Marɨkusɨ 11
11
Yeso a Kon a Yerosalɛm tso Ɨfɔ ghe
(Mat 21:1-11; Alu 19:28-40; Yoa 12:12-19)
1Mbáʼ Yeso bo bɨ bɨyɛʼ ɨbyi kɨ́nə́ fátə́ a nkúŋə́ a Yerosalɛm lá, a kɨʼ ntáʼmbagə Bɛtɨfage abɔʼnɨ Bɛtani, bo yén nkón a nye Mbám Olif ə. Yeso a tságɨ́ bɨyɛʼ ɨbyi bi bɨbá a mbyi 2nɨ ntɨgə tsen ngə́: “Ghɛnə a mu atom zhirɨ a mbyi bɨŋ ə. Tsɛʼ mbáʼ nɨ mɨ ghangə nɨ kúŋə́ ɨwu, nɨ mɨ zɛn a mɨmu jakashi wu tse wa bɨ tɨŋnɨnɨ wa mbáʼ ŋwɔn adaŋ a bvúrɨ́ tɨ láʼ nkɔʼ wu atú ə. Nɨ shwɛn ngyen nɨ zɛrə ghe. 3Be ŋwɔn tse a bitɨ awən ngə́, ‹Nɨ ghɨə mə lan lá ngə́ ke le?› Soŋnə wəmbo ngə́, ‹Maʼmbyí a lǒ ɨ faʼə nɨ zɛrə ghe. Wɛrə a mɨ byi byigɨ a zɛrə mbáʼ a mɛtɨnə nɨ zɛrə ghe.› ”
4Ma lan, bo ghɛ́n nkɨ́ ndzɛ́n a mɨmu jakashi a mu kɔŋ, bɨ korɨ a ntsundá tsɛrə ghe. Adzaŋ za bo kɨ́nə́ shwě a zɛrə lá, 5ɨbɛn bə tsɛrə mbáʼ bɨ tɛ́mnɨ́ ɨwu bítɨ́ awa ngə́, “Nɨ ghɨə lá ake, nkyɛ́gə́ a mɨmu jakashi wa le?”
6Bo chwɨ́gɨ́ tsɛʼ adzaŋ za Yeso a sóŋnɨ́ a mbó bo lá, bɨ tiʼ nyɛʼtɨ bo ghɛn awa ghe. 7Bo yén nɨ mɨmu jakashi wa a mbó Yeso, ɨ nyɔŋ ɨtsɛʼ ɨtsa wə ndzum, Yeso a tiʼ nkɔʼ ɨ shiʼtɨ ntsi wu atú ə. 8Ɨbɛn bə ghaʼnɨ sháŋtɨ́ ɨtsɛʼ ɨtsa a ndómnji, bə mɔʼɔ sobtɨ mbó mɨ ɨtɨ a mu mɨshwom ndɨʼ a mɛrə a ndómnji ɛ. 9Ɨbɛn ba bɨ kɨ́nə́ ngěn a mbyi abɔʼnɨ ba bɨ kɨ́nə́ ndzɔŋə a ndzum, bíʼnɨ́ ntɔ́nkə́ ngə́, “Bontɨ a Ŋwi ə! A Ŋwi a fɔgɨ a wɛrə wa a yenə nɨ ɨkum Maʼmbyí ɛ! 10A Ŋwi a fɔgɨ nɨfɔ nɨ Ɨfɔ Devidɨ, ta ɨwɨgɨnə ghe! Bontɨ a Ŋwi atú a təntsánɨ ə.”
11Yeso a yén nkón a Yerosalɛm lá, mbyi ntsá ngɛn a mu Ndáŋwi zɨ Ngwi, ndyiŋ ɨdzúm ɨtsum nkarɨsə. Lá mbáʼ nkfu tsánə lá, wɛrə a bə́ fú ngɛ́n a Bɛtani bo bɨ bɨyɛʼ ɨbyi ba nɨghúm ntsɔb bá ghe.
