Marɨkusɨ 6
6
Bɨ Ton a Yeso a Nazarɛ ghe
(Mat 13:53-58; Alu 4:16-30)
1Yeso a ló adiʼ wa ntiʼ mbə́ mbən a ntáʼmbagə bo, bo bɨ bɨyɛʼ ɨbyi ɛ. 2A ghɨnə mbé a Njwi Alaʼ Ŋwi, wɛrə a biʼnɨ ndiʼə anu a Ŋwi a mu ndáŋwi bə Yuda ghe; ɨbɛn bə ghaʼnɨ ba bɨ zúʼnɨ́ wə ntsu, a kɨ́ʼnɨ́ awa, bo tiʼə sóŋə́ ngə́, “Ŋwɔn wen a lɔgɨ ɨnu tsiŋ ɨtsum lá ɨ ghé le? Zóŋ wa bɨ ghanɨ wəmbo lá a nɨ wɨŋə le? A ghɨ̌ ɨnu tsɨ yerɨnɨ-yerɨnɨ lá ɨ nə́ le? 3A se nkɔm atɨ wa a wen be le? A se mɔn Mɛrɨ wu mbáŋnɨ́ wa ɨbɔmbɨma ɨbyi bə mbáŋnɨ́ nɨ Jemsɨ, Yosɛb, Yudasɨ abɔʼnɨ Samɔn be le? Ɨbɔmbɨma ɨbyi bə bəngye se bɨgɨnə bo tsi le?” Ma lan bo tíʼ ntón awa ayi ɛ.
4Yeso a sóŋ a mbó bo ngə́, “Bɨ dǐʼ mbɔm zɨ shiʼnɨ a mbó ntóm Ŋwi tsɛʼ ɨdiʼ ɨtsum, lá nkeʼ mə lá be alaʼ bo kə a mbó ɨbɛn bɨ ngwəgɨ ɨzhi kə a mu njwuʼ bo ghe.”
5A kɨ chi keʼ ɨnu tsɨ yerɨnɨ-yerɨnɨ ghɨ ɨwu, ntsa ngə́ a nyɔ́ŋ mbó ɨmyi atú mbum ɨbɛn bə tsɛrə ba bɨ kɨ́nə́ ngǒ ntsuʼ awa ghe. 6Anu zə wu a kɨ́ʼnɨ́ ayi be tɨ́sə́n mbɨ́ʼ ngə́ bo sé nɨ abeməntəm chyɛ.
Yeso a Tyigɨ Ntóm Yeso tsa Nɨghúm ntsɔb bá ghe
(Mat 10:5-15; Alu 9:1-6)
Yeso a tíʼ ngɛn a mu ɨtóm tsa tsɨ tsínɨ́ a ngɔbə, ntiʼə ndiʼə ɨwu ə. 7Yeso a ghótɨ́ a ba nɨghúm ntsɔb bá ntiʼ ntyigɨ awa bɨbá bɨbá nkɨ nga mɨtən a mbó bo a fɨ́gɨ́ ɨzhwi tɨbɔŋ ə. 8Wɛrə a sóŋ a mbó bo ngə́, “A nɨ keʼ azúm zə tse lɔgɨ a nɨyen bən ntsatɨ mbaŋ; kə́ abán, kə́ aban, kə́ nkáb a mu ɨban nkáb ə. 9Nɨ wəgɨ ngobɨ lá nkeʼ atsɛʼ zə mɔʼɔ tiʼtə.” 10A kɨ́ sóŋ a mbó bo ngə́, “Be nɨ kon a mu ndá tsɛrə, nɨ ghɔŋ ɨwu ɨ kɔʼ kuʼ nkfu za nɨ mɨ fu a ntáʼmbagə məwa. 11Be nɨ ghɛn adiʼ, bɨ tú awən kwarɨ ɨ shiʼnɨ kə nton awa a njwíʼtɨ́ anu za nɨ sóŋnə́, nɨ lo awən nkɨ nkfutɨ abvuŋnɨ adiʼ məza a mɨku bɨŋ ə. Məzen a mɨ be alisɨ a mbó bo ngə́ bo ton awɨŋ ə!”
