Alukasɨ 9
9
Yeso a Tyigɨ a ba Nɨghúm ntsɔb bá ghe
(Mat 10:5-15; Mar 6:7-13)
1Yeso a tɔ́ŋ bɨyɛʼ ba nɨghúm ntsɔb bá táʼ adiʼ nga adaʼ bo mɨtən ngə́ á bo nkə́ntɨ́ bɨdzɨŋ a mu ɨnye ɨbɛn nkə́ ntsúʼə mɨghɔ ə. 2A tíʼ ntyígɨ́ awa ngə́ á bo ghɛn ɨ soŋ anu a nɨfɔ nɨ Ŋwi nkɨ ntsuʼ mɨghɔ, 3ntiʼ nkɨ soŋ a mbó bo ngə́, “Nɨ tɨ ghěn nɨ keʼ azúm zə tse lɔgə: kə́ mbaŋ, kə́ aban, kə́ mɨdzɨ, kə́ nkáb, kə́ atsɛʼ zə daŋ ə. 4Adiʼ atsum za bɨ kwarɨnɨ awən ɨwu ɨ shiʼnɨ, tsínə a ndá məwa nkuʼnɨ njwi za nɨ fúnə́ awən a mu ntáʼmbagə məwa; 5adiʼ atsum za bɨ se awən ɨwu kwarɨ, nyɛʼtɨnə ntáʼmbagə məwa, nkfutɨ abvuŋnɨ a mɨku bən a nye alisɨ a waʼwaʼ ɨwa ghe.”
6Bɨyɛʼ ba ghɛ́n ɨ núm nkárɨ́ a mu ɨtóm tsa ɨtsum, ɨ sǒŋ Nkən wu Shiʼnɨ nkə́ ntsúʼə ɨbɛn adiʼ atsum ə.
Atú a Ɛrɔd a Bvurə
(Mat 14:1-12; Mar 6:14-29)
7Mbáʼ Ɛrɔd, ŋwɔn wa a kɨ́nə́ sáʼə a Galili, a zúʼnɨ́ ɨnu tsiŋ ɨtsum tsa tsɨ kɨ́nə́ fúə lá, atú azhi a bvúrɨ́ be tɨsɨŋə, mbɨ́ʼ ngə́ ɨbɛn bə tse kə́ sóŋə́ ngə́ Yoane Ngaŋ Nga Nkyi a bə nzhwemnə.#9:7 Alukasɨ 9:19 8Bə mɔʼɔ soŋənə ngə́ Alaja a bə fu a ɨshe, ɨ bə kwiʼtɨ, bə mɔʼɔ ghə ntom Ŋwi zɨ kɔ́ʼɔ́nguʼ tsɛrə ɨ bə mbən atú ntɨŋ ə. 9Ɛrɔd a bítɨ́ ngə́, “Ma ghɨ́nə bɨ sobɨ atú a Yoane ghe; lá ŋwɔn wen wa ma zúʼnɨ́ ɨnu tsen mbɨ́ʼ ayi lá a nɨ ɨwa le?” Wɛrə a ghɨ́ ntíʼə njwɨ́gə́ nyúʼnə́ ndǒ ndze Yeso ghe.
Yeso a Dzɨgɨ Ɨnɔ Ɨbɛn ə
(Mat 14:13-21; Mar 6:30-44; Yoa 6:1-14)
10Ntóm Yeso bə nkwɛ́n ɨ mɨ ɨnu ɨtsum tsa bo ghɨ́nɨ́ a mbó Yeso ghe. A lɔ́gɨ́ awa bo bo ghɛn tsɛʼ bo bo a ntáʼmbagə wa bɨ kɨ́nə́ ntɔ́ŋə́ ngə́ Bɛtɨsaida ghe. 11Bɨ zúʼ ngə́ wɛrə a yén ɨwu, ɨnɔ ɨbɛn tiʼ ngyen wə mbyɛn ə. Yeso a kwárɨ́ awa ɨ shiʼnɨ, ɨ soŋ anu mbɨ́ʼ nɨfɔ nɨ Ŋwi a mbó bo, ntsuʼ ngaŋ mɨghɔ ə.
