Marɨkusɨ 14

Ɨbɛn Korɨ a Mɨnaŋ a Njwítɨ́ Yeso ghe

(Mat 26:1-5; Alu 22:1-2; Yoa 11:45-53)

1A tíʼ mbvúrɨ́ njwi tsi bá a nkúŋə́ a nye Nɨdorɨ nɨ Tsa-yɛʼnɨ abɔʼnɨ Abán tɨ Mbɛgə na. Bɨntumshe bə wi abɔʼnɨ bɨdiʼ bɨ Nyɔngɔŋ tíʼə ndǒ ndómnji a nkó Yeso ndzum ndzum, ɨ zhwitə. 2Bo sóŋ ngə́, “Bɨgɨnə mɨ zagɨ ɨ keʼ ghɨ a zɛrə a nkfu nɨdorɨ nen, muŋ ɨbɛn mɨ bvugɨ ndum ə.”

Bɨ Zɔʼ a Yeso a Bɛtani ə

(Mat 26:6-13; Yoa 12:1-8)

3Yeso a tsí a Bɛtani a ndá Samɔn ŋwɔn wa a tsínɨ́ nɨ nɨghɔ nɨ atəchwen mbə́ shwetə. Mbáʼ a tsínɨ́ atú atɛkɨ a mɨdzɨ ndzɨə, mangye wu tse a yén nɨ zhwɛʼ#14:3Zhwɛʼ wen a bé tɔ́gɨ́rə́ wa bɨ nyɛ́tɨ́nɨ́ nɨ azúm zə tse bɨ tɔŋə ngə́ alabasta mbe azúm za bɨ nyɛ́tɨ́nɨ́ nɨ ngɔʼ tsɨ fúə. wa a lónɨ́ nɨ bɨnyuʼtə bə atɨŋndvuŋ ba bɨ nyɛ́tɨ́nɨ́ nɨ nadɨ nkeʼ nyamtə. Wɛrə a kwárɨ́ atɔŋ a zhwɛʼ za nchwirɨ bɨnyuʼtə ba atú Yeso ghe. 4Lá, ɨbɛn bə mɔʼɔ tsí ɨwu ba mɨntɔŋ ɨma lwínɨ́nɨ́, bo soŋ nɨ mɨlwi a tɨtərɨ bo nɨbo ngə́, “A tsəŋ bɨnyuʼtə bɨ atɨŋndvuŋ ben adzaŋ wen lá ngə́ ke le? 5Mbɨ́ʼ ngə́ bɨ kwɛ nchi fen bɨnyuʼtə ba nɨ təkɔʼ bɨ nkáb, ɨ gha nkáb ɨzhi a mbó ɨfúm ə!” Bo tíʼ nkagɨ ayi nɨ mɨtsɛgɨ ə.

6Lá Yeso a sóŋ ngə́, “Nɨ nyɛʼtɨ ayi ɛ! Nɨ ghǎ ngɨ́ʼ wəmbo lá ngə́ ke le? Wɛrə a ghɨ anu zə shiʼnɨ za a bɔŋnɨ tsɛʼ nkan a nye me ghe. 7Mbɨ́ʼ ngə́ ɨfúm tsi nkfu tsum bɨŋ bo, nkfu tsum za nɨ kɔŋnɨ, nɨ chi gha akwatɨ a mbó bo ghe. Lá ma mɨ ghɨ kaʼ bɨgɨnə ghɔŋ nkfu tsum ə. 8Wɛrə a ghɨ lá za a chinɨ ghɨə; wɛrə a lo nchwirɨ bɨnyuʼtə a nye mbəmnye ɨzan lá a nkyáŋtɨ́ zɛrə, bɔŋ á nkfu ntwəŋ ɨzə kuʼə. 9Tsɛʼ a nkənu, ma sóŋə́ a mbó bɨŋ ə, adiʼ atsum za bɨ ghɨnɨ sóŋ nkən wu shiʼnɨ a mu mbyi, anu za wɛrə a ghɨnɨ lá, bɨ ghɨ kərɨnə a nkwémtɨ́ ɨkum ɨyi ɛ.”