12Bo tíʼ fú ngɛ́n ntíʼə sóŋə́ anu a Ŋwi ngə́ á ɨbɛn bəŋ mɨntəm ɨma a nye mɨbvu ɨma ghe. 13Bo tíʼ fɨ́gɨ́ bɨdzɨŋ bə ghaʼnɨ, ndzɔ́ʼ mɨvwurɨ a nye ɨbɛn ba bɨ kɨ́nə́ ngǒ, nkɨ ntsuʼ awa ghe.
Nɨvwo nɨ Yoane Ngaŋ Nga Nkyi ɛ
(Mat 14:1-12; Alu 9:7-9)
14Ɨfɔ Ɛrɔd a zúʼ ɨnu tsiŋ ɨtsum, mbɨ́ʼ ngə́ bɨ kə́ ngamə mbɨ́ʼ a Yeso ɨdiʼ ɨtsum ə. Bə mɔʼɔ sóŋ ngə́, “Bɨ zhwemnɨ a Yoane Ngaŋ Nga Nkyi a nɨvwo; nə nɨ anu za a ghɨnɨ a tsi nɨ mɨtən men a ngɨ ɨnu tsɨ yerɨnɨ-yerɨnɨ ə.”
15Bə mɔʼɔ sóŋ ngə́, “A nɨ Alaja ghe.”
Bə mɔʼɔ sóŋ ngə́, “A nɨ ntom Ŋwi tso ntóm Ŋwi bə kɔ́ʼɔ́nguʼ ə.”
16Lá, nkfu za mbáʼ Ɨfɔ Ɛrɔd a zúʼnɨ́ a məzen, a sóŋ ngə́, “Yoane, ŋwɔn wa ma sóbɨ́nɨ́ atú azhi lá, bɨ bə nzhwemnɨ ayi a mbó nɨvwo ə.” 17Mbɨ́ʼ ngə́ Ɛrɔd a kwɛ́nə sóŋ bɨ ko a Yoane, ngɨ bɨ korɨ nɨ mɨnkɨ mɨ atɨŋə, ɨ nɨŋ atsáŋ ə. A ghɨ́ ma lan lá mbɨ́ʼ a Ɛrodiasɨ, ngwe mɨma ɨyi Firɨbɔ wa zɨ Ɛrɔd a zɔ́ʼnə́. 18Mbɨ́ʼ ngə́ Yoane a sóŋ a mbó Ɛrɔd ngə́, “A nɨ ɨ fasɨ nyɔngɔŋ a mbó gho a ndzɔ́ʼ ngwe mɨma ɨgho ghe.”
19Ma lan, Ɛrodiasɨ a tíʼ ndɛn a Yoane a ntəm zɨ, ntíʼə ndǒ njwitɨ wɛrə ghe. Lá a kɨ chi keʼ mə lá ghɨ, 20mbɨ́ʼ ngə́ Ɛrɔd a kə́ mbɔ́gə́ a Yoane ntiʼ nkɨ nkɨnkɨ ayi, mbɨ́ʼ ngə́ wɛrə a zhí ngə́ a chínɨ́ nkɨ fɛmə. Nkfu za Ɛrɔd a zúʼnɨ́ ɨnu tsa Yoane a kɨ́nə́ ndiʼə, atú azhi a bvúrɨ́; lá nkɨ mbvurɨ nkɔŋ njwíʼtə́ wəmbo ə.
