Luk 6

Jesus naárí kinyo ke *kishiíy ké bam

(Matio 12.1‑8; Maak 2.23‑28)

1Wìy lòo dzə e kishiíy ké bam ke wìr veé Juda kímóʼ kí, Jesus wùn à wón və́ lìme wáa shaà e mvə̀m sǔm saŋ wúmóʼó. Wón vəə́ nèn a tinrí vitú vímóʼ ví, a səə́y, a kfər. 2Wír veé mbìv *Farasi ámóʼó yén, e dzə̀r jii, «Vèn yii kinyo ke kí kér nsər fó yiì e kishiíy ké bam bìʼ ka?» 3Jesus dzə́r kfə́ jii, «Vèn yòʼ‑oo yií ne yòŋ fo ŋwàʼ mo Fòn Davir‑iì yiìn é ghan se jìŋ‑eè ghaʼtin wùn aàŋgaà və́ ŋgoo a? 4Kí wù‑uù nə̀ə́ é lav cù, e lì kibán ke vé‑eè cuùn Nyùy sho, e yì, e kfə̀n fò sá wír və́, a kí kér nsər fo wìr yí, e shaà taà cù cáʼ.» 5Wù nèn kfə̀n sùúy aáwune jii, «Dzə̀ ŋgaà wo yírí dzəə̀n *Wanwìr wo dzə̀ wù wày kinyo ke dzə̀ á yiì é kishiíy ké bam.»

Jesus fér wír e *kishiíy ké bam

(Matio 12.9‑14; Maak 3.1‑6)

6Kfən wìy lòo dzə e kishiíy ké bam kímóʼ kí, Jesus dù, e nə̀ə́ e ŋgày bùnrì yìmòʼ, a yeʼéy wíri. Wìr wùmòʼ wáa dzə fo, a kiwó ke yìy kí kpú ne. 7Wír ve vé‑eè duŋrì nsər Nyùy wùn à wír veé mbìv Farasii wáa shweʼ ji á koóy lor wóo lor Jesus sho. Á nèn a leéy jii, a wù lòo dzə, e fèr wír və̀n e kishiíy ké bam, bo áwune kòóy ne a kinyo. 8Jesus ku nèn kìíy kinyo ke vé‑eè kwaʼtì, e yòŋ wír wo kiwó ki‑iì kpuun və̀y jii, «Lò é yuv, e wìy, e tìím fo mbìy.» Wù nèn lò, e dù, e tìím fo. 9Jesus suúy e wír vìyi jii, «M dzə́r a dzə̀ e vèn, kinyo ke nsər biimen ji dzə̀ wìr yiì é kishiíy ké bam ki dzə̀ kiné kí? Ji wù yii kinyo ke juŋ ki e wìr moo ke bi kí á? Ji wù luŋer wír mo wù yúyrí yuyrín á?» 10Wù leéy áwune sí sí, e bóo lò, e suúy e wìr və̀y jii, «Nàsì kóy wóo.» Wù nèn nàsì, a kiwó ki kfə́n ne fo. 11Kí gháʼ wír vìy, a wáa ŋeèy, e nèn bìn, a taŋ mo dzə̀ á yiì e Jesus.

Jesus shóʼtí aŋgaà və́ ntum vee nshòv sibaà e ghvə̀m

(Matio 10.1‑4; Maak 3.13‑19)

12Kú a dzə e vishiíy fóo fèy, Jesus kóʼ é gwan wùmòʼ ji wun bunrì Nyùy, e sìíy, e bùnrì fo vitsə́ʼ vifur. 13Ndzə rán, wù jàŋrì aŋgaà və́ ŋgoo adzə̀m. Á wìy, wù shóʼtí ámóʼó nshòv sibaà e ghvə̀m, e yòŋ ji *aŋgaà və́ ntum. 14A wír ve wù‑uù shoʼtiné dzə̀ jii, Simon wo wù‑uù yoŋ yír rə́ yímóʼó sá ji Pita, wùn Andru woo fər wun woo Simon. Ámóʼó jii, Jeem wùn Joon, Filiv wùn Batolome, 15Matio wùn à Tomar, à Jeem woo wan Afiyur, à Simon wo vé‑eè yoŋ ji ntom wòŋ, 16à Judar woo wan Jeem, e lì Judar Iskariyor wo wù‑uù loòn, e kàr menàŋ e Jesus bàm.

Jesus yéʼey kinyo ke Nyùy, fer wíri

(Matio 4.23‑25)

17Mo wù shoʼtin bey, wùn áwune nèn a səy. Á sə́y, e tìím e shimboʼ shímóʼ shí, aàŋgàa ŋgoo Jesus ámóʼó kì bàʼtí fó anín wùn à màŋgòŋ nyanyày, a vé‑eè wìykìr fó Jerusalem wùn à fó ntèʼ seé Juda foo fèy sidzə̀m, e kfə̀n wìy fo wòŋ woo Taya wùn Sidon wo wú dzəə̀n é ghaa rìbà ndzə̀v. Vé‑eè wiy ji á wáa yu yéʼéy Jesus, é wù kfə́n a fèr ayàsí vév. 18Wír ve *anyùyi jívirìi nèn a wìy sa, wù wáa fèr áwune. 19Màŋgòŋ ku nèn a mùm fó a dù, a kùm wun, bìʼ vitaáví ve ví‑iì fəə́ fo wun wùn, fer wír ve á kum wun adzə̀m.