Yudasɨ a Bemtɨ a Fiŋ Yeso ghe

(Mat 26:14-16; Alu 22:3-6)

10Yudasɨ Iskario, wa a bénɨ́ táʼ abɔʼnɨ bɨyɛʼ ba nɨghúm ntsɔb bá, a tíʼ ngɛn a mbó bɨntumshe bə wi taŋ ɨ fen a Yeso a mbó bo ghe. 11Bo ghɨnə ndzúʼ anu za wɛrə a sóŋnɨ́, ntsi nɨ nɨdorɨ, ntiʼ nkaʼ a ngá nkáb wəmbo ə. Ma lan, Yudasɨ a tíʼə ndǒ abárɨ́ zə shiʼnɨ a fiŋ Yeso a mbó bo ghe.

Yeso a Dzɨ Mɨdzɨ mɨ Tsa-yɛʼnɨ bo bɨ Bɨyɛʼ ɨbyi ɛ

(Mat 26:17-25; Alu 22:7-14, 21-23; Yoa 13:21-30)

12A ghɨnə mbé a nye ntsambyi njwi nɨdorɨ nɨ abán tɨ mbɛgə, mbáʼ bɨ kyémnɨ́ ɨbɔ bɨ mbyindzɨ a ndzɨ́ mɨdzɨ mɨ Tsa-yɛʼnɨ ma ɨwu lá, bɨyɛʼ ɨbyi bítɨ́ ayi ngə́, “O lǒ ngə́ á bɨgɨ ghɛn nkyaŋtɨ mɨdzɨ mɨ Tsa-yɛʼnɨ ma a mbó gho lá ɨ ghé le?”

13Yeso a tíʼ ntsagɨ bɨyɛʼ ɨbyi bi bɨbá, nɨ ntɨgə tsen ngə́, “Nɨ ghɛn a mu ntáʼmbagə zɨ ngwi, nɨ mɨ bomnkɨ bɨŋ bɨ ŋwɔn tse wa a byɛʼnɨ atɛn a nkyi ɛ. Zɔŋnə ayi, 14ngɛn nkon a mu ndá za a mɨ kon ɨwu, ɨ soŋ a mbó mboŋ ndá məwa ngə́, ‹Ndiʼ aŋwaʼnɨ a bitɨ ngə́ kwasɨ ndá ngaŋ nɨghan wa mbáʼ ma mɨ dzɨ mɨdzɨ mɨ Tsa-yɛʼnɨ bɨgɨ bɨ bɨyɛʼ ɨban ɨwu lá a mé le?› 15A mɨ tiʼ diʼ a kwasɨ ndá wa a faŋnɨ tsɛʼ nkan a mu ndá-nɨkaŋ wa bɨ lɨʼnɨ ɨ shiʼnɨ, ɨdzúm ɨtsum tsi wə mu; nɨ kyaŋtɨ a wɛrə a mbó bɨgɨnə ghe.”

16Bɨyɛʼ ba tíʼ ndɔgɨ ndóm ngɛn a ntáʼmbagə zɨ ngwi, ntiʼ ndzɛn atsum tsɛʼ adzaŋ za Yeso a sóŋnɨ́ a mbó bo lá, ntiʼ nkɨ nkyaŋtɨ mɨdzɨ mɨ Tsa-yɛʼnɨ ma ɨwu ə.

17A ghɨnə mbé a nkwɛfɔ Yeso a yen bo bɨ bɨyɛʼ ɨbyi ba nɨghúm ntsɔb bá ghe. 18Mbáʼ bo tsínɨ́ atú atɛkɨ ndzɨə, Yeso a sóŋ ngə́, “Tsɛʼ a nkənu, ma soŋ a mbó bɨŋ ə, táʼ ŋwɔn nɨ bən a mɨ fen aghə, mbe táʼ ŋwɔn wa a dzɨ́nə́ bɨgɨ zɨə.”

19Bɨyɛʼ ba dzə́ŋnɨ́, ntiʼ mbiʼnɨ mbítə́ wəmbo ɨ mɔ́ʼɔ́ mɔ́ʼɔ́ ngə́, “Lá nɨ me le?”

20Yeso a chwɨ́gɨ́ ngə́, “A mɨ be táʼ a tɨtərɨ bən nɨghúm ntsɔb bá ghe, wa a tsubtɨnə abán a mu akəbɨ bɨgɨ zɨə. 21Mɔn Ŋwɔn a mɨ kfo adzaŋ za Aŋwaʼnɨ a Ŋwi a soŋnɨ ngə́ a mɨ kfo, lá ndɔn ɨ tsi atú ŋwɔn wa a fenɨ ayi ɛ! A ló bé bɔŋtɨ a mbó ŋwɔn məwa mbáʼ be bɨ sé ayi byi njwi ɨ jwinə!”