21A ndwitə, Ɛrodiasɨ a zɛ́n abárɨ́ ə. Ɛrɔd a ghɨnə tɨ dórɨ́kɨ́ a njwi za bɨ jwínɨ́ ayi, ntɔŋ bɨkum abɔʼnɨ bɨtantso abɔʼnɨ ɨdɨtɨ ɨbɛn bɨ mbuʼ Galili ngə́ á bɨ yen ndzɨ nkɨ no, ndórɨ́kə́. 22Mɔn Ɛrodiasɨ wu mangye a yén mbɨ́ŋ a ɨshi Ɛrɔd bo bɨ bɨghən ɨbyi, anu zə wu a bɔŋ awa tsɛʼ nkə. 23Ɨfɔ wa a sóŋ a mbó mɔn mangye wa ngə́, “Bitɨ aghan nɨ azúm atsum za o lɔnə, ma mɨ gha a zɛrə a mbó gho ghe.” Wɛrə a kɨ́ nkan a mbó mɔn wa ngə́, “Azúm atsum za o bitɨnɨ ma mɨ gha a zɛrə a mbó gho, kə a be be ake ɨ kɔʼ kuʼ a nye akum a nɨfɔ azə.”
24Mɔn mangye wa a tsá ngɛn abyɛn mbitɨ a nɨmi ɨyi ngə́, “O kwaʼtɨ ngə́ ma bitɨ ake le?”
Nɨmi ɨyi a chwɨ́gɨ́ ngə́, “Atú a Yoane Ngaŋ Nga Nkyi ɛ.”
25Mɔn wa a byí ntíʼ nkɨə ngɛn a mbyɛn Ɨfɔ Ɛrɔd ɨ soŋ ngə́, “Ma lǒ ngə́ o gha atú a Yoane a mbó me, tsɛʼ tɨtsɔŋnɨ, a mu akáŋ asəŋ ə.”
26Asɔbɨnɨ a lón a mu ntəm Ɨfɔ wa be tɨsɨŋə. Lá mbɨ́ʼ ngə́ a kánə́, bɨghən ɨbyi kɨ ndzɔŋ ntsi ɨwu, a kɨ chi keʼ túŋə. 27Ma lan, a byí ntsagɨ a gwe ngə́ á ghɛn ngyen nɨ atú a Yoane Ngaŋ Nga Nkyi ɛ. Ŋwɔn wa a ghɛ́n sóbɨ́ atú a Yoane a mu ndá atsáŋ wa, 28ngyen nɨ zɛrə a mu akáŋ asəŋ ə. Wɛrə a ghá a zɛrə a mbó mɔn mangye wa, a ghɛn nga a zɛrə a mbó nɨmi ɨyi ɛ. 29Adzaŋ za bɨyɛʼ bɨ Yoane zúʼnɨ́ a zen lá, ngyen nkwarɨ akəbyim azhi ngɛn ntwə́ŋə́.
Yeso a Dzɨgɨ Ɨbɛn Nchwuʼ Tsi Tə̧̂ ghe
(Mat 14:13-21; Alu 9:10-17; Yoa 6:1-14)
30Ntóm Yeso bə́n a mbó Yeso ntiʼ fɨʼtɨ ɨnu ɨtsum tsa bo ghɨ́nɨ́ nkɨ ndíʼə. 31Mbɨ́ʼ ngə́ ɨbɛn bə ghaʼnɨ kə́ ngyiŋə nkə́ ngěn tsɛʼ tɨka Yeso bo bɨ bɨyɛʼ ɨbyi tsí nɨ a abárɨ́ a ndzɨə, Yeso a sóŋ a mbó bɨyɛʼ ɨbyi ngə́, “Nɨ yen á bɨgɨnə ghɛn a nye adiʼ zə atəchi zə tsɛrə, njwitɨ ɨwu a nye məkum a nkfu ə.” 32Ma lan, bo tíʼ ngɛn a mu abáŋ a nkyi a nye adiʼ zə tse za bo tsínɨ́ ɨwu tsɛʼ bo bo ghe.
