Alukasɨ 11

Yeso a Diʼ Adzaŋ za bɨ Tsaʼtɨnə a Ŋwi ə

(Mat 6:9-13; 7:7-11)

1A bé a njwi tsɛrə Yeso a tsaʼtɨnə a Ŋwi adiʼ zə tsɛrə ghe. A ghɨnə mɛ́tɨ́, táʼ ngyɛʼ ɨyi a soŋ wəmbo ngə́, “Maʼmbyí, diʼ awɨgɨ nɨ adzaŋ za bɨ tsaʼtɨnə a Ŋwi, tso mbáʼ Yoane a díʼnɨ́ bɨyɛʼ ɨbyi lá.”

2Yeso a sóŋ a mbó bo ngə́, “Be nɨ ndǒ ntsaʼtɨ Ŋwi, nɨ soŋ ngə́:

‹Tarɨ, á bɨ ngúʼsɨ́ ɨkum ɨgho wa a nɨ wu fɛmnɨ ə. A anu a nɨfɔ azo a yiŋə.

3Gha awɨgɨ njwi tsum nɨ azúm zə dzɨnə#11:3 Kə mɨdzɨ mɨ njwi zɨ mɔʼɔ ghe.;

4lɨgɨnɨ mɨbvu ɨmɨgɨ, mbɨ́ʼ ngə́ bɨgɨ lɨgɨnɨ mɨbvu mɨ ɨbɛn bɨtsum ba bɨ fanə a nye bɨgɨ ə;

koʼ nyɛʼtɨ á bɨgɨ vwo a mu akwaʼnɨ ə.›”

5Yeso bə́ ntíʼ sóŋ a mbó bɨyɛʼ ɨbyi ngə́, “Lɔgɨ ngə́ táʼ ŋwɔn nɨbən a ghɛn a ndá ɨson ɨyi a ntɨŋ ɨtfúʼ ɨ soŋ wəmbo ngə́, ‹Ɨson ɨghan, tsɔʼtɨ aghan nɨ mbɛʼ abán tsi tárə́ ghe. 6Ɨson ɨghan wu tse mbáʼ a ghɛnə a nɨghan a dum ngyen a ndá me, ma kaʼ tsi nɨ azúm a mɨdzɨ wəmbo ə!› 7Lɔgɨ ngə́ ɨson ɨgho wa a chwɨgɨ ntsi ayi a mu ndá zɨ ngə́, ‹Koʼ aghə a ngágə́ ghe! Ma fənɨ ntsundá, bɨgɨ bɨ ɨbɔ ɨbə nɔŋnə awɨgɨ bo ghe. Ma chi kaʼ bə ndo atɨ́ nga azúm zə tse a mbó gho ghe.› 8Tsɛʼ ɨ shiʼnɨ, ake a mɨ tiʼ ghɨ le? Ma soŋ a mbó gho ngə́ be a kwɛ ntsi tú lo atɨ́ ɨ gha abán za a mbó gho, mbɨ́ʼ ngə́ o nɨ ɨson ɨyi, lá a mɨ lo atɨ́ ɨ gha azúm atsum za o lɔnə a mbó gho mbɨ́ʼ ngə́ ka o ndɨ́rə́ agho atú a ngěn nɨ mbyi ɨ bítɨ́nə ghe.

9Ma tiʼ ngɛn ɨwu ɨ soŋ a mbó gho ngə́: bitə, o mɨ kwarə; shwaʼə; o mɨ ze; kwɛntə, bɨ mɨ ŋaʼ ntsundá a mbó gho ghe. 10Mbɨ́ʼ ngə́ ŋwɔn tsum wa a bítɨ́nə́, a kwárə́ ghe, wa a shwaʼnə, a zě ghe, bɨ ŋǎʼ ntsundá a mbó ŋwɔn tsum wa a kwɛntɨnə ghe. 11Ŋwɔn nɨbən wu tse wa a nɨ tarɨ a chi gha ɨnyo a mbó mɔn ɨyi mbáʼ be a bitɨ ɨshwú le? 12Kə o chi gha ayi nɨ angámshe mbáʼ a bitɨnɨ nɨbom le? 13Be bən wa nɨ bɨ́gɨ́nɨ́, nɨ zhi adzaŋ a ngá ɨdzúm tsɨ shiʼnɨ a mbó ɨbɔ ɨbən, a ghɨ tiʼ bə be ɨ nə́ a mbó Tarɨ a fɔməbvurə a ngá Azhwi zə Fɛmnɨ a mbó ɨbɛn ba bɨ bitɨnɨ wəmbo le!”