12Nyom a tiʼnə ngěn a ntsó, bɨyɛʼ ɨbyi ba nɨghúm ntsɔb bá yen ɨ soŋ wəmbo ngə́, “Soŋ á ɨbɛn biŋ ghɛn nɨ ɨtóm abɔʼnɨ mɨkfú ma mɨ tsinɨ a kárɨ́kɨ́, ndo mɨdzɨ abɔʼnɨ adiʼ zə lyenɨ, mbɨ́ʼ ngə́ ka bɨgɨnə zhi awɨgɨnə a ŋwɔn tse ɨghə.”
13Lá Yeso a sóŋ a mbó bo ngə́, “Bən, atuəmbəm bən, ghanə mɨdzɨ a mbó bo ghe.”
Bɛrə tíʼ nchwɨ́gɨ́ ngə́, “Bɨgɨ tsi tsɛʼ nɨ ɨbán tsi tə̧̂ abɔʼnɨ ɨshwú tsi bá ghe. O lanə ndǒ lá ngə́ bɨgɨ ghɛn ndzuŋ mɨdzɨ a mbó ɨnɔ ɨbɛn wen ɨtsum le?” 14(Mbáŋnɨ́ tsí adiʼ wa tso nchwuʼ tsi tə̧̂ ghe.)
Yeso a tíʼ sóŋ a mbó bɨyɛʼ ɨbyi ba nɨghúm ntsɔb bá ngə́, “Ghɨnə á bo tsi achwirɨ achwirɨ, tso mɨghúm mi mɨntə̧̂ a nye táʼ achwirɨ ə.”
15Mbáʼ bɨyɛʼ ɨbyi ghɨ́nɨ́ adzaŋ məwa lá, 16Yeso a lɔ́gɨ́ ɨbán tsa tsi tə̧̂ abɔʼnɨ ɨshwú tsa tsi bá, ndyiŋ atɨ́, a fɔməbvurə, nga a mɨya a mbó Ŋwi mbɨ́ʼ mɨdzɨ ma, mbatɨ nga a mbó bɨyɛʼ ɨbyi ngə́ á bɨ yɛbtɨ a mbó ɨbɛn ba. 17Bo bɨtsum dzɨ́ nzhwúrə́. Bɨyɛʼ ba bə́ ngótɨ́ abvuʼ a mɨdzɨ za a bvúrɨ́nɨ́ a luŋ nkye nɨghúm ntsɔb bá ghe.
Bita a Soŋ Ntəm ɨyi mbɨ́ʼ a Yeso ghe
(Mat 16:13-19; Mar 8:27-29)
18A bé a njwi tse Yeso a tsi ntsáʼtə́ a Ŋwi zɨzɨ, bɨyɛʼ ɨbyi yen wə mbyɛn ə. A bítɨ́ awa ngə́, “Ɨnɔ ɨbɛn wen sóŋə́ ngə́ ma lá ɨwa le?”
19Bo chwɨ́gɨ́ ngə́, “Bə tse sóŋə́ ngə́ o nɨ Yoane Ngaŋ Nga Nkyi ɛ. Bə mɔʼɔ sóŋə́ ngə́ o nɨ Alaja ghe. Akumtɨ zə mɔʼɔ a sóŋə́ ngə́ ntom Ŋwi zɨ kɔ́ʼɔ́nguʼ zɨ tse bə ngyen atú ntɨŋ ə.”
20Wɛrə a bə́ŋ mbítɨ́ awa ngə́, “Nɨ soŋ azən ngə́ ke le? Nɨ soŋ azən ngə́ ma nɨ ɨwa le?” Bita a chwɨ́gɨ́ ngə́, “O nɨ Wa bɨ Zɔ́ʼnɨ́ wu Ŋwi ə.”