33Lá, ɨbɛn bə ghaʼnɨ ba bɨ zɛ́nɨ́ awa bo ghěnə, bo zhi ɨbɛn ba bo bénɨ́ bɛrə ghe. Bo tíʼə nkɨə nɨ mɨku, ndǒ a mu ntáʼmbagə ɨtsum, ngwasɨ ntsi adiʼ wa bɔŋ á bo tiʼə ngyíŋə́ ghe. 34Yeso a yenə fu a mu abáŋ a nkyi za, ndze ɨnɔ ɨbɛn wa ɨ tsínɨ́ ɨwu, nko a mɨlɨŋnɨ ɨwa tsɛʼ a nkan, mbɨ́ʼ ngə́ bo fí mbyindzɨ tsa tsɨ tsínɨ́ tɨ ntsiŋ ɨwa ghe. Ma lan, a tíʼ mbiʼnɨ a ndiʼ bo nɨ ɨnu tsə ghaʼnɨ ə. 35Mbáʼ njwi ghɛ́nə tsɛʼ nkan lá, bɨyɛʼ ɨbyi yén wəmbo ɨ soŋ ngə́, “Ka ɨbɛn nchyɛ̌ awa ɨghə. Nkfu kɨnə ngɛn tsɛʼ nkə. 36Soŋ á bo ghɛn a mu ɨtóm abɔʼnɨ ntáʼmbagə tsa tsɨ tsinɨ ɨ fátɨ́, ndzuŋ mɨdzɨ a mbó ɨtumbəm ɨtsa ndzɨə.”
37Lá a chwɨ́gɨ́ awa ngə́, “Nɨ gha azúm á bo dzɨə.”
Bo bítɨ́ wəmbo ngə́, “Njingə bɨgɨ mɨ ghɛn zuŋ abán nɨ nkáb za be bɨ tfu a ŋwɔn nɨ zɛrə atú bɨsaŋ bi nɨfə̧̂ ɨ yen dzɨgɨ awa ɨwu le?”
38Yeso a bítɨ́ awa ngə́, “Nɨ tsi lá nɨ mbɛʼ abán tsi sɛʼ le? Nɨ ghɛn ndentə.”
Bo ghɛnə ndzɛn ntiʼ soŋ ngə́, “Mbɛʼ abán tsi tə̧̂ abɔʼnɨ ɨshwú tsi bá ghe.”
39Yeso a tíʼ sóŋ a mbó bɨyɛʼ ɨbyi ngə́ á bo ghɨ á ɨbɛn ba shiʼtɨ ntsi achwirɨ achwirɨ atú ngyɛn ə. 40Ma lan, bo tíʼ shíʼtɨ́ ntsí a nye ɨchwirɨ nkɨ nkɨ bo mɨghúm mɨntə̧̂ mɨntə̧̂ ghe. 41Yeso a lɔ́gɨ́ mbɛʼ abán tsa tsi tə̧̂ abɔʼnɨ ɨshwú tsa tsi bá, ndyiŋ fɔməbvurə, nga mɨya a mbó Ŋwi ntiʼ mbatɨ mbɛʼ abán tsa. A ghá a tsɛrə a mbó bɨyɛʼ ɨbyi ngə́ á bɨ yɛbtɨ a mbó ɨbɛn ba. A kɨ́ ngɨ bɨ yɛbtɨ ɨshwú tsa tsi bá a mbó bo bɨtsum ə. 42Bo bɨtsum dzɨ́ nzhwurɨ, 43bɨyɛʼ bɨ Yeso bə núm nkárɨ́ ɨ sɛʼ ɨbagɨ abán abɔʼnɨ ɨshwú, tsɨ bə nduŋ nkye nɨghúm ntsɔb bá ghe. 44Ndvuŋ mbáŋnɨ́ tsa bɨ dzɨ́gɨ́nɨ́ adiʼ wa ɨ bé nchwuʼ tsi tə̧̂ ghe.