Yeso bo Bɛlzɛbu ə

(Mat 12:22-30; Mar 3:20-27)

14Yeso a kə́ nkɨŋə a dzɨŋ wu tse wa a kúgɨ́nɨ́nə́; dzɨŋ wa a funə lá, ŋwɔn wa a tsínɨ́ wə mu ɨnye lá a biʼnɨ ntiʼə ngamə ghe. Anu zə wu a kɨ́ʼnɨ́ ɨnɔ ɨbɛn wa ɨ tsínɨ́ ɨwu, 15lá ɨbɛn ba bə tse sóŋ ngə́, “A nɨ Bɛlzɛbu, ɨfɔ bɨdzɨŋ, mbáʼ a ghánə́ mɨtən wəmbo a kɨŋənɨ bɨdzɨŋ ba ɨwu ə.”

16Bə mɔʼɔ kə́ ndǒ mbentɨ Yeso, ntiʼ soŋ wəmbo ngə́ á ghɨ anu zə yerɨnɨ-yerɨnɨ za a lonɨ a fɔməbvurə ghe. 17Lá Yeso a zhí ɨkwaʼtɨ ɨtsa, ntiʼ soŋ a mbó bo ngə́, “Alaʼ atsum za a yɛbtɨnɨ awa, ntsi a achwirɨ achwirɨ, ntǒkə́ awa bo nɨbo, bɨ mɨ keʼ tsi á abaŋ a satə; ngwəgɨ tsum za ɨ tsinɨ achwirɨ achwirɨ ɨ dzagɨnə ghe. 18Ma lan, be nɨfɔ nɨ Satan tsi achwirɨ achwirɨ, nɨ ghɨ tiʼ ghɔŋ lá ɨ nə́ le? Ma sóŋə́ adzaŋ məwen lá mbɨ́ʼ ngə́ nɨ sóŋə́ ngə́ ma kɨ̌ŋ bɨdzɨŋ nɨ mɨtən mɨ Bɛlzɛbu ə. 19Be lə be adzaŋ za ma fɨ́gɨ́nɨ́ bɨdzɨŋ, ɨbɛn ba bɨ zɔŋnə awən tiʼə fɨ́gə́ a bɛrə lá ɨ nə́ le? Ɨbɛn ba bɨ zɔŋnə awən diʼ ngə́ nɨ fə! 20Ngáŋ, a baŋnɨ mbe be nɨ mɨtən mɨ Ŋwi mbáʼ ma fígɨ́nɨ́ bɨdzɨŋ, ma lan, a tiʼ ndiʼ ngə́ nɨfɔ nɨ Ŋwi yenə a mbó bɨŋ ə.

21Be ntɨŋ ŋwɔn a ntsǐŋ njwuʼ ɨzhi nɨ ɨdzúm nkyɛm ɨnye ɨchi ɨtsum, ŋwɔn tse a chi keʼ bən ndze ɨdzúm ɨchi ɛ. 22Lá be ŋwɔn wa a tənɨ ntsa ayi a zumtɨ ayi nɨ fɨto, ngaʼ ayi, a kwarɨ ɨdzúm nkyɛm ɨnye ɨchi tsa a kɨ zhinɨ ngə́ tsɨ nɨ atsum atsum a mbó zɨ lá, ntiʼ ndze ɨdzúm ŋwɔn wa ngɛn ngyɛbtə.

23Ŋwɔn tsum wa a se a bagɨ me tsi, a kwənkə bɨgɨ zɨə; ŋwɔn tsum wa a sě aghə a nkwátə́ a ngótə́, a dzagə ghe.”

