1:19-28)
1Io, simi avareit ta nga sinangavur kes ma mi napaririem ngan e Tiberius Kaesar ta nga vuor sien, e Pontio Pilato a nga gavana i Iudea. Ian simi avareit, e Erot a nga vuortie i Galili. Ma e Pilipo e kasien e Erot a nga vuortie i Ituria ma i Trakonitis. Ma e Lisanias a nga vuortie i Abilene. 2Ma, sien e Annas ma e Kaiapas guor ta nga mon kovan bu prist, ken nama e Raban a nga beit se Ioanes e natuon e Sakaria sien ta nga mon simi beir. 3Io, e Ioanes a nga rakot sibu korot kokouk vatvatta mi da i Ioridan nge vavatei simi kulou gi ta nga beit ian en va gi ta nga vodon vuris vekenan kegi sar sinavei tsokor nge por sinusuruiv, terengien va e Raban ta mang vodon rivie kegi sar sinavei tsokor. 4A nga vavatei vemusurie bu vinavataor ta mon simi Pakpak Leong e Isaia mi propet ta nga vataro, ven ne,
“Mi inan mi ka a koupkoup pevien simi beir,
‘Tsang rorois ngan ken rosar mi Nguts.
Tsang vodusie ken sar baiveisveis.
5Vovosuo bu korot gi ta kopiekopien kokouk,
ma tsoup pepekutsie bu pout ma bu kuitskuits kokouk,
ma vodusie bu rosar vilvilguo,
ma tsang vakalaie bu rosar gi ta tsongetsonge.
6Terengien mi kulou kokouk gi ta mang telekire surie ken vavato e Raban.’”#ISA 40:3-5
7Mi bineit gi nga nemei se Ioanes va gi ta nga me por sinusuruiv. Ma a nga pevien segie, “Enga bu natuon mi tsotsoi tsak! Ese a nga oeng senga va nga ta oit nia vi ngan ken aor rarap e Raban ian va ta nemei? 8Nga ta ngas vua ngan bu banga vuovuo nia vara tuktuk ngan va nga te vodon vuris. Kian va nga ta konon nia pevien ne senga kesenga, ‘E Abaraam, eie e tamagiet.’ O oeng senga. E Raban a oit nia tsana ine bu vunavout va gi ta tsorubeit bu natuon e Abaraam. 9Mi matou a te mon rorois i vunan bu ei, ma bu ei kokouk gi ta kap vua ngan kavo banga vuovuo, gi ta tara gie nge tomekan simi leing.”
10Io, mi bineit gi nga vosuoreie, “Mi sana gei ta ngas tsana?”
11E Ioanes a nga kuil nama, “Sien va ka mei man kaba kuirkuir luo, eie ta ngas terie ka mei si ka mei kap man ka kuirkuir, ma sien va ka mei ken kavo nginonginou eie buer ta ngas tsana malan mo.”
12Bu ka porpor takis buer gi nga nemei nge me por sinusuruiv, ma gi nga vosuoreie, “Vavvasengei, mi sana kepineits gei ta ngas tsana?”
13A nga kuil nama, “Kian va nga ta por lakep rio misa mi vinuor ta pengan.”
14Samo mi kulou ni minakiur gi nga vosuoreie, “Mi sana gei ta ngas tsana?”
Ma a nga kuil nama, “Kian va nga ta teie tsana tuvuon ngan kegi sar kepineits bu mei mene nge vepitsie gie ngan kavo namani binit. Nga ta ngas vodon surie va kenga sar voirvoir eie a te oit.”
15Mi kulou gi nga vor ve rorrois surie mi Messia va ta nga beit ma i arogie gi nga vodon va e Ioanes arie eie mi Messia. 16Ma e Ioanes a nga kuil nama segie kokouk, “O tsana mi sinusuruiv senga ngan mi da. Eiekesen mi ka eie ese ta ngeisngeis rio iou, ta nemei, ma o kap kalei oit va o ta ruobatie man ba poppop. Eie ta tsana mi sinusuruiv senga ngan mi Moromoruo Tamat ma mi leing. 17Mi napa sosos a te mon siba riman. Eie ta so vitseir rivie mi biror sibu nginonginou, ma ta teir kakakuon bu banga nginonginou i aron ken vonuo teteir nginonginou, eiekesen ta tunie bu biror simi leing ian ta kap oit nia maet.”