Yeso a Gham Mbɨ́ʼ Ndze Ngɨ́ʼ ɨzhi Abɔʼnɨ Nɨvwo ɨni ɛ
(Mat 16:20-28; Mar 8:30–9:1)
21Yeso a tíʼ nkwantɨ awa ngə́ á bo keʼ soŋ a mbó ŋwɔn tse a ŋwɔn wa zɨə nɨ wɛrə ghe. 22A kɨ́ mbə soŋ a mbó bo ngə́, “Mɔn Ŋwɔn a mɨ zagɨ ze ngɨ́ʼ tsɛʼ nkan, á bɨkum bɨ alaʼ, bɨntumshe bə wi nkwiʼtɨ Bɨdiʼ bɨ Nyɔngɔŋ ton ayi ɛ. Bɨ mɨ zhwitɨ a wɛrə lá á bə nzhwemnɨ a ndzum njwi tsi tárə́ ghe.”
23Yeso a tíʼ sóŋ a mbó bo ngə́, “Be ŋwɔn a tsi nɨ ndzɔŋ me, a shibɨ ntsi nɨ ntuŋ atuəmbəm azhi, ɨ byɛʼ abaŋnɨ-baŋnɨ azhi njwi tsum ɨ zɔŋnə aghə. 24Mbɨ́ʼ ngə́ ŋwɔn tsum wa a lɔnɨ ndoŋ ntsi mbyi ɨzhi a mɨ sam a zɛrə ghe, lá ŋwɔn tsum wa a samnɨ ntsi mbyi ɨzhi mbɨ́ʼ aghan, a mɨ loŋ a zɛrə ghe.#9:24 Matyo 10:39; Alukasɨ 17:33; Yoane 12:25 25Ɨbɛn mɨ sə́ŋ azúm zə tsɛrə mbáʼ be bo tsi nɨ mbyi tsum mbə sam ntsi mbyi ɨza le? Ngáŋ! 26Be ŋwɔn a ndɨ́rə́ atú mbɨ́ʼ aghan abɔʼnɨ ɨnu tsa ma diʼnə, muŋ Mɔn Ŋwɔn a ghɨ kɨ́ dɨrɨ atú mbɨ́ʼ ayi a nyom wa a yenɨ a mu nɨfáŋ ɨni abɔʼnɨ nɨfáŋ nɨ Tarɨ nkwiʼtɨ a nə bɨtsen bɨ ndá bɨ Ŋwi bə fɛmnɨ ə. 27Ma sóŋə́ a mbó bən tsɛʼ a nkənu ngə́ ɨbɛn bə tse tsi ɨghan mbáʼ bɨ ghɨnɨ keʼ kfo tɨgha bo zɛn nɨfɔ nɨ Ŋwi ə.”
Adzaŋ za Nkyerɨ Yeso ɨ Kwébtɨ́nə́
(Mat 17:1-8; Mar 9:2-8)
28A bénə tso ngabɨ zɨ fɨgɨnɨ mbáʼ a sóŋnɨ́ ɨnu tsenə ghe. Yeso a lɔ́gɨ́ a Bita, Yoane abɔʼnɨ Jemsɨ bo bo kɔʼ ngɛn atú a ntáʼ a ntsaʼtɨ Ŋwi ə.#9:28 2 Bita 1:17-18 29Mbáʼ a kɨ́nə́ ntsaʼtə a Ŋwi lá, ɨshi ɨyi ɨ kwébtɨ́ mbě ɨzhi, ɨtsɛʼ ɨchi kwebtɨ, ntiʼə fúgə́ ɨ ŋwánkə́ ghe. 30Mɨmboŋnɨ ɨbɛn bi bɨbá, bɨ tɛ́m ngamnə bo zɨə. Ɨbɛn ba bé Mǒse bo Alaja, 31mbáʼ bɨ fúnɨ́ a ɨshe a mu nɨfáŋ nɨ fɔməbvurə ngyen bo bo ghamnɨ adzaŋ za a mɨ lwɨgɨ akyaŋtɨ za Ŋwi a lɛ́nɨ́ a nkfǒ a Yerosalɛm ə. 32Bita, Yoane bo Jemsɨ lánɨ́ nɔŋ ndyě awa tsɛʼ nkə lá mbə ntiʼ mbvukɨ ndzɛn a Yeso a mu nɨfáŋ ɨni abɔʼnɨ ɨbɛn ba bi bɨbá ba bɨ tɛ́mkɨ́nɨ́ bo zɨ lá. 33Adzaŋ za ɨbɛn ba kɨ́nə́ nyɛʼtə a Yeso lá, Bita a sóŋ wəmbo ngə́, “Tafaʼ a bɔŋ be tɨ́sə́n mbáʼ bɨgɨ tsinɨ ɨghan lá! Bɨgɨ mɨ korɨ mɨntaŋ mi mɨntárə́, wu mɔʼɔ a mbó gho, wu mɔʼɔ a mbó Mǒse abɔʼnɨ wu mɔʼɔ a mbó Alaja ghe.” (A sé lanɨ nji anu za zɨ kɨ́nə́ sóŋə́ ghe.)