Yeso a Lɔʼ Atɨ a Figɨ ə
(Mat 21:18-19)
12Njwi zɨ mɔʼɔ lanə, mbáʼ bo kɨ́nə́ mbɨŋə a Bɛtani lá, nji kə́ ndzáŋə́ a Yeso ghe. 13Wɛrə a tɛ́m nəghagɨ, ndze atɨ a figɨ, ɨzəŋ bɔm, wɛrə tiʼ ngɛn ɨwu a ndzé ngə́ be zɨə zɛn mɨntam mə tse wu atú ə. Lá a yenə nkuʼ ɨwu, ndzɛn tsɛʼ ɨzəŋ atɨ tsa mbɨ́ʼ ngə́ a sé bé nkfu za figɨ a kónɨ́nə́ mɨntam ə. 14Yeso a sóŋ a mbó atɨ a figɨ za ngə́, “Ŋwɔn tse a láʼ keʼ mɨntam ɨmo kwiʼ mbə ndzɨə!” Bɨyɛʼ ɨbyi zúʼ anu za wɛrə a sóŋnə́.
Yeso a Kɨŋ Ngaŋ Mɨtan a mu Ndáŋwi zɨ Ngwi ə
(Mat 21:12-17; Alu 19:45-48; Yoa 2:13-22)
15Mbáʼ bo yénɨ́ nkón a Yerosalɛm lá, Yeso a ghɛ́n a mu Ndáŋwi zɨ Ngwi, ntiʼ mbiʼnɨ nkə́ntɨ́ ɨbɛn bɨtsum ba bɨ kɨ́nə́ ntáŋə́ a mɨtan ɨwu ə. Wɛrə a bə́nkɨ́ ɨtɛkɨ ngaŋ nkwebtɨ nkáb bo ɨkɨ́gɨ́ ngaŋ fiŋ bɨbvugɨrə-fɨkon, 16nkeʼ kɨ nyɛʼtɨ á ŋwɔn tse a byɛʼ azúm zə tsɛrə ntsa nɨ zɛrə a saŋ Ndáŋwi zɨ Ngwi ə. 17A tíʼ ndiʼ ɨbɛn ngə́: “Bɨ ŋwaʼnɨ a mu aŋwaʼnɨ a Ŋwi ngə́ Ŋwi a sóŋ ngə́,
‹Bɨ ghɨ tɔ́ŋ ndá ɨzan nɨ adiʼ a ntsaʼtɨ Ŋwi a mbó ɨbɛn bɨ ɨlaʼ ɨtsum ə.›
Lá nɨ bənkɨ a zɛrə a nye adiʼ a ndyɛmtɨ mɨzɛrə ghe!”
18Bɨntumshe bə wi abɔʼnɨ bɨdiʼ bɨ Nyɔngɔŋ zúʼ anu məzen, ntiʼ mbiʼnɨ ndǒ ndóm tse a njwítɨ́ Yeso ghe. Bo kə́ mbɔ́gə́ ayi mbɨ́ʼ ngə́ a kɨ́ʼnɨ́ ɨnɔ ɨbɛn wa mbɨ́ʼ ɨnu tsa wɛrə a kɨ́nə́ ndiʼə ghe.
19Nkwɛfɔ ghɨnə ngyén, Yeso bo bɨ bɨyɛʼ ɨbyi fu awa a ntáʼmbagə wa.
Anu zə Yɛʼnɨ a nye Atɨ a Figɨ za
(Mat 21:20-22)
20A tənjwi nɨ mbvugɨrɨ, adzaŋ za bo kɨ́nə́ ntɛ́mə́ ngěn a ndómnji, bo zɛ́n atɨ a figɨ za. A kfó tsɛʼ atsum mbiʼnɨ a nye mɨngaŋ ɨmyi ɛ. 21Bita a wáʼtɨ́ anu za a fúnɨ́ lá ntiʼ soŋ a mbó Yeso ngə́, “Ndiʼ aŋwaʼnɨ, ze, atɨ a figɨ za o kɨ lɔʼnɨ lá a kfoə!”