18Io, e Ioanes a nga vavatei ngan mi Banga Vinavatei simi kulou nia vangasie gie ngan bu suada rosar palan.
19E Ioanes a nga oeng matan e Erot mi kovakova ka leong, surie mi sinavei tsokor ta nga tsana se Erodias ken vevien e kasien ma surie palan bu sinavei tsokor ta nga tsana buer. 20Samo e Erot a te buer nga tsana mi sinavei tsokor mene, sien ta nga terie e Ioanes simi vona vinatoreis.
Ken sinusuruiv e Iesu
(Mataio 3:13-17; Marko 1:9-11)
21Io, sien mi kulou kokouk gi tate nga por sinusuruiv, e Iesu buer a nga por sinusuruiv. Ma sien ta nga vor ve nono, mi rangit a nga katsep. 22Ma mi Moromoruo Tamat a nga tsour peuk seie malan mi buen, ma mi ien kovuni simi rangit a nga vakokoit malan ne, “Evoi e natung mi ateung. Ma o resmata no beitsak.”
23Sien e Iesu tate nga tsuok vakake ken tsientsang, ken sar avareit a te nga oit malan va ba sinangavur tour. Ma bu mei gi nga telekiran va eie e Natuon e Iosep.
E Iosep e natuon e Eli.
24E Eli e natuon e Matat.
E Matat e natuon e Levi.
E Levi e natuon e Melki.
E Melki e natuon e Ianai.
E Ianai e natuon e Iosep.
25E Iosep e natuon e Matatias.
E Matatias e natuon e Amos.
E Amos e natuon e Naum.
E Naum e natuon e Esli.
E Esli e natuon e Nagai.
26E Nagai e natuon e Mat.
E Mat e natuon e Matatias.
E Matatias e natuon e Semein.
E Semein e natuon e Iosek.
E Iosek e natuon e Ioda.
27E Ioda e natuon e Ioanan.
E Ioanan e natuon e Resa.
E Resa e natuon e Serubabel.
E Serubabel e natuon e Salatiel.
E Salatiel e natuon e Neri.
28E Neri e natuon e Melki.
E Melki e natuon e Adi.
E Adi e natuon e Kosam.
E Kosam e natuon e Elmadam.
E Elmadam e natuon e Er.
29E Er e natuon e Iosua.
E Iosua e natuon e Elieser.
E Elieser e natuon e Iorim.
E Iorim e natuon e Matat.
E Matat e natuon e Levi.
30E Levi e natuon e Simeon.
E Simeon e natuon e Iuda.
E Iuda e natuon e Iosep.
E Iosep e natuon e Ionam.
E Ionam e natuon e Eliakim.
31E Eliakim e natuon e Melea.
E Melea e natuon e Mena.
E Mena e natuon e Matata.
E Matata e natuon e Natan.
E Natan e natuon e Davit.
32E Davit e natuon e Iesi.
E Iesse e natuon e Obet.
E Obet e natuon e Boas.
E Boas e natuon e Salmon.
E Salmon e natuon e Nason.
33E Nason e natuon e Aminadap.
E Aminadap e natuon e Atmin.
E Atmin e natuon e Ram.
E Ram e natuon e Esron.
E Esron e natuon e Peres.
E Peres e natuon e Iuda.
34E Iuda e natuon e Iakop.
E Iakop e natuon e Isak.
E Isak e natuon e Abaraam.
E Abaraam e natuon e Tera.
E Tera e natuon e Naor.
35E Naor e natuon e Seruk.
E Seruk e natuon e Reu.
E Reu e natuon e Pelek.
E Pelek e natuon e Eber.
E Eber e natuon e Sela.
36E Sela e natuon e Kainan.
E Kainan e natuon e Arpaksat.
E Arpaksat e natuon e Sem.
E Sem e natuon e Noa.
E Noa e natuon e Lamek.
37E Lamek e natuon e Matusela.
E Matusela e natuon e Enok.
E Enok e natuon e Iaret.
E Iaret e natuon e Maalalel.
E Maalalel e natuon e Kainan.
38E Kainan e natuon e Inos.
E Inos e natuon e Set.
E Set e natuon e Adam.
E Adam e natuon e Raban.
Currently Selected:
Luka 3: TBF
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