Adzaŋ za Azhwi zə Tɔmnɨnɨ a Fúnə́ Mbɨ́ŋə́ Mbɨŋə ghe

(Mat 12:43-45)

24“Azhwi zə tɔmnɨnɨ a ghɨ fu a nye ŋwɔn lá, a numə nkárə́ a mu ɨdiʼ tsɨ zobɨnɨ ndǒ adiʼ zə zhwitɨnə. Be a tú adiʼ zɛn, a soŋ a mbó atuəmbəm azhi ngə́, ‹Ma mɨ bə ghɛn aghə a ndá me ghe.› 25A bə́ mbən, a zɛn ngə́ ndá ɨzhi za ɨ fɛ́mə́, bɨ kɨ nkyaŋtɨ a zɛrə ɨ shiʼnɨ ə. 26Wɛrə a tiʼ fu ngɛn nghuŋ ɨzhwi tsə daŋ tsi samba tsa tsɨ bɨ́gɨ́nɨ́ ntsa ayi, bo bo tiʼ ngyen ntsi ɨwu ə. A ndwitə, ŋwɔn məwa a bə mbɨ́gɨ́ ntsa adzaŋ za a kwɛ́nɨ́ mbé a mbiʼnə ghe.”

Nkasɨ Nɨdorɨ ə

27Mbáʼ Yeso a sóŋnɨ́ adzaŋ wen lá, mangye wu tse a nyɛ́nɨ́ ndo a mu ɨnɔ ɨbɛn wa, ɨ soŋ wəmbo ngə́, “Nɨdorɨ tsi a mbó mangye wa a jwínɨ́ agho nkɨ nkúgə́!”

28Lá Yeso a chwɨ́gɨ́ ngə́, “Nɨdorɨ, baŋnɨ ntsi be a mbó ŋwɔn tsum wa a zúʼnə́ anu a Ŋwi nkə́ ndě a zɛrə ghe!”

Ɨbɛn Lǒ Ndzě Anu zə Yerɨnɨ-yerɨnɨ ə

(Mat 12:38-42)

29Adzaŋ za ɨnɔ ɨbɛn kɨ́nə́ níʼnə́ nkárɨ́sə́ ayi lá, wɛrə a ghɛ́n nɨ mbyi ɨ soŋ ngə́, “Ntɔm ɨ lanɨ ntsi a nye ɨbɛn bɨ sɨŋə be tɨsɨŋə! Bo bítə́ anu zə yerɨnɨ-yerɨnɨ, lá bo mɨ keʼ a zə tse zɛn ntsa anu zə yerɨnɨ-yerɨnɨ za fúnɨ́ a nye Yǒna ghe.#11:29 Matyo 16:4; Marɨkusɨ 8:12 30Ndəŋndəŋ, mbáʼ Yǒna a bénɨ́ alɨgɨ a mbó ɨbɛn bɨ Ninive lá, nə nɨ adzaŋ za Mɔn Ŋwɔn a ghɨnɨ bé alɨgɨ a mbó ɨbɛn bɨ sɨŋə ghe. 31A lo bé a Njwi Nɨsáʼ, á Mangye wa a kɨ́nə́ sáʼə a Shɛba lá a lo ntɛm nkaŋ ɨbɛn bɨ sɨŋə, mbɨ́ʼ ngə́ wɛrə yíŋ nɨyen nə sa ndo alaʼ zɨ ngyen njwiʼtɨ a zóŋ Ɨfɔ Sanɨmɔ ghe; ma tiʼə soŋə awɨŋ ə, ŋwɔn tse a tsi ɨghan ntsa a Ɨfɔ Sanɨmɔ ghe.#11:31 1Bɨfɔ 10:1-10; 2 Kronikɨlɨsɨ 9:1-12 32A lo bé a Njwi Nɨsáʼ, á ɨbɛn bɨ Ninive lo ntɛm nkɨ nkaŋ awən, mbɨ́ʼ ngə́ bɛrə bə́ŋ mɨntəm ɨma a nye mɨbvu ɨma ntiʼ ntsi a bagɨ Ŋwi a nkfu wa bɛrə zúʼnɨ́ anu a Ŋwi a mbó Yǒna ghe; ma tiʼə soŋə a mbó bən tsɛʼ a nkənu ngə́ ŋwɔn tse a tsi ɨghan ntsa a Yǒna ghe!”