Ntárɨ́ Maʼmbyí ɛ

(Mat 26:26-30; Alu 22:14-20; 1Ko 11:23-25)

22Adzaŋ za bo kɨ́nə́ ndzɨ́ə lá, Yeso a lɔ́gɨ́ abán, ngɨ atsaʼtɨ a Ŋwi zə ngá mɨya, ntiʼ mbatɨ nga a mbó bɨyɛʼ ɨbyi, ɨ soŋ ngə́, “Konə, nə nɨ ɨnyam ɨnye ɨzə ziŋ ə.” 23Wɛrə a tíʼ nkɨ́ ndɔ́gɨ́ ndɔ́ŋ, nga a mɨya a mbó Ŋwi ntiʼ nga a mbó bo, bo no a mu ndɔ́ŋ za. 24Yeso a sóŋ a mbó bo ngə́, “Nə nɨ alɛm azə a zen mbáʼ bɨ chwirɨnɨ a mbó bə ghaʼnɨ, alɛm azan za a nɨ fɛnwu akan zə fi ə. 25Tsɛʼ a nkənu, ma soŋ a mbó bɨŋ ə, ma mɨ láʼ kaʼ bə nkwiʼ no mɨluʼ məmen ma bɨ kamnɨ a nye mɨntam mɨ ɨtɨ lá, ɨ kɔʼ kuʼ njwi za ma ghɨ nó mɨluʼ mə fi a mu Nɨfɔ nɨ Ŋwi ə.”

26Bo tíʼ ndzɔbɨ ɨkom, ɨ fu nkɔʼ ngɛn atú Ntáʼ Olif ə.

Yeso a Fɨʼtɨ Adzaŋ za Bita a mɨ Ton ayi ɛ

(Mat 26:31-35; Alu 22:31-34; Yoa 13:36-38)

27Yeso a sóŋ a mbó bo ngə́, “Bən bɨtsum mɨ kɨəkɨ ɨ nyɛʼ aghə; mbɨ́ʼ ngə́ aŋwaʼnɨ a Ŋwi a soŋ ngə́,

‹Ŋwi a mɨ zhwitɨ a ntsǐŋ mɨnyam, á mbyindzɨ tiʼ ndzagɨnə.›

28Lá, ndzɔŋtɨ, mbáʼ bɨ zhwemnɨnə aghan, ma mɨ ghɛn a mbyi bən a Galili ə.”

29Bita a chwɨ́gɨ́ ngə́, “Be bɨtsum nyɛʼtɨ agho, ma láʼ kaʼ agho nyɛʼtə!”

30Yeso a sóŋ a mbó Bita ngə́, “Tsɛʼ a nkənu, ma soŋ a mbó gho ngə́, tsɛʼ nɨ ɨtfúʼ sɨŋə, bɔŋ á ankɨʼə a tɔŋ nkfu tsi bá, o mɨ ton aghə nkfu tsi tárə́ ghe.”

31Lá Bita a chwɨ́gɨ́ nɨ adaʼ ngə́, “Be a be be ngə́ á ma kfo bɔgə, ma láʼ kaʼ agho tuŋə.”

Bɨyɛʼ bə mɔʼɔ ba bɨtsum tíʼ nkɨ́ sóŋ tsɛʼ adzaŋ məwa.

Yeso a Tsaʼtɨ a Ŋwi a Gɛtɨsemani ə

(Mat 26:36-46; Alu 22:39-46)

32Bo tíʼ ngɛn adiʼ zə tse za bɨ kɨ́nə́ ntɔ́ŋə́ ngə́ Gɛtɨsemani; Yeso a tiʼ soŋ a mbó bɨyɛʼ ɨbyi ngə́, “Shiʼtɨ ntsinə ɨghə, mbáʼ ma tsaʼtɨnə a Ŋwi ə.” 33A lɔ́gɨ́ a Bita nɨ Jemsɨ abɔʼnɨ Yoane bo bo yen a ntsaʼtɨ Ŋwi ə. A tíʼ mbiʼnɨ ndzə́ŋnə́ be tɨ́sə́n, anu zə wu a kə́ nghágə́ ayi ɛ. 34A tíʼ sóŋ a mbó bo ngə́, “Adzə́ŋnɨ za a tsinɨ a mu ntəm me a ghaʼ be tɨ́sə́n a nye ndóm wa a chinɨ zhwitɨ aghə. A nɨ tsi ɨghan, nkyérə́ ghe.”