22Yeso a chwɨ́gɨ́ awa ngə́, “A nɨ tsi nɨ abeməntəm a nye Ŋwi ə. 23Tsɛʼ a nkənu, ma soŋ a mbó bən ngə́ ŋwɔn tsum wa a soŋnɨ a mbó ntáʼ wen ngə́ á ɨ tsɔʼnɨ ngvo a mu sagɨrə wu ngwi lá nkeʼ məŋnɨ a mu ntəm zɨ, lá ɨ nɨŋ ntəm ɨyi ɨwu ngə́ anu za zɨə sóŋnə́, a mɨ fu, bɨ mɨ ghɨ a zɛrə wəmbo ə. 24Ma lan, ma sóŋə́ a mbó bən ngə́: be o tsaʼtɨ a Ŋwi mbitɨ azúm zə tse, ɨ nɨŋ ntəm ɨgho ɨwu ngə́ o kwarɨnə a zɛrə, bɨ mɨ tiʼ gha azúm atsum za o bitɨnə. 25Be o tɛm ntsáʼtə́ a Ŋwi, lɨgɨnɨ anu atsum za o chinɨ tsi nɨ zɛrə a nye ŋwɔn, taŋ á Ta ɨgho a fɔməbvurə a kɨ ndɨgɨnɨ ɨfənu tsa o ghɨnə ghe.” 26#11:26 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwáʼnɨ́ kwiʼtɨ nkaŋ 26 ngə́ be o tú lɨgɨnɨ mɨbvu mɨ ɨbɛn bə mɔʼɔ, Ta ɨgho a fɔməbvurə a mɨ keʼ lɨgɨnɨ ɨfənu tsa o ghɨnə ghe.
Abítɨ mbɨ́ʼ Mɨtən mɨ Yeso ghe
(Mat 21:23-27; Alu 20:1-8)
27Bo bə́ ngyen nkon a Yerosalɛm ə. Tso mbáʼ Yeso a kɨ́nə́ ngántə́ a mu Ndáŋwi zɨ Ngwi lá, bɨntumshe bə wi, bɨdiʼ bɨ Nyɔngɔŋ abɔʼnɨ bɨkum yén wəmbo 28ntiʼ mbitɨ ayi ngə́, “O lɔgɨ mɨtən ɨ ghé a ngɨ ɨnu tsiŋ ə? Mɨtən men a mbó gho a gha ɨwa le?”
29Yeso a chwɨ́gɨ́ a mbó bo ngə́, “Ma mɨ bitɨ awən tsɛʼ nɨ táʼ abítɨ ə. Be nɨ gha achwɨgə zə tse a mbó me, ma mɨ tiʼ fɨʼtɨ awən nɨ mɨtən ma ma tsinɨ nɨ mɛrə a ngɨ ɨnu tsiŋ ə. 30Soŋnə a mbó me ghe, mɨtən mɨ Yoane a ngǎ nkyi mɨ ló lá ɨ ghé: mɨ ló lá a mbó Ŋwi kə a mbó ŋwɔn le?”
31Bo tíʼ mbiʼnɨ nkwə́nkə́ a tɨtərɨ bo nɨbo ngə́: “Bɨgɨnə mɨ soŋ lá ngə́ ke le? Be bɨgɨnə chwɨgɨ ngə́, ‹Mɨ ló a mbó Ŋwi›, a mɨ soŋ ngə́, ‹Nɨ yén ntíʼ nkeʼ nɨŋ mɨntəm ɨmən a nye Yoane lá ngə́ ke le?› 32Lá be bɨgɨnə soŋ ngə́, ‹A mbó ŋwɔn mɨsɔŋ...›” (Bo kə́ mbɔ́gə́ ɨbɛn mbɨ́ʼ ngə́ ŋwɔn tsum a zhí ɨ shiʼnɨ ngə́ Yoane a bé ntom Ŋwi ə.) 33Ma lan, achwɨgə aza a mbó Yeso a bé ngə́, “Ka bɨgɨ zhi awɨgɨ ə.”
Yeso a sóŋ a mbó bo ngə́, “Be a be ma lan, muŋ ma mɨ kaʼ kɨ soŋ a mbó bən, mɨtən ma ma lɔgɨnə ngɨ̌ ɨnu mətsiŋ ə.”
Currently Selected:
Marɨkusɨ 11: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