Vishí ve juŋ vi wùn à ve bi ví

(Matio 5.1‑12)

20Jesus yiì lò, e lèéy wón və́ lìm, a suúy jii:

«Bòŋ kén, ven ve á tanè, bìʼ fo dzəə̀n ven ve á sí yú vijuŋ ve saʼ Nyùy.

21Bòŋ kén, ven ve á toóŋe jíŋ lèn, bìʼ fo á wíy yiír ven, é vèn kúrkír.

Bòŋ kén, ven ve á diy lèn, bìʼ fo vèn wíy a kwaà shéʼ.

22«Vèn lóo jùmrì ŋgaà wo yírí dzəə̀n *Wanwìr, wíri lóo bàn ven, lóo jùmjùm, lóo kuùrì ven, lóo yòŋ ven e yír se bi sí, bo bòŋ vishí vén. 23Kí wíy kooy bèy, vèn wàa sheʼrí, a dzən, a sàvnìn, bìʼ fo Nyùy sí lem vilaámé vén é yuv vigháʼán. Vèn wáa kiíy jii, kù dzə̀ sá mo atǎr wìr vee shooyi‑iì lóvti aàŋgàa ntum Nyùy vee fó mbìyi.

24«Yii bèy, ké ven vee wír ve á kér bùʼ, ŋgeʼ dzə̀ yéen, bìʼ fo vèn kù sí nyavnìn a dzə̀ lèn.

25Ŋgeʼ dzə̀ yéen, ven ve á bon vifá lèn, bìʼ fo vèn wíy a tooŋé jíŋ.

Ŋgeʼ dzə̀ yéen, ven ve á shéʼ lèn, bìʼ fo vèn wíy a dìy, a sòv vitú.

26«A vèn dzə́, a wìr dzə̀m búri ven búrín, bo ŋgeʼ dzə̀ yéen. Vèn wáa kiíy jii, kù dzə̀ mo atǎr wìr vee shooyi‑iì búri wír, a dzə̀ ve vé‑eè bóʼti áwune ji á dzə̀ *aŋgàa ntum Nyùy.

Wìr wáa kòŋ wír, a rər mendzən fo fo

(Matio 5.38‑48; 7.12)

27«Yii bèy, m nén a suúy e vèn ve á yuúri kinyo kémé jii, vèn wáa kòŋ aŋgaà vén vibàn, a yiì kinyo ke juŋ ki e wír ve á ron wuú yéné adzə̀m. 28Wíri lóo shov ven, vèn kù a lon ji Nyùy shám áwune shámén, a bùnrì fo wír ve á kuurì vené. 29Wìr dzəv búbuʼ wìr, ŋgaàŋ bìnèr yìmòʼ, é wù maysi. Wìr sə́ kikúm ké wìr kee fó yuv, wù màysì kee fó sar, e fò shó. 30Wìr lón kifá fo wìr, ŋgaàŋ fò shó. A wìr fə̀m lì a dzə̀ kifá ke wìr, lá ŋgaàŋ yòʼ kù a dzər ji wù siir. 31Vèn wáa yiì kinyo e wíri a dzə̀ ke vèn koŋ ji á wáa yiì sa e vèn.

32«A vèn lò, a kòŋ a dzə̀ wír ve á koŋ sa ven, á wàa burí ven fó gha? Bó wír ve vèn nyaysì ji ve bií yòʼ yii sa bèy à? Á koŋ sa wír ve á koŋ áwune. 33A vèn lò, a yiì vinyo ve juŋ vi, a kù dzə̀ e wír ve á yii sa e vèné, bo kinyo ke juŋ ke vèn yii ki dzə̀ ka? Wír ve vèn nyaysì ji ve bií kù yii sa bèy. 34A vèn lò a foòr wír kifá, a kù dzə̀ wo á kiìn ji wù yíi siìr, bo kinyo ke juŋ ke vèn yii ki dzə̀ ka? Wír ve vèn nyaysì ji ve bií kù yii sa bèy, a wìr foor ŋkar rə kifá, kiiy ji wù yíi siìr kidzə̀m. 35Ke kí dzəə̀n kí dzə̀ jii, vèn wáa kòŋ aŋgaà vén vibàn, a yiì kijuŋ aáwune, e kfə̀n a foòr kifá, e làa yòʼ a shìy ji á wíy siìr. Vèn lóo yiì bèy, é wìy laàmé Nyùy ven kijuujùŋ, é vèn kfə́n a dzə wón wun woo Nyùy woo Taà Vitu, bìʼ fo vèn yii a dzə̀ mo wù yii sa. Wù yii vinyo ve juŋ vi e wír ve bií, a bó á yòʼ fə̀m beerì wun.