34Mbáʼ Bita a kɨ́nə́ mbvúrə́ ngámə́, mbaʼ tyínɨ́ ngyen nɨnɨŋənɨŋə ɨyi a kubɨnɨ awa; bɨyɛʼ ba tíʼ ntsi nɨ nɨbɔgɨ adzaŋ za mbaʼ za ɨ yénɨ́ ntsa atú bo ghe. 35Nji ɨ fú a mu mbaʼ za ɨ soŋ ngə́, “A nɨ Mɔn ɨghan a wɛnə mbáʼ ma tsɔʼnə – zúʼnə wəmbo ə!”#9:35 Alukasɨ 3:22
36Mbáʼ nji za ɨ kyɛ́ntɨ́nɨ́, Yeso a tíʼ ntsí tsɛʼ zɨzɨ ə. Bɨyɛʼ ɨbyi ba chwúbtɨ́ mɨntsu ɨma mbɨ́ʼ a mətsen ɨtsum, nkeʼ anu zə tse za bo zɛ́nɨ́ a nyom məwa soŋ a mbó ŋwɔn tse ghe.
Yeso a Tsuʼ a Mɔn Mbáŋnɨ́ wa a Tsínɨ́ nɨ Azhwi zə Tɔmnɨnɨ ə
(Mat 17:14-18; Mar 9:14-27)
37Njwi zɨ mɔʼɔ lanə Yeso abɔʼnɨ bɨyɛʼ ɨbyi ba bi bɨtárə́ lo atú a ntáʼ wa ɨ shiʼə. Ɨnɔ ɨbɛn yén nkwátɨ́ a Yeso ghe. 38Ŋwɔn a fú a mu ɨnɔ wa ntɔnkɨ ngə́, “Ndiʼ aŋwaʼnɨ! Ma buʼ mbó ɨwa, ze azo a mɔn ɨghan wu mbáŋnɨ́ ə — tsɛʼ mɨndɔŋ mɔn ɨghə! 39Azhwi a tɨbɔŋ a wɛmə ayi ngɨə a ŋwankɨnə nkə́ ngvǒ akəbvurə, mɨfuʼ kɔʼə fuə wə ntsu; ngǎ ngɨ́ʼ wəmbo nchi keʼ ayi nyɛʼtə! 40Ma búʼ mbó a mbó bɨyɛʼ ɨbo ngə́ á bɨ fɨgə, lá bo kɨ chi keʼ fɨ́gə.”
41Yeso a chwɨ́gɨ́ ngə́, “Nɨ nɨ nɨwə na nɨ buʼnɨ mɨbvu nkɨ mboŋ abeməntəm be tɨsɨŋə! Ma ghɨ tsí bɨgɨnə lá a nye ndvuŋ nkfu ake le? Ma ghɨ chigɨ ntəm a nye ɨfənu ɨtsən a nye ndvuŋ nkfu ake le?” Ntiʼ mbə soŋ a mbó ŋwɔn wa ngə́, “Yen nɨ mɔn ɨgho ɨghə.”