35A bɔnɨnə ngɛntɨ a mbyi mɨnya, nkwem mɨkwiʼtɨ ɨmyi a tɨshe, ntsaʼtɨ a Ŋwi ngə́, be a be ngə́ a chi fu, á zɨə keʼ ze ngɨ́ʼ məziŋ ə. 36Wɛrə a tsáʼtɨ́ a Ŋwi ngə́, “Tarɨ, Ta ɨghan! Anu zə tse a chi keʼ agho tsaə. Kwarɨ ndɔ́ŋ ngɨ́ʼ zen a mbó me ghe. Lá á keʼ be be adzaŋ za ma lɔnə, á be be adzaŋ za o lɔnə ghe.”

37A bə́ mbən ndzɛn bɨyɛʼ ba bi bɨtárə́ bɨ nɔŋ ndyě ghe. Wɛrə a bítɨ́ a Bita ngə́, “Samɔn, nɨ lyě le? Nɨ lo nchi keʼ tsi a nɨkyerə a nye táʼ nyom le?” 38Wɛrə a tíʼ sóŋ a mbó bo ngə́, “A nɨ nkyérə́ nkə́ ntsáʼtə́ a Ŋwi mbɨ́ʼ nɨ ghɨ ngvo a mu akwaʼnɨ ə. Tsɛʼ a nkənu, azhwi a lǒ ghe, lá ɨnyam ɨnye ghɔgə.”

39A bə́ mbən ngɛn a ntsaʼtɨ Ŋwi, nkwatɨ tsɛʼ ndəŋndəŋ ɨtú mɨgham ə. 40A bə́ nkwiʼ tɨ bɨŋ ə, ndze bɨyɛʼ ɨbyi lyenə mbɨ́ʼ ngə́ fɨlye dɨ́rɨ́ a ɨmɨgɨ bo ghe. Bo sé anu zə soŋnɨ a mbó zɨ zhyɛ.

41Mbáʼ wɛrə a yénɨ́ nkwátɨ́ awa a nye nkfu tsa tsɨ kúʼnɨ́ tsi tárə́ lá, wɛrə a sóŋ a mbó bo ngə́, “Nɨ bvurɨ nɔŋ ndyě nkə́ njwítə́ awən le? Ɨfɨʼ ɨ kuʼnə ghe! Nyom a yenə ghe! Zɛnə, bɨ tiʼnə ngǎ a Mɔn Ŋwɔn a mbó adaʼ a ngaŋ ngɨ mɨbvu ə. 42Nɨ lo atɨ́, á bɨgɨnə ghen. Zɛnə, ŋwɔn wa a fenɨ aghan a wɛnə!”

Bɨ Ko a Yeso ghe

(Mat 26:47-56; Alu 22:47-53; Yoa 18:3-12)

43Tsɛʼ a nyom məwa, mbáʼ wɛrə a kɨ́nə́ mbvúrə́ ngámə́, Yudasɨ, mbáʼ a bénɨ́ táʼ a tɨtərɨ bɨyɛʼ ba nɨghúm ntsɔb bá a yén abɔʼnɨ ɨnɔ ɨbɛn ə. Ɨnɔ ɨbɛn wa tíʼtɨ́ bɨlumban abɔʼnɨ mɨbúʼ ə. A tságɨ́ bɨntumshe bə wi, bɨdiʼ bɨ Nyɔngɔŋ abɔʼnɨ bɨkum ntsagɨ awa ghe. 44Ŋwɔn wa a fénɨ́ ayi lá, a ghá alɨgɨ a mbó ɨnɔ wa ngə́, “Ŋwɔn wa ma mɨ chwɨgɨ ayi, a nɨ ŋwɔn wa nɨ lɔnə ghe. Konə ayi, ngɛn nɨ wɛrə, ndyɛ́mə́ ayi ɨ shiʼnɨ ə.”