Nkaʼ Mbəmnye

(Mat 10:5-15; 6:22-23)

33“Ka ŋwɔn tse a nchwúʼə ayi nkaʼ ndwɛʼə a wɛrə kə ntságə́ a wɛrə a shwúrɨ́ ɨkon ə; a baŋnə ntɛ́gə́ atú atɛkɨ a nkaʼ taŋ ɨbɛn kon a ndá bɨ ze ɨdiʼ ə.#11:33 Matyo 5:15; Marɨkusɨ 4:21; Alukasɨ 8:16 34Ɨmɨgɨ ɨmo tsi lá tso nkaʼ wa bɨ chwuʼnɨ a mbó mbəmnye ɨzo ghe. Be ɨmɨgɨ ɨmo tsi ɨ shiʼnɨ, mbəmnye ɨzo tsum tsi nɨ nkaʼ ə; lá be ɨmɨgɨ ɨmo tú ɨ shiʼnɨ tsi, mbəmnye ɨzo tsum ɨ tsi a mu ndzumnɨ ə. 35Tíʼ lá ndə atú azo ngə́ nkaʼ wa ɨ tsinɨ a ɨnye gho se ndzumnɨ be. 36Be nkaʼ luŋ ɨnye ɨzo tsum, tɨ adiʼ zə tse a ndzumnɨ, ɨ mɨ fugɨ ɨdiʼ ɨtsum, tsɛʼ tso mbáʼ nkaʼ wa bɨ chwúʼnə́ ɨ baŋnə a nye gho nɨ ɨfugɨ ɨzhi lá.”

Yeso a kaŋ bə Farisao abɔʼnɨ Bɨdiʼ bɨ Nyɔngɔŋ ə

(Mat 23:1-36; Mar 12:38-40)

37Mbáʼ Yeso a mɛ́tɨ́nɨ́ a ngamə lá, ŋwɔn bə Farisao a ghón a wɛrə ngə́ á yen ndzɨ bo zɨə; a tíʼ ngɛn ɨwu ɨ shiʼtɨ ntsi a ndzɨ́ə ghe. 38A kɨ́ʼnɨ́ a Ŋwɔn bə Farisao wa mbáʼ a zɛ́nɨ́ ngə́ Yeso a dzɨ́ tɨ sugɨ mbó ɨmyi adzaŋ za Nyɔngɔŋ Mǒse a díʼnə́. 39Ma lan, Maʼmbyí a tíʼ soŋ wəmbo ngə́, “Bɨŋ bə Farisao sugɨ ndzum ndɔ́ŋ bo bɨ ɨkáŋ ɨtsən, lá a mu bən a luŋ adzɨə a mɨtən ɨwu abɔʼnɨ abɨgəntəm ə. 40Ɨdzɨŋtɨ tsenə, Ŋwi wa a káʼnɨ́ abyɛn, a sé tsɛʼ zɨ kɨ mbé wa a káʼnɨ́ ɨmu le? 41Lá, ghanə atsum za a tsinɨ a mu, a mbó ɨfúm ə, taŋ á diʼ ngə́ ɨnu ɨtsɨŋ ɨtsum tsɨ fɛm a mu mbɔm ɨshi ɨmɨgɨ ə.

42Wei ngɨ́ʼ zɨ ngwi a nye bɨŋ ə a bə Farisao! Mbɨ́ʼ ngə́ nɨ ghǎ ndza tsa nɨ kánə́ tso ɨyen, ɨshwe abɔʼnɨ tsə mɔʼɔ mbáʼ nɨ yɛbtɨnɨ ɨdiʼ tsi nɨghúm nga a táʼ a mbó Ŋwi, lá ngwágɨ́nɨ́ ngɨ ɨnu tsɨ tɛmnɨnɨ abɔʼnɨ nkɔŋ Ŋwi; ɨnu tsiŋ ɨtsum nɨ tsi nɨ ngɨ tsɛrə tə́ ngwágɨ́nə́ a tsa nɨ ghɨnə lá.#11:42 Levitɨkɔsɨ 27:30

43Wei ngɨ́ʼ zɨ ngwi a nye bɨŋ bə Farisao! Mbɨ́ʼ ngə́ nɨ kɔŋ ɨlaŋ ɨbɛn bə wi a mu ndáŋwi bə Yuda nkɨ nkɔŋ á bɨ ntsáʼtə́ awən a ɨsamnɨ mɨtan ə. 44Wei ngɨ́ʼ zɨ ngwi a nye bɨŋ ə! Mbɨ́ʼ ngə́ nɨ fi mɨshe ma ka bɨ lisɨ ayi, ɨbɛn tɛmtɨnə atú mɛrə tɨ zhyɛ.”