Lá wìr yòʼ a roòmè wír

(Matio 7.1‑5)

36«Vèn wáa rər mendzən me wìr réŋréŋ mo Tàr won rə́rí. 37Vèn wáa yen fó a roòmè wír, fo Nyùy wáa roòmè sa ven. Lá vèn yòʼ a nyàysì wír wùmòʼ ji wo bi, fo Nyùy wáa nyàysì sa ven. Vèn wáa làysìn ajay wíri, é Nyùy wáa làysìn sa vén. 38Vèn wáa fo fómo, é Nyùy wáa fo sa e ven. Wù lóo fo, é wù fiʼ kijuŋ, e nàŋsín, e nyòʼtì, é ví wáa fàmtìn, a fəə fo nsay. Mfìʼ ye wìr fiʼ kifá sho, e bó a fo e wìr, dzə̀ yìwun ye Nyùy yíi fìʼ sa ké ŋgaàŋ sho.»

39Jesus nèn kfə̀n yòv ŋgàn yìmòʼ jii, «Bó yòʼ dzə̀ mfìr, wù kfə̀n a dànèr wùmòʼ woo mfìr. A wù mùm, la wùn wun yòʼ tàtí, e gbù e bii adzə̀m à? 40Vèn wáa kiíy jii, bó yòʼ dzə̀ wàn lìm kìíy kinyo, e shaà tàr wov. Yii bèy, wù yii yéʼey lim rə́, maysì, wù nèn a lìm sa mo tàr wov limè.

41«Mo kí dzəə̀n bey, bìʼ ka mo nsay sə́ti sí wìr, wù kù a gheemé ji wun leéy shisám she nsay she shí toon e fər və́ si? 42Wù lo, wù nèn sùúy e fər və jii, fə̀r, ku tìím, é m fəə́r shinsay shìy fo wò si. A dzə̀ wù fə̀ə́r é le, a nsay si rún ne e rə́ yee síi? Wìr woo bey dzə̀ bìnbìnteʼnsə́m. Wù ku tòmbìy fə̀ə́r nsay se sí sətin rə́ yee sí sə́tín, e bóo fíʼ yen shisám she shí dzəə̀n e fər və́ si, e fəə́r.»

Ŋgaà yúyiì wùn ŋgaà yúwàŋ

(Matio 7.16‑27; 12.33‑35)

43Jesus kfən sùúy jii, «Bó yòʼ dzə̀ kicí ke dzə̀ á kfə̀r, kí kfə̀n kòóm kifá ke bi kí. A bó yòʼ dzə̀ sá ke bó á yòʼ yii kfə́r, kí lò, e kòóm kifá ke juŋ ki. 44Á yii kiiy kfə́ə kici a dzə̀ fó kifa ke kí koom sho. Bó yòʼ dzə̀ á kòy shinyáʼ fo tiŋ kilun, a bó yòʼ dzə̀ sá á kòy bíy fó kici ké nshùn. 45Vèn wáa kiíy jii, lóo dzə wír wo runen vinyo ve juŋ vi e wùn shiliv, wù nèn a suúy sa vinyo a dzə̀ ve juŋ vi. Lóo dzə wo runen vinyo ve bi ví e wùn shiliv, nèn a fəə kinyo ke bi kí fó shuù wo. A kí dzə̀ bey, bìʼ fo kinyo ke kí runen e wìr shiliv kí kù dzə̀ kíwun ke kí fəə́ fo shuù wo.»

46Jesus nèn dzə̀r jii, «Bìʼ ka mo vèn yoŋrì mo ji Tàr, Tàr, a bó á yòʼ yii kinyo ke m suuyì? 47Wìr wo wù yú kinyo kém dzə̀ wo wù wiy, yuúri, wù dù, a yiì mo kí dzəə̀n. A m yíi dìn e vèn lèn mo ŋgaàŋ dzəə̀n. 48Ŋgaàŋ dzə̀ moo wír wo wù‑uù loòn ji wun bóm lav, e tòmbìy tùŋ kinsə̀ŋ kijuŋ, e mèé e kitu ke kilan, e bóo bom. Ndzə́ví wìy rùn, e fəə̀ é kwaʼ, a tsəy lav yee shooy, la yì yòʼ sə̀ʼ, bìʼ fo vé‑eè bomen, yì táv. 49Yii bèy, wìr wo wù yuúri kinyo kém, la wù yòʼ dù, a yiì mo kí dzəə̀n nén a dzə kfə́ moo wír wo wù‑uù loòn, e sèŋrì kirə́ʼ séŋrin, e bòm lav sho. Ndzə́ví wìy fəə̀, e tsə̀y lav yee shooy, e bàʼ, yì gbù e nsay ji rìŋ.»

Currently Selected:

Luk 6: LNB

Highlight

Copy