45Tsɛʼ mbáʼ Yudasɨ Iskario a yénɨ́ nkuʼ wə mbyɛn, mbyi ngɛn wəmbo ɨ soŋ ngə́, “Ndiʼ aŋwaʼnɨ!” ntiʼ nchwɨgɨ ayi ɛ. 46Ma lan, bɨ kó ayi ntiʼ ntiʼtɨ ayi nɨ mbó mə tɨŋə. 47Lá táʼ ŋwɔn wa a tɛ́mnɨ́ a mbyɛn, a sɔ́ŋ a lumban ɨyi, mbaŋ atoŋnɨ abuʼ a Ntumshe wu Ngwi ɨwu ə. 48Yeso a bítɨ́ awa ngə́, “A chyɛ ndǒ ngə́ á nɨ fu tso nɨ ghěn a nkó ndzɛrə, nɨ bɨlumban abɔʼnɨ mɨbúʼ a nkó me nɨ tsɛrə le? 49Nɨ njwi nɨ njwi, ma kə́ nchyɛ̌ bɨgɨnə a Ndáŋwi zɨ Ngwi, ndíʼə ɨwu, lá nɨ keʼ aghan koə. Lá, anu za bɨ ŋwáʼnɨ́nɨ́ a mu Aŋwaʼnɨ a Ŋwi a mɨ zagɨ fu a nye nkənu ə.”

50Bɨyɛʼ ɨbyi ba bɨtsum tíʼ nyɛʼ ayi nkɨəkɨ awa ghe.

51Mɨmu mbáŋnɨ́ wu tse a kə́ ndzɔŋə a Yeso, ngwabtɨ tsɛʼ a táʼ abó atsɛʼ a ɨbəm zɨə. Bɨ zhwə́ŋtɨ́ a nkó zɨə, 52lá a sɔ́rɨ́ atsɛʼ za ɨ nyɛʼtɨ a mbó bo ngɛn ntyigɨnə.

Yeso a Ɨshi Ngaŋ Sáʼ Abyɛn

(Mat 26:57-68; Alu 22:54-55, 63-71; Yoa 18:13-14, 19-24)

53Bɨ tíʼ ndɔgɨ a Yeso ngɛn nɨ zɨ a ntsundá Ntumshe wu Ngwi, adiʼ wa bɨntumshe bə wi bɨtsum, bɨkum abɔʼnɨ bɨdiʼ bɨ Nyɔngɔŋ ghótɨ́nɨ́ ɨwu ə. 54Bita a kə́ ndzɔŋə nəghagɨ, ndzɔŋ nkɔʼ nkon a mu ɨsaŋəbyɛn Ntumshe wu Ngwi; ɨ shiʼtɨ ntsi bo bɨntsǐŋ ɨdiʼ, ndzɔ́gɨ́ ɨmugɨ ə. 55Bɨntumshe bə wi abɔʼnɨ Ngaŋ Sáʼ Abyɛn bɨtsum kə́ ndǒ anu za a mɨ diʼ a nkənu ngə́ Yeso a vwo ɨsáʼ, taŋ ɨ tsa ɨwu ɨ zhwitɨ ayi lá nkeʼ a zə tsɛrə ze. 56Bətɛmə-ndzě bə ghaʼnɨ kə́ nchwě ɨnu wu atú, lá ɨnu tsa bo kɨ́nə́ sóŋə́ keʼ a mbemnə ghe.

57Mbáŋnɨ́ tsɨ tse tɛ́m atɨ́ nchwe anu atú Yeso ɨ soŋ ngə́, 58“Bɨgɨ zúʼ a soŋ ngə́, ‹Ma mɨ kum Ndáŋwi zɨ Ngwi zen za mbáŋnɨ́ vwunɨ lá, ɨ bə vwu a zɛrə atú njwi tsi tárə́, lá á keʼ be za mbáŋnɨ́ vwunə.›” 59Lá njalaʼ ɨtsa sé nkə́ mbvúrə́ mbémnə́ tsɛʼ bemnɨnə.

60Ntumshe wu Ngwi a tɛ́m atɨ́ a ɨshi bo bɨtsum, mbitɨ a Yeso ngə́, “O so nɨ achwɨgə tsi a ngá mbɨ́ʼ ɨnu tsiŋ ɨtsum tsa ɨbɛn biŋ kaŋnə agho mbɨ́ʼ a tsɛrə lá le?”

61Lá Yeso a zúʼ ngə́ shwi, nkeʼ anu zə tsɛrə soŋə. Ntumshe wu Ngwi wa a tíʼ nkwiʼ mbitɨ ayi ngə́, “O lá Wa bɨ Zɔ́ʼnɨ́ lá, Mɔn Ŋwi, Ŋwi Wa bɨ Ghúʼsɨ́nə́ lá le?”