Yeso a Tɛ́mə́ Ngěn Atú Nkyi ɛ
(Mat 14:22-33; Yoa 6:15-21)
45Yeso a byí ntíʼ ngɨ́ bɨyɛʼ ɨbyi kon a mu abáŋ a nkyi za ngɛn a mbyi zɨ, a ndzɨŋə Bɛtɨsaida, wɛrə a tiʼ soŋ a mbó ɨnɔ ɨbɛn wa ɨ shɛmkə. 46Mbáʼ a básɨ́nɨ́ awa lá, ntiʼ nkɔʼ ngɛn atú mbám zɨ tse adiʼ a ntsaʼtɨ Ŋwi ɨwu ə. 47Nkwɛfɔ yenə, abáŋ a nkyi za a tsi a tɨtərɨ sagɨrə wa, wɛrə a baŋnɨ ntsi zɨzɨ a ntáʼ ə. 48Wɛrə a zɛ́n adzaŋ za bɨyɛʼ ɨbyi kɨ́nə́ ntikə nɨ ɨtɨ ntiŋ abáŋ a nkyi za, mbɨ́ʼ ngə́ kɨfɛrə a kə́ njintə awa mbyígə́ nɨ ndzum ə. A ghɨnə mbé tso bɨnyom bi nɨkwa a tənjwi, wɛrə a tɛmnə atú nkyi wa, ngěn a nkwátɨ́ bo ghe. Wɛrə a yén ntíʼə ndɔ́btɨ́ ɨ fəŋ bo, 49lá bo zɛ́n ayi a tɛmnə atú nkyi, bo kwaʼtɨ ngə́ a nɨ nkfúshe. Bo tíʼ ntɔ́nkɨ́; 50mbɨ́ʼ ngə́ bo bɨtsum zé ayi nɨbɔgɨ nə wi tsi a mu mɨntəm ɨma ghe.
A byí ngam a mbó bo ɨ soŋ ngə́, “Nɨ wɛmtɨ mɨntəm ɨmɨŋ ə! A nɨ me ghe. A nɨ keʼ bɔgə.” 51A tíʼ nkɔ́ʼ nkón a mu abáŋ a nkyi za nkwatɨ awa, kɨfɛrə wa a tiʼ nkɨ nkyɛntə. A kɨ́ʼnɨ́ awa be tɨ́sə́n, 52mbɨ́ʼ ngə́ bo sé zuʼ nkɨ nji anu zə yerɨnɨ-yerɨnɨ za wɛrə a ghɨ́nɨ́ a ndzɨ́gɨ́ ɨbɛn ba nchwuʼ tsi tə̧̂ nɨ mbɛʼ abán tsa; mɨntəm ma chígɨ́rə́.
Yeso a Tsuʼ Ngaŋ Mɨghɔ a Gɛnɛsarɛ ghe
(Mat 14:34-36)
53Bo dáŋ a sagɨrə wa, ntom ɨ fu a Gɛnɛsarɛ ntiʼ ntɨŋnɨ abáŋ a nkyi za ɨwu ə. 54Tsɛʼ mbáʼ bo byínɨ́ fú a mu abáŋ a nkyi za lá, ɨbɛn zé a Yeso, mbyi nji ngə́ a nɨ wɛrə ghe. 55Bo núm nkɨə nkárɨ́sɨ́ mbuʼ za tsum, mbyɛʼ ɨbɛn ɨba, ba bɨ kɨ́nə́ ngǒ atú ɨbaʼ ngěn nɨ bo adiʼ atsum za bo zúʼnɨ́ ngə́ wɛrə a tsí ɨwu ə. 56Adiʼ atsum za a ghɛ́nɨ́ ɨwu, ɨtóm, ntáʼmbagə tsɨ wi kə ɨbɔ bɨ ɨtóm, bɨ nyɔ́ŋ ngaŋ mɨghɔ ɨtsa a nye ɨdiʼ ntáŋ mɨtan ɨtsa, mbuʼtɨ mbó ngə́ á wɛrə a nyɛʼtɨ á bo mɔmtɨ tsɛʼ atsə́ŋ atsɛʼ azhi; ŋwɔn tsum wa a mɔ́mtɨ́nɨ́ a zɛrə, a shwétə́.
Currently Selected:
Marɨkusɨ 6: MNT
Highlight
Share
Copy
Want to have your highlights saved across all your devices? Sign up or sign in
© 2023, CABTAL