42Mbáʼ mɔn mbáŋnɨ́ wa a kɨ́nə́ ngyiŋə lá, dzɨŋ wa a ghɨ́ a kwiʼ ngvo akəbvurə za. Yeso a sóŋ ngə́ á azhwi zə tɔmnɨnɨ za a fuə. A byí ntíʼ nkɨ́ fú, mɔn wa a shwetə. Yeso a tíʼ nga ayi a mbó ta ɨyi wədiʼ ə. 43Mɨtən mɨ Ŋwi men mə wi tíʼ nkɨʼnɨ a ŋwɔn tsum ə.
Yeso a Kwiʼ mbə Mɨ Anu a Nɨvwo azhi ɛ
(Mat 17:22-23; Mar 9:30-32)
Mbáʼ ɨbɛn kɨ́nə́ ngyérɨ́ ɨnu ɨtsum tsa Yeso a kɨ́nə́ ngɨə lá, a sóŋ a mbó bɨyɛʼ ɨbyi ngə́, 44“A nɨ keʼ lɨgɨnɨ anu za mbáʼ ma mɨ soŋ a mbó bɨŋ ə! Bɨ mɨ gha a Mɔn Ŋwɔn a mu mbó mɨtən mɨ ɨbɛn ə.” 45Lá bɨyɛʼ ɨbyi sé zhí anu za a kɨ́nə́ sóŋə́ lá. Bɨ kwɛ́nə ndwɛʼ a mbó bo mbɨ́ʼ ɨtú ɨtsa ŋaʼnɨ mbɨ́ʼ a zɛrə, bo kə́ mbɔ́gɨ́ mbitɨ wɛrə mbɨ́ʼ anu məziŋ ə.
A nɨ Ɨwa wa a nɨ Ŋwɔn wu Ngwi ə?
(Mat 18:1-5; Mar 9:33-37)
46Ashwuŋnɨ a nɨgham a bvúgɨ́nɨ́ a tɨtərɨ bɨyɛʼ ɨbyi ngə́ a nɨ ɨwa ŋwɔn nɨbo wa a nɨ ŋwɔn wu ngwi le? 47Yeso a zhí anu za bo kɨ́nə́ nkwaʼtə, ndɔgɨ a mɔn wu mbɔrɨ, ntɛgɨ a mbyɛn zɨ, 48ntiʼ soŋ a mbó bo ngə́, “Ŋwɔn tsum wa a kwarɨnɨ a mɔn wen ɨ shiʼnɨ nɨ ɨkum ɨghan, a kwarɨ aghə ɨ shiʼnɨ ə; ŋwɔn tsum wa a kwarɨnɨ aghan ɨ shiʼnɨ, a kɨ nkwarɨ a ŋwɔn wa a tságɨ́nɨ́ aghan ɨ shiʼnɨ ə. Mbɨ́ʼ ngə́ ndwɨgɨnɨ a tɨtərɨ bən bɨtsum a nɨ ŋwɔn wu ngwi ə.” #9:48 Matyo 10:40; Alukasɨ 10:16
Ŋwɔn wa a Se Bɨŋ zɨ a Nkwə́nkə́ a Tsi a Bagɨ gho ghe
(Mar 9:38-40)
49Yoane a chwɨ́gɨ́ ngə́, “Tafaʼ bɨgɨ zɛ́n a ŋwɔn a fɨgɨnɨ bɨdzɨŋ nɨ ɨkum ɨgho bɨgɨ soŋ wəmbo ngə́ á kyɛntə, mbɨ́ʼ ngə́, a se abɔʼnɨ ngǒtə ɨzɨgɨnə chyɛ.”
50Yeso a sóŋ wəmbo abɔʼnɨ bɨyɛʼ ɨbyi bə mɔʼɔ ngə́, “Njimbɨʼ nɨ tsuʼnɨ a wɛrə mbɨ́ʼ ngə́ ŋwɔn tsum wa ka a nkwə́nkə́ ayi bɨŋ zɨ a tsi bɨŋ zɨə.”