45Táʼ Ndiʼ Nyɔngɔŋ wa wu tse a sóŋ wəmbo ngə́, “Ndiʼ aŋwaʼnɨ, o tɨ sǒŋ ɨnu tsenə lá, o kə́ ndzɔmə awɨgɨ lá ɨ zɔmnə!”

46Yeso a chwɨ́gɨ́ ngə́, “Wei ngɨ́ʼ zɨ ngwi a nye bɨŋ ngaŋ Ndiʼ Nyɔngɔŋ wəbɔʼ ə! Mbɨ́ʼ ngə́ nɨ zhǐʼ ɨbɛn nɨ abyɛʼ za a dɨrɨnɨ tɨ́sə́n a mbyɛʼə, lá bɨŋ mboŋ, nɨ chi keʼ zhwəŋtɨ a nkwátɨ́ bo nɨ abyɛʼ məza kə́ tsɛʼ mɨnya ghe. 47Wei ngɨ́ʼ zɨ ngwi a nye bɨŋ ə! Nɨ vwǔ ɨtú mɨshe ntóm Ŋwi tsɛʼ ɨ shiʼnɨ ə — lá ntóm Ŋwi mətsen tsɨ bé tsa bɨta ɨbən bə kɔ́ʼɔ́nguʼ zhwítɨ́nə́. 48Bɨŋ mboŋ nɨ běm ɨnu tsa bɨta ɨbən bə kɔ́ʼɔ́nguʼ ghɨ́nə́; bo zhwítɨ́ ntóm Ŋwi, nɨ tiʼ nkɨ ngvwu ɨtú mɨshe ɨtsa ghe. 49Mbɨ́ʼ ɨshwúrɨ́ ɨnu mətsen, Ŋwi a mu zóŋ ɨyi a sóŋ ngə́, ‹Ma mɨ tsagɨ ntóm Ŋwi abɔʼnɨ ntóm Yeso a mbó bə Yuda; á bo dɨgɨ a bə tse nkɨ njwitɨ a bə mɔʼɔ ghe.› 50Ma lan, ɨbɛn bɨ sɨŋə mɨ ze ngɨ́ʼ mbɨ́ʼ adzaŋ za bo chwírɨ́nɨ́ alɛm a ntóm Ŋwi nchwuʼnɨ nkfu za mbáʼ Ŋwi a káʼnɨ́ atuəshe zen, 51ndɔgɨnɨ a nchwirɨ alɛm a Abɛrɨ ɨ kuʼ a nchwirɨ alɛm a Zakaria wa bɨ zhwítɨ́nɨ́ a tɨtərɨ atú a mɨkuʼ bo adiʼ zə fɛmnɨ lá. E, ma soŋ a mbó bən ngə́ ɨbɛn bɨ sɨŋə wɛnə mɨ ze ngɨ́ʼ atú bo bɨtsum ə!#11:51 Jɛnɛsisɨ 4:8; 2 Kronikɨlɨsɨ 24:20-21

52Wei ngɨ́ʼ zɨ ngwi a nye bɨŋ ngaŋ ndiʼ Nyɔngɔŋ ə! Nɨ lwɛʼ akugɨ a ndá azhyɛ; bɨŋ mboŋ nɨ chi keʼ wə mu kuŋə, lá nkɨ̌ŋ ɨbɛn ba bɨ zhwə́ŋtɨ́nɨ́ nkuŋə wə mu ə!”

53Nkfu za mbáʼ Yeso a lónɨ́ adiʼ məwa lá, ngaŋ ndiʼ Nyɔngɔŋ bo bɨ bə Farisao tíʼ mbiʼnɨ sǒŋ ɨnu tɨbɔŋ mbɨ́ʼ ayi nɨ mɨlwi nkə́ mbítə́ ayi nɨ ɨbítɨ mbɨ́ʼ ɨnu tsə ghaʼnɨ 54ndɔ́btə́, mbéntɨ́ bɨ makyɛn nɨ ɨbítɨ tsa tsɨ mɨ ghɨ á wɛrə a soŋ anu za ka a kuʼnɨ ayi ɛ.

Currently Selected:

Alukasɨ 11: MNT

Highlight

Copy