62Yeso a chwɨ́gɨ́ ngə́, “Ma nɨ wɛrə ghe; nɨ ghɨ zɛ́n a Mɔn Ŋwɔn á shiʼtɨ ntsi a bagɨ abó Tamɨtən Mɨtsum zə maʼə ɨ kə́ yiŋnə a mu mbaʼ fɔməbvurə ghe!”

63Ntumshe wu Ngwi a sátɨ́ ɨtsɛʼ ɨchi a ndiʼə adzaŋ za a lwínɨ́ ntɔŋ tsɛʼ nkan, ntiʼ soŋ ngə́, “Ka bɨgɨnə kwiʼə mbɨŋə ndǒ awɨgɨnə bətɛmə-ndzě bə tsɛrə ghe! 64Nɨ zuʼnə nɨgham nɨ ndzɔm Ŋwi ɨni ɛ. Ntəgɨnɨ anu ɨzən ɨ be ngə́ ke le?”

Bo bɨtsum bósɨ́ mbémnɨ́ ngə́: a vwo ɨsáʼ, nkuʼnɨ ngə́ á bɨ zhwitɨ ayi ɛ.

65Bə mɔʼɔ chwúʼ ntsə́rɨ́ mɨtwe wə ɨnye, nkorɨ ɨmɨgɨ ɨmyi, mbuʼ ayi, ntiʼ soŋ wəmbo ngə́, “Fɨʼtə, agho lá a yibɨ ɨwa le?” Bɨntsǐŋ ɨdiʼ lɔ́gɨ́ ayi nga ndubɨnɨ wəmbo ə.

Bita a Ton Yeso ghe

(Mat 26:69-75; Alu 22:56-62; Yoa 18:15-18, 25-27)

66Adzaŋ za Bita a tsínɨ́ a bagɨ ntɨ́ŋ a ɨsaŋəbyɛn wa lá, táʼ mɔn mangye mbe ngaŋ afaʼ Ntumshe wu Ngwi a yíŋə. 67Mbáʼ a zɛ́nɨ́ Bita a tsi ndzɔ́gɨ́ ɨmugɨ ɨyi lá, a kyérɨ́ ayi ntiʼ soŋ ngə́, “O kɨ chi nkɨ ntsi bɨŋ Yeso, ŋwɔn bə Nazarɛ wa.”

68Lá a tón ayi, ɨ soŋ ngə́, “Ka ma zhi aghə – ka ma zuʼ nkɨ nji aghə anu za o sóŋnə́ lá.” A byí mbe nɨ abyɛn ə. Tsɛʼ a nyom məwa ankɨʼə a tɔ́ŋə.#14:68 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwáʼnɨ́ se kwiʼtɨ adiʼ zen ngə́ tsɛʼ a nyom məwa ankɨʼə a tɔ́ŋə.

69Mɔn mangye wa a bénɨ́ ngaŋ afaʼ zɨ mangye lá a zɛ́n a wɛrə, mbiʼnɨ ɨ sóŋə́ a mbó ɨbɛn ba bɨ tɛ́mkɨ́nɨ́ adiʼ wa ngə́, “Ŋwɔn wen a nɨ táʼ ŋwɔn nɨbo ghe!” 70Lá Bita a kwíʼ nkɨ́ nkwátɨ́ ntón ayi ɛ.

Abaŋ a bənə mbe ɨwu ɨbɛn ba bɨ tɛ́mkɨ́nɨ́ adiʼ wa soŋ a mbó Bita ngə́, “O chi koʼ ton ngə́ o so táʼ ŋwɔn nɨbo be mbɨ́ʼ ngə́ ɨzo nkfu, o lo lá a Galili ə.”

71Bita a sóŋ ngə́, “Ma kan ngə́ ma sóŋə́ lá nkənu ə! A Ŋwi a nɨŋ ngɨ́ʼ a nye me mbáʼ be ma tú soŋnə lá nkənu ə! Ka ma zhi aghə a ŋwɔn wa nɨ ghamnə mbɨ́ʼ ayi lá!”

72Tsɛʼ a nyom məwa, ankɨʼə a kwátɨ́ ntɔ́ŋə́. Bita a tíʼ ngwáʼtɨ́ nɨgham na Yeso a ghámnɨ́ a mbó zɨ ngə́, “Bɔŋ á ankɨʼə a tɔŋ nkfu tsi bá, o mɨ tón aghan nkfu tsi tárə́ ghe.” A bíʼnɨ́ ntíʼə mbúgə́ ghe.

Currently Selected:

Marɨkusɨ 14: MNT

Highlight

Copy