Atom a Samaria zə Tse a Tuŋ Nkwarɨ Yeso ghe
51Adzaŋ za nkfu tíʼnə́ ngyiŋə mbáʼ bɨ mɨ lɔgɨ a Yeso á kɔʼ ngɛn a fɔməbvurə lá, wɛrə a tɛ́gɨ́ ntəm ɨyi nkə́ ntiʼə ngěn a Yerosalɛm ə. 52A tságɨ́ ntóm a mbyi zɨ, bɨ ghɛn a mu atom zə tse a mu Samaria a nkyáŋtɨ́ ɨnu ɨtsum wəmbo ə. 53Lá ɨbɛn ba bɨ tsínɨ́ ɨwu bɨ tón awa a nkwárɨ́ wɛrə, mbɨ́ʼ ngə́ a lán ngə́ wɛrə a tsí a ndómnji ngěn a Yerosalɛm ə. 54Mbáʼ bɨyɛʼ ɨbyi, Jemsɨ bo Yoane, a bɨ zɛ́nɨ́ a məzen lá, mbitɨ ngə́, “Maʼmbyí, o lǒ ngə́ bɨgɨ tɔŋ ɨmugɨ á ɨ fu a fɔməbvurə ngyen ntɔn#9:54 Ɨŋwaʼnɨ tsə mɔʼɔ kwiʼtɨ ngə́, tso mbáʼ Alaja a ghɨ́nɨ́ lá. awa le?”#9:54 2 Bɨfɔ 1:9-16
55Yeso a bə́ŋ ayi ngámtɨ́ awa ghe#9:55 Ɨŋwaʼnɨ tsə mɔʼɔ soŋ ngə́ wɛrə a kwíʼtɨ́ ngə́, “Ka nɨ zhi awən abə́ŋ Azhwi za nɨ tsinɨ wə mu ə; mbɨ́ʼ ngə́ Mɔn Ŋwɔn a sé yen lá a njwítɨ́ ɨbɛn, wɛrə a yén be a ndoŋ bo ghe.”.
56Ndo adiʼ məwa, Yeso bo bɨ bɨyɛʼ ɨbyi tíʼ ngɛn a mu atom zə daŋ ə.
Ba bɨ Tsinɨ ɨ Ghɨ Zɔŋ a Yeso ghe
(Mar 8:19-22)
57Mbáʼ bo tsínɨ́ a ndómnji, ŋwɔn tsɛrə a sóŋ a mbó Yeso ngə́, “Ma mɨ zɔŋ agho adiʼ atsum za o ghɛnə ghe.”
58Yeso a chwɨ́gɨ́ wəmbo ngə́, “Bɨnɨmaŋ tsi nɨ mɨngvo, bɨsɨ́ŋ tsi nɨ mɨnkan, lá Mɔn Ŋwɔn a se tsi nɨ adiʼ zə nyɔŋnɨ atú azhi ɨwu ɨ zhwitə.”
59Mbə nkɨ soŋ a mbó ŋwɔn wu mɔʼɔ ngə́, “Zɔŋ aghə.” Lá ŋwɔn wa a sóŋ ngə́, “Tə̧, nyɛʼtɨ á ma fom ngɛn ntwəŋ a ta ɨghə.”
60Yeso a chwɨ́gɨ́ ngə́, “Nyɛʼtɨ á ɨkfú ɨbɛn twəŋ a tsə mɔʼɔ ghe. Gho, ghɛn ɨ soŋ anu a Nɨfɔ nɨ Ŋwi ə.”
61Ŋwɔn wu mɔʼɔ a kwíʼ nkɨ́ sóŋ ngə́, “Ma mɨ zɔŋ agho, a tə̧, lá fom nyɛʼtɨ aghan á ma ghɛn nga fɨlye a mbó ngwəgɨ ɨzə.”#9:61 1Bɨfɔ 19:20
62Yeso a sóŋ wəmbo ngə́, “Ŋwɔn tsum wa a chwanɨ aso aliʼ mbɨŋə ndyǐŋ ndzum, ka a kuʼnɨ ayi a nkúŋə́ a mu Nɨfɔ nɨ Ŋwi ə.”
Currently Selected:
Alukasɨ 9: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
